1. Yika uprofeto wa Izaia wambile hakutwala kuli Yesu, nawa kuchi unatutakamisa?

UPROFETO wa Izaia hakutwala kuli Yesu Kristu unatwehe utakamiso hamwe ni kutalatala. Izaia kambile ngwenyi Yesu ‘kechi kapatwila kulita ni chize meso jenyi mamona; kechi kapatwila kulita ni chize matwi jenyi mevwa,’ nawa ‘makapatwila yiswale ni ululi.’ (Izaia 11:3, 4) Mumu liaka maliji wano anatutakamisa? Mumu twatwama mu chifuchi muze muli katonde munji, nawa atu kakulipatwile umwe ni mukwo kulita ni chize mahasa kumona. Kashika tunafupiwa Ngaji mungunu, Yesu, yoze kechi katupatwila kulita ni chize mamona!

2. Yika Yesu ambile hanga tulinge, nawa yika mutushimutwina ha mutwe uno?

² Hita tangwa, twakunyonga yimwe hali akwetu. Alioze amu kutushi angunu ngwe Yesu, manyonga jetu no hi angunu ko. Kashika chakupwa chashi kupatwila akwetu kulita ni chize tunaamono. Hachino, Yesu yamba ngwenyi: “Kanda nukapatula nikulita ni meso jenu, alioze patulenu ni upatwilo wa ululi.” (Yoano  7:24) Hano, Yesu kanatwite hanga tupwe ngwe iye ha kwecha kupatwila akwetu kulita ni chize anasoloka. Ha mutwe uno, mutushimutwinaho yuma yitatu yize muyihasa kupihisa manyonga jetu hakutwala kuli akwetu. Yuma yacho yili, chikowa hanji vungu lia mutu, mbongo ni miaka yize mutu ali nayo. Ha hita chuma, mutulilongesa chize mutuhasa kwononokena Yesu ni kwecha kupatwila akwetu kulita ni chize anasoloka.

3, 4. (a) Mumu liaka Petulu alumwine manyonga jenyi hali akwa-mavungu? (Tala chizulie ha uputukilo.) (b) Umwenemwene uka waha uze Yehova alongesele Petulu?

³ Achinyonga chize postolo Petulu evwile muze amusanyikine hanga aye ku Sezarea ku zuwo lia Koneliu, lunga yoze te hi Ka-Yunda ko! (Yilinga 10:17-29) Petulu kakolele ni nyonga liakwamba ngwo atu waze hi A-Yunda ko kali akwa-luchisa. Alioze yuma yize yalingiwileko yalumwine nyonga lienyi. Chakutalilaho, iye yatambula usolwelo kukatuka kuli Zambi. (Yilinga 10:9-16) Mu usolwelo wacho, Petulu yamona chimwe ngwe hina chinahulumuka mu malilu, cha too ni tushitu waze kuli ayo te a luchisa. Hohene, yevwa liji linamwambe ngwo: “Katuka, Petulu; shiha ulie!” Ni hamu lieswe Petulu yalituna ha yisuho yitatu. Ha hita chisuho, liji yiliamba ngwo: “Chize Zambi hanachipemesa, kanda uchivuluka ngwe, chipi.” Hanyima lia usolwelo, nihindu Petulu kakanyingikine yize liji liacho liafupile kumulweza. Hazehene, mikeji waze Koneliu atumine yaheta. Spiritu yisandu yiyisongwela Petulu hanga aye ku zuwo lia Koneliu hamwe ni mikeji jacho.

⁴ Nyi Petulu kapatwile ‘kulita ni meso jenyi,’ kachi kakayile ku zuwo lia Koneliu. Mumu A-Yunda te keshi kuliata ku mazuwo ja akwa-mavungu. Mba mumu liaka Petulu ayile ku zuwo lia Koneliu? Chipwe ngwe te kakwete katonde hali akwa-mavungu, nihindu usolwelo ni usongwelo wa spiritu yisandu yakwashile Petulu hanga alumune manyonga jenyi. Muze Petulu hapanjika yize amulwezele kuli Koneliu, yamba ngwenyi: “Chamwenemwene ngunamono Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.” (Yilinga 10:34, 35) Umwenemwene uno waha, wevwishile Petulu kuwaha nawa te mukwata hali akwa-Kristu eswe. Mu mutapu uka?

5. (a) Yika Yehova azangile hanga akwa-Kristu eswe anyingike? (b) Chipwe mutwamba ngwetu kutushi katonde, alioze manyonga aka mutuhasa kupwa no?

⁵ Yehova kazachishile Petulu hanga akwase akwa-Kristu eswe anyingike ngwo Iye keshi katonde. Kuli Yehova, chikowa, vungu, munyachi ni limi lietu kuyishi ni ulemu. Alioze nyi mutuvwila Zambi woma ni kulinga yize yalita, iye matutayiza. (A-Ngalashia 3:26-28; Usolwelo 7:9, 10) Yena kota hi unanyingika umwenemwene wacho. Mba kuchi mutwamba nyi wakolele mu chifuchi hanji mu usoko uze ukwete katonde munji? Chipwe muwamba ngwe kuushi katonde, alioze kota uchili ni  amwe manyonga a katonde mu mbunge ye. Chipwe muze Petulu akwashile akwo hanga anyingike ngwo Zambi keshi katonde, nihindu iye kanungine ni kumusolola. (A-Ngalashia 2:11-14) Kuchi mutuhasa kwononokena Yesu ni kwecha kupatwila akwetu kulita ni chize tunaamono?

6. (a) Yika muyihasa kutukwasa mba twehuka katonde? (b) Yize asonekene umwe mukulwana wa mu chikungulwila, yika yinasolola hali mwene?

⁶ Mba tunyingike nyi tuchili ni amwe manyonga a katonde mu mbunge yetu, twatamba kulihengwola yetwene. Twatamba nawa kutesa yitanga yetu ni yize twakulilongesa mu Liji lia Zambi. (Samu 119:105) Mutuhasa nawa kuhula sepa lietu hanga atulweze nyi kakutumona ni katonde, yoze yetwene kutuchi kuhasa kumumona. (A-Ngalashia 2:11, 14) Nyi twejilila ni manyonga jacho, muchihasa kupwa chikalu kunyingika ngwetu tukwete katonde! Chino chalingiwile kuli umwe mukulwana wa mu chikungulwila. Iye yasoneka lusango hakutwala kuli alunga ni pwo waze te akukalakala mu mulimo wa shimbu lieswe. Lunga te wa ku munyachi uze atu anji akulelesa. Mukulwana wacho yasonekena lunga yuma yinji yipema, alioze yawezela ngwenyi: “Chipwe ngwe iye kali wa ku munyachi uze atu akulelesa chinji, alioze yitanga ni mwono wenyi yakukwasa akwo anyingike ngwo kupwa mutu wa ku munyachi wacho kuchalumbunukine kupwa mukwa-kulikisa hanji kulilelesa ngwe chize apwa akwa-munyachi wacho.” Yika twalilongesa ha maliji wano? Twalilongesa ngwetu, chipwe ngwe tuli ni yiteli yinji mu ululikiso wa Yehova, nihindu twatamba kulihengwola yetwene ni kutayiza ukwaso uze matwaha hanga tunyingike nyi tuchili ni amwe manyonga a katonde mu mbunge yetu. Yika nawa mutuhasa kulinga?

7. Kuchi mutuhasa kusolola ngwetu ‘twazulula mbunge yetu’?

⁷ Nyi ‘twazulula mbunge yetu,’ mutuchizamo katonde ha kusalakanyisamo zango. (2 A-Korindu 6:11-13) Shina wakuzanga kupalikisa wika mashimbu ni mandumbu a chikowa chimuwika, vungu, chifuchi, munyachi ni limi lienu? Nyi che wakulinga, eseka kupalikisa mashimbu ni mandumbu akwo nawa. Hachino, muhasa kusanyika mandumbu ni mapangi alisa hanga wambujole no hamuwika. Hanji muhasa kwaasanyika ku zuwo lie hanga nulie hamuwika chipwe kulinga yuma yikwo nawa. (Yilinga 16:14, 15) Hakupalika cha mashimbu, mbunge ye muyizala too ni zango, hi kumuchi kupwa nawa chihela cha katonde. Haliapwila tutalenu mutapu ukwo uze mutuhasa kupatwilamo akwetu ‘kulita ni meso jetu.’

8. Yika Ulevi 19:15, watulongesa ha chize upite hanji uswale muyihasa kukwata ha mutapu uze twakumwenamo akwetu?

⁸ Upite hanji uswale muyihasa kukwata ha mutapu uze twakumwenamo akwetu. Mukanda wa Ulevi 19:15 unambe ngwo: “Kanda nupatula ni uhenge hanji ni katonde kuli chiswale, hanji ni ulemeso kuli mulemu.  Alioze munukapatwila mukwenu ni ululi.” Kuchi upite hanji uswale muyihasa kukwata ha mutapu uze twakumwenamo akwetu?

9. Maliji aka a yinyengo waze Solomone asonekene, nawa yika anatulongesa?

⁹ Ni ukwaso wa Zambi Solomone yasoneka maliji wano a chinyengo ngwo: “Chiswale keshi kumuzanga chipwe kuli mwenyembo wenyi; alioze pichi kali ni masepa anji.” (Yishima 14:20) Yika maliji wano anatulongesa? Kanatulongesa ngwo, nyi kutwakeyele, mutuhasa kuzanga kulikata wika ni mandumbu waze ali ni upite, alioze yiswale ka. Mumu liaka chili ponde yinene kupatwila atu hamukunda wa yuma yize akwete ni yize keshi nayo?

10. Ha yika Tiangu atowezele akwa-Kristu?

¹⁰ Nyi mutupatwila mandumbu jetu kulita ni upite uze akwete hanji uswale, acho mutuhasa kuhandununa mandumbu mu chikungulwila. Yino yalingiwile mu yimwe yikungulwila ku sekulu yitangu, chocho Tiangu yatoweza akwa-Kristu jacho hakutwala ku yitanga yino ya katonde. (Tanga Tiangu 2:1-4.) Kashika kutwatambile kuhandununa mandumbu mu chikungulwila chetu. Mba kuchi mutuhasa kwehuka kupatwila mandumbu jetu kulita ni yuma yize akwete?

11. Shina yuma yize mutu ali nayo yinatale ha usepa wenyi ni Yehova? Lumbununa.

¹¹ Twatamba kumona mandumbu yetu ngwe chize Yehova akwaamona. Yehova keshi kulemesa mutu mumu lia kupwa pichi hanji chiswale.  Mumu usepa wetu ni Yehova kuwatalile ha unji wa mbongo hanji yikumba jize tukwete. Chipwe ngwe Yesu kambile ngwenyi, “chikalu kuli pichi kunjila mu Wanangana wa malilu” alioze iye kakambile ngwenyi pichi te kechi kuhasa kunjilamo. (Mateu 19:23) Yesu kambile nawa ngwenyi: “Kunwawaha, yenu yiswale; mumu Wanangana wa Zambi ni wenu.” (Luka 6:20) Alioze chino kuchalumbunukine ngwo yiswale eswe te mapanjika Yesu ni kuzuka yiwape. Kwapwile yiswale anji waze kakazangile kupwa tumbaji twa Yesu. Umwenemwene uli ngwo, kutwatambile kunyonga ngwetu, usepa wa mutu kuli Yehova unatale ha yuma yize iye ali nayo.

12. Yika Mbimbiliya yinakolweza pichi ni yiswale?

¹² Mu ululikiso wa Yehova, muli mandumbu ni mapangi waze ali pichi alioze akwo yiswale. Chipwe chocho eswe kakuzanga Yehova ni kumuwayila ni mbunge yeswe. Mbimbiliya yinalweza pichi ngwo, ‘kanda asa mbunge ku upite uze hi wamwenemwene ko, alioze kuli Zambi.’ (Tanga 1 Timoteu 6:17-19.) Yinatoweza nawa tuvumbi eswe a Yehova, pichi ni yiswale ngwo, chili ponde yinene kuzanga mbongo. (1 Timoteu 6:9, 10) Kashika nyi twamona mandumbu jetu ngwe chize Yehova akwaamona, kutuchi kwaapatwila kulita ni yuma yize akwete hanji yize keshi nayo. Mba yika mutwamba hakutwala ku miaka? Shina uli mutapu walita kupatwilamo akwetu?

13. Yika Mbimbiliya yinatulongesa ha chize mutuvumbika makulwana?

¹³ Kanji-kanji Mbimbiliya yakwamba ngwo twatamba kuvumbika makulwana. Mukanda wa Ulevi 19:32 unambe ngwo: ‘Senu vumbi mukwa kambu jitoma. Lemesenu mukulwana, ni kuvwila woma Zambi yenu.’ Mukanda wa Yishima 16:31 unatulweze ngwo, “kambu jitoma japwa chipangula cha uhenya muze majiwana mu jila ya ululi.” Paulu kalwezele Timoteu ngwenyi kanda akumika makulwana, alioze atwame no ngwe yisemi. (1 Timoteu 5:1, 2) Chipwe ngwe Timoteu kapwile ni yimwe yiteli hali makulwana, nihindu iye katambile kusolola vumbi hamwe ni keke.

14. Ha shimbu lika tunafupiwa kukwasa ndumbu yoze hakola?

¹⁴ Mba kuchi mutwamba nyi umwe mukulwana malinga shili kutachi hanji masolola yitanga yize Yehova keshi kuzanga? Yehova kechi kulengulula shili yize alinga kutachi, chipwe ngwe ndumbu wacho hakola nawa mandumbu kakumuvumbika. Shimbi yili ha Izaia 65:20 yinambe ngwo: “Mukwa shili wa kulakaji lia miaka mapwa wa kushinga.” Shimbi yoyene tunayiwane nawa mu usolwelo wa Ezekiele. (Ezekiele 9:5-7) Chuma chilemu chili ngwo, twatamba kuvumbika Yehova, Mukulu-wa-Matangwa. (Daniele 7:9, 10, 13, 14) Vumbi lietu hali Yehova mulitwaha hamu hanga tukwase ndumbu yoze unafupiwa ukwaso, chipwe ngwe hakola.—A-Ngalashia 6:1.

15. Yika twalilongesa hali postolo Paulu ha chize twatamba kuvumbika akweze?

¹⁵ Kuchi mutwamba nyi ndumbu uchili mukweze? Shina kupwa mukweze chinalumbunuka ngwo iye katelele vumbi lietu? Ka, hi chocho ko. Paulu kalwezele Timoteu ngwenyi: “Niumwe kanda alelesa ukweze we; alioze pwako chilweza kuli akwa kufuliela, ha liji, ha yilinga, ha zango, ha ufulielo, ha kulinanga.” (1 Timoteu 4:12) Muze Paulu asonekene maliji wano, Timoteu kota te hapwa ni miaka 30. Chipwe chocho, Paulu yamwaha yiteli yilemu. Yika twalilongesa hano? Twalilongesa ngwetu kutwatambile kupatwila akweze  mumu lia miaka yize ali nayo. Mumu liaka twamba chocho? Mumu Yesu kalingile yuma yinji muze te ali wika ni miaka 33.

16, 17. (a) Kuchi makulwana akukwata chiyulo nyi ndumbu umwe hajama kupwa kavumbi hanji mukulwana wa mu chikungulwila? (b) Kuchi manyonga jetu ni mianda ya kuze twatwama muyihasa kulimika ni yize Mbimbiliya yinambe?

¹⁶ Mu minyachi yimwe, atu keshi kuvumbika akweze a malunga. Hachino, amwe makulwana a mu chikungulwila mahasa kuhona kutongola umwe mukweze hanga apwe kavumbi hanji mukulwana wa mu chikungulwila, chipwe ngwe mukweze wacho hajama ni kulinga mulimo wacho. Alioze Mbimbiliya kuyatesele miaka yize ndumbu atamba kupwa nayo, mba amutongole ngwe kavumbi hanji mukulwana wa mu chikungulwila. (1 Timoteu 3:1-10, 12, 13; Titu 1:5-9) Nyi umwe mukulwana wa mu chikungulwila malisela shimbi ha chikuma chino mumu lia munyachi wenyi, iye keshi kukaula shimbi ja Liji lia Zambi. Makulwana a mu chikungulwila katambile kupatwila akweze kulita ni manyonga jo hanji mumu lia mianda ya kuze atwama, alioze kulita ni shimbi ja Liji lia Zambi.—2 Timoteu 3:16, 17.

¹⁷ Nyi makulwana a mu chikungulwila mecha kukaula shimbi ja Mbimbiliya hakutwala ku chize atamba kutongola tuvumbi ni makulwana, ayo mahasa kukokolola tachi jize mandumbu jacho akusa hanga atambule yiteli. Mu chifuchi chimwe, umwe kavumbi te kakulinga kanawa milimo yize amwehele, nawa makulwana yamona ngwo kulita ni Mbimbiliya iye katamba kupwa mukulwana wa mu chikungulwila. Alioze makulwana amwe a mu chikungulwila waze te hashinakajiwa yamba ngwo, uchili kanuke kupwa mukulwana wa mu chikungulwila, chocho yahona kumusa moko. Chaluyinda, ndumbu wacho yecha lume kumutongola, yino yeswe yalingiwile mumu lia kupwa mukweze. Nawa chinasoloka ngwe kunyonga chamutapu au chili mu yifuchi yinji. Kashika chili chilemu kujikijila ha Mbimbiliya kuhiana kujikijila ha manyonga jetu ni ha mianda ya kuze twatwama. Nyi twalinga chocho, mutwononokena Yesu ni kwecha kupatwila akwetu kulita ni chize tunaamono.

18, 19. Yika muyitukwasa tutwame ni mandumbu jetu ngwe chize akulinga Yehova?

¹⁸ Chipwe ngwe tuli yihenge, nihindu mutuhasa kutwama ni akwetu chakuhona kwaasolwela katonde, ngwe chize Yehova akulinga. (Yilinga 10:34, 35) Kashika mashimbu eswe twatamba kuhengwola Liji lia Zambi. Nyi mutukaula shimbi ja Zambi, mutwononokena maliji a Yesu akwamba ngwo, ‘kanda nupatula nikulita ni meso jenu.’—Yoano 7:24.

¹⁹ Kwasala hakehe hanga Mwanangana wetu, Yesu Kristu, apatwile atu eswe. Upatwilo wenyi mukapwa kulita ni shimbi ja ululi ja Zambi, kechi kapatula kulita ni chize meso jenyi mamona, hanji chize matwi jenyi mevwa. (Izaia 11:3, 4) Hachino, tunashimbwila matangwa jacho a uwahililo!