6 NOVEMBRO, 2023
RÚSSIA

Chipwe Ngwe Mandumbu Kali mu Zuwo lia Ususu, Nihindu Kananungu ni Kuwahilila

KWAZULULA

Chota cha usopeso cha ku Cheryomushkinskiy kwasala hakehe muchitwa mutambi wa chiyulo chize akwata hali mandumbu Sean Pike, Aleksandr Rumyantsev ni Eduard Sviridov. Ngaji yoze unatale ha chikuma chacho kanda achaapatwila.

Sango ja

Sean Pike

Kasemukine ha: 1971 (Georgetown, Guyana)

Yize yalingiwile ku mwono wenyi: Kalukilile ku Rússia hanga alilongese shikola yinene. Chocho yapwa engenheiro civil

Kamumenekene kuli Yela ja Yehova muze te machililongesa shikola yinene. Kakomekene chinji ha yiyulo ya mana yize amwene mu Mbimbiliya. Kamupapachishile ha mwaka 1997

Kalimbachile ni Tatyana ha 2001. Ayo kali ni ana a mapwo aali.

Maliji a mukwo-pwo, Tatyana a

Yika yinakukwasa yena ni mukwenu lunga kupalika ha kulihandununa chino ha miaka yaali yize ali mu zuwo lia ususu?

Ku uputukilo chapwile chikalu kuli yetu. Te tunevu woma unji ni kunenganyana, alioze ulutwe hitutayiza yize te yinalingiwako. Yuma yize yinamukwase uli ukwaso uze anatambula kuli mandumbu ni mapangi a hashi heswe. Chikwo nawa, yami ni anetu twakumusonekena mikanda ha yisuho yinji hanga tumusolwele zango lietu. Pwamba pundu ukwaso ni ufunge wa Yehova wakusoloka chize ku uputukilo. Nawanyine utakamiso ha kupukuna maliji a Samu 18:16,19 anambe ngwo: “Watumishine kwilu, wangwanjile, wanguzambwile mu meya anji. Wangutuhwishile ndo ku chihela chinene nawa. Wangupulwile mumu wawahililile muli yami.” Liji “meya anji” kakungutwala hanga ngunyonge mu chipatulo chize ali Sean chinatuhandununa. Yami chishi kuhasa kupwa meso ni meso ni iye hanga ngumukwase, alioze Yehova mahasa kwazulula moko jenyi hanga akwase Sean kupwa mu ufunge.

Aleksandr Rumyantsev

Kasemukine ha: 1977 (Moscow, Moscow Region)

Yize yalingiwile ku mwono wenyi: Te kakukalakala ngwe mukwa-kwendesa mashinyi. Te kakufunga naye yoze chitonji muze e kanda achimusa mu zuwo lia ususu.

Nalilongesele ni Yela ja Yehova hanga ngunyingike yize Mbimbiliya yakulongesa. Kangupapachishile ha mwaka 2006.

Maliji jenyi

Kuchi wamwene ukwaso wa Yehova ha mashimbu waze akusele mu zuwo lia ususu?

Chili utakamiso kunyingika ngwetu mandumbu a hashi heswe kanangulembela. Ngunanyingika ngwami chino chinalingi chihanda ku ukwaso wa Yehova. Chikwo nawa, mutapu uze Yehova anakumbulwilamo yilemba yami uli chiwape chize te kanda nguchimona kama ku mwono wami. Nguli ni uhumikizo ni sambukila. Yino yakungwiulula yize yili ha 2 A-Korindu 1:5 unambe ngwo: “Mumu ngwe chizechene lamba lietu muli Kristu lili linji, chizechene nawa utakamiso uze twakutambula kupalikila muli Kristu, uli unji.” Yuma yino yeswe yakwokesa uwahililo wami.

Eduard Sviridov

Kasemukine ha: 1964 (Dushanbe, Tajikistan)

Yize yalingiwile ku mwono wenyi: Te kakalakala ngwe mukwa-kwendesa makina anene-anene (trator)

Kalimbachile ni Yelena ha 1997

Katesele kutanga Mbimbiliya yamuundu. Ha kupalika cha amwe mashimbu yaameneka kuli Yela ya Yehova mba yaputuka kulilongesa no Mbimbiliya. Ayo kaapapachishile ha mwaka 1999

Maliji jenyi

Yika yakukwashile kununga ni kuwahilila chipwe ngwe wapwile mu zuwo lia ususu?

Ngunakolo ku ufulielo mumu lia katalilo wami mupema wa kutanga cha Mbimbiliya, kulemba ni ukwaso uze nakutambula kuli mandumbu jetu a hashi heswe. Chikwo nawa, nakumona ngwami chili chipema kupwa ni nyonga lialita. Mwono uli ngwe foto yize yakutuhuka kanawa nyi museha. Muze nakunyonga ha mwono wami, nakusakula kusakwilila Yehova ha kungufumba. Nakumusakwilila nawa ha uhashi uze nguli nawo ha kukumbulula yoze wakumuchoka.—Yishima 27:11.

Yilweza ya Sean, Aleksandr, Eduard ni asoko jo yinatwiulula ngwetu, “Yehova iye mupema; ha tangwa lia lamba kapwa ngwe chihunda cha kukolesa; kananyingika waze akuswamina muli iye.”—Nahume 1:7.

Katalilo wa mashimbu

25 Agosto, 2021

Kuhengwola mu zuwo. Mandumbu atatu yatwala mu zuwo lia ususu
27 Agosto, 2021

Sean, Aleksandr, ni Eduard yatwala mu zuwo lia ususu muze ali ndo musono
14 Novembro, 2022

Yaputuka kwapatwila mu zuwo lia ususu

a Twahashile kwivwa maliji a ndumbu Pike

SANGO ANATUHWISA