YIZE MBIMBILIYA YAKWAMBA
Batota
Atu amwe kakumona batota ngwe chiheho chipema, alioze akwo kakumona ngwo chili chiheho cha ponde.
Shina kuta batota chili chipi?
YIZE ATU AKWAMBA
Atu amwe kakwamba ngwo hi chipi ko kuta batota nyi machilinga kulita ni shimbi ja nguvulu. Majila amwe waze nguvulu akwecha atu hanga ate batota, kakuneha mbongo jize jakuyukisa atu.
YIZE MBIMBILIYA YAKWAMBA
Chipwe ngwe Mbimbiliya kuyishi kutongola batota, nihindu kuli shimbi jize mujihasa kutusongwela kunyingika upale wa Zambi hakutwala ha chikuma chino.
Kuta batota chinalimiki ni shimbi ya Zambi yinambe ngwo “kanyamenu, lifungenu ku kuzo yeswe.” (Luka 12:15) Kwamba umwenemwene kuzo yakutwala mutu hanga ate batota. Mazuwo waze akutako batota kakulakenya yuma yinji. Alioze, ayo keshi kwamba ngwo chili chikalu kuzuka yuma yacho, mumu kananyingika ngwo atu anji kakuta batota mumu kanazange kupwa pichi. Shimbu yikwase atu kulituna kuzo, batota yakutwala mutu hanga apwe ni usolo wa kupwa ni mbongo kawashi-washi.
Batota yinatale ha chimwe chikuma chize chakusolola kuzo: kuzuka mbongo jize akwo atokesele. Alioze, Mbimbiliya yinakolweza atu ngwo “Niumwe kanda afupa kufumbuka chenyi mwene, alioze mutu mweswe akafupe kufumbuka cha mukwo.”(1 A-Korindu 10:24) Kumi lia Shimbi yinambe ngwo: “Kanda ukavwila chipululu chuma chimwe cha mwenyembo we.” (Kutuhuka 20:17) Atu waze akuta batota, kakushimbwila mukwo atokese mbongo hanga ajizuke iye.
Mbimbiliya yakutukanyamisa tuchine kunyonga ngwo kwatwama jimwe tachi jize jakutukwasa ha mashimbu amwe. Ha mashimbu akunyima mu Izalele, atu waze te keshi kufuliela Zambi kapwile ni kuwayila “mesa Ngate” ka zambi ka mahuza. Shina Zambi te kakutayiza uwayilo wa mutapu au? Zambi kambile kuli ayo ngwenyi: “Alioze nwalingile chipi kumeso jami, nwatongwele chize yami chawahililile nacho.”—Izaia 65:11, 12.
Mu yifuchi yimwe kakuzachisa mbongo ja batota mu jila yalita ngwe kutunga shikola ni kujizachisa mu mutapu weka ni weka hanga jiyukise mbonge. Alioze kuyishikwalumuna mutapu uze ajizukile.
“Kanda ukavwila chipululu . . . chuma chimwe cha mwenyembo we.”—Kutuhuka 20:17.
Yuma yika yipi yakwizako kuli waze akuta batota?
YIZE MBIMBILIYA YAKWAMBA
Mbimbiliya yakutukanyamisa ngwo “waze mazanga kupwa pichi, malimbuka mu cheseko, ni mu muheto, ni mu usolo wunji wa kuhulamisa ni wa kulemeka, uze kuwakushimbamisa atu mu kwenyeka ni mu kwonona.” (1 Timoteu 6:9) Batota yinalifu chinji ni chipululu, chuma chize chakupiangula mutu hakehe-hakehe. Kashika Mbimbiliya yinatukolweza hanga twehuke chitanga chacho.—A-Efwesu 5:3.
Batota yakuneha upite washi, alioze yakutwala atu hanga azange chinji mbongo, chuma chize Mbimbiliya yakwamba ngwo “chikota cha yipi yeswe.” Kuzanga chinji mbongo muchihasa kupihisa mwono wa mutu ni kumutwala hanga atokese usepa wenyi ni Zambi. Chakutalilaho, Mbimbliya yakuhanjika hakutwala kuli atu waze akuzanga chinji mbogo ngwo “hanalituwu ni yikola yinji.”—1 Timoteu 6:10.
Kuzo yakutwala atu hanga ahone kuwahilila ni mbongo jize ali najo. “Yoze unase mbunge ku prata kechi kuyuka ni prata; yoze unase mbunge ku kwoka cha upite kechi kuyuka ni kulumbama.”—Chilumbununyi 5:10.
Tununu twa atu waze te apwile ni kuta batota kambile ngwo, chili chikalu kwecha ndako yacho. Chino chakulingiwa hashi heswe. Chakutalilaho, mu chifuchi cha Estados Unidos de America, tununu twa atu keshi kuhasa kwecha kuta batota.
Chimwe chishima chinambe ngwo: “Ha uputukilo mahasa kuzuka chihinga fujifuji, alioze songo liacho kulichi kuwaha.” (Yishima 20:21) Kuta batota chakutwala atu anji kutambula mikuli cha mutambwila. Kashika amwe kakutokesa mbongo, kulihandununa mu malo jo, kutokesa mulimo ni masepa. Alioze kukaula shimbi ja mu Mbimbiliya chakukwasa mutu hanga ahase kwehuka yuma yipi yize yakwiza kuli waze akuta batota.
“Alioze waze mazanga kupwa pichi, malimbuka mu cheseko, ni mu muheto, ni mu usolo wunji wa kuhulamisa ni wa kulemeka, uze kuwakushimbamisa atu mu kwenyeka ni mu kwonona.”—1 Timoteu 6:9.