1, 2. (a) Uhenge uka amwene Nabote ni ana jenyi? (b) Yitanga yika yaali mutulilongesa ha mutwe uno?

YINGULUNGULU aali yaliongela umwe lunga mulonga unene. Yize ayo ambile yapwile ya mahuza. Chipwe chocho, lunga wacho yamwanda kalema ni kumushiha. Achinyonga chize evwile atu waze te akuzanga ululi ha kumona lunga wacho kanamushihi hamwe ni ana jenyi chakuhona kulinga upi niumwe! Chino hi chishima wika ko. Chalingiwile kuli kavumbi washishika wa Yehova yoze te avuluka ngwo Nabote, yoze watwamine ha mashimbu waze Mwanangana Ahabe te anayulu mu Izalele.​—1 Mianangana 21:11-13; 2 Mianangana 9:26.

² Mu mutwe uno, mutulilongesa yize yalingiwile kuli Nabote. Mutulilongesa nawa uhenge unene uze alingile kuli umwe mukulwana washishika mu chikungulwila cha akwa-Kristu ku sekulu yitangu. Yilweza yino yaali muyisolola chize kulikehesa  ni kukonekena akwetu chili chilemu nyi mutuzanga kwimbulula ululi wa Yehova.

³ Nabote te kashishika kuli Yehova ha mashimbu waze A-Izalele anji te akukaula chilweza chipi cha Mwanangana Ahabe ni mukwo-pwo, Mwazovu mupi Jezebele. Ayo te kakuwayila zambi wa mahuza Mbale nawa te keshi kuvumbika Yehova hamwe ni shimbi jenyi. Alioze Nabote te kakulemesa usepa wenyi ni Yehova kuhiana mwono wenyi.

⁴ Tanga 1 Mianangana 21:​1-3. Muze Ahabe azangile kulanda munda wa vinyu kuli Nabote hanji kumwaha weka, Nabote yalituna. Mumu liaka? Iye kalumbunwine ni vumbi lieswe ngwenyi: “Yehova achikanjise, chichi kuhasa kukwaha chihinga cha tulamba twami.” Nabote kalitunyine kuhana munda kuli Mwanangana Ahabe mumu chino te muchilimika ni shimbi ya Yehova yize ahanyine kuli A-Izalele ya kuchina kulanjisa chihinga cha asoko jo. (Ulevi 25:23; Kwalula 36:⁠7) Pundu lume, Nabote kapwile ni kwononokena Yehova.

⁵ Muze Nabote alitunyine kulanjisa munda wenyi wa vinyu, Mwanangana Ahabe ni mukwo-pwo kalingile yuma yipi chinji. Mba ahase kutambula munda wacho, Mwazovu Jezebele yatuma malunga aali hanga aliongele Nabote yuma yize kakalingile. Hachino, Nabote yamushiha hamwe ni ana jenyi. Mba yika Yehova alingile ha uhenge uno wahiana?

⁶Ni ululi weswe Yehova yatuma Eliya kuli Ahabe. Eliya yalweza Ahabe ngwenyi, iye te chingalwe nawa mwiji. Chiyulo cha Yehova te chika? Chapwile ngwo, Ahabe, mukwo-pwo ni ana jenyi te maashiha, ngwe chize ayo alingile kuli Nabote ni ana jenyi.​​—⁠1 Mianangana 21:​17-25.

⁷ Asoko ja Nabote ni masepa jenyi kevwile yinyengo ha yuma yize Ahabe alingile. Alioze Yehova kamwene uhenge wacho, chocho kawashi-washi yalulieka yuma. Chino chapwile utakamiso unene kuli ayo. Chipwe chocho, kulikehesa ni ufulielo wo kuli Yehova yapwile mu cheseko hamukunda wa yuma yize yasulileko.

⁸ Muze Ahabe evwile yize Yehova ambile kulinga kuli iye, yasuwa “mazalo jenyi, yazala chikeleyi ha mujimba wenyi, yalitwamina kulia, yapomba mu chikeleyi ni kwenda ni vumbi.” Ahabe yalikehesa mwene! Mba yika yalingiwileko? Yehova yalweza Eliya ngwenyi: “Chichi kuneha che chipi ha matangwa  jenyi, mumu kalikehesa kuli yami alioze munguneha chipi ha munyachi wenyi ha mtangwa ja mwanenyi.” (1 Mianangana 21:​27-29; 2 Mianangana 10:​10, 11, 17) Yehova, ‘mukwa kweseka mbunge’ yoze wakumona wika yize yili ku mbunge yetu, kasolwele keke hali Ahabe.​—⁠Yishima 17:⁠3.

⁹ Muze usoko wa Nabote ni masepa jenyi evwile ngwo, asoko ja Ahabe kechi kwaamwesa lamba ndo muze Ahabe mafwa, chino kota chasele ufulielo wo kuli Zambi mu cheseko. Alioze kulikehesa te muchaakwasa hanga afunge ufulielo wo kuli Zambi. Mumu liaka? Mumu nyi ayo te mashishika, te manunga ni kuwayila Yehova, ni kumufuliela ngwo iye keshi kulinga yuma ya uhenge. (Tanga Shimbi Yamuchiali 32:​3, 4.) Kulutwe lia matangwa, asoko ja Nabote makawahilila muze makamuhindwisa hamwe ni ana jenyi. Nabote ni ana jenyi makamona ululi ungunu. (Yombi 14:​14, 15; Yoano 5:​28, 29) Mutu walikehesa kananyingika ngwo, “Zambi makakokela chitanga cheswe ku usopelo, ni chuma cheswe cha kuhengama, chipwe chipema, chipwe chipi.” (Chilumbununyi 12:14) Yehova kananyingika  kanawa yuma yize yetu kutushi kuhasa kunyingika. Kashika kulikehesa cha kutufunga hanga tuhone kutokesa ufulielo wetu kuli Yehova.

¹⁰ Yika mulinga nyi makulwana mu chikungulwila makwata chiyulo chize kuwachinyingikine hanji kuwachitayijile? Chakutalilaho, yika mulinga nyi yena hanji ndumbu yoze wanyingika matokesa chiteli chenyi mu mulimo wa Yehova? Yika mulinga nyi yoze walimbata nenyi, mwane, hanji sepa lie mamusosolola mu chikungulwila nawa kuwatayijile chiyulo chize makulwana akwata? Yika mulinga nyi unanyongo ngwe, makulwana kakwata chiyulo chipi hakwivwila keke ndumbu yoze wavulumuna? Yuma yino muyihasa kusa ufulielo wetu kuli Yehova mu cheseko ni mutapu uze iye akululiekelamo yuma mu chikungulwila musono. Shina kulikehesa muchikukwasa nyi mupwa mu cheseko cha yuma yize twatongwola hano? Tutalenu yikuma yaali yize muyitukwasa.

¹¹ Chitangu, nyi tuli akwa-kulikehesa, mututayiza ngwetu tushi kunyingika kanawa yuma yeswe yize yinalingiwako. Chipwe mutunyonga ngwetu yuma yeswe ha chikuma chacho tunayinyingika, nihindu Yehova wika mwe wanyingika yize yili ku mbunge ya mutu. (1 Samuele 16:⁠7) Muze mutupukuna hachino, ni kulikehesa cheswe mutunyingika ngwetu, tushi kunyingika yuma yeswe nawa twatamba kululieka manyonga jetu. Chamuchiali, nyi tunamono hanji tunapalika mu yuma ya uhenge, kulikehesa muchitukwasa twononoke ni kulihumikiza ni kushimbwila Yehova hanga alulieke yuma. Mbimbiliya yinambe ngwo: “Hindu ngunanyika pundu waze mavwila woma Zambi, kumakawaha.” Yinambe nawa ngwo: “Alioze chingulungulu kechi kuwaha; aye kechi kusuhisa matangwa jenyi.” (Chilumbununyi 8:​12, 13) Nyi mutununga ni kulikehesa, mutukayuka hamwe ni waze eswe ali mu chikuma chacho.​​—⁠Tanga 1 Petulu 5:⁠5.

¹² Akwa-Kristu atangu mu Andiakia ya ku Seria kamwene yuma yize yesekele kulikehesa cho ni nyonga lio lia kukonekena akwo ni mbunge yeswe. Tuhengwolenu lusango wacho nawa ni kumuzachisa ku mwono wetu hanga tululieke yitanga yetu ha kukonekena akwetu. Chino muchitukwasa hanga tunyingike mumu liaka Yehova mahasa kuzachisa atu waze yihenge chakuhona kulengulula shimbi jenyi.

¹³ Postolo Petulu kapwile umwe mukulwana yoze te anyingika kanawa kuli akwa-Kristu aku sekulu yitangu. Iye kendele hamwe ni Yesu nawa kamwehele yiteli yilemu mu chikungulwila. (Mateu 16:19) Chakutalilaho, ha mwaka 36, Petulu yamutuma hanga aye ni kwambujola sango lipema kuli Koneliu hamwe ni akwa-zuwo lienyi. Mumu liaka chino chapwile chilemu? Mumu Koneliu  te hi Ka-Yunda ko; iye te chilima mukwa-mavungu. Muze Koneliu ni akwa-zuwo lienyi atambwile spiritu yisandu, Petulu yanyingika ngwo, te katamba kwaapapachisa hanga apwe akwa-Kristu. Yamba ngwenyi: ‘Atu wano hatambula spiritu yisandu ngwe yetu, shina umwe mahasa kutukinda ha kwaapapachisa ni meya nyi?’​​—⁠Yilinga 10:⁠47.

¹⁴ Ha mwaka 49, apostolo ni makulwana mu Yerusaleme yalikunga hanga akwate chiyulo cha kunyingika nyi akwa-Kristu waze te hi A-Yunda ko, katamba kwaatwala ku mukanda. Ha kukunguluka chacho, Petulu ni zango lieswe yewulula mandumbu ngwenyi, kamwene ni meso jenyi akwa-mavungu waze te yilima yatambula spiritu yisandu. Yize Petulu ambile ye yakwashile chizavu cha tusongo mba akwate kanawa chiyulo cho. (Yilinga 15:​6-11, 13, 14, 28, 29) Akwa-Kristu A-Yunda ni waze te hi A-Yunda ko eswe kevwile kuwaha hakunyingika ngwo Petulu kapwile ni hamu lia kusolola yuma yize yalingiwileko. Chino chakwashile akwa-kristu jacho, kujikijila muli lunga yono wajama nawa washishika!​​—⁠A-Hepreu 13:⁠7.

¹⁵ Muze kukunguluka chahwile mu Yerusaleme, Petulu yaya ni kumeneka mandumbu ku Andiakia. Muze apwileko, iye te kakupwa hamwe ni mandumbu waze te hi A-Yunda ko. Ayo te akuzanga chinji kulilongesa ha chinyingi ni ha yuma yize Petulu apalikile ku mwono. Hachino, ayo kota kakomokene ni kwivwa chinyengo muze amwene susumuku Petulu halitwamine kulia no. Petulu yalingisa akwa-Kristu akwo A-Yunda, kuchingako ni Mbarnabe hanga no alinge chochene. Mumu liaka mukulwana yono mukwa-Kristu wajama alingile uhenge upwahaha, uze te muuhasa kuhandununa chikungulwila? Chikuma chilemu chili ngwo, yika mutuhasa kulilongesa ha uhenge wa Petulu yize muyitukwasa muze umwe mukulwana matulemeka ku mbunge ha yihanjika hanji ku yitanga yenyi?

¹⁶ Tanga A-Ngalashia 2:​11-14. Petulu kapwile ni kwivwila atu woma. (Yishima 29:25) Iye kanyingikine kanawa chize Yehova te akwivwa hali akwa-Mavungu. Chipwe chocho, kapwile ni kwivwa woma ngwo, akwa-Kristu A-Yunda ngalami waze akatukile ku Yerusaleme te mamunyongena upi, mumu lia kupwa hamwe ni akwa-Kristu waze te akwa-Mavungu. Postolo Paulu yalweza Petulu ngwenyi kali chilembekese. Mumu liaka? Mumu Paulu kevwile chize Petulu apwile ni kukalila akwa-Mavungu ha ku kukunguluka chize chapwile ku Yerusaleme ha mwaka 49. (Yilinga 15:12; A-Ngalashia 2:13.) Kuchi te mevwa akwa-Kristu waze hi A-Yunda ko ha katonde yoze Petulu asolwele? Shina ayo te katamba kutalinga ha chikuma chacho? Kutala Petulu kachi katokesele yiteli yenyi mumu lia uhenge wacho?

¹⁷ Petulu kalikehesele ni kutayiza ukwaso wa Paulu. Yisoneko kuyishi kwamba ngwo, Petulu katokesele yiteli yize apwile nayo. Mumu kulutwe, Zambi kakwashile Petulu hanga asoneke mikanda yaali ya mu Mbimbiliya. Mu mukanda wenyi wamuchiali, iye yavulwoka Paulu ngwenyi, “ndumbwetu wa zango.” (2 Petulu 3:15) Uhenge wa Petulu kota wanehene yinyengo yinji kuli akwa-Kristu waze te hi A-Yunda ko. Chipwe chocho, Yesu, we mutwe wa chikungulwila, nihindu kanungine ni kuzachisa Petulu. (A-Efwesu 1:22) Mandumbu ni mapangi mu chikungulwila kapwile ni uhashi wa kwimbulula Yesu ni Tato ha kukonekena Petulu. Hachino, niumwe ndumbu te kechi kutalinga hamukunda wa uhenge wa mutu mukwa-shili.

¹⁸ Mu chikungulwila cha akwa-Kristu ku sekulu yitangu mwakapwile makulwana angunu, ni musono nawa mu chikungulwila cha akwa-Kristu kumushi makulwana angunu. Mbimbiliya yinambe ngwo: “Yetu eswe twakutalinga mu yuma yinji.” (Tiangu 3:⁠2) Chino chili chashi kunyingika, alioze yika mutulinga nyi umwe ndumbu matulinga yuma ya uhenge? Shina mutwimbulula ululi wa Yehova? Chakutalilaho, kuchi mulinga nyi umwe mukulwana mu chikungulwila makwamba yimwe yize kuyalitele? Shina mutalinga nyi umwe mukulwana chakuhona kunyonga makwamba chimwe chize muchikulemeka ku mbunge? Shimbu ulipupulule kunyonga ngwe ndumbu wacho katelele kupwa nawa mukulwana, shina muhasa kulihumikiza ni kushimbwila kuli Yesu, we mutwe wa chikungulwila? Shimbu ulihulikile ha uhenge wa ndumbu wacho, shina muhasa kwiwuluka miaka yinji yize ananungu ni kuwayila Yehova ni ushishiko weswe? Nyi umwe ndumbu makuvulumuna nawa manunga ni kukalakala ngwe mukulwana mu chikungulwila hanji matambula yiteli yinji, shina yena muwahilila nenyi? Nyi wamukonekena ni mbunge yeswe, musolola ngwe unembulula ululi wa Yehova.​—Tanga Mateu 6:14, 15.

¹⁹ Amu twakuzanga ululi, tunashimbwila ni mbunge yeswe tangwa lize Yehova makahwisa yuma yeswe ya uhenge yize Satana akuneha ni hashi henyi hapi. (Izaia 65:17) Kashika, muze mutupalika mu yuma ya uhenge, ni kulikehesa cheswe tutayizenu ngwetu kutuchi kuhasa kunyingika yuma yeswe yize yinalingiwako, ni kukonekena ni zango lieswe waze akutulinga yuma yipi. Ni mutulinga chocho, mutwimbulula ululi wa Yehova.