CHILAKENYO CHINO CHILI CHIPEMA CHINJI! Sakatanga wetu kanalakenya kutwaha mwono wa miaka yeswe hano hashi. Alioze, atu anji keshi kuchitayiza. Ayo kakwamba ngwo, ‘yetu eswe mutwiza kafwa limwe tangwa. Nawa ngwo katutangile hanga tupwe ni kufwa.’ Akwo kakwamba ngwo mutuhasa kutwama ku miaka yeswe, alioze hi hano hashi ko. Kakwamba nawa ngwo, muze mutu mafwa nawa maya mu malilu mba mapwa ni mwono wa mutolo. Kuchi yena wakunyonga?

Muze kanda uchikumbulula chihula chino, tutalenu kumbululo lia mu Mbimbiliya ha yihula yino yitatu: Chize mutu amutangile chinasolola ngwo te matwama ha miaka yingahi? Upale uka Zambi apwile nawo hakutwala kuli atu ni hano hashi? Kuchi kufwa chanjilile muli atu?

Ha yuma yeswe yili ni mwono yize Zambi atangile hano hashi, atu e wika alisa. Kuchi alisa? Mbimbiliya yinambe ngwo, atu kaatangile “mu chano” cha Zambi nawa mu “kulifwa” chenyi. (Uputukilo 1:26, 27) Yika chino chinalumbunuka? Chinalumbunuka ngwo, atu kaatangile ni ndako ni yitanga yize Zambi ali nawo, ngwe, zango ni ululi.

Chikwo nawa, atu kaatangile ni manyonga, mana, utotombo ni uhashi wakunyingika chipema ni chipi, ni zango lia kupwa ni usepa upema ni Zambi. Kashika akuhasa kuzewula yitangiwa, yizulie yipema ni miaso. Kuhiana yeswe ayi, atu e wika ali ni uhashi wa kuwayila Sakatanga. Yitanga yacho ye yakuhandununa atu ni yitangiwa yikwo yize yili hano hashi.

Achinyonga ha chino: Shina Zambi te mahana yitanga yipwahaha yipema kuli atu, hamwe ni utotombo, nyi te kanazange hanga atwame wika ha mika yikehe? Kwamba umwenemwene, Zambi kahanyine yitanga yacho ni utotombo mumu te kanazange hanga atu atwame ku miaka yeswe hano hashi.

Atu amwe kakwamba ngwo, Zambi kakazangile hanga atu atwame hano hashi ku miaka yeswe. Nawa ngwo hashi katangileho hanga atu atwameho ha mashimbu akehe, ngwe chimwe chihela cha kwesekela atu ni kwaatala nyi kanajame hanga aye mu malilu akatwame ni Zambi ku miaka yeswe. Nyi yino yili yamwenemwene, shina chinalumbunuka ngwo Zambi mwe wakuneha upi ni lamba  hano hashi? Yino yinalise ni upale wa Zambi. Hakutwala kuli iye, Mbimbiliya yinambe ngwo: “Majila jenyi eswe ja ululi. Iye Zambi ya jika; keshi uhenge; mukwa pundu, mukwa umwenemwene.”—Shimbi Yamuchiali 32:4.

Mbimbiliya yinasolola pundu upale wa Zambi hakutwala kuli atu ni hano hashi hakwamba maliji wano ngwo: “Malilu o malilu a Yehova, alioze hashi wahahanyine kuli ana ja atu.” (Samu 115:16) Ewa, Zambi katangile hashi hanga hapwe zuwo lietu lipema haze atu matwama ku miaka yeswe, nawa yasaho yuma yinji yipema yize tunafupu hanga tuwahilile ku mwono.—Uputukilo 2:8, 9.

“Malilu o malilu a Yehova, alioze hashi wahahanyine kuli ana ja atu.” —Samu 115:16

Mbimbiliya nawa yakusolola upale wa Zambi hakutwala kuli atu. Iye kalwezele Alama ni Eva ngwenyi, “nukazalise hashi, ni kuyulaho. Nukayule . . . tushitu eswe akwenda hashi.” (Uputukilo 1:28) Chapwile chiwape chinji kuli ayo kufunga ni kutohwesa Paraisu, zuwo lio lipema! Chino chinasolola ngwo, Alama ni Eva te mapwa ni mwono wa mutolo hano hashi, hi mu malilu ko.

Mumu liaka twakufwa? Mbimbiliya yinasolola ngwo, umwe mungelo wa Zambi, yoze kulutwe avulukile ngwo chihula Satana Ndiapu, kapihishile upale wa Zambi mu Endene. Kuchi achilingile?

Satana kongele yisemi jetu atangu, Alama ni Eva, hanga alichinge ha uhulia wenyi ni kulimike ni Zambi. Muze Satana ambile kuli Alama ni Eva ngwenyi, Zambi kaanaswekela chuma chipema—ulite wa kusakula ayo ene chipema ni chipi, ayo yasakula kupwa sali lia Satana ni kwehuka Zambi. Yika yalingiwile kuli ayo ha kupanjika Satana? Kulutwe lia matangwa, ayo yafwa, ngwe chize Zambi atowezele. Nawa yatokesa uhashi wo wakutwama ku miaka yeswe mu Paraisu hano hashi.—Uputukilo 2:17; 3:1-6; 5:5.

Uhulia wa Alama ni Eva wunakwate hali atu ndo ku matangwa wano. Liji lia Zambi linambe ngwo: “Kuli mutu umuwika [Alama] shili yanjilile hano hashi, ni ku shili kufwa chanjilile; chocho kufwa chahetele kuli atu eswe.” (A-Roma 5:12) Maliji wano kanasolola pundu ngwo, kufwa hi upale wa Zambi ko, alioze twakufwa hamukunda wa shili yize twahingile kuli yisemi jetu atangu.

Yuma ya uhulia yize yalingiwile mu Endene kuyakapihishile upale wa Zambi hakutwala kuli atu ni hano hashi. Ha mukunda wa zango lienyi lingunu ni ululi, Zambi yawana jila yakututusula ku shili ni ku kufwa. Postolo Paulu kalumbunwine ngwenyi: “Mumu fweto ya shili kufwa, alioze chawana cha vumbi lia Zambi, mwono wa mutolo muli Kristu Yesu Mwene wetu.” (A-Roma 6:23) Ha zango lienyi, Zambi “wechele Mwanenyi wa wika [Yesu Kristu], hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Muze Yesu alihanyine ngwe chitapo cha ukuule, iye yapulula yuma yeswe yize Alama atokesele. a

Kwasala hakehe hanga chilakenyo cha Zambi cha kupwisa hashi paraisu chimanunuke. Yena muhasa kuyuka ha chilakenyo chino nyi wakaula maliji wano a Yesu anambe ngwo: “Njilenu ku chikolo chikehe: mumu chikolo chize chatwala ku kwonwona, chinene, ni ye jila kuyatoha, ni waze akunjilamo anji. Alioze chikolo chize chatwala ku mwono, chikehe, ni ye jila yikehe, ni waze akuyiwana akehe.” (Mateu 7:13, 14) Kashika, yena mwe watamba kusakula chize mwono we muukapwa. Yika yena mulinga?