25 OUTUBRO, 2023
UCRÂNIA
Mandumbu Machiwuluka Upapachiso Uze Walingiwile mu Ucrânia ha Miaka 30 Kunyima
Ha 7 Agosto, 1993 mu Kiev, Ucrânia, kapapachishile mandumbu a malunga ni a mapwo 7,402 ha chimwe kukunguluka cha mambonge cha yifuchi yinji chambile ngwo, “Malongeso a Kuli Zambi.” Uno nihindu uchili upapachiso unene mu lusango wa tuvumbi twa Yehova ha mashimbu jetu. Waze apapachishile ha kukunguluka chacho ni haliapwila kakuchiuluka.
Mukachi ka waze apapachishile mwapwile ndumbu Volodymyr ni mukwo-pwo, Alla. Chino chapwile kukunguluka cho chitangu. Ha kunyonga ha unji wa atu kuheta ku 65,000 waze apwileho a ku yifuchi 16, o yamba ngwo: “Kukunguluka chino chalingiwile mu Kiev, chatukwashile kunyingika ngwetu, kulinunga chetu ni mandumbu a hashi heswe chili chamwenemwene hi wika ko chize twakutanga ha mikanda. Haliapwila, hanyima lia kuya ku kukunguluka cha mambonge cheka ni cheka ha miaka yino yeswe, twanyingika mandumbu akwo waze ali yilweza yipema ya chize mutuhasa kulingila chinji Yehova ni kuwahilila.”
Oleksandr, umwe ndumbu wa ku Kiev, kapwile mukachi ka mandumbu a malunga ni a mapwo kuhiana 50 amu chikungulwila cho waze apapachishile ha kukunguluka chacho. Iye kaneuluka yize yalingiwile mu chihela chacho ni kwamba ngwenyi: “Nalilile mumu lia zango ni kulinunga chize mandumbu asolwele ha kukunguluka chacho. Changuhele shindakenyo ngwami nguli mu umwe usoko wa zango wa ku spiritu. Muze nakuya ku kukunguluka cha mambonge ha mashimbu wano chakungukwata ku mbunge ngwe chizechene chapwile ha chisuho chitangu.”
Muze akunyonga ha upapachiso wenyi ni ha kukunguluka cheswe cha mambonge, umwe ndumbu wa pwo avuluka ngwo Liudmyla yamba ngwenyi: “Katalilo wa kukunguluka chino ‘Malongeso a Kuli Zambi’ kangukwashile kulihulikila chinji ha yuma yize te mungutesa ku ufulielo. Natesele kulingila Yehova mu mulimo wa shimbu lieswe. Yingumanununa yize natesele, kashika haliapwila ngunalingi mulimo wa shimbu lieswe ha kupalika cha miaka 28. Ha miaka yino yeswe, Yehova kananungu ni kungukwasa.”
Ha mwaka 1993 kukunguluka cha mambonge cha yifuchi yinji chize chalingiwile mu Kiev chambile ngwo, “Malongeso a Kuli Zambi” chili chikalu kuchivulama. Chize ha shimbu liacho, akwa-kwambujola mu Ucrânia kwoka chinji. Musono, Yehova kananungu ni kuwahisa mandumbu jetu mu Ucrânia waze anambujola ni hamu ni kulihana kuli Zambi hanga apapachise.—Kutuhuka 32:26.