AMU mwono unakale chinji ha “matangwa a kusula,” tunafupiwa chinji kupwa yihumikiji. (2 Timoteu 3:1-5) Atu anji waze twatunga no keshi kulihumikiza. Ayo kapwa akwa-kuzo, kakuzanga kuzwela, nawa keshi kulihumikiza. Kashika twatamba kulihula ngwetu: ‘Shina nakuhona uhumikizo ngwe atu waze natunga no? Kulihumikiza yika chinalumbunuka? Yika munguhasa kulinga mba ngupwe chihumikiji?’

Kulita ni Mbimbiliya, liji “kulihumikiza” yika linalumbunuka? Kulihumikiza kuchalumbunukine wika kwehuka milonga. Alioze mutu yoze wakulihumikiza kakununga ni kushimbwila ngwo yuma muyikapema. Keshi kunyonga wika hali mwene, alioze kakulihulumba nawa hali akwo, chipwe hali atu waze mahasa kumuvwisa kupiha hanji uli. Iye kakununga ni kushimbwila ngwo usepa wo muupema. Kashika kutushi kukomoka muze Mbimbiliya yakwamba ngwo kulihumikiza chakwiza ha zango. * (Tala maliji mushi lia lifwo.) (1 A-Korindu 13:4) Kulihumikiza chinalingi nawa chihanda cha “mihuko ya spiritu.” ( A-Ngalashia 5:22, 23) Hachino, yika twatamba kulinga mba tupwe yihumikiji?

Mba tupwe yihumikiji, twatamba kulemba kuli Yehova yoze wakuhana spiritu yenyi kuli atu waze akumujikijila. (Luka 11:13) Spiritu yacho yikwete ndundo jinji, alioze, nihindu twatamba kutwama kulita ni yilemba yetu. (Samu 86:10, 11) Chino chinalumbunuka ngwo twatamba kulinga yeswayo mutuhasa hanga tusolole uhumikizo hita tangwa ku mwono wetu. Alioze ha mashimbu amwe mutuhasa kuhona uhumikizo. Mba yika muyihasa kutukwasa?

Twatamba kulilongesa ni kwimbulula chilweza chingunu cha Yesu. Muze postolo Paulu ahanjikile hakutwala ku ‘utu waha,’ uze te unachingi kulihumikiza, yatukolweza ngwenyi: Echenu “sambukila ya Kristu yikayule mu mbunge jenu.” (A-Kolosu 3:10, 12, 15) Kashika mba tuchilinge, twatamba kukaula chilweza cha Yesu ni kufuliela ni mbunge yeswe ngwetu ha mashimbu alita, Zambi makalulieka yuma yeswe. Nyi twapwa ni ushindakenyo wacho, kutuchi kutokesa uhumikizo wetu, chipwe muze mukulingiwa yuma yeswayo ha chihela haze twatwama.—Yoano 14:27; 16:33.

Yetweswe tunashimbwila ngwetu chifuchi chaha chize ni kawashi. Alioze twatamba kupwa yihumikiji ni kunyonga ha chize Yehova akulihumikiza ni yetu. Mbimbiliya yinatulweza ngwo: “Mwene [Yehova] keshi kuvumiwa ni chilakenyo chenyi, ngwe amwe akunyonga kupwa kuvuma; alioze iye kapwa ni uhomboloji [uhumikizo] kuli yenu, se kazangile niumwe kutoka, alioze eswe alikonyeke.” (2 Petulu 3:9) Kashika nyi twanyonga ha chize Yehova akulihumikiza hali yetu, ni yetu nawa mutuhasa kulihumikiza ni akwetu. (A-Roma 2:4) Ha yuma yika tunafupiwa kulihumikiza?

Ku mwono wetu wa hita tangwa, kuli yuma yinji yize tunafupiwa kusolola uhumikizo. Chakutalilaho, twatamba kulihumikiza hanga tuhone kuteta akwetu maliji, chipwe ngwe tunazange kuhanjika yuma yilemu. (Tiangu 1:19) Nawa twatamba kulihumikiza muze akwetu matuvwisa uli. Shimbu tulivutule ni kuhona uhumikizo, chili chipema kunyonga ha chize Yehova ni Yesu akulinga ha ulelu wetu. Ayo keshi kulihulikila wika ha uhenge uze twakulinga. Alioze, kakulihulikila ha yitanga yetu yipema, nawa ni uhumikizo weswe kanatwehe mashimbu hanga tululieke haze twakuhengesa.—1 Timoteu 1:16; 1 Petulu 3:12.

Twakufupiwa nawa uhumikizo muze umwe matwamba ngwenyi twahanjika hanji twamulinga chuma chipi. Nyi yino muyilingiwa, kanji-kanji twakwivwa uli hanji kufupa kulikalila. Alioze Mbimbiliya yinatulweze yize twatamba kulinga nyi yuma ya mutapu au muyilingiwa. Hakwamba ngwo: “Kanda ulipupula kutenuka mu mbunge; mumu utenu kuwatwama mu mbunge ja yihepuke.” (Chilumbununyi 7:8, 9) Kashika chipwe ngwe yuma yize atwamba yili ya mahuza, twatamba kulihumikiza ni kunyonga kanawa shimbu kanda tuchilinga nichimwe. Yino ye Yesu alingile muze atu amusumine mulonga chakuhona chitela.—Mateu 11:19.

Yisemi katamba kupwa yihumikiji chipi-chipi muze ana jo mafupa ukwaso hanga alulieke yitanga yo hanji kwehuka usolo upi. Tutalenu chilweza cha Mattias, yoze wakukalakala ku Mbetele ya Scandinavia. Muze Mattias te uchili mukweze, alongi-ni-akwo te kakumuhepwisa hamukunda wa ufulielo wenyi. Yisemi jenyi kakapwile ni kunyingika yize te yinalingiwa ku mwono wenyi. Alioze ayo yamona ngwo mwano kanakakajana ha ufulielo wenyi. Gillis, tato ya Mattias yamba ngwenyi, iye ni mukwo-pwo kafupiwile uhumikizo unji ha chikuma chacho. Mattias te kakuhula yihula ngwe yino: “Zambi iya? Shina Mbimbiliya yili lume Liji lia Zambi? Kuchi tunanyingika ngwetu yino ye Zambi anazange hali yetu?” Iye yahula nawa tato ngwenyi: “Mumu liaka nwakungusopesa nyi chafulielele ha yuma yize nwakukufuliela?”

Gillis yamba ngwenyi: “Ha mashimbu amwe mwanetu te kakulivutula hi ni yetu ko, alioze  hakutwala ku umwenemwene, mumu te kakulivwa ngwe unapinjisa chinji mwono wenyi.” Mba kuchi Gillis akwashile mwanenyi? Iye yamba ngwenyi: “Ami ni mwanami te twakuhanjika ha maola anji.” Kanji-kanji, Gillis te kakupanjika Mattias ni kumuhula hanga anyingike yize yili mu mbunge yenyi. Ha mashimbu amwe, Gillis te kakulumbununa chimwe kuli mwanenyi ni kumulweza hanga achinyonge kanawa ha tangwa lieswe, mba hi mashimutwina nenyi ha chuma chacho. Gillis yamba nawa ngwenyi, te kakufupiwa amwe matangwa mba anyonge ha chuma chize amuhulanga kuli mwanenyi . Mumu lia kuhanjika nenyi ha yisuho yinji, Mattias yaputuka kunyingika ulumbunwiso wa ukuule hamwe ni zango lia Yehova hali yetu ni ulite uze akwete wakutusela shimbi. Tato yamba ngwenyi: “Kwapalikile mashimbu, nawa kuchakapwile chashi kukwasa Mattias, alioze hakehe-hakehe zango lienyi kuli Yehova yilikola mu mbunge yenyi. Ami ni mukwetu-pwo twakuwahilila chinji mumu uhumikizo uze twasolwele hali mwanetu ku mukweze wenyi, wa mukwashile chinji.”

Muze Gillis ni mukwo-pwo te akukwasa mwano ni uhumikizo weswe, ayo te kakujikijila ha ukwaso wa Yehova. Gillis yamba ngwenyi: “Kanji-kanji te nakulweza Mattias ngwami zango lize ami ni noko tukwete hali iye lie te liakutulingisa mba tulembe chinji ngwetu Yehova mamukwasa kukolesa ufulielo wenyi.” Yisemi wano kakuwahilila chinji ha kupwa yihumikiji ni kukwasa mwano chakuhona kulitwamina!

Nawa twakufupiwa uhumikizo muze tunafungu umwe usoko hanji sepa yoze unayiza ha miaka yinji. Tutalenu chilweza cha Ellen * (Tala maliji mushi lia lifwo), yoze neye watwama mu Scandinavia.

Lunga lia Ellen te kakuyiza musongo wa wongo ha miaka nake. Hamukunda wa musongo wacho, iye te keshi kwivwa chiseke, chinyengo chipwe keke. Chino te chakupinjisa chinji Ellen. Iye yamba ngwenyi: “Yuma napalikile ku mwono wami yafupiwile kulihumikiza ni kulemba chinji.” Yawezela nawa ngwenyi: “Chisoneko chize changutakamishine chili A-Fwilipu 4:13, unambe ngwo: “Ha yuma yeswe nguli ni tachi muli yoze wakungutakamisa.’” Ni ukwaso hamwe ni tachi ja Yehova, Ellen kakumbile kapinda wacho ni uhumikizo.—Samu 62:5, 6.

Chochene, chilweza chingunu cha uhumikizo chili cha mwene Yehova. (2 Petulu 3:15) Mu Mbimbiliya, kanji-kanji twakutangamo hakutwala ku uhumikizo wa Yehova. (Nehemia 9:30; Izaia 30:18) Shina unewuluka chize Yehova evwile muze Apalahama amuhulile ha yisuho yinji hakutwala ku chiyulo chenyi cha kunongesa Sondoma? Yehova kakakumikine Apalahama ha yize ambile. Alioze ni uhumikizo weswe iye yapanjika hita chihula cha Apalahama ni kumona kuzakalala chenyi. Hachino, Yehova yasolola ngwenyi kamwene kuzakalala cha Apalahama ha kumulakenya ngwenyi te kechi kunongesa Sondoma, nyi mu mbonge yacho mawanamo malunga a ululi kumi. (Uputukilo 18:22-33) Hita shimbu Yehova kakutupanjika ni uhumikizo weswe, iye keshi kutulengulula!

Kulihumikiza chili chitanga chilemu cha utu waha chize akwa-Kristu eswe atamba kupwa nacho. Nyi twalikolweza hanga tupwe yihumikiji, mutuhalisa Tata yetu wa zango, Yehova, nawa mutukapwa hamwe ni “waze ku ufulielo ni uhumikizo mahinga yilakenyo.”—A-Hepreu 6:10-12.