ATU

Yika Mbimbiliya yinambe: Zambi katangile hashi “hanga atu akatwameho.”—IZAIA 45:18.

HASHI

Yika Mbimbiliya yinambe: “Chisemuko chakuya, chisemuko chikwo chakwiza, alioze hashi hakusala chizechene ha miaka.”—CHILUMBUNUNYI 1:4.

YIKA YINO YINALUMBUNUKA: Kulita ni Mbimbiliya hashi kechi keza kanongesaho, muhanunga ni kupwa atu. Mba songo lia hashi yika linalumbunuka?

ACHINYONGA HA CHINO: Mbimbiliya yakutesa songo lia hashi ni yize yalingiwile ha matangwa ja Noa. Ha mashimbu jacho, hashi te hanazala “to ni upupilo.” (Uputukilo 6:13) Alioze Noa kapwile mukwa-ululi. Kashika, Zambi yafunga Noa ni asoko jenyi, alioze yanongesa atu api ni sanga lia meya. Hakutwala ku yize yalingiwile kunyima, Mbimbiliya yinambe ngwo: “Hashi hakulu, se hazalile ni sanga lia meya, hatokele.” (2 Petulu 3:6) Lino liapwile songo lia hashi ha mashimbu jacho. Yika anongesene? Hi hashi ko, alioze atu api waze apwile hano hashi. Kashika, muze Mbimbiliya yakuhanjika hakutwala ku songo lia hashi, chino kuchalumbunukine ngwo hashi hano twatwama hanji mavu makanongesa. Alioze chinalumbunuka kunongesa cha yingulungulu ni yuma yipi yize akulinga.

KAPINDA NI UNGULUNGULU

Yika Mbimbiliya yinambe: “Mumu kwasala hakehe mba yingulungulu hi akuhi, ewa, mutala kanawa mu chihela chenyi alioze iye keshimo. Alioze yimbovu kumakahinga chifuchi. Kumakawahilila mu kulumbama cha sambukila.”—SAMU 37:10, 11.

YIKA YINO YINALUMBUNUKA: Sanga lia Meya ha mashimbu ja Noa kuliakanongesene ungulungulu weswe. Muze Sanga lia Meya te hiliapalika, atu api yaputuka nawa kulinga ungulungulu ni kupinjisa akwo. Kashika, kwasala hakehe hanga Zambi ahwise ungulungulu weswe hano hashi. Mukwa-kwimba masamu kambile ngwenyi: “Kwasala hakehe mba yingulungulu hi akuhi.” Zambi makahwisa ungulungulu kupalikila mu Wanangana wenyi—we unguvulu wa mu malilu uze muukayula akwa ululi hano hashi.

ACHINYONGA HA CHINO: Shina manguvulu a hano hashi makakwasa Wanangana wa Zambi? Mbimbiliya yinasolola ngwo ka. Ayo makalimika ni Wanangana wa Zambi. (Samu 2:2) Yika muyikalingiwako? Wanangana wa Zambi muukachiza manguvulu eswe, nawa we “muukakola wa mutolo.” (Daniele 2:44) Mumu liaka unguvulu wa atu atamba kuunongesa?

Yika Mbimbiliya yinambe: “Kuchatwamine muli mukwa kwenda kusongwela mashimbo jenyi.”—JEREMIA 10:23.

YIKA YINO YINALUMBUNUKA: Atu kakatangile hanga aliyule ene. Ayo keshi kuyula kanawa akwo, nawa keshi kuhasa kuhwisa milonga yo.

ACHINYONGA HA CHINO: Umwe longeshi wa mu Grã-Britânia kambile ngwenyi, “manguvulu keshi kuhasa kuhwisa yuma yize yakupinjisa atu hano hashi, ngwe uswale, zala, yikola, luyinda wa chisemewa, jita hanji ungulungulu.” Yamba nawa ngwenyi: “Amwe . . . kakutayiza ngwo ndo kupwe umwe unguvulu umuwika wa hashi heswe mba ahase kuhwisa milonga yeswe.” Alioze, chipwe ngwe manguvulu eswe a atu malichinga apwe nguvulu umuwika, nihindu hashi mayulaho kuli atu yihenge waze keshi ni uhashi wa kuhwisa yipikalo yize twatongola helu. Wanangana wa Zambi we wika ukwete ndundo ja kuhwisa milonga yeswe ku miaka yeswe.

Alioze, kulita ni Mbimbiliya, songo lia hano hashi hanji lia yuma ya mwakono, kuliatambile kuvwisa atu apema woma. Jino jili sango jipema, mumu chifuchi chino chipi makachisalakanyisa ni chifuchi chipema cha Zambi!

Ha mashimbu aka yino yeswe muyikalingiwa? Mutwe muuhataho, musolola kumbululo lia Mbimbiliya ha chihula chino.