Chizechene nawa, tulieswe mutupalika mu “kangonga,” yoze Yesu avulukile ngwo “luyinda munene.” (Mateu 24:21) Yetu kutuchi kuhasa kuchina luyinda wacho. Alioze mutuhasa kulinga chimwe hanga tukalifunge. Chuma chika chenacho mutulinga?

Ha Longeso lia ha Mulundu, Yesu Kristu yamba ngwenyi: “Liangenu kufupa Wanangana [wa Zambi] ni ululi wenyi.” (Mateu 6:33) Kuchi mutuhasa kuchilinga?

Ha kufupa chitangu Wanangana wa Zambi. Chino chinalumbunuka ngwo Wanangana wa Zambi watamba kupwa chuma chilemu ku mwono wetu. (Mateu 6:25, 32, 33) Mumu liaka twatamba kuumona chocho? Mumu Wanangana wa Zambi we mukalinga yuma yize atu keshi kuhasa, ni kuhwisa lamba lieswe lia atu.

Ha kufupa ululi wenyi. Twatamba kusa tachi hanga tutwame kulita ni shimbi ja Zambi. Mumu liaka? Mumu nyi yetwene twatesa chipi ni chipema mutulinehena lamba. (Yishima 16:25) Alioze, nyi twononokena shimbi ja Zambi mutumuvwisa kuwaha nawa mutuyuka ku mwono wetu.—Izaia 48:17, 18.

Nunga ni kufupa chitangu Wanangana wa Zambi ni ululi wenyi. Yesu katowezele ngwenyi amwe te mahasa kwapiangula ha kunyonga ngwo kupwa ni mbongo jinji muchaafunga  ku mwono. Akwo mahasa kulihulumba chinji ku yize yakufupiwa ku mwono ni kuhona mashimbu a kufupa Wanangana wa Zambi.—Mateu 6:19-21, 25-32.

Alioze, Yesu kalakenyene ngwenyi atu waze akukwasa Wanangana wa Zambi nihindu te mapwa ni yize mafupiwa haliapwila ni kuzuka yiwape kulutwe lia matangwa.—Mateu 6:33.

Chipwe ngwe tumbaji twa Yesu ku sekulu yitangu kafupile chitangu Wanangana wa Zambi ni ululi wenyi, nihindu o kakamwene umanunuko wa yikola ni lamba. Chipwe chocho, ayo kaafungile. Mu mutapu uka?

Kutwama kulita ni shimbi ja Zambi, chaafungile ku lamba lize te akumona atu waze apwile ni kulengulula shimbi ja Zambi. Kufuliela ha kwiza cha Wanangana wa Zambi, chaakwashile kukumba chipwe yipikalo yize te yakusoloka ngwe yikalu chinji. Nawa Zambi kaehele ‘tachi jahiana’ hanga akumbe yipikalo yize apwile nayo.—2 A-Korindu 4:7-9.

Akwa-Kristu ku sekulu yitangu kwononokene shimbi ya Yesu ya kulianga kufupa Wanangana wa Zambi. Ayo kambulwile sango lipema lia Wanangana kuli atu eswe. (A-Kolosu 1:23) Shina kuli waze analingi mulimo wacho musono?

Ewa! Yela ja Yehova kananyingika ngwo, kwasala hakehe hanga Wanangana wa Zambi unongese yuma yipi hano hashi. Kashika akusa tachi hanga akaule maliji wano a Yesu anambe ngwo: “Sango lino lipema lia Wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.”—Mateu 24:14.

Yika watamba kulinga muze makwambulwila sango lipema? Tunakukolweza hanga wimbulule chilweza cha akwa-Masendonia ku sekulu yitangu mu mbonge ya Mberia. Muze Paulu anakaambulwila sango lipema lia Wanangana wa Zambi, o yatayiza “ni mbunge yeswe.” Kashika te ‘akuhengula mu Yisoneko’ hanga apwe ni shindakenyo ha yize te akwivwa ni kuyikaula ku mwono wo.—Yilinga 17:11, 12.

Ni yena muhasa kuchilinga. Nyi walianga kufupa Wanangana wa Zambi ni ululi wenyi, iye makufunga haliapwila nawa mukapwa ni sambukila kulutwe lia matangwa.