Ha tangwa lia Março 23, tunashimbwila tukatambule ngeji anji ku Chiwanyino cha Kwiwuluka Kufwa cha Yesu kuhiana waze ejile mwakawali. Atu jacho makevwa muze mukwa-kuhanjika pande makalumbununa chitapo chize atwaha kuli Yehova ni yiwape yikwo yize mutukatambula ku matangwa a kulutwe! (Iza. 11:6-9; 35:5, 6; 65:21-23; Yoa. 3:16) Alioze, hi mukwa-kuhanjika pande wika ko makahana uchela ha tangwa liacho. Tulieswe twatamba tukatambwise ni zango lieswe ngeji waze makeza. (Roma 15:7) Ivwenu yize mutukalinga.

• Twatamba tukasehejele ha kutambwisa ngeji ni mandumbu waze anazeye mu ufulielo ni kwameneka ni zango, hi kuya wika ni kutwama ni kushimbwila pande ko

• Twatamba tukasolwele zango atu eswe makeza, hi waze wika mutukasanyika yetu ko. Mutukalweka waze aha makeza hanga tukatwame no hamuwika, ni kuzachisa Mbimbiliya ni mukanda wa miaso umuwika

• Muze pande mujikahwa, mutukakumbulula yihula yo. Nyi chikungulwila chenu muchikatuhuka kawashi hanga munjile chikungulwila chikwo, nwatamba kulitesa hanga nukameneke atu jacho muze mukukapalika matangwa akehe. Nyi kunwanyingikine numero ya telefone ya mutu, muhulenu ngwenu: “Ngunafupu ngukevwe chize nwamona chiwanyino chino. Muchilita nungwehe kama numero ya telefone yenu?”