Mumu liaka niumwe keshi ni ulite wa kusa mikanda ya Yela ja Yehova ha ma site eka hanji ha ma rede social?

Amu mikanda yeswe twakutuhwisa twakuyihana yawana kuli atu, kashika, amwe akunyonga ngwo hi chipi ko kulinga copia ni kujisa ha ma site eka hanji ha ma rede social. Alioze kulinga chino chili kuhona kukaula Shimbi ja Ulite wa kuzachisa site yetu, nawa chinanehe milonga yinji mu ululikiso wetu. * (Tala maliji mushi lia lifwo) Shimbi ja Ulite wa kuzachisa site yetu jinambe zwalala ngwo, niumwe keshi ni ulite wa “kuchiza sango ha site yetu ngwe, yizulie, yinema, mikanda, miaso ni yiheho hanga ayise ha site jeka chipwe kuyituma ha rede social hanji ha site ja kulitumina sango.” Mumu liaka ukanjiso wacho unalite?

Yikuma yeswe yize yili ha ma site jetu yili yakufunga ni shimbi ya ulite wa akwa-kusoneka. Yitanganyanyi ni akwa-kole akwo kakuzachisa chipi mikanda yetu hanga asongwele Yela ja Yehova ni atu akwo ha ma site jo. Alioze nyonga lio liapwa lia kupiangula atu waze mayitanga ni kwaalumbanganyisa. (Samu 26:4; Yishima 22:5) Kuli nawa atu akwo waze akuzachisa mikanda yetu hanji chilayi cha site jw.org, (logotipo wa site jw.org) ha mitambi yo, yuma ya kulanjisa ni ha aplicativo jo. Mba tuhase kukinda yitanga yino yipi, twakuzachisa shimbi jize ja kufunga ulite wa akwa-kusoneka. (Yishima 27:12) Alioze achinyonga ha yize te muyilingiwako nyi mutwecha ngwetu hita mutu, chipwe ndumbwetu achize yikuma ha site yetu ni kuyisa ha site jeka hanji kuzachisa chilayi cha site jw.org hanga alanjise yuma yenyi. Nyi mukulingiwa yimwe ni akwa-kole jetu hanji ni impreza yize yinalingi yuma yacho, ngaji kechi kutusambisa.

Kuchisa mikanda yetu ha ma site akwo waze hi jw.org ko chili ponde yinene. Yehova hanahane “ndungo wamwenemwene, wakanyama” chiteli chakuhana kulia kuli atu jenyi. (Mateu 24:45) Mba ahane kulia chacho, “ndungo” kakuzachisa ma site—www.pr418.com, tv.pr418.com, ni wol.pr418.com. Nawa tukwete wika aplicativo atatu waze twakusa mu matelefone ni mu yikwata yikwo nawa—JW Language^®, JW Library^®, ni JW Library Sign Language^®. Mutuhasa kupwa ni shindakenyo ngwetu ma site ni aplicativo jino kumushi mitambi chipwe yuma yipi ya hano hashi ha Satana. Kashika, nyi mutuchiza kulia cha ku spiritu mu ma site akwo, acho muchihasa kupwa chakupihisa kulu kuli yitanganyanyi.—Samu 18:26; 19:8.

Chikwo nawa, kusa mikanda yetu mu ma site muze atu mahasa kulishimutwina chakutwala yitanganyanyi ni akwa-kole akwo ahanjike yuma yipi hakutwala ku ululikiso wetu. Mandumbu amwe kakuzanga chinji kuhanjika ni atu jacho ha internet, nawa chino kuchishi kuhalisa Yehova. Lusango wa mutapu au ha Internet hi jila yipema ko yakukwashilamo mutu hanga anyingike umwenemwene. (1 Timoteu 6:3-5; 2 Timoteu 2:23-25) Atu akwo nawa, kakulinga site hanji kwazulula conta ja saki ha rede social mu jina lia ululikiso wetu, Chizavu cha Tusongo ni mandumbu waze akulinga chihanda mu chizavu chacho. Alioze kwamba umwenemwene, kukushi niumwe ndumbu wa mu Chizavu cha Tusongo yoze uli ni site yenyi mwene hanji conta ha ma rede social.

Muze mutuhanjika ni atu hakutwala ku site jw.org, tunakwase mulimo wa kwambujola “sango lipema.” (Mateu 24:14) Ma site ni ma aplicavo jetu kanayi ni kuwaha hita shimbu. Tunazange hanga atu eswe ayuke ha kujizachisa. Ngwe chize analumbununa ha Shimbi ja Kuzachisa najo site yetu, mutuhasa kutumina mutu copia ya umwe mukanda hakuzachisa e-mail hanji kutuma link wa chimwe chikuma chili mu site jw.org. Hachino, nyi mutusolola site yetu kuli mutu yoze unazange kunyingika umwenemwene, acho tunatwale mutu wacho ku chishina cha kulia chamwenemwene cha ku ufulielo chize akutwaha kuli “ndungo wamwenemwene, wakanyama.”