Ha 13 Janeiro 2024, ndumbu Jeffrey Winder wa mu Chizavu cha Tusongo yafambwisa Mbimbiliya ya Yisoneko ya Chifuchi Chaha ya Ngregu ya Akwa-Kristu mu limi lia Chokwe. Mutambi kautwanga ha chimwe kukunguluka chalipwila chize chalingiwanga ku mutango wa Angola mu Luanda. Ha kukunguluka chacho hapwanga unji wa mandumbu 187, ha videoconferência hapwanga 353,427. Kuchingaho mandumbu 1,644 waze akuhanjika chokwe. Mbimbiliya ya Yisoneko ya Chifuchi Chaha ya Ngregu ya Akwa-Kristu ya mafwo kayihananga kuli mandumbu waze apwanga ha kukunguluka chacho. Kayifambwisa nawa ha site hanga yipwe kupalumwisa mu telefone hanji mu ma tablet.

Chakusoloka ngwe atu tununu atatu a tununu, mu Angola, República Democrática do Congo ni mu Zâmbia kakuhanjika chokwe. Musono, mandumbu a malunga ni a mapwo 462 kakuwayila Zambi mu yikungulwila kumi ya limi lia chokwe mu Angola. Akwo 734, kakuwayila Zambi mu yikungulwila 21 mu limi lia chokwe mu República Democrática do Congo.

Ha kutwa mutambi wa kufambwisa Mbimbiliya ndumbu Winder yanyingika ngwenyi mu Mbimbiliya ya Yisoneko ya Chifuchi Chaha ya Ngregu ya Akwa-Kristu jina lia Zambi, Yehova linasoloka ha yisuho 237. Ndumbu umwe yamba ngwenyi: “A-Roma 10:13 unambe ngwo, ‘mweswawo yoze matambika ha jina lia Yehova kumakamulamwina.’ Alioze Mbimbiliya jimwe alumbunwine mu chokwe jishi kulumbununa kanawa versu yino. Kashika ngunashimbwila kutangila atu Mbimbiliya ya Yisoneko ya Ngregu ya Akwa-Kristu hanga ngwakwase kunyingika kulita chize chili ha jina lia Yehova ni ulamwino wenyi. Chino chili chawana chipema chinji!”

Tuli ni shindakenyo ngwetu Mbimbiliya ya Yisoneko ya Ngregu ya Akwa-Kristu mu chokwe muyikwasa atu anji kulilongesa hakutwala kuli Yehova ni kumuzanga ni mbunge yo yeswe ni tachi jo jeswe.—Marku 12:33.