1. Paraisu ya ku spiritu yika yinalumbunuka, nawa yika twatamba kulinga?

 MUSONO, hano hashi hali paraisu muze muli atu anji waze anatwamemo ni sambukila ni kulinga yuma yeka ni yeka. Atu waze ali mu paraisu yacho, kanase tachi hanga ahone kutuhukamo. Chikwo nawa, kanazange hanga atu akwo no anjile mu paraisu yacho akalakale no hamuwika mu chihela chino chipema. Mba paraisu yika yenayo? Paraisu ya ku spiritu. a

2. Yika yakukomwesa hakutwala ku paraisu ya ku spiritu?

² Chili kukomoka ha kumona chize Yehova alulieka chimwe chihela cha sambukila hano hashi haze Satana halumunaho chihela cha yuma yipi, kole ni mbwanja. (1 Yoa. 5:19; Uso. 12:12) Zambi yetu wa zango kananyingika kanawa ponde yize yiliko ha kutwama mu chifuchi chino ha mashimbu wano. Kashika, akutwaha ukulungunga uze tunafupiwa hanga tununge ni kukola ku ufulielo, ni kununga ni kumulingila ni uwahililo. Mbimbiliya yakuhanjika ha paraisu ya ku spiritu ngwe chimwe “chiswamo” hanji ngwe “fuji lia meya lize kulishi kuma.” (Iza. 4:6; 58:11) Ni ukwaso wa Yehova, waze eswe akulinga chihanda mu paraisu ya ku spiritu, kakuwahilila ni kupwa mu ufunge upema ha mashimbu wano akalu.—Iza. 54:14; 2 Timo. 3:1.

3. Maliji a Izaia kapitulu 65 kaliangile kumanunuka ha mashimbu aka?

³ Yehova katumine profeta Izaia kusolola chize mwono te muupwa mu paraisu ya ku spiritu. Muhasa kuwana maliji jacho mu kapitulu 65 wa Izaia. Uprofeto uno wamanunukine chitangu ha mwaka 537 K.M.J., muze A-Yunda aatuswile mu undungo ku Babilonia ni kufuna mu chifuchi cho. Yehova kawahishile  atu jenyi ni kwakwasa hanga alulieke nawa mbonge yo ya Yerusaleme ni kutungulula tembele hanga yipwe chihela chitangu cha uwayilo wamwenemwene mu Izalele.—Iza. 51:11; Zeka. 8:3.

4. Kuchi maliji a Izaia kapitulu 65 anamanunuka ha mashimbu jetu?

⁴ Umanunuko wamuchiali wa uprofeto uno wa Izaia, waputukile ha mwaka 1919 M.J., muze tuvumbi twa Yehova atuhukile mu undungo wa Babilonia Yinene. Ha mwaka wacho, paraisu ya ku spiritu yiyiputuka, chocho yaputuka kusa yikungulwila yinji hashi heswe. Malunga ni mapwo waze apwile ni kulinga upangala ni vunda, yaputuka kusolola yitanga yipema ya Akwa-Kristu “ni kuzala utu waha uze atangile kulita ni upale wa Zambi.” (Efwe. 4:24) Tunanyingika ngwetu, yiwape yinji yize Izaia asonekene muyikamanunuka mu chifuchi chaha, alioze chipwe haliapwila waze ali mu paraisu ya ku spiritu kanayuku chinji ha yiwape yacho. Kashika, tutalenu upeme wa kupwa mu paraisu yino ni yize mutulinga hanga tuhone kutuhukamo.

KUCHI WAZE ATWAMA MU PARAISU YA KU SPIRITU AKULIVWA?

5. Kulita ni Izaia 65:13, yiwape yika tuli nayo mumu lia kupwa mu paraisu ya ku spiritu?

⁵ Kakulia kanawa ni kupwa ni mijimba yipema. Uprofeto wa Izaia unasolola ngwo, kuli kalisa munene hakachi ka waze ali mu paraisu ya ku spiritu ni waze keshimo. (Tanga Izaia 65:13.) Yehova kakuhana kulia chinji cha ku spiritu kuli waze akumuwayila. Iye kakutwaha spiritu yenyi yisandu, Liji lienyi Mbimbiliya ni kulia chikwo chinji cha ku ufulielo chize mutuhasa ‘kulia, kunwa hanga tuwahilile.’ (Tesa ni Usolwelo 22:17.) Mwono tuli nawo unalise chinji ni wa waze keshi mu paraisu ya ku spiritu. Mumu atu jacho, ‘kakufwa zala, kakuhona meya ni kupalika mu luchoko.’ Ayo kakulivwa ngwo kanahono yimwe ku mwono wo mumu keshi ni usepa upema ni Zambi.—Amo. 8:11.

6. Kuchi Joele 2:21-24, unalumbununa yiwape yimwe yize Yehova akutwaha; mba kuchi mutuhasa kuyuka ha yuma yacho?

⁶ Profeta Joele, katongwele yuma ya tangwa ni tangwa ngwe mbuto, vinyu ni maji hanga asolole chize Yehova apwa chihanyi munene. Kashika, Yehova akutwaha yuma yeswe yize tunafupiwa ku spiritu. (Joele 2:21-24) Iye kakuchilinga kupalikila mu Mbimbiliya, mu mikanda yetu, mu site jw.org ni ha kukunguluka cha chikungulwila, cha mbonge ni cha mambonge. Nyi mutulia kanawa kulia chino cha ku spiritu, mutuyuka ni kupwa ni mijimba yipema ni kununga kukola ku ufulielo.

7. Yika yakutukwasa kupwa ni ‘mbunge yipema’? (Izaia 65:14)

⁷ Twakuwahilila ni kuyuka ni yuma yize tuli nayo. Tuvumbi twa Zambi mahasa ‘kwimba ni chiseke’ mumu mu mbunge yo muli mwa too ni usakwililo ha yeswe yize Yehova akwalingila. (Tanga Izaia 65:14.) Yetu tuli ni mbunge yipema mumu lia umwenemwene wa mu Mbimbiliya uze wakututakamisa ni kutalatala chetu chikolo chize chinakatuka ha chitapo cha Yesu. Chikwo nawa, kuhanjika ni mandumbu jetu a ku ufulielo hakutwala ku yuma yino yipema chakutuvwisa kuwaha chinji!—Samu 34:8; 133:1-3.

8. Yitanga yika yaali yize yakusolola paraisu ya ku spiritu?

⁸ Kuli yitanga yaali yilemu yize yakusolola paraisu ya ku spiritu. Yitanga yacho yili, zango ni kulinunga chize chatwama mukachi ka atu ja Yehova. ‘Muya uno ungunu,’ wakutusolwela chize mwono muukapwa mu chifuchi chaha, muze tuvumbi twa Yehova makatwama ni zango hamwe ni kulinunga kuhiana chize ali nacho musono. (Kolo. 3:14) Umwe ndumbu wa pwo kanasolola yize amwene  muze anyingikine Yela ja Yehova ha chisuho chitangu. Yamba ngwenyi: “Yami te chanyingikine chize munguhasa kuwahilila chipwe lume mu usoko wami. Mukachi ka Yela ja Yehova mwe namwene ha chisuho chitangu, chize atu akulisolwela zango liamwenemwene.” Kwamba umwenemwene, mutu mweswe yoze unazange kuwahilila ni kuyuka ha yize ali nayo, katamba kunyingika paraisu yetu ya ku spiritu. Atu mahasa kwamba yuma yeswayo hali Yela ja Yehova, alioze yetu ene tunanyingika ngwetu, tuli ni lufuma mupema kumeso ja Yehova ni kuli mandumbu jetu a hashi heswe.—Iza. 65:15.

9. Kulita ni Izaia 65:16, 17, yika muyikalingiwa ku yuma yize yakutunehena lamba?

⁹ Twakuhuzuluka ni kuhwima mbunge. Ha Izaia 65:14, twakuwanaho yize yakulingiwa kuli atu waze akusakula kupwa haze lia paraisu ya ku spiritu. Ayo ‘kakuteta ni yikola mu mbunge ni kulila mbimbi mumu lia chikulikuli mu spiritu yo.’ Chipwe ngwe tuvumbi twa Zambi no kakupalika mu lamba, alioze tunanyingika ngwetu, kwasala hakehe lamba liacho ‘mulikapwa kuvulama ni kuswama kumeso ja Zambi.’ (Tanga Izaia 65:16, 17.) Yehova makahwisa lamba lieswe lize twakumona, mba ha kupalika cha mashimbu yuma twapalikile yize yakutunehena yikola ku mbunge muyikajimuka liakulu.

10. Mumu liaka unanyongo ngwe chili chiwape kupwa hamuwika ni mandumbu je a ku ufulielo? (Tala nawa chizulie.)

¹⁰ Chipwe musono, kukunguluka chakutuhuzulula mbunge. Muze tuli ha kukunguluka, twakuhwima mbunge ni kuvulama kusakalala chize twakupalika hano hashi hapi. Kashika, nyi twasolola yitanga yize yinalingi chihanda ku muhuko wa spiritu yisandu ya Zambi, ngwe zango, uwahililo, sambukila, utu ni kushimbika, mutukwasa paraisu ya ku spiritu hanga mupwe uhumikizo. (Ngala. 5:22, 23) Chili chiwape chinene kuli yetu eswe kupwa mu ululikiso wa Yehova! Kashika, tunungenu mu paraisu ya ku spiritu, mumu kwasala hakehe mutukamona kumanunuka cha chilakenyo cha Zambi chakulinga “lilu liaha, ni hashi haha.”

11. Kulita ni Izaia 65:18, 19, kuchi wakulivwa muze wanyingikine ngwe Yehova mwe wasele paraisu ya ku spiritu?

¹¹ Twakusakwilila ni kuwahilila. Izaia kanatusolwela nawa yize yakututwala mba ‘tulikwize ni kuwahilila’ mu paraisu ya ku spiritu. Chino chakulingiwa mumu Yehova mwe wasele paraisu yino. (Tanga Izaia 65:18, 19.) Maululikiso a akwa-hashi, keshi kulongesa atu hakutwala kuli Zambi. Kashika, chinalite Yehova kutuzachisa hanga tukwase atu waze ali mu maululikiso  jacho anjile mu paraisu yino ya ku spiritu. Twakuwahilila chinji ha yiwape yize twakutambula mumu lia kupwa mu umwenemwene, nawa twakuzanga kulweza atu akwo yiwape yacho.—Jere. 31:12.

12. Kuchi wakwivwa muze wakutanga chilakenyo chili ha Izaia 65:20-24; nawa mumu liaka wakwivwa chocho?

¹² Twakuwahilila ni kusakwilila ha kutalatala chize tuli nacho, mumu lia kupwa mu paraisu ya ku spiritu. Kashika, muchilita kusa amwe mashimbu hanga tunyonge ha chize mwono muukapwa mu chifuchi chaha chize Yehova anatulakenya. Mbimbiliya yinambe ngwo: Mu paraisu ‘kumuchikapwa mwana-kemba yoze makatwama ni mwono wa matangwa akehe . . . chipwe mukulwana yoze kechi kamanununa matangwa jenyi.’ Yetu eswe ‘mutukatunga mazuwo ni kutwamamo; mutukatumba minda ya uva ni kulia ye mihuko yamo.’ Kutuchi “kahondangana mokomoko” mumu ‘Yehova makatuwahisa.’ Iye kanalakenya kutwaha mwono upema wa ukulungunga ni uwahililo. Yehova makanyingika yize hita mutu anafupiwa “shimbu kanda achitambika” ni “kuyukisa usona wa waze eswe atwama ni mwono.”—Iza. 65:20-24; Samu 145:16.

13. Kulita ni Izaia 65:25, yika atu akwalumuna ku mwono wo muze akuputuka kuwayila Yehova?

¹³ Tukwete ukulungunga hamwe ni sambukila. Ni ukwaso wa spiritu yisandu ya Yehova, atu anji waze apwile yilianyi, akwa-vunda, keshi kuhanjika umwenemwene, kalumuna mwono wo. (Tanga Izaia 65:25.) Ayo kasele tachi jinji hanga ehuke yitanga yacho yipi. (Roma 12:2; Efwe. 4:22-24) Umwenemwene uli ngwo, amu tuli yihenge mutununga ni kulinga yuma yize kuyalitele. Chipwe chocho, Yehova kanakwase “atu eswe” waze akumuzanga ni kulizanga umwe ni mukwo hanga apwe ni sambukila yamwenemwene hamwe ni kulinunga. (Titu 2:11) Chikomokeso chino mahasa kuchilinga wika kuli Zambi mukwa-ndundo jeswe!

14. Kuchi chilweza cha umwe ndumbu chinasolola ngwo, maliji a Izaia 65:25 kali amwenemwene?

¹⁴ Shina chamwenemwene mutu mahasa kwalumuna yitanga yenyi? Talenu yize yalingiwile kuli umwe mukweze, yoze muze apwile ni miaka 20 te hamusa mu mazuwo a ususu ha yisuho yinji mumu lia kumbata mwono wa upangala ni vunda. Iye kapwile ni kumusa mu mazuwo a ususu mumu lia kwiya mashinyi, kunjila mu mazuwo ja atu ni kulinga ungalwe ukwo nawa. Iye te kakulilamba ni mutu mweswawo mamusunga. Muze evwile umwenemwene wa mu Mbimbiliya ni kuputuka kukunguluka ni Yela ja Yehova, yapwa ni shindakenyo ngwenyi kawana chuma chize muchimukwasa kumona ulemu wa mwono. Chuma chacho chili paraisu ya ku spiritu. Muze amupapachishile, ha mashimbu amwe te kakunyonga chinji ha chize maliji a Izaia 65:25 akwachile ku mwono wenyi. Iye kechele kupwa chilianyi ngwe chize apwa ndumba ni kupwa mukwa-sambukila ngwe mwana-panga.

15. Mumu liaka tunazange kusanyika akwetu hanga alichinge ni yetu mu paraisu ya ku spiritu; nawa kuchi mutuhasa kuchilinga?

¹⁵ Mukanda wa Izaia 65:13, unaputuka ni maliji wano ngwo: ‘Yino ye anambe Mwene Yehova.’ Mba versu 25 yinahu ni maliji wano ngwo: “Chocho anambe Yehova.” Yetu tunanyingika ngwetu, yuma yize Yehova akulakenya nihindu yakumanunuka. (Iza. 55:10, 11) Mu maliji akwo, mutuhasa kwamba ngwetu, paraisu ya ku spiritu yili yamwenemwene. Yehova hakunga usoko walipwila wa atu waze akumuwayila. Muze tuli mukachi ketu, mutuhasa kwivwa sambukila ngwe kutushi hashi hano ha vunda. (Samu 72:7) Kashika, tukwasenu atu anji hanga alichinge ni yetu mu usoko uno wa hashi heswe. Chino mutuhasa kuchilinga ha kulihulikila mu mulimo wa kupwisa atu tumbaji.—Mateu 28:19, 20.

 TUKWASENU AKWETU HANGA NO ANJILE MU PARAISU YA KU SPIRITU

16. Yika muyihasa kukwasa atu akwo mba azange kwiza mu paraisu ya ku spiritu?

¹⁶ Hita umwe wa kuli yetu mahasa kulinga chimwe hanga akwase atu akwo azange kunjila mu paraisu ya ku spiritu. Chino mutuhasa kuchilinga ha kwimbulula Yehova. Yehova keshi kushinjila atu hanga eze mu ululikiso wenyi. Shimbu achilinge, iye kakwakoka mu jila yalita. (Yoa. 6:44; Jere. 31:3) Kashika, hanyima lia kulilongesa yitanga ya Yehova ni utu wenyi, chakupwa chikalu kuli mutu yoze ukwete mbunge yipema ahone kupwa sepa lienyi. Mba kuchi yitanga yetu yipema muyihasa kukwasa atu akwo hanga eze mu paraisu ya ku spiritu?

17. Kuchi mutuhasa kukoka atu akwo mu paraisu ya ku spiritu?

¹⁷ Mutapu umwe uze mutukwashilamo atu hanga anjile mu paraisu ya ku spiritu, uli kutwama kanawa ni mandumbu jetu a ku ufulielo. Muze amwe atu meza ha chisuho chitangu mu Zuwo lia Wanangana, katamba kulivwa ngwe chize alivwile atu waze apwile ni kukunguluka mu chikungulwila cha A-Korindu. Ayo kambile ni shindakenyo ngwo: “Zambi kali hakachi kenu.” (1 Kori. 14:24, 25; Zeka. 8:23) Kashika, tunungenu ni kusa tachi hanga tupwe “ni sambukila umwe kuli mukwo.”—1 Tesa. 5:13.

18. Yika muyihasa kukwasa atu akwo mba anjile mu ululikiso wa Yehova?

¹⁸ Twatamba kusa tachi hanga tumone mandumbu jetu a ku ufulielo ngwe chize Yehova akwamona. Twakuchilinga muze twakulihulikila ha yitanga yo yipema hi ha uhenge wo ko. Mumu tunanyingika ngwetu, kwasala hakehe uhenge kuuchi kapwako nawa. Kashika, twatamba kuhwisa ni zango kapinda mweswawo mutupwa nenyi ni mandumbu jetu ha kusolola keke ni “kulikonekena umwe ni mukwo ni mbunge yeswe.” (Efwe. 4:32) Nyi twachilinga,  paraisu ya ku spiritu muyikoka atu waze no anazange kutwama mu mutapu wacho. b

NUNGA MU PARAISU YA KU SPIRITU

19. (a) Kulita ni mushete, “ Ayo Katuhukile, Hanyima Yafuna,” yika amwe ambile hanyima lia kufuna mu paraisu ya ku spiritu? (b) Yika twatamba kununga ni kulinga? (Tala nawa chizulie.)

¹⁹ Twakusakwila chinji ha kupwa mu paraisu ya ku spiritu! Paraisu yino yinapeme chinji kuhiana; nawa te kanda muchipwa kama atu anji ngwe chize alimo musono. Kashika, mutununga ni kusakwilila Yehova ku miaka yeswe, mumu lia kutulingila paraisu yino ya ku spiritu. Mutu yoze unazange kuwahilila, kuhwima mbunge ni kupwa ni ufunge upema, katamba kulinga chihanda mu paraisu ya ku spiritu ni kunungamo, chakuhona kutuhuka! Alioze twatamba kukeya, mumu Satana kananungu ni kusa tachi hanga atwonge ni kutuchiza mu paraisu ya ku spiritu. (1 Petu. 5:8; Uso. 12:9) Kanda twecha hanga Satana atuchize mu paraisu yino. Kashika, tusenu tachi hanga tufunge upeme, kulinanga ni sambukila yize tuli nayo mu paraisu ya ku spiritu.