• Mamusakula kuli Zambi. “Hindu yami hingunawayisa ni maji mwanangana wami . . . Mungukwaha mavungu akapwe chihinga; mungukwaha masongo a hashi ukaapite.”—Samu 2:6, 8.

• Mapwa swana wa Mwanangana Ndawichi. ‘Kuli yetu hikwasemuka umwe kemba, kuli yetu hahana umwe mwana wa lunga . . . Kutanda cha chiyulo chenyi ni cha sambukila kuchichi kusula, makakolesa ngunja ya Ndawichi ni Wanangana wenyi.’—Izaia 9:6, 7.

• Masemukina mu Mbeteleme. “Mbeteleme . . . , kuli yena mukukangutuhukila umwe yoze makapwa mukwa kuyula . . . Kumakapwa munene ndo ku masongo a hashi.”—Mika 5:2, 4.

• Malituna yo kuli atu ni kumushiha. ‘Amulelesele, etu kutwamusele mbunge. . . . Ha utanguko wa yetu amulemekene. Ha uhenge wa yetu amuwondele.’—Izaia 53:3, 5.

• Mamuhindwisa ku ufwe ni kumunangamisa. “Kuchi kuhichika mwono wami muma mwa afu. Mwe musandu we kuchi kumutayiza kumona kupola. . . . Ku chindume che kwatwama yiwape ya mutolo.”—Samu 16:10, 11.

Chize ku uputukilo wa atu, mutu umuwika mwe unatela kupwa Mwanangana mupema; mutu wacho Yesu Kristu. Chikwo nawa, umwe mungelo kalwezele Maria, naye ya Yesu ngwenyi: “Zambi kumakamwaha ngunja ya tato Ndawichi, . . . Wanangana wenyi kuuchi kahwa.”—Luka 1:31-33.

Yesu kanda achiyula kama hano hashi. Alioze, makayula hano hashi kukatuka mu malilu ngwe Mwanangana mu Wanangana wa Zambi. Yika yinamupwisa Mwanangana mupema? Tutalenu yize Yesu alingile muze apwile hano hashi.

•   Yesu kakwashile atu. Yesu kakwashile malunga ni mapwo, akweze ni tushinakaji, chipwe ngwe ayo kapwile ni mwono walisa. (Mateu 9:36; Marku 10:16) Muze mukwa-mbumba amwichile ngwenyi: “Nyi mupala, muhasa kungupemesa,” Yesu yamuvwila keke, chocho yamuwuka.—Marku 1:40-42.

• Yesu katulongesele chize twatamba kulingila Zambi. Iye yamba ngwenyi: “Kunwahashile kulingila Zambi ni kulingila upite hamuwika.” Nawa katowezele atu hanga alingile akwo yuma yize o anazange hanga akwo aalingile. Yino ye anavuluka ngwo, Shimbi ya Oru. Chikwo nawa, iye kasolwele ngwenyi Zambi keshi kulihulumba wika ha yize twakulinga, alioze ni ha yize twakunyonga ni chize twakulivwa. Kashika, nyi tunazange kuvwisa Yehova kuwaha twatamba kukanyama ha yize twakunyonga mu mbunge yetu. (Mateu 5:28; 6:24; 7:12) Yesu kambile nawa ngwenyi, mba tupwe ni uwahililo wamwenemwene, twatamba kunyingika yize Zambi akutwita ni kuyikaula ku mwono wetu.—Luka 11:28.

• Yesu kalongesele chize mutusolwela akwetu zango. Maliji ni yitanga ya Yesu yapwile ni ndundo, nawa te yakukwata ku mbunge ya waze akumupanjika. Mbimbiliya yinambe ngwo: “Mbunga alishimwokene ha longeso lienyi, mumu waalongesele ngwe umwe ukwete chiyulo.” (Mateu 7:28, 29) Iye yalongesa ngwenyi: “Zangenu akwa-kole jenu.” Iye nawa kanakalembela waze amushihile, hakwamba ngwenyi: “Tata uakonekene kama, mumu kanyingikine chize analingi.”—Mateu 5:44; Luka 23:34.

Yesu kanajame ni kupwa Mwanangana wa hashi heswe, mumu kali chimbovu nawa kakulihulumba hali atu. Mba shimbu lika Yesu makaputuka kuyula hano hashi?