1. Chihula chika mutuhasa kulihula?

SHINA wakulipikala muze wakunyonga ha yuma yize muyikalingiwa kulutwe lia matangwa, ngwe unongeso wa uwayilo wa mahuza, kutulukukila kuli Ngoke wa Mangoke ni jita ya Armagedone? Hanji wakulihula ngwe: “Shina mungukahasa kununga ni kushishika muze yuma yacho muyikalingiwa?” Nyi hiunapu ni manyonga wano, maliji a Yesu waze ali ha chisoneko chinakwate mutwe uno, makukwasa chinji. Iye kalwezele tumbaji twenyi ngwenyi: “Mbunge jenu kanda jilipikala . . . , fulielenu.” (Yoa. 14:1) Nyi mutupwa ni ufulielo ukolo, kutuchi kwivwa woma wa yuma yize muyilingiwa kulutwe.

2. Kuchi mutuhasa kukolesa ufulielo wetu, nawa yika mutumona ha mutwe uno?

² Nyi twanyonga ha chize twakukumba yeseko musono, muchitukwasa kukolesa ufulielo wetu hanga tukanyongonone ha yeseko yize muyiza kulutwe. Kunyonga ha yize twakulinga muze twakupalika mu yeseko ya ufulielo musono, chakutukwasa kumona haze tunafupiwa kukolesa ufulielo wetu. Hita shimbu twakupalika mu cheseko, ufulielo wetu wakukola. Chino muchikatukwasa kunyongonona mu yeseko yize muyiza kulutwe. Ha mutwe uno, mutumonaho yuma yiwana yize tumbaji twa Yesu apalikile yize yasolwele ngwo, ayo te kanafupiwa chinji ufulielo. Hanyima, mba mutumona chize mutuhasa kunyongonona mu yuma ngwe yize tumbaji twa Yesu apalikile ni chize muyihasa kutukukwasa kupalika mu yuma yize muyilingiwa kulutwe.

3. Kulita ni Mateu 6:30, 33, yika Yesu alumbunwine hakutwala ku ufulielo?

³ Chili chipema mwata wa mu usoko kusa tachi hanga ahane kulia chakumbana ni zuwo kuli mukwo-pwo ni ana jenyi. Alioze ha mashimbu wano akalu, chino hi chashi ko. Amwe a kuli  mandumbu jetu hanatokesa mulimo wo nawa chinapu chikalu kuwana mulimo weka chipwe ngwe kanase tachi jinji. Mandumbu akwo, kalitunyine milimo yize akwa-Kristu katambile kulinga. Ha yuma ngwe yino, twatamba kufuliela ngwetu, Yehova matwaha yeswe yize mutufupiwa hanga tufunge usoko wetu. Yesu kalumbunwine zwalala chikuma chino kuli tumbaji twenyi ha Longeso lia ha Mulundu. (Tanga Mateu 6:30, 33.) Muze mutupwa ni shindakenyo ngwetu, Yehova kechi kutwehuka nilimwe tangwa, mutulihulikila ha yuma yahiana ulemu, mulimo wa Wanangana. Muze mutumona chize Yehova akutwaha yize tunafupiwa ku musunya, mutukundama kuli iye, nawa ufulielo wetu muukola.

4-5. Yika yakwashile umwe usoko mba ukumbe kusakalala cha kuwana kulia cha hita tangwa?

⁴ Tutalenu chize Yehova akwashile umwe usoko mu Venezuela. Usoko wacho te wakusakalala ha kuwana kulia. Usoko wa Castro, kapwile ni kuwana kulia mu munda uze apwile nawo. Chocho, tangwa limwe yingalwe waze apwile ni mata yaya ni kwatambula munda wacho. Miguel mwata wa mu usoko, yamba ngwenyi: “Kulia chize tuli nacho musono, chakukatuka mu munda uze twalimine mu chihela chize atuhele. Matangwa eswe, nakwita kuli Yehova hanga atwehe kulia chize tunafupu ha hita tangwa.” Mwono unakaliwa chinji kuli asoko wano, alioze, ayo kakufuliela ngwo, Tata yetu wa zango mahasa kwaha yeswe yize anafupiwa. Hachino, kakuhasa kukunguluka ni kwambujola mashimbu eswe. Ayo kakusa Wanangana ha chihela chitangu ku mwono wo, nawa Yehova kakwaha yeswe yize anafupiwa.

⁵ Ha mashimbu wano akalu, Miguel ni mukwo-pwo Yurai, kakulihulikila ha chize Yehova akwafunga. Ha mashimbu amwe, Yehova kakuzachisa mandumbu mu chikungulwila hanga aehe yuma yize anafupiwa hanji kukwasa Miguel hanga awane milimo yize malinga. Ha mashimbu akwo, Yehova kakuzachisa Mutango hanga ukwase asoko jacho ha yize anafupiwa. Yehova kananungu ni kukwasa usoko wa Castro. Hachino, ufulielo wo unanungu ni kukola. Muze te hahanjika hakutwala ku umwe ukwaso uze Yehova aahele, mwano wa pwo wa mukulwana Yoselin, yamba ngwenyi: “Nakutakama chinji ha kumona ni meso jami chize Yehova akutukwasa. Yami nakumumona ngwe sepa liami yoze munguhasa kujikijila, nawa manunga ni kungukwasa.” Yamba nawa ngwenyi: “Yeseko yize twapalika, yatukwasa kulilulieka ha yeseko yikalu yize mutukapalika kulutwe.”

6. Kuchi muhasa kukolesa ufulielo we nyi unahono mbongo ja kulikwasa najo?

⁶ Shina unahono mbongo ja kulikwasa najo? Nyi chenacho, unapalika ha mashimbu akalu chinji. Alioze, chipwe ngwe unapalika ha mashimbu akalu, muhasa kuzachisa mashimbu jacho hanga ukolese ufulielo we. Lemba kuli Yehova, nawa tanga maliji a Yesu waze ali ha Mateu 6:25-34 ni kwapukuna. Nyonga ha yilweza ya mandumbu jetu musono, yize yinasolola chize Yehova akufunga waze akulihulikila chinji mu mulimo wenyi. (1 Kori. 15:58) Nyi wachilinga, muchikukwasa kujikijila chinji muli  Yehova ngwo, makukwasa ngwe chize akukwasa mandumbu akwo waze akupalika mu yipikalo ngwe yize yena unapalika. Iye kananyingika yize unafupiwa, nawa kananyingika jila yize makuhelamo yuma yacho. Muze mumona chize Yehova anakukwase, ufulielo we muli iye muukola, nawa chino muchikukwasa ha yeseko yize muupalika kulutwe.—Haba. 3:17, 18.

7. Kulita ni Mateu 8:23-26, kuchi “kangonga munene” esekele ufulielo wa tumbaji twa Yesu?

⁷ Muze Yesu ni tumbaji twenyi te analingi wenyi mu ulungu, susumuku yapalika mu umwe kangonga munene. Yesu yazachisa yuma yacho hanga akwase tumbaji twenyi kunyingika ngwo, kanafupiwa kukolesa ufulielo wo. (Tanga Mateu 8:23-26.) Kangonga yaputuka kwoka, chocho mikanya yiyizalisa ulungu ni meya, alioze Yesu yanunga ni kupomba ngwe kushi kulingiwa niyimwe. Tumbaji yaputuka kwivwa woma unji, hachino, yamuhindwisa ni kumwita hanga aalamwine. Ni zango lieswe, Yesu yaahula ngwenyi: “Enu akwa ufulielo ukepe, kuchi te nunevu woma?” Tumbaji kachi kanyingikine ngwo, Yehova te mahasa kufunga Yesu hamwe ni waze eswe apwile nenyi. Yika twalilongesa ha chikuma chino? Twalilongesa ngwetu, ufulielo ukolo muuhasa kutukwasa kukumba “kangonga munene” hanji yipikalo yeswayo muyihasa kupwa ngwe kangonga.

8-9. Cheseko chika pangi Anel apalikile, nawa yika yamukwashile?

⁸ Tutalenu yize yalingiwile kuli Anel, umwe pangi twamishi wa ku Porto Rico. Iye kapalikile mu chimwe cheseko chikalu chize chakolesele ufulielo wenyi. Kuze apwile, kunakalingiwa umwe kakundukundu. Cheseko chacho chalingiwile ha mwaka 2017, muze furacão Maria apuzwile zuwo lia pangi Anel. Nawa mumu lia kakundukundu wacho, pangi yetu yatokesa mulimo. Iye yamba ngwenyi: “Ha matangwa jacho akalu, ngunakasakalala chinji, alioze yingulilongesa kujikijila muli Yehova, ha kulemba kuli iye ni kusa tachi hanga kusakalala chihone kunguzeyesa.”

⁹ Pangi Anel kanewuluka chuma chikwo chize chamukwashile kunyongonona ha matangwa jacho akalu. Chuma chacho, chili kwononoka. Yamba ngwenyi: “Kwononokena usongwelo wa mu ululikiso wa Yehova, changukwashile kulihumikiza. Namwene chize Yehova angukwashile kupalikila kuli mandumbu jami a ku ufulielo. Ayo kangukolwezele ni kungwaha yeswe yize te ngunafupiwa ku mwono wami.” Yawezela nawa ngwenyi: “Yehova kanguhele yuma yinji, kuhiana yize te munguhasa kumwita, nawa ufulielo wami yiukola chinji.”

10. Yika muhasa kulinga nyi mupalika mu “kangonga munene”?

¹⁰ Shina unapalika mu umwe “kangonga munene”? Muchihasa kupwa hanji unamono lamba mumu lia luyinda wa chisemewa. Hanji unanenganyana ha kuhona kunyingika yize mulinga mumu lia musongo upi uze uli nawo. Ha mashimbu amwe, muhasa kusakalala, alioze kanda wecha hanga kusakalala chikukwike kujikijila muli Yehova. Lemba kuli iye ni mbunge ye  yeswe. Kolesa ufulielo we ha kupukuna ha yisuho yeswe yize Yehova akukwashile. (Samu 77:11, 12) Muhasa kupwa ni shindakenyo ngwe, Yehova kechi keza kakwehuka nilimwe tangwa—chipwe haliapwila, chipwe kulutwe.

11. Mumu liaka twatamba kwononokena waze apwa tusongo?

¹¹ Yika nawa muyihasa kutukwasa hanga tunyongonone mu yeseko? Kuchi chilweza cha Anel chasolola ulemu wa kwononoka? Lilongese kujikijila hali atu waze Yehova ni Yesu akujikijila. Ha mashimbu amwe, mandumbu wano mahasa kutwaha usongwelo uze muusoloka ngwe kuushi ni ulemu. Alioze, Yehova nihindu kakuwahisa atu waze akwononoka. Twakulilongesa mu Mbimbiliya ni ha sango ja tuvumbi twa Yehova ashishika ngwo, kwononoka chakulamwina mwono. (Kutuhu. 14:1-4; 2 Sango 20:17) Kashika tupukunenu ha yilweza yacho. Nyi twachilinga, mutukolesa zango lietu lia kukaula usongwelo wa mu ululikiso wa Yehova haliapwila ni kulutwe lia matangwa. (Hepre. 13:17) Chikwo nawa, chino muchitukwasa kupwa ni hamu lia kukumba kangonga munene yoze unakundama.—Yishi. 3:25.

12. Kuchi chilweza chili ha Luka 18:1-8 chinatukwase kumona kulita chize chili ha kupwa ni ufulielo ni kunyongonona muze matulinga yuma yipi?

¹² Yesu kanyingikine ngwenyi, yuma ya katonde te muyeseka ufulielo wa tumbaji twenyi. Mba aakwase anyongonone mu yuma yacho, Yesu yaatela chishima chize tunawane mu mukanda wa Luka. Ha chishima chacho, Yesu kambile ngwenyi, umwe tuliwa te kanaliumbu kuli umwe sopi hanga amupatwile kanawa mulonga wenyi. Iye kapwile ni shindakenyo ngwenyi, nyi manunga ni kwita, sopi wacho te mamwivwa. Yino ye sopi alingile. Tunanyingika ngwetu, Yehova hi chihenge ko ngwe sopi wa ha chishima cha Yesu. Kashika Yesu ambile ngwenyi: “Mba te Zambi kechi kukala waze hanaatongola, waze akukololoka kuli iye mwalwa ni ufuku?” (Tanga Luka 18:1-8.) Yesu yawezela nawa ngwenyi: ‘Muze mwe Mwana Mutu makeza, shina makawana ufulielo uno hano hashi, nyi?’ Yika twalilongesa? Twalilongesa ngwetu, muze mutupalika mu yuma yipi, mutufupiwa ufulielo ukolo ngwe wa tuliwa wacho. Twakusolola ngwetu tukwete ufulielo uno muze twakulihumikiza ni kunyongonona. Nyi mutupwa ni ufulielo wa mutapu au, mutuhasa kupwa ni shindakenyo ngwetu, Yehova matukwasa ha shimbu lieswalio. Twatamba nawa kufuliela ngwetu, yilemba yikwete ndundo. Ha mashimbu amwe, Yehova mahasa kukumbulula yilemba yetu mu jila yize kutushi ni kushimbwila.

13. Kuchi kulemba chakwashile asoko waze ambile kushiha?

¹³ Tutalenu chilweza cha pangi Vero, yoze watwama mu República Democrática do Congo. Vero, mukwo-lunga ni mwano wa pwo wa miaka 15, te kanachina mu chihunda cho mumu mwanjilile chizavu cha maswalale yingalwe. Muze te anachina, yaliwana ni amwe a kuli maswalale jacho mu jila, yafupa kwashiha. Muze Vero  te analila, mwanenyi yafupa kumuholesa ha kulemba ni liji mwilu ni kuvuluka chinji jina lia Yehova mu yilemba yenyi. Muze ahwishile kulemba, mwata wa maswalale jacho yamutala ni kumuhula ngwenyi: “Yena mwana-pwo, iya wakulongesele kulemba?” Iye yakumbulula ngwenyi: “Mama mwe wangulongesele kulemba ha kuzachisa maliji waze ali ha Mateu 6:9-13.” Mwata wacho yamba ngwenyi: “Kanuke, yako ni sambukila hamwe ni yisemi je, nawa Yehova Zambi yenu, anunge ni kunufunga!”

14. Yika muyihasa kweseka ufulielo wetu, nawa yika muyitukwasa mba tununge ni kunyongonona?

¹⁴ Sango ngwe jino, jakutukwasa tumone ulemu wa kulemba. Mba nyi yilemba ye kayikumbulwile kawashi hanji ngwe chize te unazange? Chizechene ngwe tuliwa wa ha chishima cha Yesu, nunga ni kulemba. Fuliela ngwe, Yehova kechi kakwehuka nilimwe tangwa, nawa ngwe, iye makumbulula yilemba ye ha shimbu lieswalio hanji mu jila yeswayo. Nunga ni kwita spiritu yisandu ya Yehova. (Fwili. 4:13) Iwuluka ngwe, kwasala hakehe, Yehova makwaha yiwape yinji, nawa muvulama lamba lieswe lize wapalika. Nyi wanunga ni kunyongonona mu yeseko ni ukwaso wa Yehova, muupwa ni tachi ni uhashi wa kunyongonona mu yeseko yize muyiza kulutwe.—1 Petu. 1:6, 7.

15. Kulita ni Mateu 17:19, 20, kapinda muka apwile nenyi tumbaji twa Yesu?

¹⁵ Yesu kalongesele tumbaji twenyi ngwenyi, ufulielo te muwakwasa kukumba kapinda mweswawo mapwa nenyi. (Tanga Mateu 17:19, 20.) Ha yisuho yinji, tumbaji kahashile kutuhwisa andemoniu; alioze tangwa limwe, ayo kakahashile kuchilinga. Mumu liaka? Yesu yalumbununa ngwenyi, ayo te kanafupiwa ufulielo ukolo. Iye yamba ngwenyi, nyi ayo mapwa ni ufulielo ukolo, kachi te mahasa kututulula milundu, hanji ngwetu, kukumba yipikalo chipwe muyipwa yinene! Ni yetu musono, mutuhasa kupalika mu yuma yikalu, yize mutumona ngwe kutuchi kuhasa kuyikumba.

16. Kuchi ufulielo wakwashile Geydi anyongonone muze mukwo-lunga amushihile?

¹⁶ Tutalenu chilweza cha pangi Geydi, wa ku Guatemala. Mukwo-lunga Edi, kamushihile muze te anakatuka ku kukunguluka hanga aye ku zuwo. Kuchi ufulielo wakwashile pangi Geydi kupalika mu luyinda wacho? Iye yamba ngwenyi: “Kulemba changukwashile kukunjika yipikalo yami yeswe kuli Yehova, hachino, yingupwa ni sambukila ya ku mbunge. Namwene chize Yehova angukwashile kupalikila kuli asoko ni masepa jami mu chikungulwila. Kulihulikila mu mulimo wa Yehova, chatepulwile yikola yami, nawa changukwashile nguhone kulihulumba ha yize muyilingiwa kulutwe. Mu yuma yino napalika, nalilongesa ngwami, chipwe ngwe mungupalika mu yeseko yeswayo kulutwe, nihindu Yehova, ululikiso wenyi ni Yesu, mangukwasa ngununge ni kunyongonona.”

17. Yika mutuhasa kulinga nyi mutupalika mu yipikalo yize yili ngwe mulundu?

¹⁷ Shina unanenganyana mumu lia kufwisa mutu yoze wazanga chinji? Nyi chenacho, sako mashimbu utange sango ja mu Mbimbiliya ja  tuvumbi twa Zambi ashishika waze ahindwishile mu ufwe, hanga ukolese ufulielo we ha kutalatala cha uhindukilo. Shina unanenganyana mumu umwe mu usoko we hanahichika umwenemwene? Lilongese hanga upwe ni shindakenyo ngwe, jila yize Yehova akufumbilamo yalita mashimbu eswe. Chipwe ngwe unapalika mu kapinda mweswawo, nihindu mumone ngwe kali jila yakukoleselamo ufulielo we. Lweza Yehova yuma yeswe yize unapalika. Kanda ulihandununa ni mandumbu je, alioze nunga ni kupwa hamwe no. (Yishi. 18:1) Chipwe ngwe mulila muze mwiwuluka yuma yize yalingiwile kunyima, nihindu linga yuma yize muyikukwasa kunyongonona. (Samu 126:5, 6) Nunga ni kukunguluka mashimbu eswe, kwambujola ni kutanga Mbimbiliya. Nawa lihulikile ha yuma yipema yize Yehova analakenya kulutwe lia matangwa. Muze mumona chize Yehova anakukwase, ufulielo we muununga ni kukola.

18. Yika watamba kulinga nyi wanyingika ngwe kuushi ni ufulielo ukolo?

¹⁸ Nyi yeseko yize wapalikile kunyima ni ya musono yinasolola ngwo kuushi ni ufulielo ukolo, kanda uhonga. Mona ulelu wacho ngwe jila yize mukolesalamo ufulielo we. Eta ufulielo ngwe chize apostolo ja Yesu etele. Ayo yeta ngwo: “Weza kama ku ufulielo wetu!” (Luka 17:5) Chikwo nawa, nyonga ha yilweza yize twalilongesa ha mutwe uno. Ngwe Miguel ni Yurai, iwuluka yisuho yeswe yize Yehova akukwashile. Ngwe mwana wa Vero ni Anel, nunga ni kulemba kuli Yehova, chipi-chipi nyi unapalika ha mashimbu akalu. Nawa ngwe Geydi, nyingika ngwe Yehova mahasa kukwaha ukwaso uze unafupiwa kupalikila muli asoko hanji masepa je. Nyi wecha Yehova hanga akukwase kukumba yeseko yize unapalika musono, muupwa ni shindakenyo ngwe, iye makukwasa nawa kukumba yeseko yeswayo muyiza kulutwe.

19. Shindakenyo yika Yesu apwile nayo, nawa shindakenyo yika muhasa kupwa nayo?

¹⁹ Yesu kasolwele haze tumbaji twenyi te mafupiwa kukolesa ufulielo wo, alioze kapwile nawa ni shindakenyo ngwenyi, ni ukwaso wa Yehova ayo te mahasa kukumba yeseko yize muyiza kulutwe. (Yoa. 14:1; 16:33) Chikwo nawa, iye kapwile ni shindakenyo ngwenyi, te mukupwa mbunga yinene ya atu waze makalamwina ha luyinda munene mumu lia ufulielo wo ukolo. (Uso. 7:9, 14) Shina ni yena mukapwa hakachi ka atu jacho? Muhasa kupwaho mumu lia chawana cha vumbi lia Yehova. Chipwe chocho, watamba kuzachisa uhashi weswawo uli nawo haliapwila hanga upwe ni ufulielo ni kuukolesa!—Hepre. 10:39.