1. Yika yinasolola ngwo Yehova kali chihanyi?

HA AMWE mashimbu, Yehova te katwama ukawenyi. Mba yahana chawana cha mwono kuli yitangiwa ya mana mu malilu ni hashi. Yehova kali ‘Zambi ya uwahililo,’ kakuzanga kuhana akwo yuma yipema. (1 Timoteu 1:11; Tiangu 1:17) Nawa amu Yehova anazange hanga tuwahilile, kashika anatulongesa tupwe yihanyi.—A-Roma 1:20.

2, 3. (a) Mumu liaka twakuwahilila muze mutuhana akwetu yuma? (b) Yika mutushimutwina ha mutwe uno?

² Zambi katangile atu mu chifwa chenyi. (Uputukilo 1:27) Chino chinalumbunuka ngwo Yehova katutangile ni yitanga yize akwete. Kashika mba tupwe ni uwahililo wamwenemwene hamwe ni yiwape ya Yehova, twatamba kukaula chilweza chenyi. Twatamba kusolwela akwetu zango ni kuhana yuma kuli akwetu. (A-Fwilipu 2:3, 4; Tiangu 1:5) Mumu liaka? Mumu che atutangile kuli Yehova. Chipwe ngwe tuli yihenge, nihindu  mutuhasa kwimbulula Yehova ni kupwa yihanyi.

³ Haliapwila mutushimutwina amwe malongeso waze tunawane mu Mbimbiliya hakutwala ku chize mutupwa yihanyi. Mutunyingika mumu liaka Yehova akuzanga hanga tupwe yihanyi. Nawa mutunyingika chize kuhana chakutukwasa kulinga mulimo uze Yehova akutwaha ni chize mutuwahilila ha kupwa yihanyi. Mutushimutwina nawa chize mutununga ni kupwa yihanyi.

4, 5. Kuchi Yehova ni Yesu apwa yihanyi, nawa mumu liaka twatamba kweembulula?

⁴ Yehova kakuzanga hanga tumwimbulule, chino chakumuvwisa kuwaha muze mutupwa yihanyi. (A-Efwesu 5:1) Yehova nawa kakuzanga hanga atu awahilile ku mwono wo. Tunachinyingika mumu iye katutangile kanawa ni kutululiekela hashi hanga tuwahilile ni yuma yeswe yipema yize yiliho. (Samu 104:24; 139:13-16) Hachino, twakuhalisa Yehova nyi mutusa tachi hanga twivwise akwetu kuwaha.

⁵ Twakwimbulula nawa Yesu, yoze wahichikile chilweza chingunu cha chize mutuhasa kupwa yihanyi. Iye yamba ngwenyi: “Mwana Mutu kejileko akamuvumbike, alioze hanga iye akavumbike akwo, nikuhana mwono wenyi ndando ya ukuule hali anji.” (Mateu 20:28) Nawa postolo Paulu kakolwezele akwa-Kristu ngwenyi: “Kunyonga chize chapwile muli Kristu Yesu, chikapwe muli yenu nawa . . . Wechele lufuma wenyi mweswe alipwise ndungo.” (A-Fwilipu 2:5, 7) Hachino mutuhasa kulihula ngwetu, ‘Shina munguhasa lume kukaula kanawa chilweza cha Yesu?’—Tanga 1 Petulu 2:21.

6. Yika Yesu atulongesa ha chishima cha Ka-Samaria mupema? (Tala chizulie ha uputukilo.)

⁶ Yehova kakuwahilila muze mutukaula chilweza chingunu chize iye ni Yesu atuhele. Twakuchilinga ha kuzanga atu ni kufupa majila waze mutwaakwashilamo. Yesu kasolwele ulemu wacho muze atele chishima cha Ka-Samaria mupema. (Tanga Luka 10:29-37.) Iye kalongesele tumbaji twenyi ngwenyi, katamba kukwasa akwo, chipwe waze ayo kanyingikine. Shina unanyingika mumu liaka Yesu atele chishima chacho? Kachitele mumu kamuhulile kuli umwe Ka-Yunda ngwenyi: “Mba mwenyembo wami iya?” Kumbululo lia Yesu liatulongesa ngwo, nyi tunazange kuvwisa Yehova kuwaha, twatamba kupwa yihanyi ngwe yono Ka-Samaria.

7. Kuchi mutusolola ngwetu, twakutayiza ngwetu mutapu uze Yehova akulingilamo yuma wapwa upema? Lumbununa.

⁷ Chikuma chikwo chize muchitukwasa kupwa yihanyi, chinatale ha yize yalingiwile mu munda wa Endene. Satana kambile ngwenyi, Alama ni Eva te mawahilila nyi mehuka Yehova, chocho, ayo yanyonga wika hali ene. Eva kapwile ni kuzo kashika azangile kupwa ngwe Zambi. Alama neye kapwile ni kuzo kashika azangile kupemena kuli Eva kuhiana kuli Zambi. (Uputukilo 3:4-6) Yino yiyineha lamba linji kuli atu. Kwamba pundu, mutu nyi kali ni kuzo kechi kuhasa kupwa ni uwahililo. Alioze, nyi twehuka kuzo ni kupwa yihanyi, mutusolola ngwetu, twakutayiza ngwetu mutapu uze Yehova akulingilamo yuma wapwa upema.

8. Mumu liaka Alama ni Eva atambile kunyonga hali akwo?

⁸ Chipwe ngwe Alama ni Eva kapwile  ukawo mu munda wa Endene, nihindu ayo katambile kunyonga hali akwo. Mumu liaka? Mumu Yehova kaehele mulimo uze te malinga. Iye yaalweza hanga aseme azalise hashi ni kupwisaho paraisu. (Uputukilo 1:28) Alama ni Eva kota kazangile hanga ana jo awahilile ku mwono, ngwe chize Yehova azangile hali ayo eswe. Ayo eswe te makalakala hamuwika hanga apwise hashi heswe paraisu. Uno te mulimo unene chinji!

9. Mumu liaka atu te mawahilila ha kupwisa hashi paraisu?

⁹ Kupwa atu angunu, te muchaakwasa nawa kukalakala hamuwika ni Yehova ha kupwisa hashi paraisu ni kumanununa upale wenyi. Hachino, ayo te manjila mu uhwimino wa Zambi. (A-Hepreu 4:11) Mulimo wacho te mweevwisa kuwaha chinji ku mwono! Yehova te maawahisa chinji ha zango lio lingunu ni kulihulumba cho hali akwo.

10, 11. Yika muyitukwasa mba twambujole ni kutayisa tumbaji?

¹⁰ Musono, Yehova hanatwehe mulimo ulemu chinji. Iye kanazange hanga twambujole ni kutayisa tumbaji. Mba tulinge kanawa mulimo wacho, twatamba kulihulumba hali atu. Kwamba pundu, mba tununge ni kwambujola twatamba kuzanga Yehova ni atu.

¹¹ Paulu kambile ngwenyi, iye ni akwa-Kristu akwo ku sekulu yitangu te “akwa milimo-ni-akwo a Zambi” mumu te kakwambujola ni kulongesa atu umwenemwene.  (1 A-Korindu 3:6, 9) Musono, ni yetu mutuhasa kupwa “akwa milimo-ni-akwo a Zambi” ha kusa mashimbu, tachi ni upite wetu hanga tulinge mulimo wa kwambujola uze Zambi hanatwehe. Kulinga mulimo wacho chili uhenya unene!

12, 13. Yiwape yika muhasa kupwa nayo ha kutayisa tumbaji?

¹² Kusa mashimbu ni tachi jetu hanga twambujole ni kulongesa atu chakutuvwisa kuwaha chinji. Yino ye akwamba mandumbu anji waze akwete uhashi wa kusongwela malongeso a Mbimbiliya. Twakuwahilila chinji hakumona chize alongi jetu a Mbimbiliya akwivwa muze manyingika yize Mbimbiliya muyihasa kutulongesa, kupwa ni ufulielo ukolo, kwalumuna yitanga yo ni kuputuka kulweza akwo yize akulilongesa. Yesu neye kevwile kuwaha muze amunehenene lusango wa yuma yipema yize amwene tumbaji 70 waze atumine ni kwambujola.—Luka 10:17-21.

¹³ Mandumbu jetu hashi heswe kakuwahilila chinji muze mamona chize sango ja Mbimbiliya jinakwase atu kwalumuna mwono wo. Chakutalilaho, Ana, umwe pangi mukweze kazangile kulingila chinji Yehova. * (Tala maliji mushi lia lifwo.) Chocho, yaya ku chimwe chifuchi cha Europa kuze te kunafupiwa akwa-kwambujola. Yamba ngwenyi: “Kuno, ngukwete uhashi unji wa kusongwela malongeso a Mbimbiliya nawa chino chakunguvwisa kuwaha. Mulimo uno wakunguvwisa chiseke chinji. Muze nakufuna ku zuwo, kuchishi kuhasa kunyonga hali yami mwene. Nakunyonga wika ha kapinda ni ha yipikalo ya atu waze nakulilongesa no. Hachino, mba hingufupa mutapu upema wa kwaatakamishinamo ni kwaakwasa. Haliapwila ngunatayiza ngwami, ‘chinawaha kutambula alioze shinaho kuhana.’”—Yilinga 20:35.

14. Yika muyitukwasa kwambujola chipwe ngwe atu kasolo kutupanjika?

¹⁴ Chipwe ngwe atu mahona kutupanjika muze tunambujola, nihindu mutuhasa kuwahilila mumu tunehe uhashi wa kupanjika sango lipema. Yehova kanatwite hanga tulinge yuma yize atumine Ezekiele kulinga, ngwenyi: “Muhanjika maliji jami kuli ayo, chipwe mevwa, chipwe kasolo kwivwa.” (Ezekiele 2:7; Izaia 43:10) Kashika chipwe ngwe atu matupanjika, hanji ka, nihindu Yehova kakulemesa chinji tachi jetu. (Tanga A-Hepreu 6:10.) Umwe ndumbu yahanjika ha mulimo wenyi wa kwambujola ngwenyi: “Twakutumba ni kuhinjila meya, ni kulemba ngwetu, Yehova makolesa zango lize atu anasolola ha sango lipema.”—1 A-Korindu 3:6.

15. Kutala mutupwa wika yihanyi nyi atu eswe matusakwilila? Lumbununa.

¹⁵ Yesu kakuzanga hanga tupwe yihanyi  mumu chino chakuneha uwahililo. Nyi mutupwa yihanyi, atu anji no matwimbulula. Kashika, anatukolweza ngwenyi: “Hanenu, mba kumakanwaha; njongo yipema, ya kukona, ya kunyikumuna hamwe, ya kusupwoka, kumakayihana mu hina lienu, mumu ni cheseko chize munweseka nacho, kumakanwesekela cheka nawa.” (Luka 6:38) Kupwa chihanyi, kuchalumbunukine ngwo atu eswe makusakwilila ha yize wa kwaalingila. Alioze chipwe ngwe ayo keshi kukusakwilila, yena nunga wika ni kwaaha. Mumu kuuchi kuhasa kunyingika haze mukazukila yiwape mumu lia kuhana che.

16. Aya waze twatamba kuhana, nawa mumu liaka?

¹⁶ Yihanyi amwenemwene keshi kuhana akwo ni kushimbwila ngwo aafunyishine yo. Yesu yamba ngwenyi: “Muze yena mulinga chiteleka, lakenya yiswale, ni yitonji, ni yilema, ni tupuputa: mba kumukawaha, mumu o keshi ni yize mahasa kukundulula nayo.” (Luka 14:13, 14) Mbimbiliya yinambe ngwo: “Yoze uli ni liso lia chihanyi mamuwahisa,” nawa “Kawaha yoze wakunyonga yiswale.” (Yishima 22:9; Samu 41:1) Kashika, twatamba kupwa yihanyi mumu twakuzanga chinji kukwasa akwetu.

17. Yuma yika mutuhana yize muyihasa kutunehena uwahililo?

¹⁷ Muze Paulu avulukile maliji a Yesu ngwo, “chinawaha kutambula alioze shinaho kuhana,” iye kakahanjikile wika ha kuhana yuma. Mumu mutuhasa kutakamisa atu, kwaakolweza kupalikila mu Mbimbiliya, ni kwaaha ukwaso ukwo nawa. (Yilinga 20:31-35) Yize Paulu ambile ni yize alingile, yatulongesa ulemu wa kulianyina ni akwetu mashimbu ni ngolo jetu, kwaapanjika ni kwaazanga.

18. Yika akwa-kuhengwola anji akwamba hakutwala ku kuhana?

 ¹⁸ Akwa-kuhengwola waze akulilongesa hakutwala ku yitanga ya atu no hananyingika ngwo kuhana chakuneha uwahililo. Kulita ni umwe mukanda, atu kakwamba ngwo ayo kakuwahilila chinji hanyima liakulingila akwo yuma yipema. Akwa-kuhengwola jacho yamba ngwo, muze mutukwasa akwetu twakwivwa kuwaha ku mwono wetu. Kashika akwa-mana amwe akwamba ngwo, atu waze akulihana ene ku yimwe milimo kakupwa ni mwono upema hamwe ni uwahililo. Maliji wano kechi kutukomwesa, mumu Tangi yetu wa zango, Yehova, kakwamba ngwenyi kuhana nihindu chakuneha chiseke.—2 Timoteu 3:16, 17.

19, 20. Mumu liaka unazange kupwa chihanyi?

¹⁹ Nyi atu waze twatunga no kakulihulumba wika hali ene, chino muchihasa kupwa chikalu yetu kununga kupwa yihanyi. Alioze, Yesu kambile ngwenyi, shimbi jaali jinene, yitangu, kuzanga Yehova ni mbunge yeswe, ni mwono weswe, ni kunyonga cheswe, yamuchiali, kuzanga mwenyembo wetu ngwe chize twakulizanga yetwene. (Marku 12:28-31) Twalilongesa ha mutwe uno ngwetu, waze akuzanga Yehova kakumwimbulula. Yehova ni Yesu kali yihanyi. Ayo kanatukolweza hanga tukaule chilweza cho, mumu kananyingika ngwo chino muchitwaha uwahililo wamwenemwene. Nyi mutupwa yihanyi ha yize twakulingila Zambi ni enyembo jetu, mutuhalisa Yehova nawa mutuyuka hamwe ni akwetu.

²⁰ Kwamba pundu, wakusa tachi hanga upwe chihanyi ni kukwasa akwenu, chipi-chipi mandumbu je amu ufulielo. (A-Ngalashia 6:10) Nyi wanunga ni kuchilinga, atu mawahilila ni kukuzanga, nawa mupwa ni uwahililo. Mbimbiliya yinambe ngwo: “Mukwa kuvungumiona mamutohesa; ni yoze wakuhinjila akwo neye kumakamuhinjila.” (Yishima 11:25) Ku mwono ni mu mulimo wetu wa kwambujola, tuli ni mitapu yinji yize mutuhasa kusolwelamo zango, keke ni kupwa yihanyi. Ha mutwe uze muusulaho mutushimutwinaho mitapu yimwe.