Ngwe chize Yesu ambile, sango jipema ja Wanangana wa Zambi, kanajambujola hashi heswe. (Mateu 24:14) Mukanda wa Daniele unatulweze ngwo, Wanangana uno uli unguvulu wa Zambi. Mu kapitulu 2 wa mukanda uno muli uprofeto unahanjika hakutwala kuli manguvulu hanji mianangana waze ayulile, chize ku Babilonia yikulu ndo ha matangwa jetu. Hakutwala ku yuma yize muyikalingiwa kulutwe lia matangwa, versu 44 yinambe chino:

“Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.”

Uprofeto uno ni ukwo wa mu Mbimbiliya wambile ngwo, Wanangana wa Zambi muukasalakana yiyulo yeswe ya atu ni kuneha sambukila ni kululieka kanawa yuma hano hashi. Kuchi mwono muukapwa mushi lia chiyulo cha Wanangana uno? Tutalenu yimwe yilakenyo yize kwasala hakehe hanga yimanunuke.

 Chinalumbunuka ngwo, mutukapwa ni mwono wa mutolo mu paraisu hano hashi! Yino ye Sakatanga wetu, Yehova Zambi, anatulakenya.

• JITA KUYICHI KAPWAKO NAWA

  Samu 46:9: “[Zambi] hamanununa jita ndo ku songo lia hashi; kakumakuna uta; kakupatula kunga hakachi; kakwocha ni kahia matemba a jita.”

  Hashi te muhapema chinji nyi atu mazachisa mbongo ni utotombo uze akukisa hakulinga mata akushiha no atu, hanga alinge yuma yize muyikwasa atu! Yilakenyo yino muyikamanunuka mu Wanangana wa Zambi.

• YIKOLA KUYICHI KAPWAKO NAWA

  Izaia 33:24: “Niumwe watungako mamba ngwenyi, Ngunayiji.”

  Achinyonga hashi haze mutu niumwe kechi kevwa nawa yikola ya mbunge, musongo wa câncer, kachiki, hanji yikola yikwo. Atu kechi kafupa nawa shipitali ni yitumbo. Mwono ungunu—we atu makapwa nawo kulutwe lia matangwa.

• ATU KECHI KAHONA NAWA KULIA

  Samu 72:16: “Kumukukapwa kulumbama cha mbuto mu mavu helu lia milundu.”

  Hashi muhakema kulia chinji, atu eswe makapwa nacho. Zala ni katota kuyichi kapwako nawa.

• KUKUCHI KAPWA NAWA YIKOLA, KUNENGANYANA, NI KUFWA

  Usolwelo 21:4: “[Zambi] makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.”

Yuma yino twevwa yinapeme chinji nyi ngwami? Chipwe ngwe atu anji kakutayiza ngwo mwono muukapema ngwe chize anaulakenya mu Mbimbiliya, alioze amwe, ha mukunda wa yitela yinji keshi kutayiza ngwo mukukapwa mwono wa mutolo. Chino kuchishi kutukomwesa, mumu niumwe mutu kanda achipwa kama ni mwono wa mutolo.

Atu kali mu undungo wa shili ni kufwa, nawa kakupinda ni yikola, lamba, ni kapinda mweka ni mweka ha miaka yinji, nawa atu anji kakumona kapinda wacho ngwe upale wa Zambi. Alioze, yino yinalise ni upale uze Sakatanga wetu, Yehova Zambi, ali nawo hali atu.

Mba Zambi atukwase kupwa ni shindakenyo ha yuma yeswe yize alakenyene, iye kanambe hakutwala ku liji lienyi ngwenyi: “Kulichi kuhiluka kuli yami mokomoko, alioze mulikalinga chuma chize ngunapale, mulikawaha mu milimo yize nalitumine.”—Izaia 55:11.

Yehova kanamusolola mu Mbimbiliya ngwo Zambi “yoze keshi mahuza.” (Titu 1:2) Amu Zambi hanalakenya yuma yeswe yipema yize muyikalingiwa kulutwe lia matangwa, kashika chili chipema kulihula ngwetu: Shina chamwenemwene atu mahasa kutwama ku miaka yeswe mu paraisu hano hashi? Yika twatamba kulinga hanga tukayuke ha yilakenyo ya Zambi? Yikuma yize muyisulaho, muyikukwasa kuwana kumbululo lia yihula yino.