Konda Pan-Americanos ya 2023 yalingiwile mu mambonge anji a mu Chile ha 20 Outubro, 5 Novembro, 2023. Akwa-kwasa konda kuhiana 6,900, a mu yifuchi 46 kanakaya ni kwasa konda ya hashi heswe. Unji wa Yela ja Yehova waze ambile kukumbana 1,500 kanakapwa ha kwambujola chalipwila ha mashimbu jacho a konda. Kanakalulieka matemba a mikanda mu malimi a inglês, português ni espanhol. Mandumbu jetu kanakashimutwina kanawa ni akwa-kwasa konda ni atu akwo waze anakaya ni kutala konda yacho.

Chilweza chimwe chili cha umwe mukwa-kwasa konda yoze ananyingika kanawa iye kakundamine ku limwe temba, ni kwamba ngwenyi, muze apwile kanuke te kakuya ni kukunguluka hamwe ni naye. Yamba nawa ngwenyi, chipwe ngwe kakupwa ni mbongo jinji mumu lia kwasa konda, nihindu yino kuyishi kumunehena uwahililo uze akushimbwila. Mandumbu yamutangila yimwe yisoneko ya mu Mbimbiliya, iye yasakwilila ha maliji a utakamiso waze amuhele.

Chilweza chikwo chili cha umwe pulisha yoze neye te wakukunguluka muze apwile mukweze. Iye yahanjika ni mandumbu jetu ni kwamba ngwenyi, muze nanumona kuno newuluka mashimbu waze napwile ni kuya ku kukunguluka. Ndumbu yamulweza chihela ni maola a kukunguluka hakamwihi ni zuwo lienyi, chikwo nawa iye yatambula Mbimbiliya ni kamukanda Wahilila ku Mwono ku Miaka Yeswe! Pulisha wacho kambile ngwenyi, kawahilila chinji ha kuliwana cheka nawa ni Yela ja Yehova.

Umwe mwana-pwo wa miaka 19, yahanjika ni umwe ndumbu wa pwo yoze wapwile ku temba ni kwamba ngwenyi, te hikwapalika mashimbu akehe chize haze iye alembele ni kwita ukwaso wa kunyingika kanawa Mbimbiliya. Muze ndumbu alihanyine hanga alilongese nenyi Mbimbiliya iye yatayiza yawahilila chinji. Tangwa lizeliene ndumbwetu yaputuka kulilongesa nenyi Mbimbiliya, ndo halipwila ayo kananungu ni kulilongesa.

Tunasakwilila chinji hali mandumbu jetu ku Chile waze anakalinga mulimo wacho walipwila. Kuyuka chize anakapwa nacho mandumbu wano, ha zango lio ni tachi jize asele yinasolola ngwo Yehova kananungu ni kuwayisa waze akumufupa.—Izaia 55:6.