1, 2. (a) Yika tulieswe twatamba kunyingika, nawa mumu liaka? (b) Yika mutulilongesa ha mutwe uno?

TULIESWE twatamba kunyingika mwakuhengwila sango hanga tunyingike umwenemwene wa sango jacho. (Yishima 3:21-23; 8:4, 5 ) Nyi ka, muchipwa chashi Satana ni atu jenyi apihise manyonga jetu. (A-Efwesu 5:6 A-Kolosu 2:8) Kashika, kupwa ni shindakenyo ha chuma ndo kunyingika kanawa umwenemwene wa chuma chacho. Mukanda wa Yishima 18:13 unambe ngwo: “Yoze makumbulula shimbu kande-vwa chikuma, chapwa uhepuke ni sonyi kuli iye.”

² Ha mutwe uno, mutumonaho yize chakupwila chikalu kuwana umwenemwene wa chuma, mba tupwe ni shindakenyo ha chuma chacho. Mutulilongesa nawa shimbi ni yilweza ya Mbimbiliya yize muyitukwasa kunyingika mwakuhengwila sango.

3. Mumu liaka twatamba kukaula shimbi ya Mbimbiliya yize yili ha Yishima 14:15? (Tala chizulie ha uputukilo.)

³ Musono, twakutambula sango jinji kukatuka kweka ni kweka. Jakwiza kupalikila ha Internet, TV ni mu majila akwo  a kumwangilamo sango. Mutuhasa kutambula nawa sango ha e-mail, kutusonekenajo ha telefone hanji jakutulweza kuli masepa jetu. Ha mashimbu amwe sango jacho jakusoloka ngwe kujishi kuhwa. Kashika, twatamba kukeya. Masepa jetu mahasa kututumina sango jacho ni mbunge yitoma. Alioze kuli atu akwo waze akuzanga kutuma sango ja mahuza. Shimbi yika ya Mbimbiliya yize muyitukwasa kuhengwola kanawa sango jize mutwivwa? Mukanda wa Yishima 14:15 unambe ngwo: “Chizuzuke kakufuliela maliji eswe; alioze chikanyame kakutala kanawa ku kwenda chenyi.”

4. Kuchi A-Fwilipu 4:8, 9 muhasa kutukwasa kusakula yize mututanga, nawa mumu liaka chili chilemu kunyingika sango jamwenemwene? (Tala nawa mushete, “ Haze Mutuhasa Kuwana Sango Jamwenemwene.”)

⁴ Mba tukwate yiyulo ya mana, tunafupiwa kunyingika kanawa umwenemwene wa sango jize mututambula. Kashika, twatamba kukanyama muze tunasakula yize mututanga. (Tanga A-Fwilipu 4:8, 9.) Kutwatambile kupalikisa mashimbu jetu ha kuhengwola site jize kujalitele ha Internet hanji kutanga sango jize jinahanjika yuma ya saki. Hachino, chili chilemu kwehuka site ja yitanganyanyi waze akumwanga sango ja mahuza. Ayo kakuzanga kupihisa ufulielo wa atu ja Zambi hamwe ni lufuma wo. Sango ja mahuza jakutwala mutu ku yiyulo ya uhepuke. Kashika kanda tunyonga ngwetu sango ja mahuza kujishi kuhasa kutulinga upi.—1 Timoteu 6:20, 21.

5. Yika A-Izalele alingile ha lusango wa mahuza yoze evwile, nawa kuchi akwachile ku mwono wo?

⁵ Sango ja mahuza mujihasa kututwala ku ponde. Ha mashimbu a Mose, ngendeshi 12 kayile ni kuhengola Chifuchi cha Chilakenyo. Ngendeshi kumi yaneha lusango wa mahuza. (Kwalula 13:25-33) Ayo kalumbile yuma yinji, chocho atu ja Yehova yevwa woma ni kuhona utakamiso. (Kwalula 14:1-4) Mumu liaka atu evwile chocho? Kota ayo kanyongene ngwo lusango wacho te wamwenemwene mumu ngendeshi kumi kahanjikile yuma yimuwika. Kashika ayo alitunyine kupanjika lusango wamwenemwene yoze ngendeshi aali ahanjikile hakutwala ku Chifuchi cha Chilakenyo. (Kwalula 14:6-10) Shimbu alihulikile ha lusango wamwenemwene ni kujikijila kuli Yehova, atu ni uhepuke weswe yajikijila ha lusango wa mahuza.

6. Mumu liaka kutwatambile kwivwa yikola ku mbunge muze mutwivwa sango jipi hakutwala kuli atu ja Yehova?

⁶ Twatamba kukeya chipi-chipi muze mutwivwa jimwe sango jize kujalitele hakutwala kuli atu ja Yehova. Twiwulukenu ngwetu mukwa-kole wetu Satana kanamuvuluka ngwo, mukwa ‘kusuma mulonga mandumbu jetu.’ (Usolwelo 12:10) Yesu katulwezele ngwenyi, akwa-kulimika “manulamikiza  ungulungulu.” (Mateu 5:11) Nyi twakaula maliji wano, kutuchi kevwa yikola ku mbunge muze mutwivwa sango jipi hakutwala kuli atu ja Yehova.

7. Yika twatamba kulihula shimbu kanda tuchitumina akwetu e-mail hanji mesage ha telefone?

⁷ Shina wakuzanga kutumina masepa je e-mail hanji mesage ha telefone? Nyi wamona chuma hanji wevwa sango jize wazanga, shina wa kulivwa ngwe watamba kujitumina akwenu ha shimbu lizeliene? Shimbu kanda utuma e-mail hanji mesage ha telefone, watamba kulihula ngwe: ‘Shina nguli ni shindakenyo ngwami sango jino jili jamwenemwene? Kutala ngunanyingika kanawa sango jacho?’ Nyi kuushi ni shindakenyo, ena muhasa kumwanga sango ja mahuza. Kashika nyi kuushi kunyingika kanawa jimwe sango, kanda ujitumina akwenu. Jijimune hazehene!

8. Yika akulinga akwa-kole jetu mu yifuchi yimwe, nawa kuchi mutuhasa kwehuka ponde yacho?

⁸ Kuli nawa chikuma chikwo cha mumu liaka chili ponde kutumina akwetu e-mail ni mesage ha telefone chakuhona shindakenyo. Mu yifuchi yimwe, mulimo wetu hanaukanjisamo. Akwa-kole jetu mu yifuchi yacho mahasa kumwanga sango ja mahuza jize mujitupinjisa hanji kutulingisa hanga tuhone kulijikijila umwe ni mukwo. Tuchinyongenu ha yize yalingiwile mu chimwe chifuchi (União Soviética). Mapulisha avuluka ngwo KGB, yamwanga sango ja mahuza ngwo, mandumbu amwe waze akwete yiteli yinji mu ululikiso kakunjikile atu ja Yehova. * (Tala maliji mushi lia lifwo.) Chaluyinda, mandumbu anji yafuliela ha mahuza jacho, chocho yahichika ululikiso wa Yehova. Hakupalika cha mashimbu, anji a kuli ayo yafuna, alioze akwo ka. Ayo kechele sango jacho ja mahuza hanga jipihise ufulielo wo. (1 Timoteu 1:19) Kuchi mutuhasa kwehuka ponde yacho? Mutuhasa kuyehuka ha  kwecha kumwanga sango ja mahuza hanji jize kutwanyingikine kanawa. Kutwatambile kutayiza yuma yeswayo mutwivwa hakutwala kuli yetu. Alioze twatamba kupwa ni shindakenyo ngwetu yize twevwa yamwenemwene.

9. Mumu liaka chakukaliwa kunyingika sango jamwenemwene?

⁹ Ha mashimbu amwe twakwivwa sango jize jili wika ni ndambu ya umwenemwene. Sango jikwo kujishi kusolola umwenemwene weswe. Hachino, chakukaliwa kunyingika umwenemwene wa jimwe sango. Kashika kutwatambile kutayiza sango jize jili ni ndambu ya umwenemwene! Yika mutulinga mba tuhone kutayiza sango jacho ja mahuza?—A-Efwesu 4:14.

10. Mumu liaka A-Izalele amwe afupile kwasa jita ni mandumbu jo, nawa yika yaakwashile mba ahone kuchilinga?

¹⁰ Mutuhasa kulilongesa ha yize yalingiwile kuli A-Izalele waze apwile ku sali lia chitokelo ku Lwiji Yordau ha matangwa ja Yoshua. (Yoshua 22:9-34) Ayo kevwile ngwo A-Izalele waze apwile ku sali lia chivumbuko ku Yordau, katungile chilumbilo chinene hakamwihi ni lwiji. Sango jacho, ndambu te jamwenemwene, alioze jikwo te ja mahuza. Yino yalingishile A-Izalele waze apwile ku sali lia chitokelo anyonge ngwo mandumbu jo ku chivumbuko kehuka Yehova, chocho yalikunga hanga aye ni kwasa no jita. (Tanga Yoshua 22:9-12.) Alioze, shimbu kanda achiyako, A-Izalele aku chitokelo yatuma amwe malunga hanga anyingike nyi sango jacho te jamwenemwene. Mba yika malunga jacho evwile? Ayo yevwa ngwo A-Izalele aku chivumbuko kakatungile chilumbilo hanga ahane yitapo kuli tuzambi a mahuza. Ayo katungile chilumbilo chacho hanga chipwe ni kwaewulula ngwo kali tuvumbi twa Yehova. A-Izalele wano kasele shimbu hanga anyingike umwenemwene weswe ha sango jize evwile, chino kota chinakaevwisa kuwaha mumu kakayile ni kwasa jita ni mandumbu jo.

11. (a) Kuchi chapwile mba Mefiposhete amutambule minda? (b) Yika yakwashile Ndawichi mba afunyishine Mefiposhete yimwe minda?

¹¹ Ha mashimbu amwe, mutuhasa kwivwa yikola ku mbunge mumu atu kamba yimwe hali yetu yize kuyalumbunwine umwenemwene weswe. Yino ye yalingiwile kuli Mefiposhete. Mwanangana Ndawichi yahana kuli Mefiposhete minda yeswe ya kako Saulu. (2 Samuele 9:6, 7) Alioze kulutwe Ndawichi yevwa jimwe sango jipi hali Mefiposhete. Ndawichi kakahengwile hanga anyingike nyi sango jacho te jamwenemwene, alioze iye yatambula minda yeswe kuli Mefiposhete. (2 Samuele 16:1-4) Kulutwe muze Ndawichi hahanjika ni Mefiposhete, yanyingika ngwenyi kumana sango jize evwile te ja mahuza. Mba hi yafunyishina Mefiposhete yimwe minda. (2 Samuele 19:24-29) Nyi Ndawichi kasele shimbu hanga anyingike umwenemwene chakuhona kukwata chiyulo cha susumuku ha sango jize evwile, kachi Mefiposhete kakamutambwile minda yize amwehele.

12, 13. (a) Yika Yesu alingile muze atu amuliongelele yuma ya saki? (b) Yika mutulinga nyi umwe matuliongela yuma ya saki?

¹² Yika mulinga nyi umwe makuliongela yuma ya saki? Yino ye yalingiwile kuli Yesu ni kuli Yoano Chipapachisa. (Tanga Mateu 11:18, 19.) Mba yika Yesu alingile? Iye kakazachishile mashimbu ni tachi jenyi hanga alweze atu ngwo yuma yacho te ya mahuza. Alioze, kakolwezele atu hanga alihulikile ku yuma yamwenemwene. Iye kazangile hanga ayo alihulikile ha yuma yize te akulinga ni yize te  akwaalongesa. Yesu yamba ngwenyi: ‘Mana kakusoloka ku yitanga.’—Mateu 11:19.

¹³ Mutuhasa kulilongesa fumbo lilemu hali Yesu. Ha mashimbu amwe, atu mahasa kuhanjika yuma ya mahuza hali yetu, nawa mutuhasa kwivwa woma ngwetu yino muyipihisa lufuma wetu. Alioze yitanga yetu muyihasa kukwasa atu hanga anyingike chize twapwa. Ngwe chize twamona ha chilweza cha Yesu, yitanga yetu yipema muyihasa kuhisa sango jize jili ni ndambu ya umwenemwene ni yuma ya mahuza yize atu akutwamba.

14, 15. Mumu liaka kutwatambile kujikijila ha malinjekela jetu?

¹⁴ Amu tuli yihenge, muchihasa kupwa chikalu kunyingika kanawa sango jamwenemwene. Hanji twakuwayila Yehova ha miaka yinji nawa tunanyingika kanawa yimwe yuma. Akwetu mahasa kutuvumbika mumu twakunyingika kanawa yuma. Shina chino muchihasa kupwa ponde kuli yetu?

¹⁵ Ewa. Mumu mutuhasa kuputuka kujikijila ha malinjekela waze tukwete. Mutuhasa kwecha manyonga ni mbunge jetu yisongwele yitanga yetu. Nawa mutuhasa kuputuka kulijikijila ngwetu tunanyingika kanawa yimwe yuma chipwe ngwe kutushi ni umwenemwene weswe ha yuma chacho. Chino chili ponde yinene! Kashika Mbimbiliya yinatutoweza ngwo kutwatambile kujikijila ha malinjekela jetu.—Yishima 3:5, 6; 28:26.

16. Ha chilweza chino, yika yinalingiwa mu restaurante, nawa yika Tomas ananyongo?

¹⁶ Chakutalilaho achinyonga ngwe ha chimwe chingoloshi, Tomas umwe mukulwana wa mu chikungulwila yoze hajama maya mu restaurante mamona Yoano, mukulwana mukwo wa mu chikungulwila kali ku mesa ni umwe pwo yoze hi mukwo-pwo ko. Yize ayo analingi yinasolola ngwe ayo kapalikisa mashimbu anji hamuwika. Tomas maamona kanaseha ni kulisambilila. Iye malipikala ni kulihula ngwenyi: ‘Shina yuma yize Yoano analingi kuyichi kumuhandununa ni mukwo-pwo? Ana jenyi kuchi mevwa nyi yino  muyilingiwa?’ Tomas hanamono kulu yuma yacho muyilingiwa. Nyi uli Tomas kachi te kuchi muwivwa?

17. Ha chilweza chino, yika Tomas alinga, nawa yika mutuhasa kulilongesa?

¹⁷ Chipwe ngwe, Tomas hanyonga kulu ngwo Yoano keshi kushishika kuli mukwo-pwo, alioze shina iye kananyingika lume umwenemwene weswe hali ayo? Ha chingoloshi, Tomas yasanyika Yoano mba hi yanyingika ngwo, pwo wacho te ndumbwenyi yoze te uli mu wenyi kafupanga wika kwaameneka. Mumu te hikwapalika miaka yinji chize haze Yoano ni ndumbwenyi alimwene. Amu iye te malinga maola akehe, Yoano wika mwe te uli ni shimbu lia kuliwana nenyi mu restaurante ni kulia hamuwika. Mukwo-pwo te keshi ni shimbu lia kuhetako. Tomas yevwa kuwaha mumu lia kuhona kulweza mutu niumwe lusango wacho! Yika twalilongesa ha chilweza chino? Twalilongesa ngwetu, chipwe ngwe twakuwayila Yehova ha miaka yinji, nihindu twatamba kunyingika yikuma yeswe mba tupwe ni shindakenyo nyi yize twamona yamwenemwene nyi ka.

18. Yika muyihasa kutulingisa hanga tutayize chuma chipi chize twevwa hali ndumbwetu?

¹⁸ Muchihasa nawa kupwa chikalu kuhengwola kanawa chimwe chikuma chize chinatale ndumbu yoze kutushi kuzanga. Nyi mutununga ni kunyonga ha mulonga uze tuli nawo ni ndumbwetu mutuhasa kuhona kumujikijila. Hachino, nyi mutwivwa chuma chipi hakutwala kuli iye, mutuhasa kuchitayiza ni mbunge yeswe, chipwe ngwe kukushi nichimwe chize chinasolola umwenemwene wa chuma chacho. Yika mutulilongesa hano? Twalilongesa ngwetu, nyi mutunyongena mandumbu jetu yuma yipi, chino muchihasa kutulingisa hanga tutayize yuma yipi yize mutwivwa hali ayo chakuhona kufupa kunyingika umwenemwene. (1 Timoteu 6:4, 5) Kashika kutwatambile kwecha yitanga yipi ngwe chipululu ni ukwa yitumbe miji mu mbunge yetu. Kanda tuvulama ngwetu, Yehova kanatwite hanga tuzange mandumbu jetu ni kwaakonekena ni mbunge yeswe.—Tanga A-Kolosu 3:12-14.

19, 20. (a) Shimbi jika ja Mbimbiliya jize mujihasa kutukwasa tuhengwole kanawa sango? (b) Yika mutulilongesa ha mutwe uze muusulaho?

¹⁹ Musono, chili chikalu kunyingika umwenemwene wa jimwe sango ni kujihengwola kanawa. Mumu liaka? Mumu sango jinji jili ni ndambu ya umwenemwene nawa yetu tuli yihenge. Mba yika muyihasa kutukwasa? Shimbi ja Liji lia Zambi je mujitukwasa! Chakutalilaho, shimbi yimwe yinatulweze ngwo chihepuke kakulianga kukumbulula shimbu kanda achinyingika umwenemwene weswe. (Yishima 18:13) Yikwo yinatukwase hanga tumone ngwetu kutwatambile kufuliela yuma yeswe yize mutwivwa chakuhona kufupa kunyingika umwenemwene. (Yishima 14:15) Yeka yinasolola ngwo, chipwe ngwe twakuwayila Yehova ha miaka yinji, nihindu kutwatambile kujikijila ha malinjekela jetu. (Yishima 3:5, 6) Shimbi ja Mbimbiliya mujitufunga nyi mutusa tachi hanga tunyingike umwenemwene wa sango jize mutwivwa ni kukwata yiyulo ya mana.

²⁰ Alioze kuli chitela chikwo chize muchihasa kusolola ukalu wa kunyingika umwenemwene wa chimwe chikuma. Ngwe atu, twakulipupwisa kupatwila akwetu ha yuma yize mutuhasa wika kumona. Kashika ha mutwe uze muusulaho, mutulilongesa majila waze mahasa kututwala ku uhenge wacho ni chize mutuwehuka.