MUTWE WA KULILONGESA 30
MWASO 36 Tufungenu Mbunge Jetu
Yika Mutuhasa Kulilongesa Hali Mianangana a mu Izalele?
‘Henaho mba munukamona kalisa hakachi ka akwa-ululi ni yingulungulu; hakachi ka mukwa-kulingila Zambi ni yoze kamulingilile.’—MALA. 3:18.
YIZE MUTULILONGESA
Mutulilongesa chize Yehova apwile ni kumona mianangana a mu Izalele, ni yize iye anashimbwila hali tuvumbi twenyi musono.
1-2. Yika Mbimbiliya yakwamba hali amwe mianangana a mu Izalele?
MBIMBILIYA yakutongola majina ja malunga kuhiana 40 waze apwile mianangana mu Izalele. a Mbimbiliya yakusolola umwenemwene weswe muze yakuhanjika hakutwala kuli malunga jacho, ni kusolola yimwe yikuma yilemu hakutwala kuli ayo. Ngwe chilweza, chipwe mianangana apema no kalingile yimwe yuma yipi. Tutalenu chilweza cha Ndawichi. Yehova kambile ngwenyi: “Kavumbi kami Ndawichi. Iye wafungile shimbi jami, wangukawile ni mbunge yenyi yeswe, walingile chipema wika kumeso jami.” (1 Mia. 14:8) Alioze twiulukenu ngwetu, Ndawichi kalingile utanji ni pwo liambala ni kululieka yuma hanga lunga lia pwo wacho afwile ku jita.—2 Samue. 11:4, 14, 15.
2 Alioze, mianangana akwo anji waze kakashishikile, no kalingile yimwe yuma yipema. Tutalenu chilweza cha Rehoboame. Kumeso ja Yehova, iye “walingile chipi.” (2 Sango 12:14) Chipwe chocho, Rehoboame kononokene shimbi ya Yehova ya kuchina kwasa jita ni akwa-wanangana wa mavungu kumi a Izalele, ni kwecha hanga asakule mwanangana mweka. Iye nawa kakolesele mambonge anji mu wanangana wenyi hanga akwase atu ja Zambi kulifunga kuli akwa-kole jo.—1 Mia. 12:21-24; 2 Sango 11:5-12.
3. Chihula chika chilemu chasoloka ha paragrafu yino, mba yika mutushimutwina ha mutwe uno?
3 Muze tunatange hakutwala kuli mianangana a mu Izalele, mutuhasa kupwa ni chimwe kuyambashana. Nyi mianangana jacho kalingile yuma yipema ni yuma yipi, mba kuchi Yehova apwile ni kunyingika ngwenyi mwanangana umwe kashishika kuli iye, mukwo kashishikile kuli iye? Kumbululo lia chihula chino, mulitukwasa hanga tunyingike yize hita umwe wa kuli yetu atamba kulinga hanga evwise Yehova kuwaha. Ha mutwe uno, mutumonaho yuma yitatu yize kota Yehova apwile ni kuhengwola hali mianangana a mu Izalele. Mutumona yize o apwile nayo mu mbunge, kulikonyeka cho ni kumona nawa nyi kapwile ni kuwayila Yehova ni nyonga lialita.
KUZANGA YEHOVA NI MBUNGE YESWE
4. Kalisa muka wapwile hakachi ka mianangana waze ashishikile ni waze kakashishikile?
4 Mianangana waze evwishile Yehova kuwaha, kapwile ni kumuwayila ni mbunge yimuwika hanji ngwetu, ni mbunge yeswe. b Yehosofate, yoze wapwile Mwanangana mupema kafupile Yehova ni mbunge yenyi yeswe. (2 Sango 22:9) Hakutwala kuli Josia, Mbimbiliya yakwamba ngwo: “Miaka yeswe ya kunyima, kukwapwile umwe mwanangana alifwa nenyi. Yatewulukila kuli Yehova ni mbunge yenyi yeswe.” (2 Mia. 23:25) Mba hakutwala kuli Solomone, yoze walingile yuma yipi kusongo lia mwono wenyi, Mbimbiliya yakwamba ngwo: “Mbunge yenyi kuyapwile yingunu.” (1 Mia. 11:4) Hali Abijame, mwanangana mukwo yoze kakashishikile kuli Yehova, Mbimbiliya yakwamba ngwo: “Mbunge yenyi kuyapwile yingunu kumeso ja Yehova.”—1 Mia. 15:3.
5. Yika chinalumbunuka kulingila Yehova ni mbunge yimuwika?
5 Kulingila Yehova ni mbunge yimuwika, yika chinalumbunuka? Mutu yoze wakulingila Yehova ni mbunge yimuwika, keshi kuchilinga ku tachi hanji ngwetu ni kumushinjila. Shimbu alinge chocho, mutu wacho kakulingila Yehova ni zango lize linakatuka ku mbunge yenyi hamwe ni vumbi. Iye kakununga ni kusolola yitanga yacho ku mwono wenyi weswe.
6. Kuchi mutuhasa kufunga mbunge yetu? (Yishima 4:23; Mateu 5:29, 30)
6 Kuchi mutuhasa kwimbulula mianangana a mu Izalele waze ashishikile kuli Yehova ni kumulingila ni mbunge yimuwika? Twatamba kwehuka yuma yeswe yipi yize muyihasa kukekemesa zango lize tukwete hali Yehova. Ngwe chilweza, twatamba kukeya ha yuma yize twakutala hanji ha yize twakulinga muze tuli ukawetu. Chikwo nawa, twatamba kunyonga kanawa hali masepa waze twakusakula ni kwehuka kumona mbongo hanji kupwa pichi ngwe che chuma chilemu ku mwono wa mutu. Nyi mutumona ngwetu, chimwe chuma chinakekemesa zango lietu hali Yehova, twatamba kusa tachi hanga tuchehuke kafuji-fuji.—Tanga Yishima 4:23; Mateu 5:29, 30.
7. Mumu liaka chili chilemu kwehuka yuma yize muyihasa kukekemesa zango lietu hali Yehova?
7 Twatamba kusa tachi hanga tuhone kupwa ni mbunge jaali. Nyi kutwakeyele, mutuhasa kulionga yetu ene ha kunyonga ngwetu, mumu lia kulinga milimo yinji ya ku ufulielo, yitanga yipi ya hano hashi kuyichi kutulinga chuma nichimwe. Tutalenu chilweza chino. Tunyongenu ngwetu, kwilu kuli chishika chinji, mba munjila mu zuwo ni kuwika kahia, shina chishika muchihwa nyi wahichika mapito eswe a washi? Ka, kuchichi kuhwa, mu zuwo mumunjila chishika. Yika twalilongesa ha chilweza chino? Twalilongesa ngwetu, mba tufunge usepa wetu ni Yehova, twatamba kulinga yuma yinji hi wika ko kulia ku ufulielo. Twatamba nawa kuyika mapito a mbunge yetu hanga yuma yipi yihone kunjilamo. Kulinga chino, fuji ya chishika ya hano hashi ni yitanga yize Yehova keshi kutayiza, kuyichi kuhandununa mbunge yetu.—Efwe. 2:2.
KULIKONYEKA NI MBUNGE YESWE HA SHILI YIZE MUTULINGA
8-9. Yika Mwanangana Ndawichi ni Hezekia alingile muze atambwile fumbo? (Tala chizulie ha .)
8 Ngwe chize twamona, Mwanangana Ndawichi kalingile uhenge unji. Alioze, muze profeta Natane ahanjikile nenyi hakutwala ku chize te Yehova anevu, ni kulikehesa cheswe Ndawichi yalikonyeka. (2 Samue. 12:13) Maliji a Ndawichi waze ali ha Samu 51, kanatukwase kumona ngwetu, iye kalikonyekene ni mbunge yeswe ha yize alingile. Ndawichi kakasolwele wika kulikonyeka cha kumeso hanga onge Natane ni kwehuka kutambula fumbo.—Samu 51:3, 4, 17, maliji a helu.
9 Mwanangana Hezekia neye kavulumwine kuli Yehova. Mbimbiliya yakwamba ngwo: “Mbunge yenyi yilifuza, kashika ufwatulo wejile hali iye ni ha Yunda ni Yerusaleme.” (2 Sango 32:25) Mba mumu liaka Hezekia alizachile? Hanji iye kaputukile kulivwa ngwo, kali mulemu mumu lia upite uze apwile nawo, kukumba jita ni Asuria, hanji mumu lia kumuuka ni chikomokeso musongo uze apwile nawo. Kota mumu lia kulizata chize apwile nacho, kashika asolwele upite wenyi weswe kuli A-Babilonia. Ha mukunda wa chino, profeta Izaia yamulweza ngwenyi, Yehova kanamuvwila uli. (2 Mia. 20:12-18) Alioze chizechene ngwe Ndawichi, ni kulikehesa cheswe Hezekia yalikonyeka. (2 Sango 32:26) Kashika kuli Yehova, Hezekia kapwile Mwanangana washishika yoze “walingile chipema kumeso” jenyi.—2 Mia. 18:3.
Mwanangana Ndawichi ni Hezekia kalikonyekene ni mbunge yeswe muze amwene chize Yehova alivwile ha shili yize ayo alingile (Tala maparagrafu 8-9)
10. Yika Mwanangana Amazia alingile muze amufumbile?
10 Hakutwala kuli Mwanangana Amazia wa mu Yunda, iye kalingile yuma yalita, “alioze hi ni mbunge yingunu ko.” (2 Sango 25:2) Mba upi uka alingile? Hanyima lia Yehova kumukwasa kwasa jita ni A-Endome, Amazia yawayila tuzambi twa atu jacho. c Mba muze profeta wa Yehova ahanjikile nenyi hakutwala ku yize alingile, Mwanangana kakazangile kumupanjika; yamuhuma kumeso jenyi.—2 Sango 25:14-16.
11. Kulita ni 2 A-Korindu 7:9, 11, yika twatamba kulinga mba Yehova atukonekene? (Tala nawa yizulie.)
11 Yika twalilongesa ha yilweza yino? Twalilongesa ngwetu, twatamba kulikonyeka ha shili yize mutulinga ni kusa tachi hanga tuhone kuyifunyina nawa. Mba yika mutwamba nyi ngwe makulwana a mu chikungulwila matwaha chimwe chiyulo chize hanji chinatale ha chikuma chikehe? Kanda tunyonga ngwetu, Yehova keshi kutuzanga nawa hanji ngwetu, makulwana kanalimika ni yetu. Chipwe mianangana ashishika a mu Izalele no ha mashimbu amwe kafupile kutambula yiyulo ni kwafumba. (Hepre. 12:6) Nyi twatambula limwe fumbo, twatamba kulinga (1) kulitayiza ni kulikehesa cheswe, (2) kwalumuna yitanga yetu nyi muchilita, ni (3) kununga ni kulingila Yehova ni mbunge yeswe. Nyi twalikonyeka ku shili yetu, Yehova matukonekena pundu.—Tanga 2 A-Korindu 7:9, 11.
Nyi matwaha limwe fumbo, twatamba (1) kulitayiza ni mbunge yeswe, (2) kwalumuna yize muyifupiwa, ni (3) kununga ni kuwayila Yehova ni mbunge yeswe (Tala paragrafu 11) f
KUWAYILA YEHOVA MU JILA YALITA
12. Kalisa muka wapwile hali mianangana waze ashishikile ni hali waze kakashishikile?
12 Mianangana waze Yehova amwene ngwenyi kashishika, kapwile ni kulalaminya ku uwayilo wamwenemwene. Ayo yakwasa atu ja Yehova hanga no achilinge. Ewa, no kapwile ni uhenge wo ngwe chize hitwamona kulu. Alioze, ayo kalihanyine kuli Yehova ni mbunge yeswe ni kusa tachi hanga ahwise uwayilo wa mahamba mu chifuchi. d
13. Mumu liaka Yehova ambile ngwenyi Mwanangana Ahabe kakashishikile?
13 Mba mumu liaka Yehova amwene ngwenyi mianangana amwe kakashishikile? Kwamba umwenemwene, hi yuma yeswe ko yize o alingile yapwile yipi. Chipwe Mwanangana Ahabe yoze walingile upi unji, ha mashimbu amwe, kalikehesele ni kulikonyeka ha mulonga uze alingile wa kushiha Nabote. (1 Mia. 21:27-29) Iye nawa katungile mambonge ni kukumba jita jimwe jize alingile ni akwa-kole ja Izalele. (1 Mia. 20:21, 29; 22:39) Alioze, Ahabe kalingile chimwe chuma chipi chinji. Mumu lia yitanga yipi ya mukwo-pwo, iye yatwala atu kuwayila tuzambi ha mahuza ni mahamba. Iye nawa kakalikonyekene ha uhenge uno alingile.—1 Mia. 21:25, 26.
14. (a) Mumu liaka Yehova amwene ngwenyi Mwanangana Rehoboame kakashishikile? (b) Yika alingile mianangana anji waze kakashishikile?
14 Tutalenu chilweza cha Rehoboame, umwe mwanangana yoze neye kakashishikile. Ngwe chize hitwamona, iye kalingile yuma yinji yipema mu kuyula chenyi. Alioze, muze yuma yeswe yapwile kanawa mu wanangana wenyi ni kupwa mwanangana wa ndundo, iye yehuka shimbi ja Yehova ni kuputuka kuwayila tuzambi a mahuza. (2 Sango 12:1) Kukatuka ha shimbu liacho, yaputuka kuwayila Yehova ni kuwayila tuzambi a mahuza. (1 Mia. 14:21-24) Hi mwanangana Rehoboame ni Ahabe wika ko ehukile uwayilo wamwenemwene. Kwamba pundu, kapinda wa mianangana anji waze kakashishikile kuli Yehova, kapwile wa kukwasa uwayilo wa mahuza ku yimwe yitanga. Kashika twamona ngwetu, kumeso ja Yehova, kulikwachilila ku uwayilo wamwenemwene chapwile chuma chilemu chize te chakusolola nyi mwanangana umwe kali mupema nyi ka.
15. Mumu liaka uwayilo wamwenemwene uli ni ulemu kuli Yehova?
15 Mumu liaka chikuma cha uwayilo chili chilemu kumeso ja Yehova? Mumu mianangana kapwile atu waze apwile ni chiteli cha kusongwela tuvumbi twa Zambi mu uwayilo wamwenemwene. Chikwo nawa, uwayilo wa mahuza te wakutwala atu ku kulinga shili ni kupalika mu yuma yipi. (Hoze. 4:1, 2) Mianangana ni A-Izalele eswe kapwile vungu lize te hilinalihane kuli Yehova. Kashika, Mbimbiliya yakutesa uwayilo wa mahuza ni utanji hanji ngwetu, kulumbula umwe mutu. (Jere. 3:8, 9) Nyi mutu umwe malinga utanji, iye kakuhona kushishika kuli mutu yoze te atamba kushishika hanji ngwetu, kuli mukwo-pwo hanji mukwo-lunga. Chikwo nawa, mutu yoze wakulinga utanji kakuneha yikola yinji hali yoze alimbata nenyi. Chizechene nawa, nyi kavumbi yoze hanalihane kuli Yehova malinjisa mu yuma ya uwayilo wa mahuza, iye kanavulumuna kuli Zambi ni kumuvwisa yikola yinji ku mbunge. e—Shimbi 4:23, 24.
16. Kuli Yehova, kalisa muka watwama hakachi ka mukwa-ululi ni chingulungulu?
16 Yika twalilongesa? Twalilongesa ngwetu, twatamba kusa tachi hanga tuchine kulinjisa mu uwayilo wa mahuza. Alioze, twatamba nawa kulikwachilila ku uwayililo wamwenemwene ni kununga kulinga yuma ya ku ufulielo. Profeta Malakia kalumbunwine kalisa yoze watwama hali mutu mupema ni mutu mupi, kulita ni nyonga lia Yehova. Iye yasoneka ngwenyi: ‘Henaho mba munukamona kalisa watwama hakachi ka akwa-ululi ni yingulungulu; hakachi ka mukwa-kulingila Zambi ni yoze kamulingilile.’ (Mala. 3:18) Kashika, kutwatambile kwecha chuma nichimwe, chipwe lume uhenge wetu utukwike kulingila Yehova. Kwecha kulingila Yehova chili shili yinene.
17. Mumu liaka twamishi atamba kukeya ha kusaula mutu yoze malimbata nenyi?
17 Nyi uli twamishi mba unafupu mutu yoze mulimbata nenyi, shina wamona chize maliji a Malakia anakwate ha ulo? Mutu mahasa kupwa ni yimwe yitanga yipema, alioze nyi keshi kulingila Yehova, shina iye kali mutu mupema hanji mukwa-ululi kumeso jenyi? (2 Kori. 6:14) Nyi walimbata ni mutu wacho, shina makukwasa ku ufulielo? Achinyonga ha chikuma chino: Mapwo ja Mwanangana Solomone waze te keshi kuwayila Yehova, kapwile ni yimwe yitanga yipema. Alioze amu te keshi kuwayila Yehova, hakehe-hakehe o yatwala Solomone kulinga yuma yize Yehova keshi kuzanga ni kumutwala alinjise mu uwayilo wa mahuza.—1 Mia. 11:1, 4.
18. Yika yisemi atamba kulongesa ana jo?
18 Yisemi, munuhasa kuzachisa sango ja mianangana a mu Izalele hanga nukwase ana jenu apwe ni zango lia kulingila Yehova. Kwasenu ana jenu amone ngwo, kuli Yehova, kupwa mutu mupema hanji mutu mupi chinatale ha tachi jize mutu wacho akusa hanga akwase uwayilo wamwenemwene. Sololenu kupalikila mu yitanga yenu ni mu maliji ngwenu, yuma ya ku ufulielo ngwe kutanga Mbimbiliya, kuya ku kukunguluka ni kwambujola, yili yilemu chinji ku mwono wenu. (Mateu 6:33) Nyi kunwachilingile, ana jenu mahasa kuputuka kunyonga ngwo, kupwa Chela cha Yehova kuchishi ni ulemu, chinalingi wika chihanda cha “uwayilo wa asoko.” Ha mukunda wa chino, ayo mahasa kusa uwayilo wamwenemwene ha chihela chamuchiali ku mwono wo hanji kwecha lume kulingila Yehova.
19. Uhashi uka ali nawo mutu yoze wechele kuwayila Yehova? (Tala nawa mushete, “ Muhasa Kuhiluka Kuli Yehova!”)
19 Nyi mutu mecha kuwayila Yehova, shina iye keshi nawa ni kutalatala cha kufuna kuli Yehova? Kali ni kutalatala, mumu mahasa kulikonyeka ni kuputuka kuwayila Yehova mu jila yalita. Mba achilinge, mutu wacho hanji mafupiwa kwecha kulisuta ni kutayiza ukwaso uze mamwaha kuli makulwana a mu chikungulwila. (Tia. 5:14) Tachi jeswe jize masa hanga apwe nawa sepa lia Yehova mujikunduluka.
20. Kuchi Yehova matumona nyi twembulula mianangana waze ashishikile?
20 Yika twalilongesa ha mutwe uno hakutwala kuli mianangana a mu Izalele? Twalilongesa ngwetu, mutuhasa kupwa ngwe mianangana waze ashishikile ha kununga ni kuwayila Yehova ni mbunge yimuwika. Twatamba kulilongesa ha uhenge wetu, kulikonyeka ni kwalumuna yize muyifupiwa ku mwono wetu. Twatamba nawa kwiuluka mashimbu eswe ulemu wa kulikwachilila ku uwayilo wamwenemwene. Nyi mutununga ni kushishika kuli Yehova mu mutapu uno, iye matumona ngwe atu waze akulinga yuma yalita kumeso jenyi.
MWASO 45 Kupukuna cha Mbunge Yami
a Ha mutwe uno, muze tunahanjika hali “mianangana a mu Izalele,” tunatalikisa hali mianangana eswe waze ayulile atu ja Yehova. Chipwe mu wanangana wa minyachi yaali ya Yunda, wanangana wa minyachi kumi ya Izalele hanji minyachi yeswe 12.
b ULUMBUNWISO WA AMWE MALIJI: Kanji-kanji Mbimbiliya yakutongola liji “mbunge” hanga yihanjike ha chize mutu apwa muchima. Yino yinachingi usolo, manyonga, zango lia kulinga yimwe, yitanga, uhashi ni yize mutu matesa kulinga.
c Ha mashimbu jacho, kanji-kanji mianangana waze te hi A-Izalele ko kapwile ni kuwayila tuzambi twa mavungu waze o te akukumba ku jita.
d Mwanangana Asa kalingile upi unji. (2 Sango 16:7, 10) Chipwe chocho, Mbimbiliya yakwamba ngwo, Asa walingile yipema kumeso ja Yehova. Chipwe ngwe ku uputukilo, kakatayijile fumbo lize amuhele, chinasoloka ngwe kulutwe kalikonyekene. Kashika, Yehova amwene yuma yipema muli iye kuhiana yuma yipi. Chahiana ulemu, Asa kanakawayila wika Yehova ni kusa tachi hanga ahwise uwayilo weswe wa mahuza mu wanangana wenyi.—1 Mia. 15:11-13; 2 Sango 14:2-5.
e Twamona ngwetu, uwayilo ukwete ulemu unji kuli Yehova, mumu Shimbi jaali jitangu jize ahanyine kuli Mose, japwile ni kukanjisa A-Izalele kuwayila chimwe chuma hanji mutu. Ayo te katamba wika kuwayila Yehova.—Kutuhu. 20:1-6.
f ULUMBUNWISO WA YIZULIE: Umwe mukulwana wa mu chikungulwila mukweze, kanahanjika ni ndumbu ha kumusolwela ngwo kanalihulumba chinji hali iye ha unji wa walwa uze akunwa ni ha mashimbu waze akupalikisa ha kunwa walwa. Ndumbu katayiza chiyulo, kalumuna yitanga yenyi ni kununga kulingila Yehova ni ushishiko.
