Yika Yize Muyihasa Kukunehena Mwono Upema Kulutwe lia Matangwa?
Atu anji kakufuliela ngwo, kutalatala chetu cha kulutwe lia matangwa kakuchisongwela ku tachi jize kujishi kumoneka. Kashika ayo akulinga yuma yize akumona ngwe muyanehena uwahililo.
YIZE ATU ANJI AKUFULIELA
AKWA-KULILONGESA TUTONGONOSHI: Atu anji kakufuliela ngwo kupwa cha tutongonoshi muze mutu anasemuka, chakusolola chize mwono wa mutu wacho muukapwa kulutwe lia matangwa. Ayo kakufupa tahi hanga akwase kunyingika chize mwono wo muukapwa kulutwe lia matangwa ni kwakwasa kukwata yiyulo yipema.
FENG SHUI: Atu anji kakunyonga ngwo katamba kululieka kanawa yuma ha mukala wo mba afumbuke hanji awahilile ku mwono. Lo Wing, * yoze watwama mu Hong Kong yamba ngwenyi: “Longeshi wa feng shui kangulwezele ngwenyi, nyi nasa cristal homa hamwe ku zuwo liami mungupwa ni mbongo jinji.”
KUWAYILA TULAMBA: Atu amwe kakufuliela ngwo, mba awahise ni kupwa ni ufunge, katamba kuwayila tulamba two waze afwile ni tuzambi anji. Van yoze watwama mu Vietname yamba ngwenyi: “Te nakufuliela ngwami, mba ngupwe ni mwono upema haliapwila ni kuhana mwono upema kuli usoko wami kulutwe lia matangwa, te natamba kuwayila tulamba twami waze hanafu.”
MUTU NYI HAFWA KAKUSEMUKA CHEKA: Atu anji kakunyonga ngwo mutu nyi mafwa kakusemuka nawa cheka. Ayo kakufuliela ngwo, yuma yipi hanji yipema yize anapalika musono yinakatuka ku mwono uze apwile nawo muze te kanda achifwa.
Atu anji kakumona yuma yacho ngwe yipandapanda. Chipwe chocho anji kakuzachisa ngombo, tufutafuta ni munanyi. Ayo kakumona ngwe yuma yacho muyakwasa kunyingika yuma yize muyikalingiwa ku mwono wo kulutwe lia matangwa.
SHINA YUMA YACHO YAKUKWASA ATU
Shina atu waze akufuliela yuma yacho ni kuyilinga kakupwa ni mwono upema ni kutalatala chipema cha kulutwe lia matangwa?
Tutalenu yize yalingiwile ku mwono wa Hào yoze watwama mu Vietname. Iye kafupile ukwaso wa akwa-kulilongesa tutongonoshi, feng shui ni kuwayila tulamba twenyi waze hanafu. Shina yuma yacho yamukwashile? Mwene yamba ngwenyi: “Mingoso yami yaholokele, natambwile makongo anji, mu usoko wami mwapwile kapinda chikwo nawa te nakulipikala chinji.”
Qiuming wa ku Taiwan neye kapwile ni kufuliela kuli akwa-kulilongesa tutongonoshi, akwa-kufuliela ngwo mutu nyi hafwa kakusemuka cheka, kuli waze akwamba ngwo, yuma yize yakulingiwa hi yinapu kutesa, kuli akwa-feng shui ni kuwayila tulamba waze hanafu. Muze ahengwile kanawa yikuma yino mwene yamba ngwenyi: “Yingumona ngwami malongeso ni ndako yacho te kuyalitele nawa te hi yamwenemwene ko. Chikwo nawa, yingumona ngwami yuma yize akwa-kulilongesa tutongonoshi te akwamba yalisa. Hakutwala ku kusemuka cheka, kuchi mutu mahasa kupwa ni mwono upema hanji kululieka yuma ku mwono wenyi kulutwe lia matangwa nyi keshi kwiwuluka yuma yize alingile muze te kanda achifwa?”
“Yingumona ngwami malongeso ni ndako yacho te kuyalitele, nawa te hi yamwenemwene ko.”—QIUMING, WA KU TAIWAN
Hào, Qiuming ni atu akwo yanyingika ngwo, yuma yize yakulingiwa ku mwono wetu kakayitesele, kuyatalile hali tutongonoshi, kuwayila tulamba twetu hanji ha longeso lia kwamba ngwo, mutu nyi hafwa kakusemuka cheka. Shina chino chinalumbunuka ngwo kutushi ni uhashi wa kunyingika yuma yize muyilingiwa ku mwono wetu kulutwe lia matangwa?
Atu anji kakunyonga ngwo, mba apwe ni mwono upema kulutwe lia matangwa katamba kulilongesa chinji ni kupwa ni upite unji. Kapinda muka apalikile atu waze akwachile chiyulo chacho?
^ kax. 5 Majina amwe ha mutwe uno ni yize muyihateho kapwa kwalumuna.
^ kax. 16 Maliji jacho tunawane mu Mbimbiliya Yisandu ha A-Ngalashia 6:7. Nyonga lino liakusoloka chinji mu chishima cha akwa Oriente chinambe ngwo: “Yuma yipi yize wakulinga kuli akwenu, muyikufunyina.”
Kota Muzanga Chinji Yuma Yize Mumona
KAPOSHI WA KUTALILA
Shina Akwa-Kulilongesa Tutongonoshi ni Tahi Mahasa Kunyingika Yuma ya Kulutwe Lia Matangwa?
Shina muhasa kufuliela kuli atu wano akwa-kutaha?
KAPOSHI WA KUTALILA
Yika Mbimbiliya Yakwamba Hakutwala ku Mwono ni Kufwa
Shina kuli chimwe chuma muli yetu chize chakusala ni mwono muze twakufwa? Shina tuli ni mwono uze kuushi kufwa? Afu kulihi ali?
