Atu anji kakunyonga ngwo, waze ali pichi nawa alilongesele chinji makapwa ni mwono upema kulutwe lia matangwa. Amwe kakutayiza ngwo, kulilongesa ku shikola yinene muchihasa kukwasa mutu kupwa chikilikita, kupwa mutu mupema mu usoko, ni mu chifuchi chize atwama. O kakwamba nawa ngwo, kulilongesa chinji chakukwasa mutu kupwa ni mulimo upema, chikwo nawa nyi wapwa ni mbongo jinji muwahilila ku mwono.

Tutalenu yize ambile Zhang Chen, watwama ku China. Iye ngwenyi: “Napwile ni kunyonga ngwami, ngunafupiwa kupwa ni mikanda ya shikola yinene hanga nguchine kupwa chiswale. Chikwo nawa, nyi napwa ni mulimo upema ni kuzuka mbongo jinji, mungupwa ni uwahililo ku mwono.”

Atu anji kanayi ku mashikola anene-anene a lufuma hanji kuya mu yifuchi yeka, mumu kanazange kupwa ni mwono upema kulutwe lia matangwa. Kulipikala chino chinoko chinji musono, mumu musongo wa COVID-19 unaakinda kuya wenyi mu yifuchi yeka. Umwe lusango wa Organização para a Cooperação e Desenvolvimento Econômico wa mwaka 2012, kambile ngwo: “Atu anji a mu Ásia kakuya ni kulilongesela mu yifuchi yeka.”

Yisemi kanji-kanji kakusa tachi jinji hanga ana jo alilongese ku shikola yinene. Qixiang wa mu Taiwan, yamba ngwenyi: “Yisemi jami kapwile yiswale, chipwe chocho katutumine mu uwana wetu mu Estados Unidos, hanga tulilongese ku shikola yinene.” Ngwe chizechene akulinga atu anji, yisemi anji no kakulinjisa mu mikuli hanga afwete shikola ja ana jo.

Kulilongesa chinji muchihasa kukwasa mutu kupwa ni mwono upema, alioze, alongi anji keshi kuhasa kupwa ni yuma yize te akushimbwila. Chakutalilaho, atu anji kasele tachi jinji ni kulinjisa mu mikuli yeka ni yeka hanga alilongese chinji. Chipwe chocho, kakawanyine mulimo uze te akuzanga. Umwe lusango wa Rachel Mui Business Times wa mu Cingapura, kanambe ngwo: “Kuli atu anji waze hahwisa shikola yinene, chipwe chocho, kanda achiwana mulimo.” Jianjie yoze walilongesele chinji, wa mu Taiwan yamba ngwenyi: “Atu anji alilongesele chinji keshi ni uhashi wa kusakula mulimo uze anazange. O kakutayiza mulimo weswawo akwaha kulinga.”

Atu waze akuwana mulimo uze akuzanga, ha kupalika cha mashimbu kakumona ngwo, mwono wo kuushi ngwe chize apwile ni kushimbwila. Hanyima lia kuhwisa shikola yinene ku Reino Unido, Niran yahiluka mu chifuchi chenyi ku Tailândia, kuze awanyine mulimo uze apwile ni kushimbwila. Mwene yamba ngwenyi, “Mukanda wa shikola yinene wangukwashile kuwana mulimo upema uze te wakungwaha mbongo jinji. Chino te chinalumbunuka ngwo, natamba kukalakala chinji ni kupalikisa maola anji ku mulimo. Ha kupalika cha mashimbu yaputuka kutepulula atu ku mulimo, ni yami yanguchizako. Kashika, yingunyingika ngwami, kukushi mulimo niumwe uze wakuneha uwahililo wamwenemwene.”

Atu waze ali pichi hanji waze akwamba ngwo, kali ni mwono upema, nihindu kakupwa ni kapinda mu usoko, misongo ni kusakalala mumu lia upite. Umwe lunga wa ku Japão avuluka ngwo, Katsutoshi, yamba ngwenyi: “Nakuzanga chinji kupwa ni upite, alioze yinyengo yinji nevwile mumu lia atu waze apwile ni kulimika ni yami, kunguvwila ukwa, ni kungusosomba.” Lam, umwe pwo wa mu Vietname yamba ngwenyi: “Nakumona atu anji masa tachi hanga apwe ni mulimo uze muwanehena mbongo jinji ni kupwa ni mwono upema, alioze, kwamba umwenemwene, o kakuzuka yuma yeka ngwe, woma, misongo, kuhonga ku mbunge ni kunenganyana.”

Chizechene ngwe Franklin, atu anji hananyingika ngwo, kuli yuma yinji yilemu ku mwono, kuhiana kulilongesa chinji ni kupwa ni upite unji. Atu jacho shimbu ahulikile mwono wo ha kufupa upite unji, amwe kakusa tachi hanga apwe atu apema ni kulingila akwo yuma yipema. Shina kulinga yuma yacho muchihasa kuneha mwono upema kulutwe lia matangwa? Mutwe uze muuhataho muukumbulula chihula chino.