1. (a) Chuma chika chalifwa chize alingile Jefeta ni Hana? (Tala chizulie cha uputukilo.) (b) Yihula yika mutukumbulula ha mutwe uno?

JEFETA kapwile kasongo wa hamu nawa kajita wakanyama. Hana, kapwile umwe pwo walikehesa yoze te wakufunga kanawa mukwo-lunga hamwe ni zuwo lienyi. Ayo eswe ni aali te kakuwayila Yehova. Alioze, ayo kapwile nawa ni chimwe chuma chalifwa. Jefeta ni Hana, kalingile chilakenyo kuli Yehova, nawa hita mutu kamanunwine chilakenyo chenyi ni ushishiko weswe. Ayo kali yilweza yipema yize malunga ni mapwo waze akulinga yilakenyo kuli Yehova musono, mahasa kwimbulula. Haliapwila tuhengwolenu makumbululo a yihula yitatu: (1) Chilakenyo yika chinalumbunuka? (2) Kulinga chilakenyo ulemu uka chikwete kumeso ja Zambi? (3) Malongeso aka mutuhasa kulilongesa hali Jefeta ni Hana?

2, 3. (a) Chilakenyo yika chinalumbunuka? (b) Yika Yisoneko yakwamba hakutwala ku kulakenya chimwe kuli Zambi?

² Mu Mbimbiliya chilakenyo chapwa chuma chilemu chize twakulakenya kuli Zambi. Chakutalilaho, mutu mahasa kulakenya kuli Yehova ngwenyi, malinga chimwe chuma, mamwaha umwe mulambu, manjila mu umwe mulimo, hanji kulituna yimwe yuma. Yilakenyo kakuyilinga kuli atu ene,  ha kuzachisa chawana chakusakula chipi ni chipema. Niumwe keshi kumushinjila hanga alinge chilakenyo. Alioze muze mutu masakula kuchilinga, Yehova kakumona ngwenyi chilakenyo chenyi chili chuma chilemu chize atamba kuvumbika ni kumanununa. Mu Mbimbiliya, chilakenyo chapwa chilemu ngwe chize liapwa shingo. Shingo liapwa chuma chize mutu akulishinga mwene ngwo malinga hanji kwecha kulinga chimwe chuma. (Uputukilo 14:​22, 23; A-Hepreu 6:​16, 17) Kuchi Mbimbiliya yakusolola ulemu uze twatamba kumanwinamo yilakenyo yetu kuli Zambi?

³ Mu Shimbi ya Mose, twakutangamo ngwo, nyi umwe lunga malakenya kuli Yehova chilakenyo chimwe, “kanda akajilula liji lienyi, iye akalinge nikulita ni yeswe muyituhuka mu kanwa lienyi.” (Kwalula 30:2) Kulutwe, Solomone yasoneka ngwenyi: “Nyi mulakenya chilakenyo kuli Zambi, kanda ukokoloka ha kuchifweta, mumu keshi kuwahilila ni yehepuke. Fweta chize hiwalakenya.” (Chilumbununyi 5:4) Yesu yalongesa ngwenyi, kulakenya chimwe kuli Zambi chapwa chilemu chinji, muze ambile ngwenyi: “Hinunevu nawa chize ambile kuli ashakulu ngwo, Kanda nulishinga, alioze ukamanunune kuli Mwene mashingo je.”​—Mateu 5:33.

4. (a) Ulemu uka uli ha kulinga chilakenyo kuli Zambi? (b) Yika mutulilongesa hakutwala kuli Jefeta ni Hana?

⁴ Twamona pundu ngwetu, twatamba kulemesa chinji chilakenyo cheswacho mutulinga kuli Yehova. Mutapu uze twakufungilamo yilakenyo yetu wakutwa ha usepa wetu ni iye. Ndawichi kachisolwele pundu, muze ambile ngwenyi: “Iya makanduka ha mulundu wa Yehova, iya mamana muma mwenyi musandu?” Hachino, aye yakumbulula ha kwamba ngwenyi, Yehova makatayiza “yoze kalishingile ni mahuza.” (Samu 24:3, 4) Yilakenyo yika Jefeta ni Hana alingile? Shina chapwile chashi kuli ayo kumanununa yilakenyo yo?

5. Chilakenyo chika Jefeta alingile? Yika yalingiwileko?

⁵ Jefeta kalakenyene chimwe kuli Yehova muze te anayi ni kwasa jita ni A-Amone. Vungu liacho te liakulimika ni atu ja Zambi. (Akwa Kuyula 10:​7-9) Jefeta yeta kuli Yehova hanga akumbe jita, chocho yalakenya ngwenyi: “Nyi mukunjika A-Amone mu kwoko liami, mweswawo matuhuka ku chikolo cha zuwo liami ni kungupatwiza muze munguhiluka ha kukumba A-Amone, mapwa wambala wa Yehova.” Zambi yakumbulula kulemba cha Jefeta ni kumukwasa kukumba jita. Muze Jefeta te anafuna ku zuwo, mwanenyi wa wika wa pwo yeza ni kumupatwiza. Mwana wacho te mwe “mapwa wambala wa Yehova.” (Akwa Kuyula 11:30-34) Yika chino te chinalumbunuka kuli mwanenyi?

6. (a) Kuchi chapwile chashi kuli Jefeta ni mwanenyi kumanununa chilakenyo chize alingile kuli Zambi? (b) Yika twalilongesa hakutwala ku yilakenyo yize yili ha Shimbi Yamuchiali 23:​21, 23; Samu 15:⁠4?

⁶ Mba amanunune chilakenyo cha tato,  mwana wa Jefeta katambile kuya ni kulingila Yehova shimbu lieswe ku tabernakulu. Shina Jefeta kalingile chilakenyo chakuhona kunyonga hachino? Ka. Kwamba pundu, Jefeta kota kanyingikine ngwenyi, mwanenyi te mahasa kupwa mutu mutangu yoze te meza ni kumupatwiza. Alioze chipwe kanyingikine chipwe ka, kumanununa chilakenyo chenyi kuli Yehova kuchakapwile chashi kuli iye ni kuli mwanenyi. Muze Jefeta amwene mwanenyi, yamba ngwenyi, mbunge yenyi yamumakukine. Mwanenyi yaya “nikulilila uvirgem” wenyi. Mumu liaka? Mumu Jefeta kakapwile ni mwana wa lunga, nawa haliapwila mwanenyi te keshi kusomboka chipwe kupwa ni ana. Hachino, jina lia usoko wa Jefete te mulisula. Chipwe chocho, Jefeta ni mwanenyi yanyingika ngwo te kuli chimwe chuma chilemu chize chahiana manyonga a mbunge yo. Jefeta yamba ngwenyi: “Hinahanjika ni Yehova mba chahashile kulishingulula ku chilakenyo chami.” Mwanenyi yamba ngwenyi: “Nyi hiwahanjika ni Yehova ungulinge cheswacho wambile.” (Akwa Kuyula 11:35-39) Jefeta ni mwanenyi kapwile atu ashishika waze te keshi kwehuka chilakenyo chize alingile kuli Zambi, chipwe ngwe chapwile chikalu kuchimanununa.​—Tanga Shimbi Yamuchiali 23:21, 23; Samu 15:4.

7. (a) Yika Hana alakenyene, nawa mumu liaka? Kuchi evwile ha chilakenyo chacho? (b) Yika chilakenyo cha Hana chalumbunukine kuli Samuele? (Tala maliji mushi lia lifwo.)

⁷ Hana neye kalakenyene chimwe kuli Yehova ha mashimbu a yinyengo ku mwono wenyi. Iye kapwile ni chikala chikalu, mumu te mumba, nawa te kakumukekuna ni kumulenya mumu lia kuhona ana. (1 Samuele 1:​4-7, 10, 16) Aye yalweza Yehova chize te akwivwa, ni kumulakenya ngwenyi: “Yehova-wa-Tujita nyi chamwenemwene munutala ku luyinda wa yami kavumbi kenu, nukangwiwuluke, kanda nunguvulama kama yami kavumbi kenu, alioze nukangwehe mwana wa lunga, mungumuhana kuli Yehova ha matangwa eswe a mwono wenyi, kechi kasa tewula ku mutwe wenyi.” * (Tala maliji mushi lia lifwo.) (1 Samuele 1:11) Yehova yapanjika kulemba cha Hana, chocho ha mwaka uze wasulileho yashita mwana wa lunga, Samuele. Hana yawahilila chinji! Chipwe chocho, kakavulamine yize alakenyene kuli Zambi. Muze mwanenyi asemukine aye yamba ngwenyi: “Namwichile kuli Yehova.”​​—⁠1 Samuele 1:⁠20.

8. (a) Shina chapwile chashi kuli Hana kumanununa chilakenyo chenyi? (b) Kuchi mukanda wa Samu 61 wakukwiwulula chilweza chipema cha Hana?

⁸ Muze Samuele akumbanyishine miaka yitatu, Hana yalinga ngwe chize alakenyene kuli Yehova. Aye yatwala Samuele kuli Sasendote wa Lutwe Eli, ku tabernakulu ku Shilo ni kwamba ngwenyi: “Yono mwana nechile,  mba Yehova hangwaha chize namwichile. Kashika, ni yami nawa hinamuhana kuli Yehova, ha matangwa eswe a mwono wenyi.” (1 Samuele 1:24-28) Chize haze, Samuele yatwama ku tabernakulu. Mbimbiliya yinambe ngwo, “Ni mwe mwana Samuele yatatuka kumeso ja Yehova.” (1 Samuele 2:21) Te hi chashi ko kuli Hana kumanununa chilakenyo chenyi. Chino chalumbunukine ngwo, iye te kechi kupwa mashimbu eswe hamwe ni mwanenyi yoze azangile chinji. Te kechi kumona chize mwanenyi anayi ni kukola. Alioze Hana kasele ulemu ha chilakenyo chenyi kuli Yehova. Iye kazangile kuhana ni mbunge yeswe yuma yize te yikwete ulemu ku mwono wenyi hanga amanunune chilakenyo chenyi kuli Zambi.​—1 Samuele 2:​1, 2; tanga Samu 61:1, 5, 8.

9. Yika nawa mutuhengwola?

⁹ Haliapwila hitwanyingika ulemu uze wapwa ha kulakenya yimwe kuli Yehova, tuhengwolenu yihula yino: Yilakenyo yika twakulinga musono? Yika twatamba kulinga mba tumanunune yilakenyo yacho?

10. Chilakenyo chika chilemu chize mukwa-Kristu mahasa kulinga? Yika chino chinalumbunuka?

¹⁰ Chilakenyo chilemu chize mukwa-Kristu  mahasa kulinga, chili kuhana mwono wenyi kuli Yehova. Ha kulemba cha wika, mutu malakenya kuzachisa mwono wenyi hanga awayile Zambi ku miaka yeswe, chipwe mukusoloka chuma cheswacho. Yesu yamba ngwenyi, ‘twalituna’ yetwene, chekwamba ngwo, twakulakenya kusa Yehova kulutwe ku mwono wetu, hi yetwene ko. (Mateu 16:24) Kukatuka ha tangwa liacho, twakupwa “a mbala a Yehova.” (A-Roma 14:⁠8) Kulihana chetu kuli Yehova, twakuchilemesa chinji. Twakwivwa ngwe chize evwile mukwa-kwimba masamu ngwenyi: “Yika munguhana kuli Yehova ha yiwape yenyi yeswe kuli yami? Mungumanununa yilakenyo yami kuli Yehova, chipwe kumeso ja atu jenyi eswe.”​—Samu 116:12, 14.

¹¹ Shina hiunahana mwono we kuli Yehova ni kusolola kulihana che ha kukupapachisa mu meya? Nyi hiunachilinga, chili chipema chinji! Shina unewuluka muze ndumbu yoze wahanjikile pande ja upapachiso ahulile nyi hiwalihana kuli Yehova nawa unanyingika ngwo, “kulihana che ni upapachiso we muyikupwisa Chela cha Yehova”? Muze wakumbulwile ngwe ewa, atu eswe waze apwileho kanyingikine ngwo, hiwahana mwono we nawa hiwajama ni kukupapachisa hanga upwe kavumbi ka Yehova. Chino chevwishile Yehova kuwaha chinji!

12. (a) Yihula yika twatamba kulihula? (b) Ndako jika Petulu atukolwezele hanga tupwe najo?

¹² Muze akupapachishile, walakenyene kuli Yehova ngwe, muzachisa mwono we hanga umuwayile ni kusa tachi hanga ukaule shimbi jenyi. Alioze upapachiso uli wika uputukilo. Hakupalika cha mashimbu, yetweswe twatamba kununga ni kulihengwola yetwene. Mutuhasa kulihula ngwetu: ‘Kuchi usepa wami ni Yehova uli kukatuka ha upapachiso wami? Shina ngunanungu ni kumuwayila ni mbunge yami yeswe? (A-Kolosu 3:23) Kutala nakulemba ni kutanga Mbimbiliya matangwa eswe? Shina nakuya ku kukunguluka ni kwambujola sango lipema mashimbu eswe, nyi muchilita? Nyi hi natokesa chiseke chami ha yuma yeswayi?’ Postolo Petulu katutowezele ngwenyi, muchihasa kupwa ponde nyi mutuzeya ku spiritu mu mulimo wetu kuli Yehova. Mutuhasa kwehuka ponde yacho, nyi mutusa tachi ni kukola mu ufulielo, chinyingi, kunyongonona, ni ku uwayilo wetu kuli Zambi.​—Tanga 2 Petulu 1:​5-8.

13. Yika akwa-Kristu waze alihana ni kulipapachisa atela kunyingika?

¹³ Muze hitwalakenya kuwayila Yehova ku mwono wetu, kuchalitele kufuna nawa kunyima. Mutu yoze hazeya ni kuwayila Yehova hanji kutwama nikulita ni yitanga ya Ukristu katambile kwamba ngwenyi, kakalihanyine pundu kuli Zambi nawa ngwo upapachiso wenyi hi wamwenemwene ko. * (Tala maliji mushi lia lifwo.) Nyi mutu yoze walihana kuli Yehova malinga shili yinene, iye mapwa ni chitela kuli Yehova ni mu chikungulwila. (A-Roma 14:12) Kutwazangile kupwa ngwe atu waze Yesu ambile ngwenyi: ‘Hinunehuka zango lienu litangu.’ Alioze tunazange hanga atulweze ngwenyi: ‘Ngunanyingika yitanga yenu, zango, ufulielo, uvumbiko, kunyongonona, ni yitanga yenu ya kasula yahiana yitangu.’ (Usolwelo 2:​4, 19) Tunazange kuvwisa Yehova kuwaha ha kutwama nikulita ni kulihana chetu.

14. Chilakenyo chika chamuchiali chilemu chize mutu mahasa kulinga ku mwono wenyi? Mumu liaka?

 ¹⁴ Chilakenyo chamuchiali chilemu chize mutu akulinga, chili chilakenyo cha ulo wenyi. Ulo wapwa usandu. Yehova kakumona chilakenyo cha ulo ngwe chapwa chilemu chinji. Muze lunga ni pwo malishinga, ayo kanalilakenya kumeso ja Yehova ni kuli atu eswe waze ali ha umbachiso wo. Ayo kanji-kanji kakulilakenya kulizanga, kulilemesa, ni kulivumbika umwe ni mukwo ha mashimbu eswe waze matwama hamuwika hano hashi nikulita ni ululikiso wa Zambi hakutwala ku ulo. Akwo hanji keshi kuzachisa maliji wano, chipwe chocho, kakulinga chilakenyo kumeso ja Zambi. Muze akulinga yilakenyo yacho, ayo kakupwa lunga ni pwo. Ulo unalumbunuka kutwama hamuwika ni kulivwashana. (Uputukilo 2:24; 1 A-Korindu 7:39) Yesu yamba ngwenyi: “Chize Zambi hananungu, niumwe mutu kanda akachihandununa.” Lunga ni pwo waze alimbata katambile kunyonga ngwo nyi ulo wo kuushi kwenda kanawa, mahasa kwo kuliecha hanji kulilakula.​—Marku 10:9.

15. Mumu liaka Yela ja Yehova katambile kunyonga ulo ngwe chize akuunyonga kuli waze keshi kuwayila Yehova?

¹⁵ Amu kukushi atu angunu, chizechene nawa, kukushi ulo ungunu. Kashika Mbimbiliya yakutulweza ngwo, waze alimbata ha mashimbu amwe “kumakapwa ni luyinda ha mwono” wo. (1 A-Korindu 7:28) Hashi ha musono, atu anji kakwete nyonga lialisa hakutwala ku ulo. Ayo kakunyonga ngwo nyi yuma kuyishi kwenda kanawa mu ulo wo, ayo mahasa kuliecha. Alioze hi chocho ko, Yela ja Yehova akunyonga ha ulo. Ayo kananyingika ngwo kanakalinga chilakenyo cha ulo wo kumeso ja Zambi. Nyi mahona kuchimanununa, muchipwa ngwe kamwongele. Alioze tunanyingika ngwetu, Zambi keshi kuzanga akwa-mahuza. (Ulevi 19:12; Yishima 6:16-19) Yela ja Yehova waze alimbata katamba kwiwuluka maliji a postolo Paulu akwamba ngwo: “Unakashiwa kuli pwo, nyi? Kanda ufupa kukasuluka.” (1 A-Korindu 7:27) Paulu kambile chocho mumu kanyingikine ngwenyi, Yehova neye keshi kuzanga kulilakula chakutachi.​—Malakia 2:13-16.

16. Yika Mbimbiliya yinambe hakutwala ku kulilakula ni kulihandununa cha waze alimbata?

¹⁶ Yesu kalongesele ngwenyi, chitela cha mu Yisoneko chize muchihasa kutwala waze alimbata hanga alilakule, chili wika nyi umwe malinga utanji, nawa yoze wasamba malituna kumukonekena. (Mateu 19:9; A-Hepreu 13:⁠4) Mba yika mutwamba hakutwala ku kulihandununa cha waze alimbata? Mbimbiliya neyo yakuhanjika pundu ha chikuma chino. (Tanga 1 A-Korindu 7:10, 11.) Mu Mbimbiliya kumushi chitela chakulihandununa cha waze alimbata. Alioze, ha mashimbu amwe mukuhasa kusoloka yuma yize muyilingisa mukwa-Kristu hanga alihandunune ni mutu yoze alimbata nenyi. Chakutalilaho, amwe mahasa kumona ngwo, mwono hanji usepa wo ni Yehova muupwa mu ponde yinene nyi matwama ni lunga hanji pwo chilianyi chipwe chitanganyanyi. * (Tala maliji mushi lia lifwo.)

17. Yika akwa-Kristu waze alimbata mahasa kulinga mba ulo wo ukole?

¹⁷ Nyi waze alimbata maya ni kwita chiyulo kuli makulwana amu chikungulwila ha  chize atamba kululieka ulo wo, makulwana mahasa kwaahula ngwo, hinwatala kulu chinema, Zango Liamwenemwene Kuchi Liapwa? nawa hinwalilongesa mukanda Kuchi ­Munuhasa Kupwa ni Uwahililo mu Usoko? Shimbi ja ­Mbimbiliya jize jiliho mujihasa ­kukwasa waze alimbata hanga akolese ulo wo. Amwe waze alimbata yamba ngwo: “Chize haze twaputukile kulilongesa mukanda uno, tunawahilila mu ulo wetu kuhiana.” Umwe pangi yoze hanasomboka ha miaka 22, kanyongene ngwenyi ulo wenyi te muufwa. Hachino, aye yatala chinema chacho ni kwamba ngwenyi: “Yetweswe ni aali hanatupapachisa kulu, alioze tukwete manyonga alisa. Chinema chino cheza ha shimbu lialita! Haliapwila tunase tachi hanga tulivwashane mu ulo wetu.” Chochene, waze alimbata nyi makaula shimbi ja Yehova mu ulo wo, usepa wo muukola nawa mapwa ni uwahililo.

¹⁸Ku uputukilo wa mutwe uno twahanjika hakutwala ku yilakenyo ya Jefeta ni Hana. Mumu lia yilakenyo yacho, mwana wa Jefeta ni mwana wa Hana yazachisa mwono wo hanga alingile Yehova mu majila alipwila. Musono yisemi anji akwa-Kristu kakukolweza ana jo hanga anjile mu mulimo wa kwambujola wa shimbu lieswe ni kuhulikila mwono wo mu mulimo wa Zambi. Hachino, yetweswe mutuhasa kukolweza akweze jacho hanga anunge mu mulimo wo.​​—⁠Akwa Kuyula 11:40; Samu 110:⁠3.

18, 19. (a) Yisemi anji akwa-Kristu yika akulinga? (b) Yika mutuhasa kwamba hali mandumbu waze ali mu mulimo walipwila wa shimbu lieswe?

¹⁹ Musono, Hashi heswe mandumbu 67,000, kali mu Mulimo Walipwila wa ­Shimbu Lieswe wa Yela ja Yehova. Amwe kakukalakala ku Mbetele hanji ku mulimo wa kutunga mazuwo chipwe ­kumeneka ­yikungulwila. Akwo kapwa alongeshi a ­mashikola a Wanangana, pionelu alipwila, mishionaliu, tuvumbi waze akufunga Mazuwo Akukunguluka cha Mbonge, hanji tuvumbi aku Mazuwo a Shikola ja Wanangana. Mandumbu wano eswe hanalingi “Chilakenyo cha Kwononoka ni Uswale.” Ha chilakenyo chacho, ayo kakulakenya kuhondangana mulimo weswawo maaha mu ululikiso wa Yehova, ha kupwa ni mwono washi, ni kwehuka kulinga mulimo uze mafwikako mbongo chakuhona utayizo wa kuulinga. Mandumbu jacho hi atu alemu ko, alioze mulimo uze akulinga we ulemu. Ni kulikehesa cheswe hanakwate chiyulo chakufunga chilakenyo cho, shimbu achili mu mulimo walipwila wa shimbu lieswe.

20. Kuchi twatamba kwivwa hakutwala ku yilakenyo yetu kuli Zambi? Mumu liaka?

²⁰ Mu mutwe uno, twalilongesa yilakenyo yitatu yize mutuhasa kulakenya kuli Zambi. Kota hiunalingi yimwe yilakenyo yacho. Tunanyingika ngwetu, twatamba kulemesa yilakenyo yetu nawa twatamba kulinga yeswe yize mutuhasa hanga tuyimanunune hanji kuyifunga. (Yishima 20:25) Nyi kutwamanunwine yilakenyo yize hitunalingi kuli Yehova, mutuhasa kumona lamba linji ku mwono wetu. (Chilumbununyi 5:⁠6) Kashika tupwenu ngwe mukwa-kwimba masamu wambile kuli Yehova ngwenyi: “Mungwimba uhaliso ku jina lie ku miaka ya mutolo, hanga ngukamanunune yilakenyo yami ­tangwa ha tangwa.”​—Samu 61:8.