1. Kuchi tuvumbi twa Yehova apwile a kululieka ku sekulu yitangu?

 MUZE Yehova akuhana umwe mulimo kuli atu jenyi, iye kakushimbwila hanga mulimo wacho upwe wa kululieka kanawa. (1 Kori. 14:33) Ngwe chilweza, Zambi kanazange hanga sango jipema ajambujole hashi heswe. (Mateu 24:14) Yehova hanahane chiteli kuli Yesu cha kusongwela mulimo uno. Yesu neye kakusa shindakenyo hanga anyingike ngwenyi, mulimo wacho uli wakululieka kanawa. Ku sekulu yitangu, muze aputukile yikungulwila, yasakula makulwana hanga asongwele yikungulwila yacho. (Yili. 14:23) Mu Yerusaleme, mwapwile chizavu cha apostolo ni makulwana chize chapwile ni kukwata yiyulo yize te yikungulwila yakukaula. (Yili. 15:2; 16:4) Hachino, “yikungulwila yatakamine mu ufulielo.”—Yili. 16:5.

2. Yika Yehova akulinga chize ha mwaka 1919 hanga asongwele ni kulisa atu jenyi ku ufulielo?

² Musono, nihindu Yehova kananungu ni kululieka atu jenyi. Kukatuka ha mwaka 1919, Yesu kakuzachisa chizavu chikehe cha malunga akuwahisa ni spiritu yisandu, waze akululieka mulimo wa kwambujola ni kuhana kulia cha ku ufulielo kuli tumbaji twenyi. a (Luka 12:42) Chinasoloka zwalala ngwo, Yehova kanawahisa mulimo wa malunga wano.—Iza. 60:22; 65:13, 14.

3-4. (a) Lumbununa yiwape yize twakuzuka mumu lia kupwa akululieka kanawa. (b) Yika mutulilongesa ha mutwe uno?

 ³ Nyi te kutushi a kululieka kanawa, kachi kutushi kuhasa kulinga mulimo uze Yesu atuhele. (Mateu 28:19, 20) Achinyonga nyi ngwe kutushi ni njiza jakuteta, kachi hita mutu maya ni kwambujola kweswako anazange, hachino mu njiza jimwe mutwambujolamo chinji, alioze mu njiza jikwo ka. Shina muhasa kunyonga ha yuma yikwo yize tuli nayo mumu lia kupwa akululieka kanawa?

⁴ Chizechene Yesu aluliekele tumbaji twenyi muze apwile hano hashi, iye kananungu ni kululieka tuvumbi twa Zambi musono. Ha mutwe uno, mutumonaho chilweza chize Yesu ahichikile ni chize ululikiso wetu wakukaula chilweza chino. Mutumona nawa chize mutuhasa kujikijila chinji ululikiso wa Yehova.

ULULIKISO WETU WAKUKAULA CHILWEZA CHA YESU

5. Jila yika yize mutuhasa kukawilamo chilweza cha Yesu? (Yoano 8:28)

⁵ Yesu kalilongesele ni Tato hakutwala ku yize malinga ni yize mahanjika. Ha kukaula chilweza cha Yesu, ululikiso wa Yehova wakuzachisa Mbimbiliya hanga atulongese chipi ni chipema, ni kutukwasa kutwama mu mutapu uze wakuvwisa Yehova kuwaha. (Tanga Yoano 8:28; 2 Timo. 3:16, 17) Ululikiso wa Yehova wakutwiulula mashimbu eswe hanga tutange Mbimbiliya, ni kukaula yize twakulilongesa ku mwono wetu. Kuchi twakuyuka ha kuchilinga?

6. Jila yika yize yakutuyukisa muze twakulilongesa Mbimbiliya?

⁶ Twakuyuka chinji muze twakulilongesa Mbimbiliya ni ukwaso wa mikanda yetu. Ngwe chilweza, twakutesa yize Mbimbiliya yakwamba ni usongwelo uze twakutambula mu ululikiso wa Yehova. Mba muze twakumona ngwetu, usongwelo uze tunatambula unakatuka mu Yisoneko, ujikijilo wetu ha ululikiso wa Yehova wakwoka chinji.—Roma 12:2.

7. Sango jika Yesu ambulwile, mba kuchi ululikiso wa Yehova wakukaula chilweza chenyi?

⁷ Yesu kambulwile sango jipema ja Wanangana wa Zambi.” (Luka 4:43, 44) Chikwo nawa, iye yatuma tumbaji twenyi hanga no ambujole sango ja Wanangana. (Luka 9:1, 2; 10:8, 9) Musono, yetu eswe waze twakukaula usongwelo wa mu ululikiso wa Yehova, twakwambujola sango ja Wanangana chipwe ngwe twatwama kweswako hanji tukwete chiteli cheswacho mu ululikiso wa Yehova.

8. Chiwape chika tuli nacho?

⁸ Chili chiwape chinene kwambujola sango ja Wanangana kuli akwetu! Chiwape chino kuchishi kuli atu eswe. Ngwe chilweza, muze Yesu apwile hano hashi, iye kakechele hanga maspiritu api ahanjike ha jina lienyi. (Luka 4:41) Chino che chakulingiwa ni musono. Mba mutu aputuke kwambujola hamuwika ni chikungulwila, katamba kukaula shimbi ja Yehova ku mwono wenyi. Yetu twakusolola nawa chize twakulemesa mulimo uno ha kusa tachi hanga twambujole muze mutupwa ni uhashi wa kuchilinga. Kashika, chizechene ngwe Yesu, chikuma chilemu chili kutumba mbuto ya Wanangana mu mambunge ja atu ni kwalongesa umwenemwene.—Mateu 13:3, 23; 1 Kori. 3:6.

9. Kuchi ululikiso wa Yehova wakukwasa atu kunyingika jina lia Zambi?

⁹ Yesu kakwashile atu kunyingika jina lia Zambi. Tangwa limwe muze alembele kuli Tato, iye yamba ngwenyi: “Yami nanyingikisa jina lienu.” (Yoa. 17:26) Ha kukaula chilweza cha Yesu, ululikiso wa Yehova wakusa tachi jinji hanga ukwase atu kunyingika jina lia Zambi. Jila yimwe yize akuchilingila, yili kupalikila mu Mbimbiliya ya Yisoneko ya Chifuchi Chaha.  Mbimbiliya yino hayituhwisa ya muundu hanji chihanda mu malimi kuhiana 270. Apendice A4 ni A5 mu Mbimbiliya yino, jinatukwase kunyingika mumu liaka jina lino lili mu Mbimbiliya. Mba Apendice C yize yili mu Mbimbiliya ya estudo, yakusolola yikuma yinji ya mumu liaka jina lia Zambi liatamba kusoloka ha yisuho 237 mu Yisoneko ya Ngregu ya Akwa-Kristu.

10. Yika mutuhasa kulilongesa ha yize ambile umwe mama mu Myanmar?

¹⁰ Chizechene ngwe Yesu, ni yetu tunazange kukwasa atu anji hanga anyingike jina lia Zambi. Muze umwe pwo mu Myanmar wa miaka 67 anyingikine ngwenyi jina lia Zambi, Yehova, iye yaputuka kulila ni kwamba ngwenyi: “Chino che chisuho chitangu ku mwono wami nanyingika ngwami, jina lia Zambi, Yehova. . . . Yenu nwangulongesa chuma chilemu kuhiana yuma yeswe yize ngunanyingika.” Ngwe chize twamona ha chilweza cha mama yono, muze atu akunyingika jina lia Zambi, chino chakwalumuna mwono wo.

NUNGA NI KUSOLOLA NGWE WAKUJIKIJILA ULULIKISO WA YEHOVA

11. Kuchi makulwana a mu chikungulwila akusolola ngwo kakujikijila ha ululikiso wa Yehova? (Tala nawa chizulie.)

¹¹ Mu mutapu uka makulwana a mu chikungulwila mahasa kusolola ngwo, kakujikijila ha ululikiso wa Yehova? Muze akutambula usongwelo, makulwana kakuutanga ni uhumikizo weswe ni kulinga yeswayo mahasa hanga aukaule. Ngwe chilwesa, kuchizako usongwelo uze akutambula hakutwala ku kulinga yihanda ha kukunguluka, kulemba kulutwe lia chikungulwila, ayo nawa kakutambula usongwelo hakutwala ku chize mafunga mapanga ja Kristu. Muze makulwana akukaula usongwelo uze akutambula mu ululikiso wa Yehova, mandumbu eswe mu chikungulwila kakulivwa ngwo Yehova kakwazanga ni kwafunga.

12. (a) Mumu liaka twatamba kukalakala hamuwika ni mandumbu waze apwa tusongo? (A-Hepreu 13:7, 17) (b) Mumu liaka twatamba kulihulikila ha yitanga yipema ya mandumbu waze akutusongwela mu ululikiso wa Yehova?

¹² Nyi mututambula umwe usongwelo kuli makulwana a mu chikungulwila, twatamba kusa tachi hanga tuukaule. Kulinga chino, muchikwasa makulwana hanga alinge kanawa mulimo wo wa kufunga chikungulwila. Mbimbiliya yakutukolweza hanga twononokene ni kuzeyela waze apwa tusongo mukachi ketu. (Tanga A-Hepreu 13:7, 17.) Alioze ha mashimbu amwe, muchihasa kupwa chikalu kuchilinga. Mumu liaka? Mumu mandumbu waze akutusongwela no kali yihenge. Alioze nyi mutulihulikila wika ha uhenge wo, hi ha yitanga yo yipema ko, kwamba pundu, acho tunakwase akwa-kole jetu. Mu mutapu uka? Akwa-kole jetu kanazange hanga tuhamike ngwetu, ululikiso uno hi wa Yehova ko. Kashika, nyi mutununga ni kulihukikila wika ha uhenge wa mandumbu waze apwa tusongo, chino muchipwa ngwe tunanyongo yuma yipi ha ululikiso wa Yehova ni kututwala tuhone kuujikijila. Yika mutuhasa kulinga mba tunyingike mahuza waze akwa-kole jetu akulumba ni kwehuka?

KANDA WECHA AKWENU AKUKWIKE KUJIKIJILA ULULIKISO WA YEHOVA

13. Kuchi akwa-kole ja Zambi akufupa kupihisa lufuma mupema wa ululikiso wenyi?

¹³ Akwa-kole ja Zambi kakwanda yuma yipema yize yakulingiwa mu ululikiso wenyi ni kuyisolola ngwe yipi. Ngwe chilweza, yetu twakulilongesa mu Mbimbiliya ngwetu, Yehova kanazange hanga tuvumbi twenyi eswe alinange ku mujimba, ku yitanga ni ku spiritu. Iye kanambe ngwenyi, mutu mweswawo malinga chuma chipi, chakuhona kulikonyeka, mutu wacho katambile kununga mu chikungulwila.  (1 Kori. 5:11-13; 6:9, 10) Alioze, muze twakwononokena shimbi yino, akwa-kole jetu kakwamba ngwo, yetu kutushi kuzanga atu, twakwapatwila; nawa ngwo, kutushi kutayiza mukachi ketu atu waze alisa ni yetu.

14. Iya uli chishina cha mahuza waze atu akwamba ha ululikiso wa Yehova?

¹⁴ Fupa kunyingika yoze wakulimika ni ululikiso wa Yehova. Satana mwe wakumwanga sango ja mahuza hakutwala ku ululikiso wa Yehova. Iye kali “tato ya mahuza.” (Yoa. 8:44; Uputu. 3:1-5) Kashika, kutushi kukomoka muze Satana akuzachisa atu amwe hanga amwange sango ja mahuza hakutwala ku ululikiso wa Yehova. Yino ye yalingiwile kuli Yesu ni kuli Akwa-Kristu ku sekulu yitangu.

15. Yika mangana a mayingeleja alingile hali Yesu ni hali tumbaji twenyi?

¹⁵ Yesu, Mwana wa Zambi, kapwile mungunu nawa kalingile yikomokeso yinji, chipwe chocho, Satana yazachisa atu amwe hanga amwange sango ja mahuza hakutwala hali iye. Ngwe chilweza, mangana a mayingeleja te kakulweza atu ngwo, Yesu kanachiza andemoniu “ni tachi ja mwata wa andemoniu.” (Marku 3:22) Muze apwile ni kusopesa Yesu, mangana a mayingeleja yamuliongela ngwo, kashililika Yehova, chocho yashinjila atu ete kuli nguvulu hanga ashihe Yesu. (Mateu 27:20) Kulutwe, muze tumbaji twa Yesu apwile ni kwambujola sango jipema, akwa-kole jo yatuma mbunga hanga alimike no. (Yili. 14:2, 19) Kaposhi wa Kutalila 1 Dezembro, 1998 kalumbunwine mukanda wa Yilinga 14: 2 ngwo: “Akwa-kole jacho kalitunyine sango jipema jize Akwa-Kristu apwile ni kwambujola ni kwamba yuma yipi hali ayo hanga atu aasolwele katonde ni kuhona kwapanjika.”

16. Yika twatamba kwiuluka muze mutwivwa atu mahanjika yuma ya mahuza ha ululikiso wa Yehova?

 ¹⁶ Satana kananungu ni kumwanga sango ja mahuza ndo musono. Iye ‘kanapiangula akwa-hashi heswe.’ (Uso. 12:9) Kashika, nyi muwivwa sango ja mahuza hakutwala ku ululikiso wa Yehova ni hali mandumbu waze akutusongwela, iwuluka yize akwa-kole ja Zambi alingile hali Yesu ni hali tumbaji twenyi ku sekulu yitangu. Ngwe chize Mbimbiliya yambile, atu te mahungumiona tuvumbi twa Zambi ha mashimbu jetu ni kwamba yuma yipi hali ayo. (Mateu 5:11, 12) Nyi twanyingika chishina cha mahuza jacho, kutuchi kwatayiza; nawa mutusa tachi hanga tulifunge ku yuma yacho. Mba yika mutulinga hanga tulifunge?

17. Yika twatamba kulinga hanga twehuke yishima ya mahuza? (2 Timoteu 1:13) (Tala nawa mushete, “ Kanda Upanjika Sango ja Mahuza.”)

¹⁷ Kanda upanjika yuma ya mahuza yize atu akwamba ha ululikiso wa Yehova. Postolo Paulu kalumbunwine yize twatamba kulinga nyi mutwivwa sango ja mahuza. Iye kalwezele Timoteu hanga akolweze mandumbu achine “kupanjika yishima ya mahuza” . . . ni ‘kulituna yishima ya mahuza.’ (1 Timo. 1:3, 4; 4:7) Tunanyingika ngwetu, kanuke mahasa kutongona chuma hashi ni kuchisa mu kanwa, alioze chino kuchichi kulingiwa kuli mukulwana yoze unanyingika ponde yize muyihasa kwizako. Yetu twakwehuka yishima yino ya mahuza mumu tunanyingika mwenya mahuza jacho. Twakupanjika wika maliji apema a umwenemwene.—Tanga 2 Timoteu 1:13.

18. Kuchi mutuhasa kusolola ngwetu, twakujikijila ha ululikiso wa Yehova?

¹⁸ Ha mutwe uno, twamonaho wika majila atatu waze ululikiso wa Yehova wakwimbulwilamo Yesu. Muze mulilongesa Mbimbiliya, sako shindakenyo ha majila akwo waze yetu twakwimbulwilamo chilweza cha Yesu. Kwasa akwenu mu chikungulwila hanga avumbike ni kujikijila chinji ha ululikiso wa Yehova uze iye akuzachisa hanga alinge upale wenyi. (Samu 37:28) Kashika, tunungenu ni kulemesa chiwape chino tuli nacho cha kukalakala hamuwika ni tuvumbi twa Yehova waze akwete zango, nawa ashishika.