“Lawokenu se kunwanyingikine tangwa, chipwe ola.”—MATEU 25:13.

“Kanyamenu, lawokenu, lembenu: mumu kunwanyingikene muze mwaka muupwa.”—MARKU 13:33.

Kashika kukushi niumwe hano hashi unanyingika tangwa lize yuma yipi ya hano hashi makayihwisa. Alioze, Zambi hanase “tangwa” ni “ola” yize songo muliheta. (Mateu 24:36) Shina chino chinalumbunuka ngwo, kushi yuma yize muyihasa kutukwasa hanga tunyingike ngwetu songo linakundama? Ka, hi chocho ko. Yesu kalwezele tumbaji twenyi hanga anyingike yilayi yinji yize te muyisolola ngwo, songo linakundama.

Yuma anatongola mushi ye te muyipwa chilayi “cha kumanunuka cha miaka.” Yesu yamba ngwenyi: “Vungu limwe makakatukila akwa vungu likwo, ni akwa wanangana umwe makakatukila akwa wanangana ukwo; kumukukapwa tupunga ni yilungo ni minyiko kweka ni kweka.” (Mateu 24:3, 7) Yamba nawa ngwenyi, kumukukapwa “yilungo”—hanji misongo yinji kweka ni kweka. (Luka 21:11) Shina wakumona yuma yino ya uprofeto wa Yesu?

Ha matangwa wano a kusula atu kanamono lamba linji mumu lia jita, zala, minyiko, ni misongo. Chakutalilaho, ha mwaka 2004, ku Oceano Índico kwalingiwile umwe munyiko unene uze wanehene kakundukundu (tsunami) yoze washihile atu 225,000. Ha miaka yitatu, musongo wa COVID 19 unakashiha unji wa atu 6.9 milhões. Yesu kambile ngwenyi, yuma yino ye te muyisolola ngwo songo lia yuma yipi ya hano hashi linakundama.

Mbimbiliya yinavuluka mashimbu wano akalu ngwo “matangwa a kusula.” (2 Petulu 3:3, 4) Mukanda 2 Timoteu 3:1-5 unasolola ngwo, ha matangwa a kusula atu te mehuka shimbi jipema ja mu Mbimbiliya. (Tala mushete “ Shimbu Songo lia Hano Hashi Kanda Lichiheta.”) Shina musono wakumona atu waze akwete chipululu, kuzo, asasu nawa keshi zango? Yitanga yino neyo yinasolola ngwo, songo lia hano hashi linakundama.

Matangwa a kusula malinga mashimbu angahi? Mbimbiliya yinambe ngwo, malinga wika “mwaka ukepe.” Hanyima mba Zambi makanongesa “waze akwonwona hashi.”—Usolwelo 11:15-18; 12:12.

Zambi hanatesa tangwa ni ola yize makaneha songo lia hano hashi hapi. (Mateu 24:36) Chipwe chocho, kuli sango jipema, Zambi “kazangile niumwe kutoka.” (2 Petulu 3:9) Kashika, iye kanahane uhashi kuli atu hanga alilongese shimbi jenyi ni kumwononokena. Mumu liaka? Mumu iye kanazange tulilamwine muze songo lia hano hashi hapi muliza, nawa kanazange tukatwame mu chifuchi chaha muze hashi muhapwa paraisu.

Zambi kanalongesa atu hashi heswe chize mahasa kumwononokena, hanga akatwame hashi haha mushi lia Wanangana wenyi. Yesu kambile ngwenyi, sango jipema ja Wanangana wa Zambi te majambujola “mu yifuchi yeswe ya hashi.” (Mateu 24:14) Hashi heswe, Yela ja Yehova kakuzachisa tununu ni tununu a maola mu mulimo wa kwambujola ni kulongesa atu sango ja mu Mbimbiliya. Yesu kambile ngwenyi, mulimo uno wa kwambujola te maulinga hashi heswe shimbu songo kanda lichiza.

Mashimbu a kuyula cha manguvulu ja atu kanayi ni kuheta kusongo. Alioze sango jipema jili ngwo, yena muhasa kulilamwina muze songo lia hano hashi muliheta, ni kutwama mu paraisu hano hashi yize Zambi hanalakenya. Mutwe uze muuhataho muusolola chize yena muhasa kutwama mu chifuchi chaha.