Ha 20 ya Julho ndo 20 ya Agosto 2023, atu kuhiana tununu 2 a tununu kayile ni kutala konda ya mapwo ya yifuchi yeswe ya FIFA yize yinakapalika mu mambonge anji a mu Austrália ni Nova Zelândia. Ha mashimbu a yiheho yacho, mandumbu 1,200 a malunga ni a mapwo yalihana hanga ambujole mu mambonge livwa a yifuchi yino yaali. Atu 18 yeta malongeso a Mbimbiliya.

Mu Sydney, Austrália, akweze a mapwo aali a ku Índia yakundama ku temba lia kwambujola nalio, mba yamona ngwo ha temba hapwile ha kusoneka ngwo, kuhana malongeso a Mbimbiliya awana. Yahula kuli mandumbu kuze te mahasa kulingila malongeso jacho. Mba mandumbu yaakumbulula ngwo, malongeso jetu a Mbimbiliya kanji-kanji kakwalinga hali mutu ni mutu. Ayo yalumbununa nawa ngwo mapwo jacho te mahasa kwita hanga aameneke kuli Yela ja Yehova ha kunjila ha site kupalikila ha kasha ya chijimbikilo cha kamukanda Wahilila ku Mwono ku Miaka Yeswe! Ayo eswe aali yalinga chocho, mba yasoneka ha kwita longeso kupalikila ha site ni kuputuka kulilongesa Mbimbiliya.

Umwe lunga ni pwo Yela ja Yehova a ku Brisbane, Austrália, yalihana hanga akwase umwe mukweze wa pwo yoze te unasoloka ngwe katoka. Pwo yamba ngwenyi te kanafupu hotel kuze iye atulilile. Alunga ni pwo yalihana hanga amukwase kufupa zuwo liacho. Muze te anayi mu jila, pwo wacho yamba ngwenyi kali wa ku Papua Nova Guiné. Iye kakomokene ha kunyingika ngwenyi, alunga ni pwo wano no katwamine ku Papua Nova Guiné ha amwe mashimbu. Chino yichaatwala kupwa ni umwe lusango mupema, yaliaha numero ja telefone. Mandumbu wano yalitesa hanga amutwale anyingike kanawa mbonge, chocho yazachisa uhashi wacho hanga amwambulwile umwenemwene wa mu Mbimbiliya. Mwana-pwo wacho muze afunyine ku chifucho cho yatayiza longeso lia Mbimbiliya.

Mu Auckland, Nova Zelândia, ndumbu wa pwo avuluka ngwo Terina, yaputuka lusango wa Mbimbiliya ku chihela kuze akutulila mbunga ni tufunga aali waze akuhanjika limi lia Punjabi. Ndumbwetu yaahula nyi ngwe te kaanapinjisa ha kuhanjika no ha mashimbu a milimo. Chakuhoma kushimbwila, umwe yamba ngwenyi te ngunalumbunwina malunga awa. Iye yanguhula nawa ngwenyi: “Mbimbiliya yika? Yingumulweza ngwami yili mukanda wa Zambi. Shina yino yili yamwenemwene?” Muze anyingikine ngwenyi yize amba yili yamwenemwene, Terina yasolwela hita mutu chize te mahasa kwita longeso lia Mbimbiliya mu limi lio ha kuzachisa site jw.org.

Umwe lunga wa mu Colômbia avuluka ngwo Nicholas yakundama ku temba lia kwambujola nalio mu Brisbane, Austrália, ni kuhula hakutwala ku kukunguluka chetu. Iye yamba ngwenyi naye ni kako kali Yela ja Yehova mba kakumukolweza hanga aye ku kukunguluka. Mandumbu waze te anakalakala ni temba yakwasa hanga Nicholas apwe kumeneka kuli umwe Chela cha Yehova yoze wakuhanjika limi lia espanhol. Chikwo nawa, ha poso yize yene yalilulieka hanga amukwase kuya ha kukunguluka cha Mambonge chakwamba ngwo, “Lihumikizenu”!

Tunasakwiila chinji hali mandumbu ni mapangi jetu a mu Austrália ni Nova Zelândia ha tachi jize asele hanga ‘apanguke ngwe lutemo’ ha kwambujola sango ja Wanangana ha chiwanyino chacho.—A-Fwilipu 2:15.