1. Yika Yehova anashimbwila hanga tulinge?

 TANGWA lilemu chinji ku mwono wa lunga ni pwo, lili tangwa lize akusemuka mwano mutangu. Chipwe ngwe yisemi jacho mazanga chinji mwano, nihindu ayo keshi kushimbwila hanga mwana wacho anunge ni kupwa kanuke ku mwono wenyi weswe. Mumu nyi chino muchilingiwa, ayo malipikala chinji. Chizechene nawa, Yehova kakuwahilila muze twakuputuka kulilongesa umwenemwene hakutwala kuli iye, alioze kazangile hanga tununge ni kupwa twanuke ku ufulielo ku miaka yeswe. (1 Kori. 3:1) Shimbu tununge ni kupwa twanuke, iye kanazange hanga tupwe Akwa-Kristu waze ‘hakola ku ufulielo.’—1 Kori. 14:20.

2. Yihula yika mutukumbulula ha mutwe uno?

² Kupwa Mukwa-Kristu yoze wajama ku ufulielo, yika chinalumbunuka? Yika twatamba kulinga mba tupwe Akwa-Kristu waze ajama ku ufulielo? Mumu liaka waze anazange kujama ku ufulielo, atamba kulia kanawa ku spiritu? Chikwo nawa, mumu liaka twatamba kwehuka kulijikijila chinji yetu ene? Ha mutwe uno, mutukumbululaho yihula yino.

YIKA CHINALUMBUNUKA KUPWA MUKWA-KRISTU YOZE WAJAMA KU UFULIELO?

3. Kupwa Mukwa-Kristu yoze wajama ku ufulielo yika chinalumbunuka?

³ Mu Mbimbiliya, liji lia Ngregu lize akulumbununa ngwo, “mukulwana” mulihasa kulumbunuka nawa “kujama,” “ungunu” hanji “kutatuka.” a (1 Kori. 2:6) Ngwe chizechene kanuke akukola ndo muze mapwa mukulwana, ni yetu twatamba kununga ni kukolesa usepa wetu ni Yehova. Nyi twachilinga, mutupwa Akwa-Kristu waze ajama ku ufulielo. Chipwe ngwe hitwajama chinji ku  ufulielo, nihindu twatamba kununga ni kululieka haze mutufupiwa. (1 Timo. 4:15) Yetu eswe, kuchingako mandumbu waze achili akweze, mutuhasa kujama chinji ku ufulielo. Mba yika yakusolola ngwo Mukwa-Kristu hajama ku ufulielo?

4. Yika yakusolola Mukwa-Kristu yoze wajama ku ufulielo?

⁴ Mukwa-Kristu kakujama ku ufulielo muze akutwama kulita ni upale wa Yehova, chakuhona kusakula wika kulinga yuma yize iye akufwila hanji akuzanga. Tunanyingika ngwetu tuli yihenge, nawa chakupwa chashi kuhengesa. Alioze, Mukwa-Kristu yoze wajama ku ufulielo, kakusolola ku mwono wenyi wa tangwa ha tangwa ngwo, kakunyonga ni kulinga yuma kulita ni upale wa Yehova. Iye kakuzala utu waha, nawa kakusa tachi anyonge ngwe chize Yehova akunyonga. (Efwe. 4:22-24) Iye kakulilongesa kukwata yiyulo yipema mumu kakusa tachi hanga akaule shimbi ja mu Mbimbiliya. Kashika, keshi kupwa ni katalilo wa shimbi yoze wakumulweza yize malinga. Muze akukwata chiyulo, kakusa tachi hanga alinge yuma kulita ni chiyulo chacho.—1 Kori. 9:26, 27.

5. Yika muyihasa kulingiwa kuli Mukwa-Kristu yoze keshi kukola ku ufulielo? (A-Efwesu 4:14, 15)

⁵ Alioze, Mukwa-Kristu yoze keshi kusa tachi hanga akole ku ufulielo, chakupwa chashi ‘kumupiangula’ kuli waze akumwanga ‘sango ja mahuza,’ ha mashimbu amwe mahasa kumwonga chipwe kuli yitanganyanyi. b (Tanga A-Efwesu 4:14, 15.) Mukwa-Kristu yoze kanda achijama ku ufulielo, mahasa kuvwila akwo kuzo, kuneha mbwanja mu chikungulwila, kupihilila ni kawashi ha yize akwo akulinga hanji kufwa lume mu muheto wa kulinga shili yinene.—1 Kori. 3:3.

6. Ni yika mutuhasa kutesa kukola ku ufulielo cha umwe Mukwa-Kristu? (Tala nawa chizulie.)

⁶ Ngwe chize hitwamona, Mbimbiliya yakutesa kukola ku ufulielo ni chize atu akukola ku mujimba. Twanuke kakufupiwa ufunge ni usongwelo wa makulwana, mumu ayo kanda achipwa ni chinyingi nichimwe ku mwono wo. Ngwe chilweza, umwe mama nyi kanambe kutangunuka tapalo ni mwanenyi mukehe, mamukwata ku kwoko hanga amukwase kutangunuka. Alioze mwana wacho muze maya ni kukola, naye mamwecha hanga atangunuke tapalo ukawenyi. Chipwe chocho, iye nihindu meulula mwanenyi hanga apwe ni kutala sali ni sali lia tapalo muze anambe kutangunuka ni kusa shindakenyo muze mashinyi mapalika. Hachino, muze  mwana makola, iye manyingika chize mapwa ni kutangunuka tapalo. Ngwe chizechene kanuke akufupa ukwaso wa makulwana hanga ehuke yuma yipi, ni Mukwa-Kristu yoze kanda achijama ku ufulielo kakufupiwa ukwaso wa mandumbu waze ajama mba ehuke yuma yize muyipihisa usepa wenyi ni Yehova ni kumukwasa kukwata yiyulo yipema. Alioze Mukwa-Kristu yoze wajama ku ufulielo nyi kanambe kukwata chiyulo, kakuhengwola shimbi ja mu Mbimbiliya hanga anyingike kunyonga cha Yehova ha chikuma chacho, mba makaula usongwelo uze mawana.

7. Shina mukwa-Kristu yoze wajama ku ufulielo kakufupiwa ukwaso wa akwo?

⁷ Shina chino chinalumbunuka ngwo Mukwa-Kristu yoze wajama ku ufulielo, kechi keza kafupa ukwaso wa mutu niumwe? Ka, hi chocho ko. Ha mashimbu amwe, mandumbu waze ajama ku ufulielo no kakufupiwa ukwaso. Alioze, ndumbu yoze kanda achijama ku ufulielo, kakushimbwila hanga akwo amulweze yize malinga hanji kumukwachila chiyulo chize mwene atamba kukwata. Kulisa ni chino, ndumbu yoze wajama ku ufulielo, kakwita ukwaso kuli akwo waze ali ni yinyingi yinji ya ku mwono ni mana. Chipwe chocho, iye kananyingika ngwenyi, Yehova mashimbwila hanga mwene ‘ambate chiteli chenyi.’—Ngala. 6:5.

8. Mu mutapu uka Akwa-Kristu ajama ku ufulielo akulisa?

⁸ Yetu eswe tukwete mijimba yalisa, chizechene nawa, Akwa-Kristu waze ajama ku ufulielo kali ni yitanga yalisa. Ngwe chilweza, amwe kali ni mana anji, akwo kali akwa-hamu, mandumbu amwe kakuzumbula chinji ngeji, eka kakulisa mu chihela cha akwo waze anapalika mu yipikalo. Hachino, Akwa-Kristu aali waze anapalika mu chimwe chuma chalifwa mahasa kukwata yiyulo yalisa, chipwe chocho yiyulo yacho muyikatuka mu Mbimbiliya. Yino yakulingiwa kanji-kanji ha yuma yize yinatale ha shimbi ya mbunge ya mutu. Kashika, mandumbu jacho kechi kuliamba yuma yipi mumu lia kukwata yiyulo yalisa. Shimbu alinge chocho, ayo masa tachi hanga afunge kulinunga mukachi ko.—Roma 14:10; 1 Kori. 1:10.

YIKA TWATAMBA KULINGA MBA TUJAME KU UFULIELO?

9. Shina kukola ku ufulielo chakwiza chamwijila? Lumbununa.

⁹ Kanuke mweswe yoze wasemuka, hakupalika cha mashimbu kakupwa mukulwana, alioze kukola ku ufulielo kuchishi kulingiwa chamulingiwila. Ngwe chilweza, Akwa-Kristu mu Korindu kalilongesele umwenemwene, yaapapachisa, yatambula spiritu yisandu ni kulilongesa yuma yinji ni postolo Paulu. (Yili. 18:8-11) Alioze anji a kuli ayo, chipwe ngwe te hikwapalika miaka chize haze aapapachishile, nihindu te kanda achikola ku ufulielo. (1 Kori. 3:2) Yika mutulinga hanga yuma ya mutapu au yihone kulingiwa kuli yetu?

10. Yika twatamba kulinga mba tupwe Akwa-Kristu waze ajama ku ufulielo? (Yundase 20)

¹⁰ Muchipwa chikalu yetu kukola ku ufulielo, nyi kutushi ni nyonga liacho chize ku uputukilo. Waze ‘akuzanga uzuzuke,’ nawa keshi kuzanga kusenya kulutwe, kechi keza kakola ku ufulielo. (Yishi. 1:22) Yetu kutwazangile kupwa ngwe atu waze hakola, alioze kakujikijila wika hali yisemi jo mba akwate yiyulo. Shimbu tupwe chocho, yetu ene tuli ni chiteli cha kukola ku ufulielo ni kununga ni kukolesa usepa wetu ni Yehova. (Tanga Yundase 20.) Nyi unase tachi ujame ku ufulielo, lemba kuli Yehova hanga ‘akwehe tachi ja kuchilinga.’—Fwili. 2:13.

11. Ukwaso uka akutwaha kuli Yehova hanga tujame ku ufulielo? (A-Efwesu 4:11-13)

¹¹ Yehova keshi kushimbwila hanga tujame ku ufulielo chakuhona ukwaso. Waze akukalakala ngwe tufunga, nawa alongeshi mu chikungulwila cha Akwa-Kristu, kali ni chiteli cha kutukwasa hanga ‘tujame’ ku ufulielo ni ‘kupwa atu  waze hakola ngwe Kristu.’ (Tanga A-Efwesu 4:11-13.) Yehova kakutwaha nawa spiritu yisandu hanga yitukwase tupwe ni “kunyonga cha Kristu.” (1 Kori. 2:14-16) Chikwo nawa, Yehova katumine kusoneka mikanda yiwana ya Evanjelu yize yakutukwasa tumone chize Yesu apwile ni kunyonga, kuhanjika ni chize apwile ni kulinga yuma mu mulimo wa kwambujola. Nyi twembulula chilweza chenyi, muchitukwasa hanga tujame ku ufulielo.

ULEMU WA KULIA KANAWA KU UFULIELO

12. “Longeso litangu hakutwala kuli Kristu” yika linalumbunuka?

¹² Mba tupwe Akwa-Kristu ajama ku ufulielo, tunafupiwa kulilongesa yuma yinji hi wika ko “longeso litangu hakutwala kuli Kristu,” hanji ngwetu, malongeso atangu waze twakulilongesa hali Yesu. Amwe a ku malongeso jacho kali wano: kulikonyeka, ufulielo, upapachiso ni uhindukilo. (Hepre. 6:1, 2) Wano kali malongeso atangu waze hita Mukwa-Kristu atamba kunyingika ni kufuliela. Kashika, postolo Petulu ahanjikile ha malongeso jacho muze ambulwile sango jipema kuli mbunga ya atu ha Pentekoste. (Yili. 2:32-35, 38) Mba tupwe tumbaji twa Yesu, twatamba kutayiza malongeso wano. Ngwe chilweza, postolo Paulu kasolwele pundu ngwenyi, mba mutu apwe kambaji ka Kristu katamba kufuliela ha kutalatala cha uhindukilo. (1 Kori. 15:12-14) Alioze, mba tupwe Akwa-Kristu waze ajama ku ufulielo, tunafupiwa kulinga yuma yinji hi wika ko kunyingika malongeso wano atangu.

13. Yika twatamba kulinga mba tuyuke ha kulia cha tachi cha ku ufulielo chize anatongola ha A-Hepreu 5:14? (Tala nawa chizulie.)

¹³ Kulisa ni malongeso wano atangu, kulia cha tachi cha ku ufulielo kuchatalile wika ha shimbi ja Yehova, alioze chinatale nawa ha yiyulo yenyi yize yakutukwasa kunyonga ngwe iye. Mba tuyuke ha kulia cha ku ufulielo, twatamba kulilongesa, kupukuna ni kukaula kanawa Liji lia Zambi ku mwono wetu. Nyi twachilinga, muchitukwasa kunyingika chize mutukwata yiyulo yize muyivwisa Yehova kuwaha. c—Tanga A-Hepreu 5:14.

14. Kuchi Paulu akwashile A-Korindu akole ku ufulielo ni kupwa Akwa-Kristu ajama?

¹⁴ Kuli Akwa-Kristu waze keshi kusa tachi hanga akole ku ufulielo, ha mashimbu amwe chakupwa chikalu kunyingika yiyulo ya mu  Mbimbiliya ni kuyikaula muze anambe kukwata chiyulo. Amwe kakunyonga ngwo, amu kukushi shimbi niyimwe ya mu Mbimbiliya, acho mahasa kulinga yeswayo anazange. Akwo kakufupa kuwana yimwe shimbi chipwe ngwe kuyafupiwile. Chakutalilaho, chakusoloka ngwe Akwa-Kristu mu Korindu, ketele kuli Paulu hanga aasele shimbi yize te muyisolola nyi malia yuma yize apwile ni kulambula ku mahamba nyi ka. Shimbu aalweze yize o atamba kulinga, Paulu yasolola ulemu wa shimbi ya mbunge ya mutu, ni kulumbununa ngwenyi hita mutu kali ni “ulite wa kusakula” yize malinga ha chikuma chino. Paulu kanakashimutwina ni A-Korindu ha kuzachisa yiyulo yize yakukatuka ha shimbi. Hachino, mutu ni mutu te makwata chiyulo chize kuchichi kupinjisa shimbi yenyi ya mbunge ni kuhona kuhukanyisa akwo. (1 Kori. 8:4, 7-9) Hachino, Paulo te kanakwase A-Korindu akole ku ufulielo ni kuzachisa kunyonga cho, shimbu atale hali akwo hanji kufupa-fupa katalilo wa shimbi yoze makaula.

15. Kuchi Paulu akwashile Akwa-Kristu A-Hepreu akole ku ufulielo?

¹⁵ Twawana longeso linene ha yize Paulu asonekenene A-Hepreu. Amwe a kuli ayo te kanda achijama ku ufulielo, chocho ‘yafuna cheka kunyima ni kufupa kunwa yamwa hi kulia cha tachi ko.’ (Hepre. 5:12) Ayo kakapwile ni kutayiza umwenemwene waha uze Yehova apwile ni kwalongesa. (Yishi. 4:18) Ngwe chilweza, Akwa-Kristu anji A-Yunda te machilikwachilila ha Shimbi ya Mose, chipwe ngwe te hikwapalika miaka 30 chize haze Yesu afwile ni kuhwisa shimbi yacho. (Roma 10:4; Titu 1:10) Mutu mweswawo te matanga mukanda uze Paulu asonekenene A-Hepreu, te masa shindakenyo ngwenyi, mukanda wacho uli ni kulia cha tachi cha ku ufulielo. Mukanda uno wakwashile Akwa-Kristu kumona mutapu waha wakuwayilamo Yehova; ni kupwa ni hamu lia kununga ni kwambujola sango jipema chipwe ngwe kapwile ni kwahungumiona kuli A-Yunda.—Hepre. 10:19-23.

KANDA ULIJIKIJILA CHINJI YENA MWENE

16. Kuchizako kujama ku ufulielo, yika nawa twatamba kulinga?

¹⁶ Yetu kutwatambile wika kusa tachi hanga tujame ku ufulielo, alioze twatamba nawa kulikolweza hanga tufunge ufulielo wacho. Maliji wano kanalumbunuka ngwo, twatamba kwehuka kulijikijila chinji yetu ene. (1 Kori. 10:12) Twatamba nawa ‘kulihengwola yetu ene’ hanga tunyingike nyi tunase tachi tujame ku ufulielo nyi ka.—2 Kori. 13:5.

17. Kuchi mukanda uze Paulu asonekenene A-Kolosu unasolola ulemu wa kununga ni kujama ku ufulielo?

 ¹⁷ Ha mukanda uze asonekenene A-Kolosu, Paulu yahanjika nawa ha ulemu wa kununga ni kujama ku ufulielo. Ha mashimbu jacho, A-Kolosu kapwile Akwa-Kristu waze te ajama ku ufulielo, alioze Paulu yaatoweza ha ponde ya kunyonga ngwe akwa-hashi. (Kolo. 2:6-10) Epafwa, yoze kota wanyingikine kanawa mandumbu mu chikungulwila chacho te kakwalembela chinji hanga “ajame,” hanji ngwetu akole ku ufulielo. (Kolo. 4:12) Yika mutuhasa kulilongesa ha chikuma chino? Paulu ni Epafwa kanyingikine ngwo, mba tununge ni kukola ku ufulielo, twatamba kusa tachi ni kufupa ukwaso wa Zambi. Ayo kazangile hanga mandumbu mu Kolosu anunge ni kujama ku ufulielo chipwe ngwe mapalika mu kapinda mweswawo.

18. Yika muyihasa kulingiwa kuli Mukwa-Kristu yoze wajama ku ufulielo? (Tala nawa chizulie.)

¹⁸ Postolo Paulu katowezele A-Hepreu ngwenyi, chipwe Mukwa-Kristu yoze hajama ku ufulielo mahasa kutokesa utayizo wa Yehova ku miaka yeswe. Mbunge ya umwe Mukwa-Kristu muyihasa kukala mbee ni kumutwala hanga ahone kulikonyeka, hachino mahona kuzuka ukonekeno wa Yehova. Chili chipema kunyingika ngwetu, Akwa-Kristu A-Hepreu kakasolwele yitanga yacho. (Hepre. 6:4-9) Mba yika mutwamba kuli Akwa-Kristu musono waze akuzeya ku ufulielo hanji waze akusosolola mu chikungulwila, mba hanyima malikonyeka ni kufuna? Ayo kakulikonyeka ni mbunge yeswe ni kusolola ngwo, kanalise ni waze Paulu asonekenene ngwenyi te mahasa kutokesa utayizo wa Yehova ku miaka yeswe. Alioze muze akufuna kuli Yehova o kakufupiwa ukwaso uze iye akuhana. (Eze. 34:15, 16) Kanji-kanji, makulwana a mu chikungulwila kakusakula mandumbu waze ali ni chinyingi hanga aakwase ajame cheka ku ufulielo.

19. Nyonga lika twatamba kupwa nalio?

¹⁹ Nyi unase tachi hanga upwe Mukwa-Kristu wajama ku ufulielo, tachi jacho mujikunduluka! Nunga ni kulilongesa umwenemwene wa mu Mbimbiliya uze wajondoka ni kuputuka kunyonga ngwe Yehova. Nyi hiwajama chinji ku ufulielo, linga yeswayo muhasa hanga ununge chizechene uli ndo ku miaka yeswe.