Yize Mbimbiliya Yakwamba

“Yiheho Yize Yakusa Mwono mu Ponde”—Shina Twatamba Kuta Yiheho Yacho?

“ATU ANJI MUSONO KANATE YIHEHO YIZE YAKUSA MWONO WO MU PONDE NGWE, KWENDESA MOTO KAWASHI-WASHI, KUZOMBOKA NI WATO MU MEYA NI KUNYINA MULUNDU USUKU CHINJI NI MOTO.”—MUKANDA THE WILLOW GLEN RESIDENT

CHINO chinalite ni yize yinalingiwa chinji mu yiheho yimwe musono. Atu anji kakuzanga kuheha ni yuma yize yakusa mwono wo mu ponde. a Anji a kuli ayo kakuzanga kunyina ha milundu yisuku, kupalumuka ni kutumbuka. Kulita ni mukanda Time atu waze akuzanga kuta “yiheho yize yakusa mwono mu ponde” kanoko chinji, mumu ayo kakulivwa kanawa ha kuta yiheho ya mutapu wacho. Alioze, anji kakulilemeka chinji.

Ha mwaka 1997 mu chifuchi cha Estados Unidos, anji a kuli atu waze akuta yiheho yize yakusa mwono mu ponde kalilemekene ni kwatwala ku shipitali, akwo yafwa. Chipwe chocho, atu amwe kakukalila yiheho wa mutapu au. Umwe pwo yamba ngwenyi: “Yami chishi ni woma wa kufwa”, mutu mukwo yoze wahanjikile ha chikuma chino yamba ngwenyi: “Nyi walilemekene chekwamba, kwasele tachi jinji.”

Kulita ni yize twalilongesa ha mutwe uno, kuchi Akwa-Kristu atamba kunyonga hakutwala ku yiheho yize yakusa mwono mu ponde? Kuchi Mbimbiliya muyihasa kutukwasa kukwata yiyulo hakutwala ha chikuma chino? Kulilongesa mutapu uze Zambi akumona mwono muchitukwasa kukumbulula yihula yino.

Chize Zambi Akumona Mwono

Mbimbiliya yakwamba ngwo Yehova mwe “fuji lia mwono.” (Masamu 36:9) Iye kakatangile wika atu, alioze kaehele yeswe yize te mafupiwa hanga awahilile ku mwono. (Masamu 139:14; Yilinga 14:16, 17; 17:24-28) Kashika chili chipema kunyonga ngwetu iye kanazange hanga tufunge kanawa yuma yize iye atwehele ni zango. Shimbi jize Zambi ahanyine kuli A-Izalele mujitukwasa kuhengwola kanawa chikuma chino.

Shimbi yize ahanyine kuli Mose, yinambe ngwo mutu katamba kufunga mwono wa mukwo. Nyi kachilingile malinehena mulonga wa mwanyinga. Chakutalilaho, Mwenya-zuwo te katamba kutunga yisakala ha fulumba lia zuwo lienyi. Nyi kachilingile, mba umwe maholoka ha fulumba lia zuwo ni kufwa, usoko wa mwenya-zuwo mapwa ni mulonga wa manyinga. (Shimbi Yamuchiali 22:8) Nyi umwe ngombe susumuku maselumuka ni kushiha umwe mutu, mwenya-ngombe keshi kupwa ni mulonga wa manyinga. Alioze, tunyongenu ngwo, ngombe wacho kakulinga yuma yize akusa mwono wa atu mu ponde nawa mwenya ngombe kananyingika, chipwe chocho kalingile nichimwe hanga amukinde. Nyi kachi ngombe wacho mapupa ni mbinga umwe mutu, mba mutu wacho mafwa, mwenya ngombe neye te mamushiha. (Kutuhuka 21:28, 29) Amu Yehova akulemesa chinji mwono, kashika shimbi jenyi yakusolola vumbi ni kutukolweza hanga tufunge mwono wetu.

Tuvumbi twa Zambi ashishika no kanyingikine ngwo, shimbi yino yinatale ha yuma yize yakusa mwono wetu mu ponde. Mbimbiliya yakwamba ngwo, Ndawichi kapwile ni usona wa “kunwa meya a mushima lia Mbeteleme.” Mbonge lize A-Filistea apwile ni kujingilika. Ha kuchivwa, amwe malunga atatu yapula ndusu mu mbonge ya Filistea yata meya a mushima lia Mbeteleme yaneha kuli Ndawichi. Yika Ndawichi alingile? Iye kanwine, yaazujila hashi nyi kwamba ngwo: “Zambi angukanjise kulinga chuma chino. Te mungunwa mwanyinga ja wano malunga asa mwono wo mu utoji ha kuanehena? Mumu hasa mwono wo mu utonji ha kuaneha.” (1 Sango ja Mianangana 11:17-19) Kuli Ndawichi, niumwe katambile kusa mwono wenyi mu ponde hanga amuvwise kuwaha.

Yesu kalingile chizechene ngwe Ndawichi muze Ndiapu amutwalile ha kasonga ka tembele ni kumwamba hanga alinyase hashi mumu te angelo mahasa kumufunga. Yesu yamukumbulula ngwenyi: “Kanda ukeseka Mwene Zambi ye.” (Mateu 4:5-7) Ngwe chize twamona, Ndawichi ni Yesu kanyingikine ngwo chili chipi kumeso ja Zambi kusa mwono mu ponde.

Ha yilweza yino mutuhasa kulihula ngwetu, ‘Kuchi chiheho chino muchihasa kusa mwono wami mu ponde? Chiheho chimwe muchihasa kupwa chipema kuli yetu, alioze muchihasa kusa mwono wa akwetu mu ponde, kuchi mutuhasa kusakula kanwa yuma yize mutuheha nayo?’

Shina Twatamba Lume Kulisa Mu Ponde Ni Yiheho Yacho?

Kuhengwola kanawa yiheho yize tunazange kuta muyitukwasa kuwana kumbululo. Chakutalilaho, mutuhasa kulihula ngwetu, ‘Shina atu anji kakulilemeka ha kuta chiheho chino? Natambwile fumbu lize muyingukwasa kulifunga ha kuta chiheho chino? Yika muyilingiwako nyi nata chiheho chino? Kutala mungupwa ni katumu-tumu nyi mungufa?’

Mukwa-kristu yoze wakusa mwono wenyi mu ponde ha kuta chiheho, mahasa kutokesa usepa wenyi ni Yehova nawa kechi kupwa ni yiteli mu chikungulwila. (1 Timoteu 3:2, 8-10; 4:12; Titu 2:6-8) Kwamba pundu, ha kusakula yiheho akwa-kristu katamba kuhengwola kanawa shimbi hanga anyingike chize Sakatanga wo akunyonga ha kutwala ku ulemu wa mwono.

[Maliji ali mushi]