YIKUMA YIZE twahichika yasolola chize yipikalo yimwe muyihasa kupinjisa mwono ni kuupwisa ukalu. Muze mununga ni kupinda ni yipikalo ye, muhasa kulihula ngwe, shina mwono uli lume ni ulemu, shina kuli umwe yoze unanguzange. Pwako ni shindakenyo ngwe, Zambi kakulipikala ha lamba lie. Yena uli mulemu kumeso jenyi.

Mukwa kusoneka Samu 86 kasolwele ufulielo wenyi muli Zambi hakwamba ngwenyi: “Ha tangwa lia lamba liami mungusanyika kuli yena, mumu kumukangukumbulula.” (Samu 86:7) Hanji muhasa kulihula ngwe, ‘Kuchi Zambi mangukumbulula “ha tangwa lia lamba liami”?’

Chipwe ngwe Zambi kechi kuhwisa kawashi-washi yipikalo ye, alioze Liji lienyi, Mbimbiliya, linambe ngwo, iye mahasa kukwaha sambukila ya mu mbunge hanga uhase kukumba yipikalo yacho. Mbimbiliya yinambe ngwo: “Kanda nukalipikala ha chuma nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu.” (A-Fwilipu 4:6, 7) Tala chize versu jino ja mu Mbimbiliya jinatwehe shindakenyo ngwetu, Zambi kakutuzanga.

“Zambi keshi kuvulama chipwe [kalujila] umuwika. . . .yenu kunwahiana tulujila tunji.”—Luka 12:6, 7.

ACHINYONGA HA CHINO: Chipwe ngwe tulujila ku meso ja atu keshi ni ulemu, alioze Zambi kakwalemesa. Zambi keshi kuvulama chipwe kalujila kamuwika, ayo kali ni ulemu kuli iye, mumu kali yitangiwa ya mwono. Alioze atu kali alemu chinji kuli Zambi kuhiana tulujila. Atu kali yitangiwa yilemu yize Zambi atangile hano hashi, katangile “mu chifwa” chenyi, nawa kali ni uhashi wa kwimbulula ni kusolola yitanga yenyi.—Uputukilo 1:26, 27.

“Yehova, yena hiunapolongoza mu mbunge yami, hiunanguse chinyingi. Kunyonga chami kuchakulumbunuka kuli yena . . . Ungweseke, unyingike manyonga jami.”—Samu 139:1, 2, 23.

ACHINYONGA HA CHINO: Zambi kanakunyingika kanawa. Kanyingika manyonga je eswe. Alioze, chipwe ngwe akwenu keshi kunyingika chize unevu, Zambi kakulipikala hali yena nawa kanazange hanga akukwase. Yino yakulemesa mwono we.

“Yehova, iwva kama kulemba chami; muteto wami ukanjile kuli yena. . . . Hetamisa twitwi lie kuli yami. Ha tangwa lize mungutambika ungukumbulule kawashi. Iye hanapanjika ku kulemba cha akwa kuyindama.”—Samu 102:1, 2, 17.

ACHINYONGA HA CHINO: Yehova kakumona yinyengo yeswe yize atu akwivwa hamukunda wa lamba lize akumona. (Samu 56:8) Kakumona nawa masoji je. Yehova kakwiwuluka yipikalo ye yeswe ni masoji je, mumu yena uli mulemu chinji kuli iye.

“Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa. . . . Yami Yehova Zambi ye, . . . ngunambe kuli yena ngwami, ‘Kanda wivwa woma, mungukukwasa.’”—Izaia 41:10, 13.

ACHINYONGA HA CHINO: Zambi kanazange kukukwasa. Nyi walimbuka, iye makuzundula.

“Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”—Yoano 3:16.

ACHINYONGA HA CHINO: Zambi kakukuzanga chinji, kashika ahanyine Mwanenyi wa wika Yesu, ngwe chitapo hali yena. Ha mukunda wa chitapo chino, yena uli ni uhashi wa kupwa ni mwono upema haliapwila, ni mwono wa mutolo kulutwe lia matangwa. a