1. Kuchi mandumbu amwe akulivwa muze akwambujola kuli atu akwo? (Tala nawa chizulie.)

 YETU Yela ja Yehova, twakwambujola sango jipema kuli akwetu mumu twakuzanga Tata yetu wa mu malilu; ni kuzanga kukwasa atu hanga amunyingike. Kwamba pundu, mandumbu anji kakuzanga chinji mulimo wa kwambujola. Alioze, akwo kakupinda kuwana uwahililo mu mulimo wa kwambujola. Mumu liaka? Kuli amwe chakulingiwa, mumu lia kwivwa-vwa sonyi, hanji mumu lia kuhona kulijikijila ene. Kuli akwo chakulingiwa, mumu keshi kuzanga kuya ku mazuwo ja atu nyi kaasanyikine. Eka mahasa kwivwa woma mumu lia atu kulituna kwapanjika. Mandumbu akwo kaalongesele hanga apwe ni kwehuka kulikumbujola ni atu akwo. Chipwe ngwe kakuzanga Yehova, mandumbu wano chakwapwila chikalu kukundama kuli mutu yoze kanyingikine hanga amwambulwile sango jipema. Chipwe chocho, ayo kananyingika ulemu uze mulimo wa kwambujola ukwete. Hachino, kakusa tachi hanga aye ni kwambujola sango jipema mashimbu eswe. Chino chakuvwisa Yehova kuwaha!

2. Nyi kuushi kuwahilila mu mulimo wa kwambujola, mumu liaka kuwatambile kunenganyana?

² Shina ha mashimbu amwe kuushi kuhasa kupwa ni uwahililo mu mulimo wa kwambujola? Nyi yino ye yinalingiwa kuli yena, kanda unenganyana. Kwamba pundu, yino yinasolola ngwo wakulikehesa nawa kuushi kuzanga kusoloka, chipwe kuneha mbwanja mukachi ka atu. Chikwo nawa, kukushi mutu niumwe yoze wakuzanga hanga akwo amutambule chipi, chipi-chipi, nyi kanazange kwalingila chuma chipema.  Alioze, muhasa kupwa ni shindakenyo ngwe Yehova kananyingika kanawa ukalu uze unapalika ha chikuma chino; nawa kanazange kukukwasa ha yeswe yize mufupiwa. (Iza. 41:13) Ha mutwe uno, mutumonaho yiyulo yitano yize muyitukwasa kwehuka manyonga wano ni kuwana uwahililo mu mulimo wa kwambujola.

FUPA UKWASO WA LIJI LIA ZAMBI

3. Yika yakwashile Jeremia kwambujola kuli akwo?

³ Chipwe ku shakulu, maliji a Zambi katakamishine tuvumbi twenyi muze te akutambula umwe mulimo ukalu. Tutalenu chilweza cha profeta Jeremia. Iye kalipikalile chinji muze Yehova amuhele chiteli cha kwambujola. Jeremia yamba ngwenyi: “Chanyingikine kuhanjika mumu nguchili mukweze.” (Jere. 1:6) Yika yakwashile Jeremia kupwa ni hamu lia kwambujola? Yika Yehova amulwezele yize yamutakamishine? Jeremia yamba ngwenyi: ‘Maliji je kapwa ngwe kahia kaze kanangwocho mu mbunge. Nakweseka kulihumikiza, alioze chishi kuhasa.’ (Jere. 20:8, 9) Chipwe ngwe Jeremia katambile kwambujola kuli atu waze te keshi kumupanjika, nihindu sango jize atambwile jamuhele hamu lize te anafupiwa hanga alinge mulimo wacho.

4. Yika yakulingiwa nyi twatanga Mbimbiliya ni kupukuna ha yize tunatange? (A-Kolosu 1:9, 10)

⁴ Ni musono, Akwa-Kristu no kakutambula tachi jize akufupiwa kupalikila mu Mbimbiliya. Muze postolo Paulu asonekenene chikungulwila mu Kolosu, iye yalweza mandumbu ngwenyi: Nyi ngwe malilongesa ‘chinji kunyingika upale wa Yehova,’ chino te muchaakwasa hanga ende mu “jila yalita ya Yehova ni kwima mihuko ya yitanga yeswe yipema.” (Tanga A-Kolosu 1:9, 10.) Yitanga yipema atongola ha versu yino, yinachingi nawa mulimo wa kwambujola. Kashika, muze twakutanga Mbimbiliya ni kupukuna ha yize tunatange, ufulielo wetu muli Yehova wakukola, chino chakutukwasa kunyingika ulemu wa kwambujola sango jipema kuli atu.

5. Kuchi mutuhasa kuyuka chinji muze tunatange Mbimbiliya ni kulilongesayo?

⁵ Mba tuyuke chinji ha Liji lia Zambi, kanda tuzomboka muze tunatange, tunalilongesa ni kupukuna. Sako mashimbu alita hanga ulilongese Liji lia Zambi. Nyi unatange umwe lusango yoze unamono ngwe kanakukalila, kanda wecha kutanga lusango wacho. Shimbu weche, zachisa mikanda yetu ya kuhengwola nayo hanga uwane ulumbunwiso walita ha lusango wacho. Nyi muosa mashimbu  hanga ulilongese ni uhumikizo, muopwa ni shindakenyo ngwe yize Liji lia Zambi liakwamba yili yamwenemwene. (1 Tesa. 5:21) Nyi wapwa ni shindakenyo ha chikuma chino, muzanga chinji kulweza akwenu yize unalilongesa.

PWAKO NI KULILULIEKA KANAWA

6. Mumu liaka twatamba kulilulieka kanawa muze tunambe kuya ni kwambujola?

⁶ Nyi waliluieka kanawa shimbu kanda uchiya ni kwambujola, muchipwa chashi kuhanjika ni atu. Yesu kakwashile tumbaji twenyi aliange kululieka shimbu te kanda achaatuma mu mulimo wa kwambujola. (Luka 10:1-11) Ayo kakawile malongeso eswe waze Yesu aalongesele, kashika awahililile chinji ha yize yeswe alingile mu mulimo wacho.—Luka 10:17.

7. Kuchi mutuhasa kulilulieka mba tuye ni kwambujola? (Tala nawa chizulie.)

⁷ Kuchi mutuhasa kulilulieka hakutwala ku mulimo wa kwambujola? Chitangu, twatamba kunyonga ha yize mutuhanjika ni atu, mba mutululieka maliji jacho kanawa hanga tukahase kwahanjika. Chikwo nawa, chili chilemu kunyonga ha yikuma yaali hanji yitatu, yize atu akuhamika mu njiza yetu ni kuliluieka ha chize mutuhasa kwakumbulula. Nyi twachilinga, muze mutupwa ha kuhanjika ni mutu mutuhasa kuhwima mbunge, kusehejela ni kusolola usepa.

8. Mu mutapu uka Akwa-Kristu ali ngwe yikwachilo ya uma yize postolo Paulu ambile?

⁸ Postolo Paulu kalwezele mandumbu jenyi ngwenyi: “Tuli ni upite uno mu yikwachilo ya uma.” (2 Kori. 4:7) Upite uka wenawo? Upite wacho uli sango jipema ja Wanangana jize jakulamwina atu. (2 Kori. 4:1) Mba yikwachilo ya uma yika? Yikwachilo yino, yinalumbunuka tuvumbi twa Zambi waze akwambujola sango jipema kuli akwo. Ha mashimbu ja Paulu, akwa-mingoso te kakuzachisa milondo ya uma hanga ambachilemo hanji kutulikilamo yuma ya ndando ngwe kulia, vinyu ni mbongo. Chizechene nawa, yetu tuli yikwachilo ya uma yize Yehova akuzachisa hanga tumbate sango jipema. Ni ukwaso wa Yehova, twakupwa ni tachi jize tunafupiwa hanga tununge ni kwambujola ni ushishiko.

PWAKO NI KULEMBA HANGA WITE UKWASO

9. Kuchi mutuhasa kukumba woma wa atu hanji woma wa kuhona kutupanjika? (Tala nawa chizulie.)

⁹ Ha mashimbu amwe, mutuhasa kuvwila atu woma hanji kwivwa woma wa kuhona kutupanjika. Kuchi mutuhasa kukumba kapinda  wacho? Tutalenu kulemba cha apostolo muze aalwezele hanga alitwamine kwambujola. Shimbu evwile atu woma, o yeta ukwaso kuli Yehova hanga “anunge ni kwambujola liji [lienyi] ni hamu.” Ha shimbu lizeliene, Yehova yakumbulula yilemba yo. (Yili. 4:18, 29, 31) Nyi musakalala mu mulimo wa kwambujola mumu lia kuvwila atu woma, lemba kuli Yehova hanga akukwase. Mwite hanga akukwase kumona ngwe zango lize ukwete hali atu lili linene chinji kuhiana woma uze wakwaevwila.

10. Kuchi Yehova akutukwasa kupwa Yela jenyi? (Izaia 43:10-12)

¹⁰ Yehova katusakwile hanga tupwe Yela jenyi. Kashika analakenya ngwenyi, matukwasa hanga tupwe ni hamu. (Tanga Izaia 43:10-12.) Mutumona majila awana waze iye akutukwashilamo. Yitangu, Yesu kakupwa hamwe ni yetu mashimbu eswe waze tuli mu mulimo wa kwambujola. (Mateu 28:18-20) Yamuchiali, Yehova hanase angelo waze akutukwasa mu mulimo uno. (Uso. 14:6) Yamuchitatu, Yehova kakutwaha spiritu yisandu yize yakutukwasa hanga twiuluke yuma yize twakulilongesa. (Yoa. 14:25, 26) Yamuchiwana, Yehova kakutwaha mandumbu jetu waze akutukwasa mu mulimo wa kwambujola. Ni ukwaso wa Yehova ni wa mandumbu jetu, tuli ni yeswe yize mutufupiwa hanga tupwe ni hamu ni kununga kwambujola sango jipema.

NYINGIKA YIZE ATU ANAFUPIWA NI KUPWA NI NYONGA LIALITA

11. Kuchi muhasa kuwana atu anji muze unambujola? (Tala nawa chizulie.)

¹¹ Shina wakunenganyana muze wakuya ni kwambujola ku zuwo ni zuwo mba kuuchi kuwana mutu niumwe? Ni chenacho, lihule ngwe: Atu a mu njiza yami kuliko ali ha shimbu lino? (Yili. 16:13) Shina kali ku milimo nyi kaya ni kulanda yuma? Nyi yino ye yakulingiwa mu njiza yenu, acho muchilita kufupa atu ha kwambujola mu matapalo. Ndumbu Joshua yamba ngwenyi: “Yami nawana uhashi wa kwambulwilamo sango jipema muze nakuya ku yihela kuze akulanjishila yuma ni ku yihela kuze kwakupwa atu anji.” Iye ni mukwo-pwo Bridget, kakuwana atu ku mazuwo jo ha mashimbu waze kwilu kunayi ni kutoka hanji Liayenga chingoloshi.—Efwe. 5:15, 16.

12. Kuchi mutuhasa kunyingika yize umwe mutu afuliela ni yize akulihulumba nayo?

¹² Nyi mumona ngwe mutu yoze unahanjika  nenyi kazangile kukupanjika, fupa kunyingika yize mutu wacho akufuliela ni yuma yize analihulumba nayo. Joshua ni Bridget kakuzachisa chihula chize chili ha kalifwo hanga aputuke lusango ni atu. Ngwe chilweza, o kakuzachisa chihula chakwamba ngwo, Kuchi Yena Wakunyonga Mbimbiliya? mba maahula ngwo: “Atu amwe kakwamba ngwo Mbimbiliya yili mukanda wa Zambi, alioze akwo kakuhamika ha chikuma chacho. Mba yenu kuchi nwakunyonga?” Kanji-kanji, yino yakwakwasa kuhanjika ni atu.

13. Mumu liaka mutuhasa kufumbuka mu mulimo wa kwambujola chipwe ngwe atu keshi kutupanjika? (Yishima 27:11)

¹³ Chipwe ngwe atu matupanjika hanji ka, nihindu mutufumbuka mu mulimo wetu wa kwambujola. Mumu liaka twamba chocho? Mumu yetu tunalingi yize Yehova ni Mwanenyi anazange hanga tulinge—kwambujola kanawa sango jipema. (Yili. 10:42) Chipwe ngwe kutwawanyine mutu niumwe yoze mutwambulwila sango jipema hanji atu malituna kutupanjika, nihindu mutuhasa kuwahilila ha kunyingika ngwetu, yize tunalingi yinevwisa Yehova kuwaha.—Tanga Yishima 27:11.

14. Mumu liaka twakuwahilila nyi umwe ndumbu mawana mutu yoze unazange kulilongesa Mbimbiliya?

¹⁴ Twakuwahilila chinji nyi twevwa ngwo, umwe ndumbu kawana mutu yoze unazange kulilongesa Mbimbiliya. Kaposhi umwe katesele mulimo wa kwambujola ni mulimo uze atu akulinga hanga afupe mwana yoze watoka. Atu anji kakulihana hanga afupe mwana wacho ku yihela yeka ni yeka. Hachino muze mamuwana, atu eswe waze alinga mulimo wacho kakuwahilila, hi wika ko mutu yoze wamuwananga. Chizechene nawa, chikungulwila cheswe chakukwasa mulimo wa kwambujola, kashika yetu eswe twakuwahilila muze mutumona umwe mutu maputuka kukunguluka hamwe ni yetu.

LIHULIKILE HA ZANGO LIZE UKWETE HALI YEHOVA NI HALI ATU

15. Kuchi kukaula Mateu 22:37-39, muchitukwasa kwokesa uwahililo wetu mu mulimo wa kwambujola? (Tala nawa chizulie ha .)

¹⁵ Mutuhasa kwokesa uwahililo wetu mu mulimo wa kwambujola ha kunyonga ha chize twakuzanga Yehova ni chize twakuzanga atu. (Tanga Mateu 22:37-39.) Achinyongenu chize Yehova akuwahilila muze akutumona mutwambujola sango jipema ni chize atu  akuwahilila muze akuputuka kulilongesa Mbimbiliya! Twiulukenu nawa ngwetu, waze akupanjika sango jipema ni kutayiza kuwayila Yehova makatwama ku miaka yeswe.—Yoa. 6:40; 1 Timo. 4:16.

16. Kuchi mutuhasa kupwa ni uwahililo mu mulimo wa kwambujola chipwe ngwe kutushi kukatuka ku zuwo? Hana yilweza.

¹⁶ Mba yika mulinga nyi kunalingiwa yimwe yize yinakukwika kukatuka ku zuwo? Nyi yino ye yinalingiwa kuli yena, lihulikile ha yize muhasa kulinga hanga usolole zango lie kuli Yehova. Ha mashimbu a COVID-19, ndumbu Samuel ni Dania, kakapwile ni kukatuka ku zuwo. Ha mashimbu jacho akalu, ayo yambujola ku telefone, kusoneka mikanda ni kusongwela malongeso kupalikila ha Zoom. Samuel kapwile ni kutambula uukiso wa musongo wa câncer. Kashika te kakuzachisa mashimbu aze akuya ku shipitali hanga ambujole kuli atu eswe waze te akuliwana no. Yamba ngwenyi: “Yipikalo muyihasa kutuhongesa ku manyonga, ku mujimba ni ku spiritu. Kashika, chili chilemu kuwana uwahililo mu mulimo wa Yehova.” Ha mashimbu jacho, Dania yalimbuka, chocho neye yaputuka kuyiza ha tukweji atatu. Kulutwe, mba yaputuka kwendela mu chitwamo cha yitonji ha tukweji asambano. Iye yamba ngwenyi: “Nalingile yize te munguhasa kulita ni uhashi wami. Te nakwambujola kuli mbuki waze akunguuka ni kuli atu waze te akwiza ku zuwo ni kutuhichikila yuma. Chikwo nawa, napwile ni kuhanjika ku telefone ni umwe pwo yoze te wakutala ha uukiso wami.” Mumu lia yize apwile ni kupalika, ndumbu Samuel ni Dania te keshi nawa ni uhashi wa kulinga yize apwile ni kulinga chitangu. Chipwe chocho, ayo kalingile yize mahasa, hachino yawahilila chinji ha yize azukile.

17. Kuchi muhasa kuyuka chinji ha yiyulo yize twamona ha mutwe uno?

¹⁷ Eseka kukaula yiyulo yeswe yitano yize twatongola ha mutwe uno. Hita chiyulo chili ngwe mulungo uze muosa ku kasa. Nyi muchinga milungo yeswe hamuwika, kulia chize muteleka muchiyema chinji. Kashika, nyi twakaula yiyulo yeswe yize twatongola hano, mutulilulieka hanga tukumbe manyonga waze kalitele ni kupwa ni uwahililo mu mulimo wa kwambujola.