Fupa Ukwaso
Fupa Ukwaso
“Mutu wa ukawenyi chashi kumukumba, hindu nyi aali ali hamwe mahasa kulikwasa.”—Chilumbununyi 4:12.
CHAKUPWA chashi kukumba akwa-kole jetu nyi tuli ni ukwaso wa akwetu. Kashika, nyi unazange kwecha kunwa makanya, eta ukwaso kuli asoko, masepa ni atu akwo waze mahasa kukukwasa ni kukusolwela uhomboloji.
Fupa ukwaso wa atu waze echele kunwa makanya, kota ayo mahasa kukukwasa kanawa. Torben umwe mukwa-kristu wa Dinamarca, kambile ngwenyi: “ukwaso uze akwetu anguhele wapwile ulemu chinji.” Abraham, watwama mu chifuchi cha Índia, yasoneka ngwenyi: “zango lia umwenemwene lize asoko ni mandumbo jami a ku ufulielo angusolwele liangukwashile chinji kwecha kushipa makanya.” Kanji-kanji, twatamba kulinga yimwe, hi wika ko kutambula ukwaso wa asoko ni masepa.
Umwe lunga anavuluka ngwo Bhagwandas yamba ngwenyi: ”unji wa miaka yize nashipile makanya yapwile 27, alioze muze nalilongesele yize Mbimbiliya yakwamba hakutwala ku yuma ya luchisa, yingukwata chiulo cha kwecha kushipa makanya. Yingweseka kutepulula unji wa makanya waze te nakushipa, yingupwa ni masepa aha nawa yingufupa ukwaso wa mandotolo. Chipwe chocho nanungine ni kushipa. Kashika tangwa limwe yingwita kuli Yehova mu yilemba angukwase ngweche kushipa makanya. Hachino yinguhasa!”
Chuma chikwo chilemu chili kulilulieka hanga ukumbe kapinda mweswawo yoze masoloka. Kapinda muka? Tala chikuma chize muchihataho.
[Mushete]
SHINA WATAMBA KUNWA YITUMBU?
Atu waze akulinga yitumbo ngwe, adesivo de nicotina, yakukwasa nayo atu, waze ali nyi ndako ya kushipa makanya yapwa ni mbongo jinji.shimbu kanda uchinwa yitumbo yacho, hengola ha yihula yino:
Kuchi muyuka? Amwe kakwamba ngwo, yitumbo yakukwasa kulitwamina kushipa makanya. Alioze ha kupalika cha mashimbu ukwaso wacho ushi kulingiwa.
Upi uka muhasa kulingiwako? Yitumbo yimwe yakuzelola ku mbunge, depressão ni manyonga akulishiha. Iwuluka nawa, uukiso wa kufunyisa nicotina yili jila yakunwa droga, kashika mutu manunga nikusa mwono wenyi mu ponde. Kwamba pundo, mutu kananungu ni ndako yacho.
China kuli majila akwo? Kuhengwola chimwe chasolwele ngwo, 88% ya atu kahashile kwecha kushipa makanya, ha kusa tashi chakuhona ukwaso wa yitumbo yacho.