Yika muyikukwasa kupwa ni mwono upema kulutwe lia matangwa?
Ngwe chize twamona ha mitwe yapalika, atu anji kakunyonga ngwo mba apwe ni mwono upema kulutwe lia matangwa, katamba kufuliela ngwo yuma yize yakulingiwa ku mwono yapwile kutesa, kulilongesa chinji, kupwa ni mbongo jinji ni kupwa mutu mupema. Alioze, kuzachisa yuma yino hanga mutu apwe ni kutalatala chipema, chili ngwe kuzachisa mapa yize muyitwala mutu kweka. Shina chino chinalumbunuka ngwo, kukushi niumwe usongwelo uze muutukwasa kupwa ni mwono upema kulutwe lia matangwa? Ka, hi chocho ko!
USONGWELO UZE UNAHIANE WA ATU
Muze twakuzanga kukwata chimwe chiyulo, kanji-kanji twakufupa ukwaso wa mutu yoze uli mukulwana wetu hanji uli ni mana anji kuhiana yetu. Chizechene nawa mutuhasa kuwana usongwelo upema wa chize mutuhasa kupwa ni mwono upema kulutwe lia matangwa, kuli mutu yoze uli mukulwana nawa ni mana anji kuhiana yetu. Usongwelo wacho mutuhasa kuuwana mu yisoneko yisandu yize asonekene ha miaka 3,500 kunyima. Yisoneko yacho yisandu yili Mbimbiliya.
Mumu liaka twatamba kufuliela mu Mbimbiliya? Mumu kukushi mutu mukwo yoze uli mukulwana nawa uli ni mana anji kuhiana Mwenyayo. Iye kakumuvuluka ngwo, “Mukulwana-wa-Matangwa” yoze watwama “ku miaka ya mutolo ndo ku miaka ya mutolo.” (Daniele 7:9; Samu 90:2) Iye kali “tangi ya malilu; iye Zambi yoze wawumbile hashi nikulingaho.” (Izaia 45:18) Iye kanatulweze ngwenyi jina lienyi, Yehova.—Samu 83:18.
Amu mwenya Mbimbiliya ali Sakatanga, iye keshi kulemesa munyachi umwe ni kulelesa ukwo. Yiyulo ya mu Mbimbiliya yakukwasa chinji, chikwo nawa, hiyinakwase atu anji hashi heswe. Kukushi mukanda ukwo uze hiunapu kulumbununa ni kutuhwisa kuhiana Mbimbiliya. * Kashika yiyulo yamo muyihasa kukwasa ni kusongwela atu eswe. Yino yinasolola ngwo, yize Mbimbiliya yakwamba yili yamwenemwene.
“Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.”—YILINGA 10:34, 35.
Chizechene ngwe umwe chisemi akuzanga ni kufunga mwanenyi, Yehova Zambi kali Tata wa zango yoze wakutukwasa kupalikila mu Liji lienyi, Mbimbiliya. (2 Timoteu 3:16) Muhasa kufuliela mu Mbimbiliya, mumu Yehova mwe watutangile, kashika iye kananyingika kanawa yize tunafupiwa hanga tupwe ni uwahililo.
Yika watamba kulinga mba upwe ni mwono wa mutapwau kulutwe lia matangwa? Kumbululo lili ha mutwe uze muuhataho.
^ kax. 6 Nyi unazange kunyingika nawa yuma yikwo hakutwala ku kulumbununa cha Mbimbiliya ni kuyituhwisa, njila ha site www.pr418.com ha chikuma ENSINOS BÍBLICOS > A HISTÓRIA E A BÍBLIA.
^ kax. 16 Nyi unazange kunyingika yuma yikwo, tala kapitulu 9 wa mukanda A Bíblia— Palavra de Deus ou de Homem? wakufwambwisa kuli Yela ja Yehova. Uli nawa ha internet ha site www.pr418.com. Yako ha UTULIKILO WA MIKANDA > MIKANDA.
Kota Muzanga Chinji Yuma Yize Mumona
KAPOSHI WA KUTALILA
Umwenemwene wa Yuma ya Kulutwe Lia Matangwa
Kolesa kutalatala che ha yize Zambi anambe hakutwala ku yuma ya kulutwe lia matangwa hano hashi ni atu waze makatwamaho.
KAPOSHI WA KUTALILA
Shina Usongwelo wa mu Mbimbiliya Uli ni Ulemu Musono?
Kuli sango jinji jaha musono, mba mumu lia kuya ni kufupa usongwelo ha Mbimbiliya—mukanda ukulu uze akumbanyishine kusoneka ha 2,000 a miaka kunyima?
KAPOSHI WA KUTALILA
Mbimbiliya ni Mwono We Kulutwe Lia Matangwa
Liji lia Zambi mulihasa kutukwasa kukumba yipikalo yize muyiza kulutwe, ngwe yize twakumona matangwa eswe hano hashi hapi. Alioze Mbimbiliya kuyishi kuhanjika wika ha yino. Yinalumbununa nawa yize muyiza kulutwe lia matangwa.
