1. Kulita ni A-Hepreu 12:1, yika twamba kulinga mba tuhete ku kuzomboka chetu cha mwono?

 MBIMBILIYA yakutesa mwono wa Akwa-Kristu ni chimwe kuzomboka. Akwa-kuzomboka eswe waze maheta ku songo, makatambula chiwape cha mwono wa mutolo. (2 Timo. 4:7, 8) Kashika, tunafupiwa kulinga yize mutuhasa hanga tununge mu kuzomboka chino, mumu hikwasala hakehe tuhete ku songo. Postolo Paulu, kahashile kuheta ku songo lia kuzomboka chenyi, kashika anatulweze yize muyitukwasa hanga ni yetu tuhete ku songo lia kuzomboka chetu. Iye kanatulweze ngwenyi: “Tumbilenu yilemu yeswe . . . tuzombokenu ni kunyongonona mu kuzomboka chize hanase kumeso jetu.”—Tanga A-Hepreu 12:1.

2. ‘Kumbila yilemu yeswe’ yika chinalumbunuka?

² Muze Paulu ambile ngwenyi, “tumbilenu yilemu yeswe,” shina te kanazange kwamba ngwenyi, Mukwa-Kristu katambile kumbata yilemu niyimwe mu kuzomboka cha mwono? Ka, hi chocho ko. Iye kazangile wika kwamba ngwenyi, tumbilenu yilemu yeswe yize kutwafupiwile. Mumu yilemu yacho, muyihasa kutuvwisa chinyengo ni kutuhongesa. Kashika, nyi tunazange kununga ni kunyongonona, twatamba kumana ni kutala nyi tunambate yimwe ya ku yilemu yacho ni kuyimbila kawashi-washi nyi muchilita. Alioze, kuli yilemu yimwe yize twatamba kumbata. Tunafupiwa kumbata yilemu yacho mumu nyi twayihichika muchipwa ngwe kutwazangile kuzomboka. (2 Timo. 2:5) Mba yilemu yika yenayo?

3. (a) Kulita ni A-Ngalashia 6:5, yika twatamba kumbata? (b) Yika mutulilongesa ha mutwe uno, mumu liaka chili ni ulemu kulilongesayo?

 ³ Tanga A-Ngalashia 6:5. Paulu katongwele chimwe chuma chize twatamba kumbata. Iye kambile ngwenyi: “Mutu ni mutu makambata chiteli chenyi.” Hano Paulu kazangile kwamba ngwenyi, yetu eswe tuli ni yimwe “yiteli” yize Yehova anashimbwila hanga tuyimbate. Ha mutwe uno, mutumonaho yize yinalumbunuka kumbata yiteli yetu, ni chize mutuhasa kuchilinga. Mutumona nawa yilemu yize kutwafupiwile yize mutuhasa kumbata chakuhona kunyingika ni chize mutuhasa kuyimbila. Kumbata yilemu yetu ni kumbila yilemu yize kutwafupiwile, muchitukwasa tununge ni kuzomboka ndo ku songo lia kuzomboka chetu.

4. Mumu liaka kumanununa chilakenyo chetu cha kulihana kuli Yehova, hi chuma chikalu ko kulinga? (Tala nawa chizulie.)

⁴ Kulihana chetu kuli Yehova. Muze twakulihana kuli Yehova, twakumulakenya ngwetu mutumuwayila ni kulinga upale wenyi ku miaka yeswe. Kashika, twatamba kumanununa  chilakenyo chino. Kulinga yuma yeswe yize twalakenyene kuli Yehova, chili chimwe chiteli chinene, alioze hi yilemu ko. Mumu liaka tunambe chocho? Mumu Yehova katutangile hanga tulinge upale wenyi. (Uso. 4:11) Iye katutangile mu chano chenyi ni kutwaha mbunge ya kumunyingika ni kumuwayila. Kashika twakuhasa kukundama kuli Yehova ni kuzanga kulinga upale wenyi. (Samu 40:8) Chikwo nawa, muze twakulinga upale wenyi ni kwononokena Mwanenyi, twakuwana ‘uhwimino mu mbunge yetu.’—Mateu 11:28-30.

5. Yika muyikukwasa mba umbate kanawa chiteli che cha kulihana kuli Yehova? (1 Yoano 5:3)

⁵ Kuchi mutuhasa kumbata chiteli chacho? Yuma yaali muyihasa kutukwasa. Chitangu, kununga ni kukolesa zango lietu hali Yehova. Mutuhasa kupukuna ha yuma yeswe yipema yize hanatulingila ni ha yiwape yize makatwaha. Muze zango lietu hali Yehova mulinunga ni kukola, muchipwa chashi ku mwononokena. (Tanga 1 Yoano 5:3.) Chamuchiali, kwimbulula Yesu. Iye kahashile kulinga upale wa Yehova, mumu te kakulemba ni kwita ukwaso ni kulihulikila ha yiwape yize amulakenyene. (Hepre. 5:7; 12:2) Chizechene ngwe Yesu, tunungenu ni kulemba kuli Yehova hanga atwehe tachi; kanda tutokesa kutalatala chetu cha kulutwe lia matangwa. Nyi twokesa zango lietu hali Yehova ni kwimbulula Yesu, mutuhasa kumbata kanawa chiteli chetu cha kulihana kuli Yehova.

6. Mumu liaka twatamba kulinga yiteli yize tukwete mu usoko? (Tala nawa chizulie.)

⁶ Chiteli chize tukwete mu usoko. Mu kuzomboka chetu cha mwono, twatamba kuzanga chinji Yehova ni Yesu kuhiana asoko jetu. (Mateu 10:37) Alioze chino kuchalumbunukine ngwo, twatamba kulengulula yiteli yize tukwete mu usoko. Mumu nyi tunazange kuvwisa Yehova ni Yesu kuwaha, twatamba kuyilinga. (1 Timo. 5:4, 8) Nyi twachilinga, mutuwahilila chinji. Yehova kananyingika ngwenyi, asoko kakuwahilila muze lunga ni pwo akulizanga ni kulivumbika, muze yisemi akuzanga ana jo ni kwafumba kanawa ni muze ana akwononokena yisemi jo.—Efwe. 5:33; 6:1, 4.

7. Yika muyikukwasa mba ulinge chiteli chize ukwete mu usoko?

⁷ Kuchi mutuhasa kumbata chiteli chacho? Chipwe ngwe uli lunga, pwo hanji mwana, chuma chilemu kulinga chili kukaula shimbi ja Zambi. Kanda ulinga wika yuma yize wakunyonga ngwe yalita hanji yize yakulingiwa kuze watwama. Chipwe kweseka kukaula yuma yize amwe akwa-mana akwamba ngwo watamba kulinga. (Yishi. 24:3, 4) Zachisa kanawa mikanda yetu yize yakukatuka mu Mbimbiliya. Mikanda yino, yakuhana yiyulo yipema ya chize mutuhasa kukaula shimbi ja Zambi. Chakutalilaho, chikuma chinambe ngwo, “Ukwaso Kuli Asoko” hali sango jipema jize mujihasa kukwasa waze alimbata, yisemi ni akweze hanga ahase kukumba yipikalo ya hita tangwa. b Sako tachi hanga ukaule yize Mbimbiliya yakwamba chipwe ngwe amwe mu usoko wenu kazangile kuyikaula. Nyi wachilinga, usoko wenu muyuka chinji ni kuzuka yiwape ya Yehova.—1 Petu. 3:1, 2.

8. Kuchi yiyulo yetu muyihasa kukwata ku mwono wetu?

⁸ Kutayiza yize muyiza ku yiyulo yize twakwachile. Yehova katutangile ni nyonga lia kusakula chipi ni chipema. Hachino, iye kakuzanga hanga tukwate yiyulo yipema ni kuwahilila ku mwono. Alioze nyi mutukwata chiyulo chipi, Yehova keshi kutufunga ku lamba lize muliza ku chiyulo chacho. (Ngala. 6:7, 8) Kashika, twatamba  kutayiza lamba lize muliza ku chiyulo chize twakwata, ku maliji hanji ku yuma yize twalinga chakuhona kunyonga chitangu. Chikwo nawa, yeswayo mutulinga, mutuhasa kununga ni kwivwa yikola ku mbunge. Alioze, kunyingika ngwo twatamba kutayiza yilemu yize muyiza ku yiyulo yetu, muchihasa kutukwasa hanga twambulule shili yize twalinga, kululieka mwono wetu ni kwehuka kufunyina shili yacho. Kulinga yuma yino, muchitukwasa kununga mu kuzomboka cha mwono.

9. Yika muhasa kulinga nyi wakwachile chiyulo chipi? (Tala nawa chizulie.)

⁹ Kuchi mutuhasa kumbata chiteli chacho? Yika muhasa kulinga nyi wakwata chiyulo chipi? Tayiza ngwe kuuchi kuhasa kwalumuna yize walingile kunyima. Echa kukisa mashimbu ni tachi je ha kukalila chiyulo chize wakwachile hanji kulamikiza akwenu ha uhenge uze walingile. Shimbu ulinge chocho, tayiza ngwe wahengesele ni kulinga yize muhasa hanga ululieke yuma. Nyi unevu yikola ha chuma chize walingile, likehese ha kulemba kuli Yehova, kutayiza uhenge wacho ni kumwita hanga akukonekene. (Samu 25:11; 51:3, 4) Eta ukonekeno kuli waze walemeka ku mbunge, chikwo nawa, nyi muchilita fupa ukwaso wa makulwana mu chikungulwila. (Tia. 5:14, 15) Wana malongeso ha upi uze walinga, ni kusa tachi hanga uhone kuufunyina. Nyi walinga yuma yino, muhasa kupwa ni shindakenyo ngwe, Yehova makusolwela keke ni kukukwasa ha yize unafupiwa.—Samu 103:8-13.

10. Mumu liaka kulieseka ni akwetu muchihasa kupwa yilemu yikalu kumbata? (A-Ngalashia 6:4)

¹⁰ Kunyonga ngwe kutushi kulinga yuma ngwe yize akwetu akulinga. Kulieseka ni akwetu muchihasa kutuhongesa ku mbunge. (Tanga A-Ngalashia 6:4.) Nyi mutupwa ni chako cha kulieseka ni akwetu, chino muchihasa kututwala tupwe akwa-kuzo ni kupwa ni kulihamika mukachi ketu. (Ngala. 5:26) Nyi mutufupa kulinga yuma yize akwetu akulinga, alioze kutushi ni uhashi wa kuulinga, mutuhasa kulipinjisa yetu ene. Nyi “kutalatala chize kuchishi kumoneka kuchakuhongesa mbunge,” achinyonga chize mutuhasa kuhonga nyi mutufupa kulinga yuma yize kutuchi kuhasa! (Yishi. 13:12) Nyi twalinga yuma ya mutapu au, mutuhasa kuhonga chinji ni kufupa kulitwamina mu kuzomboka cha mwono.—Yishi. 24:10.

11. Yika muyikukwasa hanga uhone kulinga yuma yize kuuchi kuhasa?

¹¹ Kuchi muhasa kumbila yilemu yacho? Kanda ulinga yuma yize Yehova keshi kushimbwila hali yena. Iye keshi kukwita ulinge yuma yize kuuchi kuhasa. (2 Kori. 8:12) Chikwo nawa, nyingika ngwe Yehova keshi kutesa yuma yize wakulinga ni yize akwenu akulinga. (Mateu 25:20-23) Yehova kakulemesa chinji mulimo uze wakumulingila ni mbunge yeswe, ufulielo uze ukwete ni kunyongonona chize wakusolola. Solola kulikehesa ha kunyingika ngwe, hanji kuuchi kuhasa kulinga yuma yeswe yize unazange, mumu lia ushinakaji, misongo hanji yuma yikwo nawa yize yinasoloka ku mwono we. Ngwe Bazilai, litune chiteli chize mumona ngwe kuuchi kuhasa kuchilinga, mumu lia musongo hanji ushinakaji. (2 Samue. 19:35, 36) Ngwe Mose, eta ukwaso ni kuhana yiteli yimwe kuli akwenu nyi muchilita. (Kutuhu. 18:21, 22) Kulikehesa muchikukwasa hanga uhone kulinga yuma yize muyikutwala ulitwamine mu kuzomboka cha mwono.

12. Shina twatamba kumbata yilemu ya yiyulo yize akwetu makwata? Lumbununa.

¹² Kulilamikiza ha yiyulo yipi yize atu akwo makwata. Yetu kutwatambile kukwachila akwetu yiyulo. Chipwe kwakinda ku lamba lize muliza ku yiyulo yo. Chakutalilaho, tunyongenu ngwetu mwane wa lunga hanji wa pwo mazanga kwecha kuwayila Yehova. Chiyulo chino muchihasa kuvwisa yisemi yikola yinji ku mbunge.  Alioze, nyi yisemi manunga ni kulilamikiza ha chiyulo chize mwana akwata, chino muchihasa kupwa chiteli chilemu chize ayo anambate. Yehova kazangile hanga yisemi ambate yilemu ya mutapu au.—Roma 14:12.

13. Kuchi yisemi mahasa kumona yiyulo yipi yize ana jo makwata?

¹³ Kuchi muhasa kumbila yilemu yacho? Iwuluka ngwe Yehova katutangile ni nyonga lia kusakula chipi ni chipema. Kashika, kanashimbwila ngwo hita umwe wa kuli yetu asakule yize malinga. Yino yinachingi kusakula kumuwayila hanji ka. Yehova kananyingika ngwenyi, yenu yisemi hi nuli angunu ko; kashika kanashimbwila hanga nulinge yize munuhasa. Yuma yize mwanenu masakula kulinga yinatale hali iye mwene hi hali yenu ko. (Yishi. 20:11) Chipwe chocho, hanji munuhasa kununga ni kunyonga ha upi uze nwalinga ngwe yisemi. Nyi chenacho, lembenu kuli Yehova ha kumulweza chize nunevu ni kwita ukonekeno. Yehova kananyingika ngwenyi, yenu kunuchi kwalumuna yuma yize nwalingile kunyima. Chikwo nawa, iye keshi kushimbwila hanga nufunge mwanenu ku lamba lize muliza ku upi uze alinga. Nyi mwanenu masa tachi hanga ahiluke kuli Yehova, nyingikenu ngwenu, Yehova mamutambula ni mbunge yimuwika.—Luka 15:18-20.

14. Mumu liaka kununga ni kulilamikiza ha shili yize twalingile yili yilemu yize twatamba kumbila?

¹⁴ Kununga ni kulilamikiza ha shili yize twalingile. Nyi twalinga shili, chinalite kwivwa yikola ku mbunge. Alioze, Yehova kazangile hanga tununge ni kulivwa chocho. Yino yili yilemu yize twatamba kumbila. Mba kuchi mutuhasa kunyingika ngwetu, tunahianyisa ha yikola yize tunevu ku mbunge? Nyi hitwambulula shili yetu; twalikonyeka ni kusa tachi hanga tuhone kuyifunyina, mutuhasa kupwa ni shindakenyo ngwetu, Yehova katukonekena. (Yili. 3:19) Hanyima lia kulinga yuma yino, Yehova kazangile hanga tununge ni kulilamikiza ha shili yacho. Mumu kananyingika ngwenyi, manyonga jacho mahasa kutunehena upi. (Samu 31:10) Nyi twambata yilemu ya mutapu au, mutuhasa kulitwamina mu kuzomboka cha mwono.—2 Kori. 2:7.

15. Yika muyihasa kukukwasa hanga uhone kulilamikiza chinji ha shili yize Yehova hanakukonekenayo? (1 Yoano 3:19, 20) (Tala nawa chizulie.)

 ¹⁵ Kuchi muhasa kumbila yilemu jacho? Nyi unanungu ni kulilamikiza ha shili yize walingile, lihulikile ha ‘ukonekeno wamwenemwene’ wa Yehova. (Samu 130:4) Yehova kanambe kuli waze malikonyeka ni mbunge yeswe ngwenyi: “Mungukonekena uhenge wo; chichi kwiwuluka nawa shili yo.” (Jere. 31:34) Maliji wano kanalumbunuka ngwo, Yehova kechi kanyonga nawa ha shili walingile yize hanakukonekenayo. Kashika, nyi mumona lamba mumu lia yize walingile; kanda unyonga ngwe Yehova kakukonekenene. Kanda ununga ni kulilamikiza nyi upi uze walingile wakutwalile utokese chiteli chize wapwile nacho mu chikungulwila. Yehova keshi kunyonga ha upi uze walingile kunyima; ni yena kuwatambile kuchilinga.—Tanga 1 Yoano 3:19, 20.

16. Ngwe akwa-kuzomboka, yuma yika twatamba kunyingika?

¹⁶ Amu tuli mu kuzomboka cha mwono, tunafupiwa ‘kununga ni kuzomboka hanga tukazuke fweto.’ (1 Kori. 9:24) Mutuhasa kuchilinga, nyi twanyingika kanawa kalisa yoze uli ha yilemu yize twatamba kumbata ni yize twatamba kumbila. Ha mutwe uno, twamonaho yimwe yuma yize twatamba kumbata ni yize twatamba kumbila. Alioze kuli yuma yikwo nawa yize twatamba kumbila. Yesu kambile ngwenyi: ‘Mbunge jetu te mujihasa kulema mumu lia kulialia, kunwanwa ni yipikalo ya mwono.’ (Luka 21:34) Chisoneko chino ni yisoneko yikwo nawa, muyihasa kukukwasa umone yuma yize watamba kwecha hanga ununge mu kuzomboka cha mwono.

17. Yika yinatukwase kupwa ni shindakenyo ngwetu, mutukumba mu kuzomboka chetu cha mwono?

¹⁷ Tuli ni shindakenyo ngwetu, mutuhasa kuheta ku songo mu kuzomboka chetu cha mwono, mumu Yehova kakutwaha tachi jize tunafupiwa. (Iza. 40:29-31) Kashika, kanda uhonga! Kaula chilweza cha Paulu yoze wasele tachi hanga azuke chiwape chize chapwile kulutwe lienyi. (Fwili. 3:13, 14) Mu kuzomboka chino cha mwono, kukushi niumwe yoze mahasa kukuzombokela, alioze ni ukwaso wa Yehova, yena mwene muhasa. Yehova mahasa kukukwasa hanga umbate yilemu yize yalita ni kumbila yize muyihasa kukupinjisa. (Samu 68:19) Nyi ukwaso wa Yehova, muhasa kuheta ku songo mu kuzomboka cha mwono!