SHINA MUHASA KUSAKULA CHIZE MWONO WE MUUKAPWA KULUTWE LIA MATANGWA? Atu anji kakutayiza ngwo yuma yize hanatese kulu ye yakusongwela mwono wo, hi kusakulako. Muze ayo keshi kuhasa kulinga chuma chize anazange, kakwamba ngwo, mumu hanangushingi hanga nguhone kuchilinga. Nawa ngwo, “hanayitese kulu hanga yilingiwe!”

Akwo kakunenganyana nyi kanamono lamba, ni uhenge hano hashi hapi. Ha mashimbu amwe, ayo kakweseka kululieka mwono wo, alioze jita, ungulungulu, luyinda ni yikola yakupihisa nawa mwono wo. Ha chino, ayo kakulihula ngwo, “Mumu liaka yuma yacho yinalingiwa?”

Chochene, yuma yimwe ku mwono muyihasa kupihisa yiyulo yetu. (Chilumbununyi 9:11) Alioze, hakutwala ku mwono wa kulutwe lia matangwa, yena mwene mwe watamba kuusakula. Kwamba pundu, Mbimbiliya yinasolola ngwo, yena mwene mwe watamba kusakula chize mwono we muukapwa kulutwe lia matangwa. Tutalenu yize yinambe.

Mose, kasongo wa vungu likulu lia Izalele, kalwezele atu muze te kwasala hakehe hanga anjile mu Chifuchi cha Chilakenyo ngwo, Yehova kanambe ngwenyi: “Hinasa kumeso jenu mwono ni kufwa, chiwape ni shingo, kashika, tongolenu mwono hanga nupwe ni mwono, ni yenu ni ana jenu. Mukuzanga Yehova Zambi yenu, mukuzeya ku liji lienyi, mukumulalaminya.”—Shimbi Yamuchiali 30:15, 19, 20.

“Hinasa kumeso jenu mwono ni kufwa, chiwape ni shingo, kashika, tongolenu mwono hanga nupwe ni mwono, ni yenu ni ana jenu.” —Shimbi Yamuchiali 30:19

Ewa! Zambi kachijile A-Izalele mu undungo ku Engitu, nawa yalakenya kwaha utuswilo ni mwono upema mu Chifuchi cha Chilakenyo. Alioze, mwono wacho te kuuchi kulijila wene. Mba te atambule yiwape yino, ayo te katamba ‘kusakula mwono.’ Kuchi te machilinga? Ha ‘kuzanga Yehova Zambi yo, kuzeya ku liji lienyi, ni kumulalaminya.’

Chipwe musono, twatamba kusakula, nawa yize mutusakula ye muyisolola chize mwono wetu muukapwa kulutwe lia matangwa. Nyi twasakula kuzanga Zambi, ni kupanjika liji lienyi, mutusolola ngwetu tunasakula mwono—mwono wa mutolo mu paraisu hano hashi. Alioze yika yino yinalumbunuka?

Zango lili utu utangu wa Zambi. Postolo Yoano kasonekene ngwenyi, “Zambi iye zango.” (1 Yoano 4:8) Kashika, muze umwe wa kuli A-Fwariseu ahulile Yesu hakutwala ku liji linene lia shimbi, iye yamba ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe.” (Mateu 22:37) Usepa upema ni Yehova Zambi watamba kukatuka ha zango, hi ha mukunda wa woma ko. Mumu liaka twatamba kusakula kuzanga Zambi?

Zango lia Yehova hali atu, lili ngwe zango lia yisemi hali ana jo. Chipwe ngwe kali yihenge, nihindu yisemi a zango kakulongesa, kukolweza, kukwasa ni kufumba ana jo, mumu kanazange hanga awahilile ni kutwama kanawa. Yika yisemi anashimbwila kuli ana jo? Yisemi kanazange hanga ana  jo asolole zango, ni kukaula fumbo lize akwaha hanga atwame kanawa. Hi chipema ko kunyingika ngwo, Tata yetu wa mu malilu kanazange hanga tusakwile ha yuma yeswe yize iye akulinga hali yetu?

Mu Mbimbiliya liji “kupanjika” kanji-kanji linalumbunuka “kwononoka.” Che twakuzanga kwamba muze twakulweza ana ngwetu, “Panjikenu yisemi jenu.” Alioze, kupanjika liji lia Zambi chinalumbunuka kulilongesa ni kwononokena yize iye akwamba. Chipwe ngwe kutushi kumona Zambi, nihindu mutuhasa kumupanjika ha kutanga ni kukaula yize iye akwamba mu Liji lienyi, Mbimbiliya.—1 Yoano 5:3.

Mba tumone ulemu wa kupanjika liji lia Zambi, limwe tangwa Yesu kambile ngwenyi: “Hi ku mbolo wika ko, mutu mapwa ni mwono, alioze ku maliji eswe akutuhuka mu kanwa lia Zambi.” (Mateu 4:4) Kulia chili ni ulemu ku mwono wetu, alioze kunyingika Zambi chili chilemu chinji kuhiana kulia. Mumu liaka? Mwanangana wa mana Solomone, kambile ngwenyi: “Mumu mana kapwa chuma cha kutufunga chizechene ngwe mbongo kujakutufunga. Kuwaha cha yinyingi ngwami, Mana kakufunga mwono wa yoze uli no.” (Chilumbununyi 7:12) Yinyingi ni mana a Zambi muyihasa kutufunga musono, ni kutukwasa kukwata yiyulo yipema yize muyitukwasa kupwa ni mwono wa mutolo kulutwe lia matangwa.

Ewuluka chishima cha Yesu chize twashimutwinanga ha chikuma twahichika, haze anambe ngwo, “Chikolo chize cha twala ku mwono, chikehe, ni ye jila yikehe, ni waze akuyiwana akehe.” (Mateu 7:13, 14) Ha kwenda mu jila yacho, mutuwahilila nyi matusongwela kuli mutu yoze unanyingika jila yacho hanga tuhase kuwana yize tunafupu—mwono wa mutolo. Kashika, chili chilemu kukundama kuli Zambi. (Samu 16:8) Kuchi mutuhasa kukundama kuli iye?

Matangwa eswe, tuli ni yuma yinji yize twatamba kulinga. Yuma yacho muyihasa kutulalwisa ni kumbata mashimbu eswe waze te mutuzachisa hanga tulinge yize Zambi anazange. Kashika Mbimbiliya yinatweulula ngwo: “Talenu kanawa ku kwenda chenu. Kanda nwenda ngwe waze keshi mana, alioze endenu ni mana. Kuulenu we mwaka, mumu matangwa ano api.” (A-Efwesu 5:15, 16) Mutuhasa kukundama kuli Zambi ha kulemesa chinji usepa wetu ni iye.—Mateu 6:33.

Kuli yuma yinji yize yena ni usoko we munuhasa kulinga hanga nupwe ni kutalatala chipema cha kulutwe lia matangwa. Mbimbiliya yinasolola ngwo Tata yetu, Yehova Zambi, kakutuzanga chinji nawa iye kanatulweze yize twatamba kulinga. Tala yize profeta Mika ambile:

“Ena lunga, hanakulweze chize chinapeme. Yehova yika anafupu kuli yena shina kupatula ni ululi, ni kuzanga vumbi, ni kuliendela ni Zambi ye ni kulikehesa?”—Mika 6:8.

Shina yena mutayiza kwenda ni Yehova, hanga ukazuke yiwape yize analakenya waze akulinga upale wenyi? Yena mwene mwe musakula!