MUTWE WA KULILONGESA 29
MWASO 121 Twatamba Kulifunga
Lifungenu ku Yeseko
“Nungenu ni kulawola, nungenu ni kulemba hanga nuhone kunjila mu cheseko.”—MATEU 26:41.
YIZE MUTULILONGESA
Mutwe uno muutukwasa kumona ngwo, twatamba kusa tachi hanga tuhone kulinga shili yinene. Muutukwasa nawa kwehuka kulinga yuma yize muyitutwala ku kulinga shili.
1-2. (a) Utowezo uka Yesu ahanyine kuli tumbaji twenyi? (b) Mumu liaka tumbaji ahichikile Yesu ukawenyi? (Tala nawa yizulie.)
YESU kambile ngwenyi: “Spiritu yinazange, alioze mujimba ulelu.” a (Mateu 26:41b) Maliji wano kanasolola ngwo, Yesu kanyingikine kanawa ngwenyi, yetu tuli yihenge, chikwo nawa, mutuhasa kulinga shili. Maliji wano kanatutoweza nawa ngwo: Twatamba kukeya hanga tuhone kulijikijila chinji. Muze te kanda achihanjika maliji wano, ha ufuku uzewene, tumbaji kambile ngwo te kechi kwehuka Yesu. (Mateu 26:35) Nyonga lio liapwile lipema, alioze kakanyingikine ngwo, ha mashimbu akalu te muchihasa kupwa chashi kuholokela mu cheseko cha kulinga yuma yize kuyalitele ni kuvulama kulinga yize yalita. Kashika Yesu aatowezele ngwenyi: “Nungenu ni kulawola, nungenu ni kulemba hanga nuhone kunjila mu cheseko.”—Mateu 26:41a.
2 Chaluyinda, tumbaji kakahashile kununga ni kulawola. Muze Yesu amukwachile, shina ayo kanungine hamwe nenyi, nyi kachinyine mumu lia woma? Mumu lia kuhona kununga ni kulawola, tumbaji yalinga yize ayo ambile ngwo te kechi kulinga. Ayo yahichika Yesu ukawenyi.—Mateu 26:56.
Yesu kalwezele tumbaji twenyi anunge ni kulawola hanga ahone kuholokela mu cheseko, alioze ayo yamuhichika ukawenyi (Tala paragrafu 1-2)
3. (a) Mba tununge ni kushishika kuli Yehova, mumu liaka twatamba kwehuka kulijikijila yetu ene? (b) Yika mutumona ha mutwe uno?
3 Kutwatambile kulilamba ha pambo ni kulijikijila ngwo mashimbu eswe mutulinga yuma yalita. Kwamba umwenemwene, tunazange kulinga yize mutuhasa hanga tuvwise Yehova kuwaha. Alioze mumu lia uhenge, mutuhasa kuholokela mu cheseko cha kulinga yuma yipi. (Roma 5:12; 7:21-23) Chikwo nawa, chakuhona kunyingika, mutuhasa kunyonga ngwetu chili chipema kulinga yuma yize kuyalitele. Mba tununge ni kushishika kuli Yehova ni kuli Mwanenyi, chili chilemu kukaula chiyulo cha Yesu cha kununga ni kulawola muze mutupwa mu cheseko cha kulinga shili. Longeso lino, mulitukwasa kumona chize mutuhasa kuchilinga. Chitangu, mutumona yuma yize twatamba kwehuka. Chamuchiali, mutumona chize mutuhasa kulifunga ku yeseko. Mba kusongo, mutumona chize mutuhasa kununga ni kulawola.
NYINGIKA KANAWA ULELU WE
4-5. Mumu liaka twatamba kukeya ni shili yize yakusoloka ngwe yikehe?
4 Chipwe shili yize yakusoloka ngwe yikehe muyihasa kupihisa usepa wetu ni Yehova. Chikwo nawa, muyihasa kutututwala kulinga shili yinene.
5 Yetu eswe twakupalika mu yeseko ya kulinga shili. Alioze mutu ni mutu kali ni ulelu wenyi. Ulelu wacho muuhasa kupwa wa kulinga shili yinene, kulinga yuma ya luchisa hanji lume kupwa ni kunyonga cha akwa-hashi. Ngwe chilweza, amwe hanji kakupinda ni usolo wa kulinga upangala ni utanji. Akwo hanji kakupinda ni usolo wa kulinga yuma ya luchisa ngwe, kulipinya-pinya ku ulunga hanji ku upwo ni kutala yinema ni yizulie ya sonyi. b Eka kanapinji ni cheseko cha kuvwila atu woma, kupwa akwa-pami, yitenu ni yuma yikwo nawa. Ngwe chize Tiangu ambile, “mutu ni mutu kakumweseka muze mecha hanga usolo wenyi umukoke ni kumupiangula.”—Tia. 1:14.
6. Yika yetu eswe twatamba kutayiza?
6 Shina unanyingika ulelu we? Chili ponde yinene kunyonga ngwetu, kutushi ulelu niumwe hanji ngwo tukwete tachi ja kukumba yeseko yeswayo muyisoloka ku mwono wetu. (1 Yoa. 1:8) Twiulukenu ngwetu, Paulu kambile ngwenyi chipwe atu waze ali “ni yiteli ya ku spiritu” nyi kakanyamine no mahasa kulinga shili. (Ngala. 6:1) Kashika, twatamba kulikehesa ni kutayiza ngwetu, yetu eswe tukwete umwe ulelu.—2 Kori. 13:5.
7. Yika yetu eswe twatamba kunyingika? Hana chilweza.
7 Yika watamba kulinga nyi munyingika ngwe ukwete umwe ulelu? Watamba kusa tachi hanga ulelu wacho uhone kukusa mu cheseko. Tutalenu chimwe chilweza. Ku shakulu, yikolo yapwile yihanda yilelu ku yikalakala ya yimwe mbonge. Kashika apwile ni kusako tufunga anji hanga ayifunge. Chizechene nawa, ni yetu twatamba kunyingika kanawa ulelu wetu mba tulifunge ku yeseko ya kulinga shili.—1 Kori. 9:27.
CHIZE MUHASA KULIFUNGA
8-9. Kuchi mukweze yoze anatongola ha Yishima kapitulu 7 te mahasa kwehuka kulinga shili yinene? (Yishima 7:8, 9, 13, 14, 21)
8 Kuchi mutuhasa kulifunga hanga tuhone kuholokela mu cheseko cha kulinga shili yinene? Mutuhasa kuwana longeso ha chilweza cha mukweze yoze anatongola ha Yishima kapitulu 7. Iye kalingile utanji ni umwe pwo chikoi. Versu 22 yinambe ngwo, mukweze yakaula pwo wacho “washi-washi.” Alioze lusango kanasolola ngwo, mukweze wacho hakehe-hakehe yaputuka kulinga yuma yize yamutwalile ku kulinga shili yinene.
9 Yika yamutwalile kulinga shili yinene? Chitangu, ha kunjila cha tangwa, mukweze wacho ‘yapalika mu tapalo hakamwihi ni [pwo wacho].’ (Tanga Yishima 7:8, 9.) Chamuchiali, muze iye amwene pwo wacho yamukundama. Chikwo nawa, iye yecha hanga pwo wacho amumbejale ni kupanjika yize apwile ni kwamba. Pwo yamba ngwenyi, hinahana yitapo ya mulambu wa sambukila, kota kambile maliji wano hanga asolole ngwo iye te hi mutu mupi ko. (Tanga Yishima 7:13, 14, 21.) Nyi ngwe mukweze wacho kakalingile yino yeswe, kachi kakaholokele mu cheseko cha kulinga shili yinene.
10. Kuchi umwe mahasa kulinga shili ngwe chize alingile mukweze yoze anatongola ha Yishima?
10 Lusango yono kanasolola yize muyihasa kulingwa kuli umwe ni umwe wa kuli yetu. Hanyima lia kulinga shili yinene, mutuhasa kuputuka kunyonga ngwetu shili yacho yalingiwa “washi-washi.” Amwe hanji mamba ngwo, “Yino yalingiwa susumuku.” Alioze nyi mutunyonga kanawa ha yize yalingiwa, mutuhasa kumona ngwetu shili yacho yalingiwa mumu lia yiyulo yipi yize mutu akwachile. Hanji yeswe yaputukile mumu lia kusakula masepa api, yiheho ni yinema ya luchisa, kuya ku yihela yize kuyalitele hanji kunjila ha site jipi. Hanji mutu wacho haneche kulemba, kutanga Mbimbiliya, kukunguluka ni kwambujola. Ngwe chizechene yalingiwile kuli mukweze anatongola ha Yishima, hanji shili yacho kuyakalingiwile susumuku.
11. Yika twatamba kulinga mba twehuke kulinga shili?
11 Yika twalilongesa? Twalilongesa ngwetu, kutwatambile wika kwehuka shili, alioze twatamba nawa kwehuka yuma yize muyihasa kututwala ku kulinga shili. Solomone kasolwele chikuma chino zwalala muze asolwele yize yalingiwile kuli mukweze ni pwo chikoi. Muze ahanjikile hali pwo chikoi, iye yahichika utowezo uno: “Kanda upiasukila mu majila jenyi.” (Yishi. 7:25) Iye yamba nawa ngwenyi: “Kanda wiza hakamwihi nenyi; kanda ukundama ku chikolo cha zuwo lienyi.” (Yishi. 5:3, 8) Chochene, mba tulifunge ku shili, twatamba kwehuka majila waze matutwala kulinga yuma yize muyivwisa Yehova chinyengo. c Yino muyihasa kuchinga, kwehuka kulinga yuma yize muyisoloka ngwe hi yipi ko kuli Mukwa-Kristu, alioze muyitutwala ku kulinga yuma yipi.—Mateu 5:29, 30.
12. Yika Yombi atesele kulinga, mba kuchi yino yamukwashile kwehuka kulinga shili? (Yombi 31:1)
12 Mba twehuke yuma yize muyihasa kututwala kulinga shili, twatamba kusa tachi hanga tulinge yuma yalita. Yino ye Yombi alingile. Iye “kakolesele shingo ni meso [jenyi]” hanga ahone kutala mapwo akwo ni usolo upi. (Tanga Yombi 31:1.) Mumu lia kulinga yuma kulita ni yize atesele mu mbunge yenyi, Yombi yahasa kwehuka utanji. Ni yetu twatamba kusa tachi hanga twehuke chuma cheswacho muchihasa kutusa mu cheseko.
13. Mumu liaka twatamba kufunga manyonga jetu? (Tala nawa yizulie.)
13 Twatamba nawa kufunga manyonga jetu. (Kutuhu. 20:17) Amwe kakwamba ngwo, kunyonga ngwe unalingi shili hi chipi ko, upi uli kuyilinga. Alioze mutapu uno wa kunyonga uli ponde yinene. Mutu yoze wakunyonga mashimbu eswe chize malinga yuma yipi, kwamba umwenemwene, kakwokesa usolo wa kulinga shili. Chili ngwe mutu wacho kanaputuka cheseko, chize mwene atamba kusa tachi mba achehuke. Tunanyingika ngwetu, ha mashimbu amwe mutuhasa kupwa ni manyonga api. Alioze, kawashi-washi mutuhasa kwehuka manyonga jacho ha kwasalakanyisa ni manyonga apema. Nyi twachilinga, mutuhasa kukinda manyonga api ahone kukola mu mbunge yetu ni kwehuka usolo uze muuhasa kututwala ku kulinga shili yinene.—Fwili. 4:8; Kolo. 3:2; Tia. 1:13-15.
Twatamba kwehuka chuma cheswacho muchihasa kututwala mu cheseko (Tala paragrafu 13)
14. Yika nawa muyihasa kutukwasa kwehuka kulinga shili?
14 Yika nawa mutuhasa kulinga hanga twehuke cheseko cha kulinga shili? Twatamba kupwa ni shindakenyo ngwetu, kwononokena shimbi ja Yehova mashimbu eswe muchituyukisa yetu ene. Ha mashimbu amwe, muchihasa kupwa chikalu usolo ni manyonga jetu, yilite ni upale wa Yehova. Alioze, nyi twasa tachi hanga tulinge yuma yalita mutupwa ni mbunge yitoma, nawa kutuchi kulihesa ha tachi jize mutusa.
15. Kuchi kunyonga ha yuma yipema muchitukwasa kwehuka kulinga shili?
15 Twatamba kupwa ni kunyonga ha yuma yipema. Nyi twalilongesa ‘kuvwila lwaji yuma yipi; ni kuzanga yuma yipema,’ chino muchitukwasa kwehuka yuma yize muyihasa kututwala ku kulinga shili. (Amo. 5:15) Kunyonga ha yuma yipema, muchitukwasa nawa kwehuka cheseko chize te kutushi ni kushimbwila.
16. Kuchi kulinga yuma ya ku ufulielo muchihasa kutufunga? (Tala nawa yizulie.)
16 Yika yakutukwasa kunyonga ha yuma yipema? Twakuchilinga ha kulihulikila ha yuma ya ku ufulielo. Muze twakuya ku kukunguluka ni kwambujola, yino yakutukwasa hanga tuvwise Yehova kuwaha ni kwehuka kulinga yuma yipi. (Mateu 28:19, 20; Hepre. 10:24, 25) Muze twakutanga ni kulilongesa Liji lia Zambi ni kulipukuna, twakukolesa zango lietu lia kulinga yuma yipema ni kuvwila lwaji yuma yipi. (Yoshu. 1:8; Samu 1:2, 3; 119:97, 101) Twiulukenu yize Yesu alwezele tumbaji twenyi: “Nungenu ni kulemba hanga nuhone kunjila mu cheseko.” (Mateu 26:41) Muze twakulemba kuli Tata yetu wa mu malilu, twakumwaha uhashi wa kutukwasa ni kukolesa nyonga lietu lia kumuvwisa kuwaha.—Tia. 4:8.
Kulinga yuma ya ku spiritu muchitukwasa kupwa ni tachi jize tunafupu hanga tukumbe yeseko (Tala paragrafu 16) d
NUNGA NI KULIFUNGA
17. Ulelu uka Petulu apwile ni kupinda nawo?
17 Yetu hanji mutuhasa kukumba umwe ulelu. Alioze, hanji twatamba nawa kununga ni kusa tachi ha mashimbu anji mba tukumbe ulelu ukwo. Tutalenu yize yalingiwile kuli postolo Petulu. Muze alitunyine Yesu ha yisuho yitatu, iye yasolola ngwenyi kapwile ni kuvwila atu woma. (Mateu 26:69-75) Alioze ha kupalika cha limwe shimbu, Petulu yasolola hamu linji ha kuhana uchela mu chota cha akwa-kuyula A-Yunda ni kusolola ngwenyi, te hanakumbu woma wa atu. (Yili. 5:27-29) Alioze muze te hikwapalika yimwe miaka, Petulu yevwa “woma wa akwa-ungalami,” yecha kuliendela ni Akwa-Kristu waze te hi A-Yunda ko. (Ngala. 2:11, 12) Cheka nawa, Petulu yevwila woma wa atu. Chinasoloka ngwe iye kakahashile kukumba ulelu wacho liakulu.
18. Yika muyihasa kulingiwa nyi tukwete umwe ulelu?
18 Chino muchihasa nawa kulingiwa kuli yetu. Mu mutapu uka? Hanji mutuhasa kupwa ni umwe ulelu uze twakunyonga ngwetu, hitunaukumbu. Ngwe chilweza, ndumbu umwe yamba ngwenyi: “Kwapalikile miaka kumi chize haze nechele kutala yinema ni yizulie ya sonyi (pornografia). Napwile ni shindakenyo ngwami, te hingunakumbu kapinda wacho. Alioze ha mashimbu amwe, te nakupwa mu cheseko cha kuyitala nawa.” Ndumbu yono kakakokolokele mumu lia ulelu wenyi. Iye kanungine ni kusa tachi hanga akumbe ulelu wacho. Kanyingikine ngwenyi, chili chilemu kununga ni kulikolweza ku mwono wenyi weswe mu chifuchi chino chipi. Ni ukwaso wa mukwo-pwo ni wa makulwana a mu chikungulwila, iye kanahase kupwa kusuku ni yinema hanji yizulie ya sonyi.
19. Yika muhasa kulinga nyi uli ni ulelu uze kanda uchihasa kukumba?
19 Nyi ukwete ulelu uze kanda uchihasa kukumba, yika mulinga hanga ulelu wacho uhone kukutwala ku kulinga shili? Muhasa kukaula chiyulo cha Yesu chinambe ngwo: “Nungenu ni kulawola.” Chipwe muze mulivwa ngwe unajame, nihindu nunga ni kwehuka yuma yize muyihasa kukusa mu ponde. (1 Kori. 10:12) Nunga ni kulinga yuma yize ha shimbu limwe yakukwashile kukumba ulelu wacho. Mukanda wa Yishima 28:14 unambe ngwo: ‘Kawaha mutu yoze wakukanyama matangwa eswe.’—2 Petu. 3:14.
YIWAPE YIZE MUTUZUKA NYI TWANUNGA NI KULAWOLA
20-21. (a) Yiwape yika mutuzuka nyi mutununga ni kulawola ha kwehuka yeseko? (b) Kuchi Yehova matukwasa nyi mutulinga chihanda chetu? (2 A-Korindu 4:7)
20 Mutuhasa kupwa ni shindakenyo ngwetu, nyi twanunga ni kulawola ni kulikolweza hanga twehuka yeseko ya kulinga shili, tachi jetu kujichi kulitokela. Nyi twalinga shili, mutuhasa kupwa ni uwahililo wa ‘mashimbu akehe,’ alioze nyi twatwama kulita ni shimbi ja Yehova mutupwa ni uwahililo wamwenemwene. (Hepre. 11:25; Samu 19:8) Yino yakulingiwa mumu Yehova katutangile hanga tukaule shimbi jenyi. (Uputu. 1:27) Nyi twachilinga, mutuhasa kupwa ni mbunge yitoma ni kupwa ni kutalatala cha kutwama ku miaka yeswe.—1 Timo. 6:12; 2 Timo. 1:3; Yunda. 20, 21.
21 Kwamba umwenemwene ‘mujimba uli ulelu,’ alioze chino kuchalumbunukine ngwo kutuchi kuhasa kulinga nichimwe hakutwala ku ulelu wetu. Yehova kanazange kutwaha tachi jize tunafupiwa. (Tanga 2 A-Korindu 4:7.) Iwuluka ngwe Yehova kakutwaha ndundo jahiana. Alioze kulinga yuma yize twakuhasa hanji ngwetu, tachi jize twakusa tangwa ni tangwa hanga twehuke yeseko chili chiteli chetu. Nyi mutulinga chihanda chetu mutuhasa kujikijila muli Yehova ngwetu, makumbulula yilemba yetu ha kutwaha tachi jize tunafupiwa hanga tukumbe yeseko. (1 Kori. 10:13) Ni ukwaso wa Yehova, mutuhasa kununga ni kulifunga ku yeseko.
MWASO 47 Tulembenu Kuli Yehova Hita Tangwa
a ULUMBUNWISO WA AMWE MALIJI: Liji “spiritu” lize anatongola ha Mateu 26:41, linalumbunuka tachi jize jakukatuka mu mbunge ya umwe mutu jize ja kumutwala kuhanjika hanji kulinga yuma mu jila yimwe. “Mujimba” unalumbunuka kupwa chetu ngwe yihenge hanji yivulumunyi. Kashika, muchihasa kupwa ngwe yetu tunazange kulinga yuma yize yalita, alioze nyi kutwakanyamine mutuhasa kuholokela mu cheseko cha kulinga yuma yize Mbimbiliya yakukanjisa.
b Hanji ngwetu, pornografia.
c Mutu yoze walinga shili yinene mahasa kuwaha ukwaso ha mukanda Wahilila ku Mwono ku Miaka Yeswe!, ha longeso 57 ha yikuma 1-3 ni ha chikuma “Lihulikile ku Yuma ya Kulutwe lia Matangwa,” ha Kaposhi wa Kutalila Novembro 2020 mafwo 27-29, par. 12-17.
d ULUMBUNWISO WA CHIZULIE: Ndumbu kanatange chisoneko cha ha tangwa ha ola ya chimene. Kanatange Mbimbiliya ha mashimbu a kuhwima, kali ha kukunguluka cha hakachi ka poso.
