Kwasala hakehe, muze unguvulu wa Zambi muuyula atu eswe, hashi muhapwa chihela chipema haze atu makatwama hamuwika ni kulivwasha, kulinga yuma yipema ni kuwahilila ni milimo ya moko jo. Zambi hanasakula Yesu Kristu hanga ayule hashi heswe. Musono, akwa-kuyula anji keshi kulihulumba hali atu. Alioze Yesu kalisa ni akwa-kuyula wano, mumu iye makalingila atu yuma yipema. Iye makayula ni zango, makapwa chimbovu, makasolola keke nawa, makapwa Mwanangana wa ululi.—Izaia 11:4.

Mu chifuchi chaha atu kechi kalihandununa mu mavungu ni minyachi. Atu makalinunga. (Usolwelo 7:9, 10) Atu eswe waze makatwama hano hashi makazanga Zambi ni kuzanga enyembo jo, nawa makakalakala hamuwika ni sambukila hanga amanunune upale utangu wa Zambi wa kufunga kanawa zuwo lio, hashi.—Samu 115:16.

Muze Wanangana wa Zambi muukalumuna yuma hano hashi, yuma yeswe muyikenda kanawa, nawa kukuchi kalingiwa luyinda wa chisemewa. (Samu 24:1, 2) Muze Yesu apwile hano hashi, kaholesele fuji ni kusolola ngwo Zambi mwe wamwehele ndundo ja kuchilinga. (Marku 4:39, 41) Mu chiyulo cha Yesu, niumwe makevwa woma wa luyinda wa chisemewa wakuhi. Muze Wanangana wa Zambi muukayula, mukukapwa sambukila hakachi ka atu ni tushitu, nawa yisemewa kuyichi katulinga upi.—Hozeia 2:18.

Atu eswe makapwa ni mwono ungunu. Niumwe mutu kechi kapwa kashinakaji, chipwe kuyiza hanji kufwa. (Izaia 35:5, 6) Atu eswe makawahilila hakutwama hashi haze halinanga ngwe chize apwile lunga ni pwo mutangu muze apwile mu munda wa Endene. Mu chifuchi chaha, ngwe chize mwapwile mu munda wa Endene, mumukapwa kulia chinji, nawa atu eswe hashi makapwa ni kulia chinji. (Uputukilo 2:9) Ngwe chize apwile A-Izalele ku shakulu, yetweswe mu paraisu ‘mutukalia [mbolo jetu] nikukuta.’—Ulevi 26:4, 5.

Mu chiyulo cha unguvulu wa Zambi, atu eswe makawahilila ni kulisolwela umbovu umwe ni mukwo. Kukuchi kapwa nawa jita, kuzachisa chipi ndundo, nawa atu eswe makapwa ni yize mafupa. Mbimbiliya yinalakenya ngwo: “Mutu mweswe matwama mushi lia mutondo wenyi wa uva hanji mushi lia mutondo wenyi wa makuyu; niumwe maavwisa woma.”—Mika 4:3, 4.

Asoko eswe makapwa ni mazuwo apema, kechi kevwa woma wa kwapuzula, nawa milimo yeswe yize malinga muyikapwa yipema. Mbimbiliya yinambe ngwo, waze matwama mu chifuchi chaha cha Zambi “kechi kahondangana mokomoko,” hanji chawana.—Izaia 65:21-23.

Mbimbiliya yinalakenya ngwo: “Hashi muhakazala ni chinyingi cha Yehova.” (Izaia 11:9) Atu waze matwama hashi haha, malilongesa mana anji a Sakatanga wetu, Yehova, ni yitangiwa yenyi yipema. Kechi kazachisa yinyingi yo hanga alinge mata hanji upi hali akwo. (Izaia 2:4) Alioze, malilongesa chize matwama ni sambukila ni akwo ni chize atamba kufunga hashi.—Samu 37:11.

Zambi kaluliekele kanawa hano hashi hanga tuhase kuwahilila ku mwono hita tangwa. Iye kakuzanga hanga atu atwame hano hashi ku miaka yeswe. (Samu 37:29; Izaia 45:18) Mba amanunune upale wenyi, Zambi “kumakakumba che kufwa ndo ku miaka ya mutolo.” (Izaia 25:8) Mbimbiliya yinalakenya ngwo, “kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.” (Usolwelo 21:4) Zambi makahana uhashi wa kutwama ku miaka yeswe kuli atu eswe waze makalamwina muze manongesa hano hashi hapi, ni kuli waze makahindwisa mu ufwe.—Yoano 5:28, 29; Yilinga 24:15.

 Tununu twa atu kanalilulieka haliapwila hanga atwame mu chiyulo cha Wanangana wa Zambi uze unakundama. Chipwe ngwe kali yihenge, nihindu kakwafumba hanga apwe atu waze Zambi anazange atwame mu chifuchi chaha. Kuchi akwafumba? Hakulilongesa hakutwala kuli Yehova Zambi ni Yesu Kristu, yoze iye atumine.—Yoano 17:3.

Nyingika nawa hakutwala ku yize watamba kulinga mba akulamwine muze manongesa hano hashi hapi, ni kutwama muchifuchi chaha chize chinakundama. Tayiza longeso lia Mbimbiliya liawana kuli umwe Chela cha Yehova ni kuzachisa mukanda Wahilila ku Mwono ku Miaka Yeswe!