1-2. Zadoke te iya? (1 Sango ja Mianangana 12:​22, 26-28)

 TUNYONGENU ha chino, chizavu cha atu kuhiana 340,000 yalikunga hanga apwise Ndawichi mwanangana wa A-Izalele eswe. Atu jacho yatwama hakamwihi ni milundu ya Heprone ha matangwa atatu. Ayo te kanawahilila, kanashimutwina, kanaliketeka ni kuhalisa Yehova ni miaso. (1 Sango 12:​39) Hakachi ka mbunga yacho, hapwile umwe mukweze yoze te avuluka ngwo Zadoke, atu anji kakanyingikine ngwo iye kali hakachi ko. Alioze, Yehova yazanga hanga tunyingike ngwetu, Zadoke kapwileho. (Tanga 1 Sango ja Mianangana 12:​22, 26-28.) Zadoke te iya?

² Zadoke kapwile sasendote yoze te wakukalakala chimuwika ni mwata wa asasendote Abiatare. Yehova kahanyine kuli Zadoke mana anji ni uhashi wakunyingika upale wenyi. (2 Samue. 15:​27) Muze atu apwile ni kufupa yiyulo ya mana, o te kakuhula kuli Zadoke. Alioze, iye nawa kapwile lunga wa hamu. Ha mutwe uno, mutulihulikila ha hamu lize Zadoke apwile nalio.

3. (a) Mumu liaka tuvumbi twa Yehova anafupiwa hamu? (b) Yika mutumona ha mutwe uno?

³ Ha matangwa wano a kusula, Satana kanalingi yeswe yize mahasa hanga alimike ni atu ja Yehova. (1 Petu. 5:8) Amu tunashimbwila hanga Yehova anongese Satana ni chifuchi chino chipi, tunafupiwa kupwa ni hamu. (Samu 31:​24) Mutumona majila atatu waze mutuhasa kwimbulwilamo hamu lia Zadoke.

KWASA WANANGANA WA ZAMBI

4. Mumu liaka tuvumbi twa Yehova anafupiwa hamu mba akwase Wanangana wa Zambi? (Tala nawa chizulie.)

⁴ Yetu atu ja Yehova, twakukwasa Wanangana wenyi ni mbunge yeswe, alioze chakufupiwa hamu mba tuchilinge. (Mateu 6:​33) Ngwe chilweza, mu chifuchi chino, tunafupiwa kupwa ni hamu mba twononokene Yehova ni kwambujola sango jipema ja Wanangana. (1 Tesa. 2:2) Chikwo nawa, chakufupiwa hamu mba tuhone kulinjisa mu yuma ya mafwefwe yize yinahandununa atu. (Yoa. 18:​36) Tuvumbi twa Yehova anji katokesa yikumba, kaalamba ni kwasa mu mazuwo a ususu mumu lia kulituna kulinga yuma ya mafwefwe ni kulituna kupwa maswalale.

5. Mumu liaka Zadoke atambile kupwa ni hamu mba akwase Ndawichi?

⁵ Zadoke kakayile wika ku Heprone mumu lia chiwanyino chize alingileko hanga apwise Ndawichi Mwanangana. Iye kayile ku Heprone wakulilulieka kulu hanga ase jita. (1 Sango 12:​38) Iye kayileko hanga akwase Ndawichi kupulwila A-Izalele kuli akwa-kole jo. Zadoke kota te keshi yinyingi yinji ya uswalale, chipwe chocho kapwile ni hamu.

6. Kuchi Ndawichi apwile chilweza chipema cha hamu kuli Zadoke? (Samu 138:3)

⁶ Yika yakwashile Zadoke kupwa ni hamu? Iye kapwile ni kwenda ni malunga yitakame waze te akwete hamu. Kwamba pundu, iye kalilongesele ha chilweza cho. Ngwe chilweza, Ndawichi kapwile kasongo nawa kajita wa hamu, kashika A-Izalele amukwashile kupwa mwanangana. (1 Sango 11:​1, 2) Ndawichi te kakujikijila mashimbu eswe muli Yehova muze apwile ni kwasa jita ni akwa-kole jenyi. (Samu 28:7; tanga Samu 138:3.) Alioze, kwapwile nawa malunga akwo a hamu waze Zadoke te mahasa kwimbulula. Malunga jacho kapwile Jehoiada ni mwanenyi Benaia yoze neye wapwile kajita, ni tusongo twa atu 22 waze apwile ni kukwasa Ndawichi. (1 Sango 11:​22-25; 12:​26-28) Ndawichi kapwile mwanangana mumu lia ukwaso wa malunga wano. Chikwo nawa, o kalingile yeswe yize mahasa hanga amufunge.

7. (a) Yilweza yika ya ha matangwa jetu yize muyitukwasa kupwa ni hamu? (b) Kulita ni chinema, yika walilongesa ha chilweza cha ndumbu Nsilu?

⁷ Ni yetu twakupwa ni hamu muze twakulilongesa yilweza ya tuvumbi akwo a Yehova waze asolwele hamu ha kukwasa Wanangana wenyi ni ushishiko weswe. Mwanangana wetu Yesu Kristu, kalitunyine kulinjisa mu yuma ya mafwefwe ya hano hashi ha Satana. (Mateu 4:​8-11; Yoa. 6:​14, 15) Iye kajikijilile muli Yehova mashimbu eswe hanga apwe ni hamu lia kulinga yuma yalita. Musono, tuli ni yilweza ya akweze anji waze akulituna kulinjisa mu yuma ya mafwefwe ni mu uswalale. Tunakukolweza hanga utange hakutwala ku yilweza ya akweze wano ha site jw.org. a

KWASA MANDUMBU JE

8. Ha mashimbu aka makulwana a mu chikungulwila mahasa kusolola hamu ha kukwasa mandumbu jo ha yize anafupu?

⁸ Yetu Yela ja Yehova twakuzanga kulikwasa umwe ni mukwo. (2 Kori. 8:4) Alioze ha mashimbu amwe, kulinga chino chakufupiwa hamu. Ngwe chilweza, muze kwakulingiwa jita, makulwana a mu chikungulwila kakufupa kukolweza mandumbu jo, kwakwasa ku spiritu ni ku musunya. O kakuzanga mapanga ja Yehova, kashika akusa mwono wo mu ponde hanga aakwase ha yize anafupu. (Yoa. 15:​12, 13) Muze makulwana a mu chikungulwila akulinga chino, kakusolola ngwo kanakaula chilweza cha hamu cha Zadoke.

9. Kulita ni 2 Samuele 15:​27-29, yika Ndawichi atumine Zadoke kulinga? (Tala nawa chizulie.)

⁹ Mwono wa Ndawichi wapwile mu ponde. Mwanenyi Absalome kazangile kumushiha hanga amusalakane ha wanangana. (2 Samue. 15:​12, 13) Hazehene Ndawichi yalilulieka hanga ahichike Yerusaleme. Yalweza tuvumbi twenyi ngwenyi: “Tuchinenu; nyi ka, kutuchi kulilamwina kuli Absalome.” (2 Samue. 15:​14) Muze tuvumbi twenyi te anachina, Ndawichi yamona ngwenyi umwe katamba kusala mu Yerusaleme hanga anyingike yize Absalome analingi ni kumulwezayo. Hachino, iye yafunyisa Zadoke ni asasendote akwo mu mbonge hanga apwe ngendeshi waze mamutumina sango. (Tanga 2 Samuele 15:​27-29.) Alioze o te katamba kukeya, mumu yize Ndawichi aatumine kulinga yapwile utoji unene. Absalome kapwile ni kunyonga wika hali mwene, chitenu, nawa kafupile kushiha tato. Achinyonga yize te malinga hali Zadoke ni asasendote akwo nyi manyingika ngwenyi, o kapwile ngendeshi ja Ndawichi!

10. Kuchi Zadoke ni asasendote akwo afungile Ndawichi?

¹⁰ Ndawichi kapwile ni nyonga lia kulinga yimwe, alioze kafupiwile ukwaso wa Zadoke ni sepa lienyi mukwo washishika, Hushai. (2 Samue. 15:​32-37) Hushai katambile kusoloka ngwe kanakwase Absalome ni kumwaha chiyulo hakutwala ku chize te malukukila Ndawichi. Alioze chiyulo chino te muchikwasa Ndawichi hanga alilulieke muze te mamulukukila kuli Absalome. Muze Absalome akawile chiyulo cha Hushai, mba Hushai yalweza Zadoke ni Abiatare yize te yinalingiwako. (2 Samue. 17:​8-16) Hachino, ayo yahasa kutuma sango kuli Ndawichi, ni kumulweza yize te Absalome anambe kulinga. (2 Samue. 17:​17) Ni ukwaso wa Yehova, Zadoke ni asasendote akwo yahasa kufunga mwono wa Ndawichi.​​—2 Samue. 17:​21, 22.

11. Kuchi mutuhasa kwimbulula hamu lia Zadoke muze mutukwasa mandumbu jetu?

¹¹ Nyi ngwe mandumbu mu chikungulwila chetu mapwa mu yimwe ponde mba mafupa ukwaso, kuchi mutuhasa kwimbulula chilweza cha Ndawichi ni Zadoke ha kusolola hamu? (1) Tukaulenu usongwelo. Ha mashimbu waze tunapalika mu ponde, chili chilemu kupwa alinunga. Chikwo nawa, chakufupiwa kukaula usongwelo uze twakutambula ku Mbetele. (Hepre. 13:​17) Makulwana a mu chikungulwila, katamba kuliulula mashimbu eswe usongwelo wa kuze atwama ni wa mu ululikiso ha yize mutuhasa kulinga nyi mukulingiwa umwe luyinda. (1 Kori. 14:​33, 40) (2) Tupwenu ni hamu, alioze twatamba kukanyama. (Yishi. 22:3) Tunyongenu kanawa shimbu kanda tuchilinga chuma  nichimwe. Kanda tulisa mu ponde. (3) Tujikijilenu muli Yehova. Twiulukenu ngwetu, Yehova kakuzanga upeme wetu ni wa mandumbu jetu. Kashika, mahasa kutukwasa kumona majila akukwashilamo kanawa mandumbu jetu.

12-13. Yika walilongesa ha chilweza cha Viktor ni Vitalii? (Tala nawa chizulie.)

¹² Tutalenu chilweza cha mandumbu aali, Viktor ni Vitalii waze akwashile kutwala kulia ni meya kuli mandumbu mu Ucrânia. Viktor yamba ngwenyi: “Twapwile ni kufupa kulia sali ni sali. Kanji-kanji, twapwile ni kwivwa zungo lia mata malozoka. Ndumbu umwe yoze wapwile ni kulanjisa yuma ya kulia, yatwaha kulia chinji. Kulia chize atuhele chakwashile mandumbu anji ha amwe mashimbu. Muze te tunalongeza kulia mu mashinyi, yimwe mbomba yiyiholokela ha tando 20 ni haze twapwile. Ha tangwa liacho, naliumbile kuli Yehova hanga angwehe hamu lia kununga ni kukwasa mandumbu jami.”

¹³ Vitalii yamba ngwenyi: “Twafupiwile kupwa ni hamu linji. Wenyi wami utangu wambachile maola 12. Napwile ni kulemba kuli Yehova mashimbu eswe.” Vitalii kasolwele hamu, alioze katambile nawa kukanyama. Iye yamba nawa ngwenyi: “Nechile kuli Yehova hanga angwehe mana ni kulikehesa. Napwile ni kwendesela mashinyi mu matapalo waze apwile ni utayizo wa nguvulu. Ufulielo wami wakolele chinji muze namwene chize mandumbu anakalakala hamuwika. Ayo katukwashile kuchiza yuma yize yapwile mu tapalo, yakunga mazalo ni kulia, ni kutukwasa kuyilongeza mu mashinyi jetu. Katuhele nawa kulia ni haze mutupomba muze te tunalingi wenyi wacho.”

NUNGA NI KUSHISHIKA KULI YEHOVA

14. Kuchi twakwivwa muze mutu yoze twazanga akwecha kuwayila Yehova?

¹⁴ Cheseko chimwe chikalu kukumba chili muze umwe usoko hanji umwe sepa mecha kuwayila Yehova. (Samu 78:​40; Yishi. 24:​10) Nyi twakuzanga chinji mutu wacho, chakupwa chikalu kukumba kapinda wacho. Nyi unapalika mu kapinda ngwe yono, chilweza cha ushishiko cha Zadoke muchihasa kukutakamisa.

15. Mumu liaka Zadoke afupiwile hamu mba anunge ni kushishika kuli Yehova? (1 Mianangana 1:​5-8)

¹⁵ Zadoke kanungine ni kushishika kuli Yehova chipwe muze sepa lienyi Abiatare echele kuchilinga. Chino chalingiwile kusongo lia kuyula cha mwanangana Ndawichi. Muze te kwasala hakehe hanga Ndawichi afwe, mwanenyi Adonija yazanga kumusalakana ha wanangana chipwe ngwe Yehova te hanalakenya kulu ngwenyi, Solomone mwe mapwa mwanangana. (1 Sango 22:​9, 10) Abiatare yazanga kukwasa Adonija. (Tanga 1 Mianangana 1:​5-8.) Ha kulinga chino, Abiatare kakehukile wika Ndawichi, alioze ni Yehova nawa. Kota chino chevwishile Zadoke chinyengo chinji, mumu o kakalakalile hamwika ngwe asasendote ha miaka kuhiana makumi awana. (2 Samue. 8:​17) Ayo kambachile “mushete wa Zambi.” (2 Samue. 15:​29) Muwaali wo kakwashile mwanangana Ndawichi ni kulinga yuma yinji mu mulimo wa Yehova.​​—2 Samue. 19:​11-14.

16. Yika kota yakwashile Zadoke kununga ni kushishika?

¹⁶ Chipwe ngwe Abiatare kechele kushishika kuli Yehova ha kwehuka Ndawichi, nihindu Zadoke kanungine ni kushishika. Ndawichi kanyingikine ngwenyi, mahasa kujikijila muli Zadoke mashimbu eswe. Muze anyingikine ngwenyi Adonija kamwehuka, Ndawichi yasakula Natane ni Benaia hanga awayise Solomone ngwe mwanangana. (1 Mia. 1:​32-34) Kwamba pundu, Zadoke katakamine chinji ha kumona chilweza cha Natane ni cha tuvumbi akwo a Yehova waze ashishikile ni kukwasa mwanangana Ndawichi. (1 Mia. 1:​38, 39) Muze Solomone apwile mwanangana, iye ‘yasa sasendote Zadoke mu chihela cha Abiatare.’​​—1 Mia. 2:35.

17. Kuchi muhasa kwimbulula Zadoke nyi mutu yoze wazanga mecha kuwayila Yehova?

 ¹⁷ Kuchi muhasa kwimbulula Zadoke nyi mutu yoze wazanga mecha kuwayila Yehova? Solola zwalala kuli Yehova ngwe unazange kununga ni kushishika kuli iye. (Yoshu. 24:​15) Yehova makwaha hamu lize mufupiwa hanga ulinge yuma yalita. Lemba kuli Yehova ni kununga kupwa sepa lia waze akushishika kuli iye. Yehova kakulemesa ushishiko we, kashika, makuwahisa ha kuchilinga.​​—2 Samue. 22:26.

18. Yika walilongesa ha chilweza cha ndumbu Marco ni mukwo-pwo Sidse?

¹⁸ Tutalenu yize yalingiwile kuli ndumbu Marco ni mukwo-pwo, Sidse. Ana jo aali a mapwo waze te hakola, kechele kuwayila Yehova. Marco yamba ngwenyi: “Chize ha tangwa lize ana je masemuka, yena muputuka kwazanga chinji. Mulinga yeswayo hanga wafunge ku ponde. Kashika, muze o mecha kuwayila Yehova, chino chakulemeka ku mbunge.” Yanunga ni kwamba ngwenyi: “Alioze Yehova mashimbu eswe kakutukwasa kunyongonona. Muze nakuhonga, mukwetu-pwo kakungutakamisa, mba muze mukwetu-pwo akuhonga, ni yami nakumutakamisa.” Sidse yamba ngwenyi: “Nyi te kutushi ni ukwaso wa Yehova, kachi kutwakahashile kukumba kapinda yono. Nanenganyanyine chinji ni kunyonga ngwe ana jami kechele kuwayila Yehova mumu lia yami, chocho yingulemba kuli Yehova ni kumulweza chikuma chacho. Hakupalika cha shimbu likehe, umwe ndumbu wa pwo yoze te kutushi kulimona nenyi ha miaka yinji, yeza ni kuhanjika ni yami. Iye yangukwata ha chipaya, yangutala ni kwamba ngwenyi: ‘Sidse, iwuluka chikuma chino, yize yalingiwa kuli ana je hi mulonga we ko.’ Ni ukwaso wa Yehova, ngunahase kununga ni kumulingila ni uwahililo.”

19. Yika unazange kununga ni kulinga?

¹⁹ Yehova kanazange hanga tuvumbi twenyi eswe apwe ni hamu ngwe lia Zadoke. (2 Timo. 1:7) Kanazange hanga tujikijile ha tachi jize iye akutwaha hi ha tachi ja yetu ene ko. Kashika, muze mutupalika mu yuma yize muyifupiwa kusolola hamu, twitenu ukwaso wa Yehova. Nyi twachilinga, mutupwa ni shindakenyo ngwetu, iye matukwasa kupwa ni hamu ngwe lia Zadoke.​​—1 Petu. 5:10.