Chize Muhasa Kutwama Hashi Haha
Mutwe wapalika wasolola ngwo, kwasala hakehe hanga Zambi anongese atu api ni upi weswe. Mutuhasa kupwa ni shindakenyo ngwetu, yino muyikalingiwa. Mumu liaka? Mumu Liji lia Zambi, Mbimbiliya, linalakenya ngwo:
“Ya hashi muyipalika.”—1 YOANO 2:17.
Mutuhasa kupwa ni shindakenyo ngwetu makatulamwina, mumu chisoneko chize twatongola chinalakenya nawa ngwo:
“Yoze malinga upale wa Zambi matwama ndo ku miaka ya mutolo.”
Alioze, nyi tunazange hanga akatulamwine, twatamba kulinga upale wa Zambi. Mba tunyingike upale wa Zambi, chitangu twatamba kunyingika Zambi.
‘KUNYINGIKA ZAMBI’ MUCHITUKWASA HANGA ATULAMWINE
Yesu kambile ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika.” (Yoano 17:3) Mba akatulamwine ku songo lia hano hashi ni kutwama ku miaka yeswe, twatamba ‘kunyingika Zambi.’ Kunyingika Zambi chinalumbunuka yuma yinji, hi wika ko kunyingika ngwo, iye katwama ko hanji kunyingika yimwe yuma hakutwala kuli iye. Twatamba kupwa masepa jenyi. Nyi tunazange kulinga usepa ni umwe mutu, twatamba kupalikisa mashimbu ni mutu wacho hanga usepa wetu ukole. Chizechene nawa, usepa wetu ni Zambi che watamba kupwa. Tushimutwinenu umwenemwene ulemu wa mu Mbimbiliya, uze muutukwasa kukolesa usepa wetu ni Zambi ni chize mutununga ni kuufunga.
TANGA LIJI LIA ZAMBI, MBIMBILIYA, MATANGWA ESWE
Mahasa kukulamwina ku songo lia hano hashi, ha kulemba kuli Zambi hanga akukwase ni kulinga upale wenyi
Yetu twakulia matangwa eswe hanga tupwe ni mwono. Alioze Yesu kambile ngwenyi: “Hi ku mbolo wika ko, mutu mapwa ni mwono, alioze ku maliji eswe akutuhuka mu kanwa lia Zambi.”—Mateu 4:4.
Musono, yetu twakuwana maliji a Yehova mu Mbimbiliya. Muze mulilongesa mukanda uno usandu, yena munyingika umwenemwene ulemu hakutwala ku yize Zambi alingile ku mashimbu akunyima, yize analinge musono ni yize makalinga kulutwe lia matangwa.
LEMBA KULI ZAMBI AKUKWASE
Yika muuhasa kulinga nyi unazange kukaula usongwelo wa Zambi alioze kuwahashile kwecha kulinga yuma yipi? Ha chikuma ngwe chino, kunyingika Zambi muchihasa kukukwasa mu jila yalita.
Tutalenu chilweza cha umwe pwo yoze mutuvuluka ngwo Sakura, iye kapwile chitanji. Muze aputukile kulilongesa Mbimbiliya, iye yalilongesa shimbi ya Zambi yinambe ngwo, “chinenu utanji.” (1 A-Korindu 6:18) Sakura kapwile ni kulemba kuli Zambi hanga amwehe tachi, ni kumukwasa hanga eche yitanga yipi. Alioze, chipwe chocho yanunga ni kupinda ni usolo wacho. Iye yamba ngwenyi: “Muze manyonga a utanji akungwiza mu mbunge, nakulemba ni mbunge yeswe kuli Yehova, mumu ngunanyingika ngwami, kuchishi kuhasa kukumba ukawami. Kulemba chakungukwasa kukundama kuli Yehova.” Ngwe Sakura, kuli tununu twa atu waze analilongesa hakutwala kuli Zambi. Iye kakwaha tachi jize anafupiwa hanga alumune yitanga yo, ni kutwama kulita ni upale wenyi.—A-Fwilipu 4:13.
Nyi munyingika kanawa Zambi, ni iye ‘makunyingika’ kanawa ngwe sepa lienyi mupema. (A-Ngalashia 4:9; Samu 25:14) Chino muchikukwasa nawa hanga akakulamwine, ni kutwama mu chifuchi chaha cha Zambi. Kuchi chifuchi chacho muchikapwa? Mutwe uze muuhataho muukumbulula chihula chino.
a Yehova lili jina lia Zambi ngwe chize analisolola mu Mbimbiliya.