Ha 27 Outubro 2023, katuhele utayizo wa kutunga mazuwo aha a Mbetele mu mbonge ya Fishkill, Nova York, EUA. Utayizo wacho uze tunakatambula kuli akwa-kukwata chiyulo cha kuteta yipatulo ya mbonge, (Conselho de Planejamento Municipal) chinalumbunuka ngwo chishina cha ukwaso cha Yela ja Yehova mahasa kuputuka kuchitunga.

Mbetele ya Fishkill yili ha 64 quilômetro ndo haze hali Chishina Chinene cha Yela ja Yehova mu Warwick, Nova York, EUA. Mandumbu a malunga ni a mapwo waze atwama mu Fishkill kakukalakala mu chipatulo cha computadores ni milimo yikwo nawa.

Mazuwo jacho matungila mu chihela chinene chinji cha yihela 23 hectares ku sali likwo lia tapalo kuze kuli mazuwo akwo a Mbetele. Chishina chino cha ukwaso muchipwa ni prédio yimuwika ya ma escritórios ya 4.366 metros quadrados, yipatulo yaali ya kwilu ni ya mwishi, prédio yimuwika ya manutenção ya 1.393 metros quadrados ni prédio yimuwika ya kuhehela ya 1.393 metros quadrados. Chikwo nawa, kanalulieka yihela ya haze ya kuhehela. Tunalihulikila kanawa ha mulimo uno hanga upwe upema chinji.

Milimo yinji ya kutunga makayilinga kuli akwa-mayipreza, alioze mayisongwela kuli mandumbu waze akalakala ku Mbetele. Nyonga lili ngwo mulimo uno upwe kuhwisa ha Outubro 2025.

Ndumbu Jason Kahle yoze watwama mu Fishkill, wakukalakala mu escritório ya ukwaso yamba ngwenyi: “Ndo haliapwila Mbetele ya Fishkill yili wika ni mazuwo a kutwama, kumwakapwile yihela ya kuhehela. Alioze hanyima lia kutunga chihela chino, mutupwa ni chihela cha kulikungulwila ni kukalakala hamuwika. Tunazange chinji kumona kuhwa cha chishina chino cha ukwaso!”

Tunawahilila chinji ni mutambi wa mulimo uno wa kutunga uze mununga chinji mandumbu waze akalakala ku Mbetele ya Fishkill. Tunalembe hanga Yehova awahise mulimo uno.—Samu 127:1.