1. Majila aka mutuhasa kukalakala hamwe ni Yehova?

MUZE Yehova atangile atu, kazangile hanga ayo apwe akwa-milimo-ni akwo. Chipwe ngwe tuli yihenge, nihindu atu ashishika mahasa kukalakala ni Yehova hita tangwa. Chakutalilaho, tuli “akwa milimo-ni-akwo a Zambi” muze twakwambujola sango lipema lia Wanangana wenyi ni kutayisa tumbaji. (1 A-Korindu 3:5-9) Chili chiwape chinene hakutusakula kuli Sakatanga mukwa-ndundo-jeswe hanga tulinge mulimo wacho ulemu! Chipwe chocho, mulimo wa kwambujola hi mutapu umuwika ko uze twakukalakalilamo ni Yehova. Ha mutwe uno, mutulilongesaho nawa chize mutukalakala ni Yehova ha kukwasa asoko ni mandumbu jetu mu chikungulwila, ha kuzumbula ngeji, ha kulinga milimo mu ululikiso wa Yehova hashi heswe, ni kulinga chinji mulimo wa Yehova.—A-Kolosu 3:23.

2. Mumu liaka kutwatambile kutesa yuma yize mutulingila Yehova ni yize akwetu mamulingila?

² Muze mutushimutwina mutwe uno, chili chilemu kunyingika ngwetu tulieswe tukwete mwono walisa. Miaka, mwono, mashimbu ni utotombo wetu yalisa ni ya akwetu. Kashika, kanda  tutesa yuma yize mutulingila Yehova ni yize akwetu mamulingila. Postolo Paulu kambile ngwenyi: “Mutu ni mutu akeseke chitanga chenyi mwene, chocho makapwa ni kulisamba chenyi hakutwala kuli iye mwene wika, hi hakutwala ku yuma yambala ko.”—A-Ngalashia 6:4.

3. Mumu liaka mutuhasa kwamba ngwetu atu eswe waze akufunga asoko jo kakukalakala hamwe ni Zambi?

³ Yehova kanazange hanga tufunge kanawa asoko jetu. Chakutalilaho, ena unafupiwa mbongo hanga ulise asoko je. A mama anji kakufupiwa kutwama ku mazuwo hanga alele ana jo. Nawa yisemi jetu nyi kahashile kulifunga ene, etu e twatamba kwaafunga. Yino yili yuma yilemu yize twatamba kulinga. Mbimbiliya yinambe ngwo: “Nyi kachi umwe keshi kulisa atu jenyi mwene, ni kuhiana chikolo akwa zuwo lienyi, iye hanalikale ufulielo, kapiha kuhiana yoze kafulielele.” (1 Timoteu 5:8) Nyi uli ni yiteli mu usoko, hanji kuuchi kulingila chinji Yehova ngwe chize wakuzanga kumulingila. Alioze kanda uhonga! Yehova kakwivwa kuwaha muze mukalakala hanga ulise asoko je.—1 A-Korindu 10:31.

4. Kuchi yisemi mahasa kusa Wanangana kulutwe, nawa yika yakulingiwako nyi machilinga?

⁴ Yisemi akwa-Kristu mahasa kukalakala hamwe ni Yehova ha kukwasa ana jo hanga atese yize malinga mu mulimo wa Yehova. Yino ye akulinga yisemi anji. Hachino, ana jo hanakwate chiyulo cha kulingila Yehova mu mulimo wa shimbu lieswe, chipwe ngwe mapwa kusuku ni yisemi jo. Amwe kali mishionaliu, akwo kanalingi upionelu kuze kunafupiwa chinji akwa-kwambujola, eka kanakalakala ku Mbetele. Ana nyi mapwa kusuku ni yisemi jo, chakupwa chikalu ayo kupalikisa mashimbu anji hamuwika. Alioze ni zango liswe, yisemi kakukolweza ana jo hanga anunge ni kulingila Yehova kweswako ali. Mumu liaka? Mumu kakuwahilila chinji ha kumona chize ana jo anase Yehova kulutwe ku mwono wo. (3 Yoano 4) Anji a kuli yisemi jacho kakwivwa ngwe Hana, yoze wambile ngwenyi ‘hi hahana’ mwanenyi Samuele kuli Yehova. Ayo kananyingika ngwo chili uhenya unene kukalakala ni Yehova mu mutapu uno.—1 Samuele 1:28.

5. Kuchi muhasa kukwasa mandumbu mu chikungulwila chenu? (Tala chizulie ha uputukilo.)

⁵ Nyi kuushi ni yiteli yinji mu usoko, kutala muhasa kukwasa mandumbu waze anayiza hanji tushinakaji chipwe waze anafupu ukwaso? Shina muhasa kama kukwasa waze akufunga atu jacho? Tala mu chikungulwila chenu mandumbu waze anafupiwa ukwaso wacho. Chakutalilaho, hanji muli umwe pangi unalela chisemi yoze hashinakajiwa. Shina muhasa kuya ni kupalikisa mashimbu hamwe ni chisemi wacho, hanga iye alinge milimo yikwo? Hanji muhasa kukwasa umwe ndumbu hakuya nenyi ku kukunguluka, ha chitanda, chipwe kumutwala ku shipitali hanga ameneke umwe yoze unayiza. Nyi walinga chocho, yena muhasa kukalakala hamwe ni Yehova hakukumbulula yilemba.—Tanga 1 A-Korindu 10:24.

6. Yika muyitukwasa kuzumbula ngeji?

⁶ Akwa-milimo-ni-akwo a Zambi kaanyingika kanawa mumu lia kuzumbula ngeji. Mu Mbimbiliya, liji lia Ngregu “kuzumbula  ngeji” linalumbunuka kulingila yilambala yuma yipema. (A-Hepreu 13:2) Mu Mbimbiliya, twakuwanamo yilweza yinji yize yakutulongesa chize mutuhasa kusolola chitanga chino chipema. (Uputukilo 18:1-5) Kashika twatamba kukwasa akwetu ha shimbu lieswalio mutupwa ni uhashi wa kuchilinga, chipwe ngwe kali mandumbu jetu mu “ufulielo” chipwe ka.—A-Ngalashia 6:10.

7. Yiwape yika mupwa nayo nyi wazumbula tuvumbi twa Yehova a shimbu lieswe?

⁷ Kuchi muhasa kukalakala ni Yehova ha kuzumbula tuvumbi twenyi a shimbu lieswe, waze anafupu chihela chakutwama? (Tanga 3 Yoano 5, 8.) Mumu liaka twatamba kuchilinga? Mumu nyi twachilinga, ni yetu mutuyuka chinji. Kuzumbula atu jacho, Mbimbiliya yakuchivuluka ngwo, ‘kulianyina cha utakamiso.’ (A-Roma 1:11, 12) Tutalenu chilweza cha Olaf. Muze te uchili mukweze, kalayi wa mbonge yameneka chikungulwila cho, alioze mandumbu kakapwile ni zuwo kuze te kalayi matwama. Olaf yeta kuli yisemi jenyi, waze te hi Yela ja Yehova ko hanga kalayi wa mbonge atwame ku zuwo lio. Yisemi yatayiza, alioze yalweza Olaf ngwo ha poso yacho iye te mapomba mu chitwamo. Olaf yatayiza kupomba mu chitwamo, alioze kakalisehele. Iye kapalikishile poso yipema ni kalayi wa mbonge! Hita chimene ha maola a kulia ayo te kakushimutwina yikuma yinji yipema. Kalayi wa mbonge kakolwezele chinji Olaf, chocho yakwata chiyulo cha kulingila Yehova mulimo wa shimbu lieswe. Olaf hanakalakala ngwe mishionaliu mu yifuchi yinji, hakupalika cha miaka 40.

8. Mumu liaka twatamba kupwa yimbovu chipwe ngwe kuuputukilo akwetu mahona kutusakwilila? Hana chilweza.

⁸ Mutuhasa kuzanga yilambala mu majila anji, chipwe ngwe kuuputukilo ayo mahona kutusakwilila. Chakutalilaho, umwe pangi mu Espanha kalilongesele Mbimbiliya ni Yesica, umwe pwo wa ku Equador. Limwe tangwa, muze te analilongesa, Yesica yaputuka kulila. Hachino, pangi yamuhula mumu liaka analila. Yesica yamba ngwenyi shimbu te kanda eza mu Espanha, kapwile ni uswale unji. Tangwa limwe kakapwile ni kulia cha kuhana kuli mwanenyi, alioze meya wika. Shimbu te anapombesa mwana, Yesica yalemba hanga umwe amukwase kama. Ha limwe shimbu, Yela ja Yehova aali yameneka Yesica ni kumwaha kaposhi. Alioze iye yaatenukina ni kusuwa kaposhi ni kwamba ngwenyi: “Chino che kulia munguhana kuli mwanami?” Pangi umwe yeseka kumukolweza, alioze, nihindu Yesica kakamupanjikile. Hakupalika cha amwe mashimbu, mapangi jacho yamunehene njeke ya kulia ni kumuselayo ha chikolo. Kashika Yesica alilile muze te analilongesa Mbimbiliya, mumu kewulukile ngwenyi kumana kalengulwile kumbululo lia Zambi ha yilemba yenyi. Chocho Yesica yakwata chiyulo cha kulingila Yehova.  Chochene, mumu lia kuhana cha mapangi wano, Yesica yaputuka kulingila Yehova.—Chilumbununyi 11:1, 6.

9, 10. (a) Uhashi uka uze A-Izalele apwile nawo wa kulihana ene mu mulimo wa Zambi? (b) Mu milali yika mutuhasa kukwashilamo chikungulwila musono?

⁹ Ku shakulu, A-Izalele kapwile ni uhashi unji wa kulihana ene hanga alingile Zambi milimo yeka ni yeka. (Kutuhuka 36:2; 1 Sango ja Mianangana 29:5; Nehemia 11:2) Musono, ni yetu nawa tukwete uhashi unji wa kuzachisa mashimbu, yikumba ni utotombo wetu hanga tukwase mandumbu jetu amu ufulielo. Nyi twachilinga, mutuwahilila chinji nawa Yehova matuwahisa.

¹⁰ Mbimbiliya yinakolweza malunga mu chikungulwila hanga akalakale ni Yehova ha kulingila akwo ngwe tuvumbi ni makulwana a mu chikungulwila. (1 Timoteu 3:1, 8, 9; 1 Petulu 5:2, 3) Waze akuchilinga kakuzanga kukwasa akwo hanga awayile Yehova mu mutapu walita. (Yilinga 6:1-4) Shina makulwana hanakwite kama hanga uhane yihela kuli atu waze aneza ku kukunguluka, kukwasa ku mikanda, njiza, kululieka zuwo lia Wanangana ni yuma yikwo nawa? Mandumbu waze akukwasa mulimo wa Zambi mu milali yino kakuwahilila chinji.

11. Kuchi pangi umwe ayukile ha kulinga mulimo wa kutunga Mazuwo a Wanangana?

¹¹ Waze akulihana mu mulimo wa kutunga Mazuwo a Wanangana, kakulikata ni masepa aha. Pangi yoze avuluka ngwo Margie kalingile mulimo wa kutunga Mazuwo a Wanangana ha miaka 18. Ku milimo yacho, iye te kakulihulumba chinji hali akweze a mapwo ni kwaakwasa hanga anyingike kanawa milimo. Yamba ngwenyi, uno uli mutapu upema uze mandumbu waze akulihana ene mahasa kulitakamishinamo umwe ni mukwo.  (A-Roma 1:12) Hachino, muze apwile mu kapinda, masepa waze alikachile no ku milimo yacho e amutakamishine. Shina hiunalihane kama mu mulimo wa kutunga Mazuwo a Wanangana? Muhasa kulinga mulimo wacho, chipwe ngwe kuushi ni utotombo niumwe.

12. Kuchi muhasa kukwasa muze hi kwalingiwa kakundukundu?

¹² Mutuhasa nawa kukalakala ni Yehova hakukwasa mandumbu jetu waze anapalika mu luyinda. Chakutalilaho, mutuhasa kwaakwasa ha kuhana milambu ya mbongo. (Yoano 13:34, 35; Yilinga 11:27-30) Mutapu ukwo uze mutuhasa kukwashilamo akwetu, uli wa kululieka yuma yize yapiha ku kakundukundu. Gabriela, umwe pangi wa mu Polônia yoze watokesele zuwo lienyi ku sanga lia meya kevwile kuwaha ha kumona chize mandumbu amu yikungulwila yikwo ejile ni kumukwasa. Muze akunyonga ha chilweza chacho, kakwamba ngwenyi keshi kulipikala ni yuma ya musunya yize atokesele, alioze kakulihulikila wika ha yize azukile. Yamba ngwenyi: “Yuma yino yakungwaha shindakenyo ngwami kupwa mu ululikiso wa Yehova chili chiwape chinene chize chakuneha uwahililo ni sambukila.” Atu anji waze akutambula ukwaso hanyima lia kakundukundu, no che akwamba. Nawa waze akukalakala ni Yehova hanga akwase mandumbu jacho kakwivwa kuwaha hamwe ni chiseke.—Tanga Yilinga 20:35; 2 A-Korindu 9:6, 7. 

13. Kuchi mutukolesa zango lietu kuli Yehova muze mutulihana hanga tukwase akwetu? Hana chilweza.

¹³ Pangi Stephanie ni akwa-kwambujola akwo mu njiza yenyi kakalakalile hamwe ni Zambi ha kukwasa Yela ja Yehova waze achinyine mu chifuchi cho mumu lia jita ni kuya mu Amerika. (Estados Unidos.) Ayo kakwashile mandumbu jacho kuwana mazuwo waze matwama ni yikwata yikwo nawa. Iye yamba ngwenyi: “Uwahililo ni usakwililo wo ha zango lize te akwaasolwela kuli mandumbu a hashi heswe ye yatulingishile mba twaakwase. Mandumbu jacho kanyongene ngwe yetu wika e twaakwashile, kumana no katukwashile chinji. Zango, kulinunga, ufulielo ni ujikijilo wo hali Yehova yatukwashile chinji kukolesa zango lietu kuli Yehova, nawa chino chokesele usakwililo wetu ha yize yeswe twakutambula mu ululikiso wenyi.”

14, 15. (a) Nyonga lika apwile nalio profeta Izaia? (b) Kuchi akwa-Kristu mahasa kwimbulula nyonga lia Izaia?

¹⁴ Shina muzanga kukalakala chinji ni Yehova? Kutala muzanga kuya kuze kunafupiwa ukwaso wa akwa-kwambujola? Chipwe ngwe kupwa yihanyi kuchalumbunukine ngwo twatamba kuya ni kukalakalila ku  yihela ya kusuku. Alioze kuli mandumbu waze mahasa kuchilinga. Mandumbu jacho kakwete nyonga ngwe lia profeta Izaia. Muze Yehova ahulile ngwenyi: “Iya mungutuma? Iya yoze matuyilako?” Iye yakumbulula ngwenyi: “Yami uno; ngutume.” (Izaia 6:8) Shina uli ni uhashi hamwe ni zango lia kukwasa ululikiso wa Yehova? Mitapu yika yize muhasa kukwashilamo ululikiso wa Yehova?

¹⁵ Yesu kambile hakutwala ku mulimo wa kwambujola ni kutayisa tumbaji ngwenyi: “Kucha chamwenemwene chinalumbama, alioze akwa milimo akehe. Kashika liumbenu kuli Mwenya kucha, hanga atume akwa milimo aye ku kucha chenyi.” (Mateu 9:37, 38) Shina muhasa kukalakala ngwe pionelu kuze kunafupiwa chinji akwa-kwambujola? Kutala muhasa kukwasa umwe hanga achilinge? Mandumbu anji kananyingika ngwo mutapu upema wa kusolwelamo zango lio hali Yehova ni hali enyembo jo uli wakuya ni kukalakala ngwe pionelu kuze kunafupiwa ukwaso. Shina unanyingika majila akwo waze muhasa kulingilamo chinji mulimo wa Yehova? Nyi wakaula majila yacho, muwahilila chinji ku mwono we.

16, 17. Mitapu yikwo yika muhasa kulingilamo chinji Yehova?

¹⁶ Shina wa kuzanga kukalakala ku Mbetele hanji kukwasa mulimo wa kutunga mazuwo a wanangana, chipwe ha matangwa akehe hanji poso? Ululikiso wa Yehova nihindu wakufupa atu waze akulihana ene hanga akalakale kuze kunafupiwa ukwaso ni waze akuzanga kulinga yeswayo maaha chipwe ngwe kananyingika milimo yeka. Yehova kakuzanga hita ndumbu yoze wa kusa tachi hanga aye ni kumulingila kweswako mukufupiwa ukwaso.—Samu 110:3.

¹⁷ Shina unazange kutambula fumbo mba uhase kulingila chinji Yehova? Nyi che unazange, yena muhasa kusoneka hanga uye ku Shikola ya Akwa-kwambujola Wanangana. Shikola yacho yakufumba akwa-Kristu ajama waze analingi mulimo wa shimbu lieswe hanga ululikiso wa Yehova uhase kwaazachisa. Waze akuya ku shikola yacho kakwete zango lia kukalakala kweswako maatuma. Kutala muhasa kuya ku Shikola yacho hanga ukalakalile chinji Yehova?—1 A-Korindu 9:23.

18. Yiwape yika mutuzuka ha kukalakala ni Yehova hita tangwa?

¹⁸ Amu tuli tuvumbi twa Yehova, tukwete yitanga yipema ngwe, kuhana, umbovu, hamwe ni zango. Twakulihulumba hali akwetu hita tangwa. Chino chakutwaha uwahililo, sambukila ni chiseke. (A-Ngalashia 5:22, 23) Kashika, chipwe ngwe yimwe muyalumuka ku mwono we, nihindu muwahilila ha kwimbulula kuhana cha Yehova ni kupwa umwe wa kuli akwa-milimo-ni-akwo!—Yishima 3:9, 10.