1-2. (a) Mumu liaka waze machilimbata atamba kujikijila muli Yehova? (Samu 37:3, 4) (b) Yika mutulilongesa ha mutwe uno?

SHINA unambe kumbata nyi hanji nuchili aha mu ulo? Nyi watayiza ngwe ewa, chinalumbunuka ngwo unazange kupwa hamwe ni mutu yoze wazanga chinji. Alioze, mu ulo mwakusoloka yipikalo, nawa waze machilimbata kakufupiwa kukwata yiyulo yilemu. Kashika, mutapu uze makumbilamo yipikalo ni yiyulo yize makwata, muyihasa kukwata ha uwahililo wo ku mwono wo weswe. Nyi lunga ni pwo majikijila muli Yehova, ayo makwata yiyulo yipema, ulo wo muukola chinji, nawa mawahilila. Alioze waze keshi kukaula shimbi ja Zambi, mahasa kupwa ni yipikalo yinji mu ulo ni kuhona uwahililo.—Tanga Samu 37:3, 4.

² Chipwe ngwe mutwe uno unatale chinji hali waze machilimbata, nihindu muusolola yipikalo yize waze eswe hanambata mahasa kupalika. Muushindakenya yize mutuhasa kulilongesa ha yilweza ya malunga ni mapwo ashishika a ku shakulu. Yilweza yino muyitulongesa yuma yinji yize mutuhasa kukaula ku mwono ni mu ulo wetu. Nawa mutumona yize mutuhasa kulilongesa ha yilweza ya amwe mandumbu waze alimbata a ha matangwa jetu.

3-4. Kapinda muka waze machilimbata mahasa kupalika?

³ Amwe hanji mahasa kukolweza waze machilimbata hanga apwe ni mwono ngwe uze atu anji ali nawo musono. Chakutalilaho, yisemi ni asoko akwo mahasa kushinjila waze machilimbata  hanga aseme ana kawashi-washi. Hanji kwashinjila nawa kuli masepa ni asoko hanga alande zuwo ni yikumba yinji yipema.

⁴ Waze alimbata nyi kakeyele, mahasa kulinjisa mu mikuli yinji. Yino muyihasa kutwala lunga ni pwo kukalakala chinji hanga afwete mikuli yacho. Hachino, ayo mahasa kuhona mashimbu akulinga longeso lia wika, uwayilo wa mu usoko ni kwambujola. Hanji kuhona kuya ku kukunguluka, mumu lia kukalakala ndo ha maola waze keshi mu katalilo wa mulimo hanga apwe ni mbongo jinji hanji kufunga mulimo. Nyi machilinga, ayo kechi kuhasa kulinga milimo ya mu ululikiso wa Yehova.

5. Yika chilweza cha Klaus ni Marisa chinatulongesa?

⁵ Yilweza yinji yinasolola ngwo, nyi twasa mbongo ni yikumba ha chihela chitangu ku mwono wetu, kutuchi kuwahilila. Tutalenu yize Klaus ni mukwo-pwo Marisa, alilongesele ha chikuma chino. * Ku uputukilo wa ulo wo, ayo eswe te kakukalakala matangwa eswe hanga apwe ni mwono upema. Alioze hakupalika cha mashimbu, yanyingika ngwo te keshi ni uwahililo wamwenemwene. Klaus yamba ngwenyi: “Twapwile ni yuma yinji kuhiana yize te tunafupiwa, alioze kutwakatesele kulinga niyimwe yuma ya ku ufulielo. Kwamba umwenemwene, mwono wetu wapwile wa too ni yipikalo ni kusakalala.” Hanji ni yena hiunanyingika ngwo kusa mbongo ni yikumba ha chihela chitangu ku mwono, kuchishi kuneha uwahililo wamwenemwene. Nyi yino ye yinalingiwa kuli yena, kanda uhonga. Tala chize yilweza yipema ya akwenu muyihasa kukukwasa. Chitangu, tutalenu yize malunga mahasa kulilongesa ha chilweza cha Mwanangana Yehosofate.

6. Muze apalikile mu kapinda, kuchi Yehosofate akawile chiyulo chili ha Yishima 3:5, 6?

⁶ Malunga, shina ha mashimbu amwe nwakulivwa ngwe nuli ni milimo yinji? Nyi chocho, talenu yize munulilongesa hali Yehosofate. Amu te ali mwanangana, Yehosofate kapwile ni mulimo unene wa kufunga vungu lieswe lia Izalele. Kuchi ahashile kulinga mulimo wacho? Iye kalingile yeswe yize mahasa hanga afunge atu ja Zambi. Yatunga yikalakala ya mambonge a mu Yunda, nawa yakunga chilombo chinene cha tujita kuhiana 1,160,000. (2 Sango 17:12-19) Kulutwe, Yehosofate yapalika mu umwe kapinda. Chizavu chinene cha tujita twa A-Amone, A-Moape ni malunga a ku mulundu wa Sere, yalilulieka aye ni kwasa nenyi jita, chocho mwono wa Yehosofate, usoko wenyi ni wa vungu lieswe yiupwa mu ponde. (2 Sango 20:1, 2) Yika Yehosofate alingile? Iye yafupa ukwaso ni tachi kuli Yehova. Yino yinalite ni chiyulo chize chili ha Yishima 3:5, 6. (Tanga.) Kulemba cha kulikehesa cha Yehosofate chili ha 2 Sango ja Mianangana 20:5-12, chinasolola ngwo iye kapwile ni kujikijila hali Tato wa mu malilu. Kuchi Yehova akumbulwile kulemba cha Yehosofate?

7. Kuchi Yehova akumbulwile kulemba cha Yehosofate?

 ⁷ Yehova kahanjikile ni Yehosofate kupalikila muli umwe Ka-Levi avuluka ngwo, Jahaziele. Yehova yamba ngwenyi: “Lilongenu, manenu chizechene nukamone ulamwino wa Yehova hali yenu.” (2 Sango 20:13-17) Usongwelo uze Yehosofate atambwile, walisele ni uze te akuhana hakutwala ku jita! Usongwelo wacho kuwakakatukile kuli mutu, alioze kuli Yehova. Ha kujikijila kuli Zambi, Yehosofate yononokena usongwelo wacho. Muze iye ni atu jenyi ayile ni kulimika ni akwa-kole jo, shimbu ase kulutwe tujita waze te anyingika kwasa jita, iye yasa akwa-kwimba waze te keshi ni yuma ya kwasa nayo jita. Yehova yamanununa chilakenyo chenyi chize alingile kuli Yehosofate, chocho Iye yakumba chizavu cha akwa-kole.—2 Sango 20:18-23.

8. Yika malunga mahasa kulilongesa ha chilweza cha Yehosofate?

⁸ Malunga, yenu munuhasa kulilongesa yuma yinji ha chilweza cha Yehosofate. Yenu nuli ni chiteli cha kufunga kanawa usoko wenu, kashika nwakukalakala chinji hanga nwafunge ni kwakwasa. Muze nwakupalika mu yipikalo, hanji nwakunyonga ngwenu munuhasa kuyihwisa ukawenu. Alioze kanda ujikijila ha tachi je. Shimbu uchilinge, lemba kuli Yehova muze uli ukawe, nawa lemba ni mbunge yeswe muze uli ni mukwenu-pwo. Fupa usongwelo wa Yehova mu Mbimbiliya ni ha mikanda ya mu ululikiso wenyi. Chikwo nawa, kaula yiyulo yize muwanamo. Atu amwe hanji keshi kutayiza yiyulo yize mukwata kulita ni Mbimbiliya, nawa mahasa kwamba ngwo yena unahepuka. Ayo mahasa kwamba nawa ngwo, mbongo ni yikumba ye muyihasa kukukwasa kufunga kanawa usoko we. Alioze, iwuluka chilweza cha Yehosofate; iye kajikijilile muli Yehova nawa yachisolola mu yitanga. Yehova kakehukile lunga yono washishika, iye nawa kechi kukwehuka. (Samu 37:28; Hepre. 13:5) Yika nawa waze alimbata mahasa kulinga hanga apwe ni uwahililo wamwenemwene?

9. Yika tunanyingika hakutwala kuli profeta Izaia ni mukwo-pwo?

⁹ Profeta Izaia ni mukwo-pwo, kapwile ni kulemesa chinji mulimo wa Yehova. Izaia kapwile profeta, nawa mukwo-pwo neye kota kapwile profeta, kashika Mbimbiliya yakumuvuluka ngwo, “profeta wa pwo.” (Iza. 8:1-4) Chinasoloka zwalala ngwo, lunga yono ni mukwo-pwo, kasele uwayilo wa Yehova ha chihela chitangu ku mwono wo. Ayo kali chilweza chipema kuli waze alimbata musono!

10. Kuchi kulilongesa uprofeto wa mu Mbimbiliya muchihasa kukwasa waze alimbata?

¹⁰ Musono, waze alimbata mahasa kwimbulula chilweza cha Izaia ni mukwo-pwo ha kulinga yeswe yize mahasa mu mulimo wa Yehova. Ayo mahasa kukolesa ufulielo wo muli Yehova ha kulilongesa uprofeto wa mu Mbimbiliya hamuwika, ni kumona chize wakumanunuka. * (Titu 1:2) Mahasa kunyonga yize mahasa kulinga hanga akwase ha umanunuko wa umwe uprofeto wa mu Mbimbiliya. Chakutalilaho, ayo mahasa kukwasa ha umanunuko wa uprofeto wa Yesu hakutwala ku kwambujola sango lipema shimbu songo kanda liheta. (Mateu 24:14) Muze waze alimbata malilongesa chinji uprofeto wa mu Mbimbiliya ni kupwa ni shindakenyo ngwo nihindu wakumanunuka, chino muchaakwasa hanga alihane chinji mu mulimo wa Yehova.

11. Yika Akwila ni Prisila ahashile kulinga, nawa mumu liaka?

¹¹ Waze machilimbata, mahasa kulilongesa ha chilweza cha Akwila ni Prisila, lunga ni pwo A-Yunda waze apwile mu Roma. Ayo kevwile sango lipema hakutwala kuli Yesu, chocho yapwa akwa-Kristu. Kwamba pundu, ayo te kakuzanga chinji mwono uze apwile nawo. Alioze, mwono wo walumukine susumuku muze nguvulu Kelautiu ahumine A-Yunda eswe mu Roma. Tutalenu chize yino yakwachile ha mwono wa Akwila ni Prisila. Ayo kahichikile chihela chize te anyingika kanawa, yaya ni kutwama ku chihela chikwo ni kuputuka cheka mulimo wo wa kutunga mbalaka. Shina yuma yize yalumukine ku mwono wo, yaakwikile kusa Wanangana wa Zambi ha chihela chitangu? Yena kota unanyingika kumbululo lia chihula chino. Kuze ayile ku Korindu, Akwila ni Prisila yakwasa chikungulwila chize awanyine ni kukalakala hamuwika ni postolo Paulu hanga atakamise mandumbu. Kulutwe, ayo yaya ku mbonge jikwo kuze te kunafupiwa chinji akwa-kwambujola. (Yili. 18:18-21; Roma 16:3-5) Kwamba pundu, ayo kapwile ni mulimo unji, chipwe chocho kawanyine yiwape yinji!

12. Mumu liaka waze alimbata atamba kutesa yize malinga ku spiritu?

¹² Musono, waze alimbata mahasa kwimbulula chilweza cha Akwila ni Prisila ha kusa Wanangana wa Zambi ha chihela chitangu ku mwono wo. Waze anambe kulimbata, mahasa kutesa kanawa chikuma chino muze achili tusendo. Muchilita waze anafupu kulimbata kukwata yiyulo hamuwika ni kusa tachi hanga amanunune yize hanatese kulinga ku spiritu; chino muchaaha uhashi wa kumona ukwaso wa Yehova ku mwono wo. (Chilu. 4:9, 12) Tutalenu chilweza cha Russell ni Elizabeth. Russell yamba ngwenyi: “Ha mashimbu a usendo wetu, twapwile ni kuhanjika ha yuma yize te mutulinga ku spiritu.” Elizabeth yamba ngwenyi: “Twaliangile kuhanjika ha yuma yino hanga kulutwe muze mutuheta ha mashimbu a kukwata yiyulo yikwo, yichine kutukwika kulinga yuma ya ku spiritu yize twatesele.” Hachino, Russell ni  Elizabeth yapwa ni uhashi wa kwalukila ku Micronésia kuze te kunafupiwa chinji akwa-kwambujola.

13. Kulita ni Samu 28:7, yika mutuyuka nyi twafuliela muli Yehova?

¹³ Chizechene ngwe Russell ni Elizabeth, mandumbu anji waze alimbata hanasakula kupwa ni mwono washi hanga alihane chinji mu mulimo wa kwambujola ni kulongesa. Muze waze alimbata akutesa kulihana chinji mu mulimo wa Yehova ni kukalakala hamuwika hanga alinge yize atesele, kakupwa ni yiwape yinji. Ayo kakumona chize Yehova akwafunga. Chino chakukolesa ufulielo wo muli Yehova, nawa kakupwa ni uwahililo wamwenemwene.—Tanga Samu 28:7.

14. Kuchi postolo Petulu ni mukwo-pwo asolwele ngwo te kakujikijila ha chilakenyo chili ha Mateu 6:25, 31-34?

¹⁴ Waze alimbata, mahasa nawa kulilongesa ha chilweza cha postolo Petulu ni mukwo-pwo. Muze Petulu anyingikine Yesu, hakupalika cha tukweji asambano hanji mwaka umuwika, iye yakwata chiyulo chilemu chinji. Petulu kapwile ni kulinga mulimo wa kuta yishi hanga akwase usoko wenyi. Muze Yesu amusanyikine hanga amukaule mu mulimo wa shimbu lieswe, Petulu te katamba kunyonga ha chize usoko wenyi muupwa. (Luka 5:1-11) Alioze, yasakula kukaula Yesu mu mulimo wenyi wa kwambujola. Iye kakwachile chiyulo cha mana! Nawa tuli ni yikuma yize yinatwehe shindakenyo ngwo, pwo lia Petulu kakwashile chiyulo cha mukwo-lunga. Mbimbiliya yinasolola ngwo, hanyima lia uhindukilo wa Yesu, pwo lia Petulu ha mashimbu amwe neye kapwile ni kuya mu wenyi ni mukwo-lunga. (1 Kori. 9:5) Kwamba pundu, mumu lia chilweza chipema cha mukwo-pwo, Petulu kahashile kuhana yiyulo kuli malunga ni mapwo akwa-Kristu ni mbunge yitoma. (1 Petu. 3:1-7) Yehova kalakenyene ngwenyi, mafunga waze masa Wanangana wenyi ha chihela chitangu ku mwono wo. Kwamba umwenemwene, Petulu ni mukwo-pwo kajikijilile ha chilakenyo chino.—Tanga Mateu 6:25, 31-34.

15. Yika chilweza cha Tiago ni Esther chinatulongesa?

¹⁵ Nyi hinwalinga yimwe miaka chize haze nwalimbachile, kuchi munuhasa kununga ni kulihana chinji mu mulimo wa Yehova? Jila yimwe yili kulilongesa ha yilweza ya mandumbu akwo waze alimbata. Chakutalilaho, munuhasa kutanga yikuma yinambe ngwo, “Ayo Kalihanyine Hanga Akwase.” Yikuma yacho yakwashile Tiago ni Esther a ku Brasil, hanga azange chinji kuya ni kukwasa kuze te kunafupiwa ukwaso. Tiago yamba ngwenyi: “Kunyingika chize Yehova akukwasa tuvumbi twenyi ha matangwa jetu, chatuhele shindakenyo ngwetu, Yehova matusongwela ni kutukwasa.” Ha mwaka 2014, Tiago ni Esther yaya ni kukalakala ku Paraguai, kwenako anakalakalila mu njiza ya limi lia Putu ndo musono. Esther yamba ngwenyi: “Chisoneko chize twakuzanga chinji chili A-Efwesu 3:20. Matangwa eswe, twakumona umanunuko wa maliji wano mu mulimo wa Yehova.” Ha mukanda uno wa A-Efwesu, Paulu yalakenya ngwenyi, Yehova te matwaha yuma yinji kuhiana yize mutumwita. Chilakenyo chino chili chamwenemwene!

16. Nyi waze alimbata manyonga ha yize atesele kulinga ku spiritu, kuli aya atamba kwita ukwaso?

¹⁶ Musono, waze machilimbata mahasa kuyuka ha yilweza ya waze akujikijila muli Yehova. Mandumbu amwe waze alimbata, hanalingi miaka yinji mu mulimo wa shimbu lieswe. Nyi nunanyongo nawa ha yize nwatesele  kulinga ku spiritu, munuhasa kwita ukwaso wo. Yino yili jila yikwo yize munusolwelamo ngwenu, nwakujikijila muli Yehova. (Yishi. 22:17, 19) Makulwana a mu chikungulwila no mahasa kukwasa waze machilimbata hanga atese yize malinga ku ufulielo ni kuyikaula.

17. Yika yalingiwile kuli Klaus ni Marisa, nawa yika chilweza cho chinatulongesa?

¹⁷ Ha mashimbu amwe, mutuhasa kuzanga kulingila Yehova mu jila yimwe, alioze iye mahasa kututwala mu jila yeka. Tutalenu chilweza cha Klaus ni Marisa waze twatongola ku uputukilo wa mutwe uno. Hanyima lia miaka yitatu ya ulo wo, ayo yaya ku Finlândia hanga akwase kutunga Mbetele. Alioze kulutwe yanyingika ngwo, te kechi kutwamako tukweji asambano. Ku uputukilo yanenganyana. Hanyima lia yino, yaatuma mu chifuchi chikwo hanga aye ni kulilongesa limi lia Árabe. Musono, ayo kanawahilila chinji ha kwambujola kuli atu waze akuhanjika Árabe mu chifuchi chacho. Ha kunyonga kunyima, Marisa yamba ngwenyi: “Nevwile woma wakulinga chuma chize te kanda nguchilinga kama ni kujikijila muli Yehova ni mbunge yeswe. Alioze, namwene chize Yehova atukwashile mu mutapu uze te kutushi ni kushimbwila. Yuma yino yeswe, yangukwashile kujikijila chinji muli Yehova.” Ngwe chize chilweza chino chinasolola, munuhasa kupwa ni shindakenyo ngwenu, Yehova manunga ni kunukwasa nyi munujikijila muli iye ni mbunge yenu yeswe.

18. Yika waze alimbata mahasa kulinga mba ase Wanangana ha chihela chitangu?

¹⁸ Ulo uli chawana cha Yehova. (Mateu 19:5, 6) Nawa iye kanazange hanga waze alimbata ayuke ha chawana chino. (Yishi. 5:18) Mandumbu waze nuchili aha mu ulo, shina hinwanyonga ha chize nunambate mwono wenu? Kutala nunase tachi hanga nusolole kuli Yehova ngwenu, nunasakwilila ha yeswe yize ananulingila? Lembenu kuli Yehova hakutwala ku chikuma chino. Fupenu yiyulo ya mu Mbimbiliya yize yinatale ha chikuma chenu. Hanyima, kaulenu chiyulo chize Yehova manwaha. Nyi nwachilinga, munuhasa kupwa ni shindakenyo ngwenu, munuwahilila ni kuzuka yiwape mumu lia kusa Wanangana ha chihela chitangu ku mwono wenu!