Ha poso jaali yakulikaula mandumbu aali anamanyinako ku mutango wa Nigéria kafambwisa Mbimbiliya ya Chifuchi Chaha ya Yisoneko ya Ngregu ya Akwa-Kristu mu malimi aali a mu Nigéria. Mbimbiliya jacho kanakajifambwisa ha kukunguluka cha mambonge chize chinakalingiwa mu mbonge ya Benin ni Agbor Nigéria, chapwile ni mutwe ngwo, “Lihumikizenu.” Ha 8 Dezembro, 2023 ndumbu Archibong Ebiti yafambwisa Yisoneko ya Ngregu ya Akwa-Kristu mu limi lia Edo. Mba ha 15 Dezembro, 2023 ndumbu Malcolm Hall yafambwisa mu limi lia Esan. Ha yisuho yeswe yaali kanakahana Mbimbiliya yacho ya mafwo kuli mbunga. Yisoneko yacho nawa mahasa kuyitanga mu matelefone ni mu maliji a kukopa.

Muze anakafambwisa Yisoneko ya Ngregu ya Akwa-Kristu mu limi lia Edo ha kukunguluka hanakapwa atu 1,678. Chakusoloka ngwe atu 2 milhões mu yifuchi yeswe kakuhanjika limi lia Edo. Mandumbu kuhiana 900 mu yikungulwila 23 mu Nigéria kakuhanjika limi lia Edo. Chizavu chimuwika cha akwa-kulumbununa mu limi lia Edo chinakaputuka kukalakala ha shimbu lieswe mu 2014. Ha shimbu lioliene ha mwaka wacho mikanda mu limi lia Edo kayisele ha site jw.org.

Chipwe ngwe kuli Mbimbiliya jikwo mu limi lia Edo, nihindu jakufwika ndando yinji. Ha Mbimbiliya jacho jinji hanachizaho jina Yehova nawa kakuzachisa maliji akulu chinji. Kashika chakupwa chikalu kuli waze akuhanjika Edo kunyingika sango ja mu Mbimbiliya. Ndumbu Patience Izevbuwa, yoze uli ni miaka 74 wakulingila Yehova ha miaka 50 yamba ngwenyi: “Ngunawahilila chinji ha kupwa ni Mbimbiliya ya Chifuchi Chaha ya Yisoneko ya Ngregu ya Akwa-Kristu mu limi lia Edo. Chahashile chipwe kulumbununa chize ngunawahilila.”!

Muze anakafambwisa Yisoneko ya Ngregu ya Akwa-Kristu mu limi lia Esan ha kukunguluka hanakapwa atu kuhiana 692. Atu kuhiana 1 milhão kakuhanjika limi lia Esan mu Nigéria mweswe. Ha mashimbu wano, mu yikungulwila 10 mu Nigéria muli mandumbu 640 akuhanjika Esan.

Yino yili Mbimbiliya yitangu ya Yisoneko ya Ngregu ya Akwa-Kristu yize anakafambwisa mu limi lia Esan. Muze te kanda achifambwisa yisoneko yino, mandumbu anji te kakuzachisa Mbimbiliya ya inglês. Hakutwala ku maliji a kwamba ngwo: “Tuli ni upite uno mu yikwachilo ya uma” ali ha mukanda 2 A-Korindu 4:7, ndumbu umwe wa pwo yamba ngwenyi: “Nguneuluka yami te nakutanga versu yino mu inglês alioze te chishi kuhasa kunyingika kanawa yize yinalumbunuka. Alioze Mbimbiliya ya Yisoneko ya Chifuchi Chaha mu limi lia Esan yinalumbununa chikuma chacho ngwo: ‘Chipwe ngwe tuli yikwachilo ya uma’ Zambi hanatwehe mulimo uno ulemu.’ Haliapwila maliji jacho kapwa kulumbununa zwalala nawa kakungukwata ku mbunge. Chili chawana chipema chinji!”

Tunawahilila chinji hamwe ni mandumbu jetu waze akuhanjika limi lia Edo ni Esan, ha kufambwisa Mbimbiliya ya Yisoneko ya Chifuchi Chaha ya Yisoneko ya Ngregu ya akwa-Kristu mu malimi wano aali. Tunalembe hanga mikanda yino afwambwisa yikwase atu anji apwe ni “chinyingi cha umwenemwene.”—1 Timoteu 2:3, 4.