Ha mutwe wacho, twalilongeseleho ngwetu, kuli chikuma chimuwika chilemu chize chinakwate hali atu ni angelo: Chikuma chacho chili, kupwisa jina lia Yehova lisandu. Chikuma cha wata hanji ngwetu mutapu uze Yehova akuyula unahiane, chino chinatale ha kupwisa jina lia Yehova lisandu. Chikuma chinatale ha kushishika cha atu necho chinakwate ha kupwisa jina lia Yehova lisandu.

Mumu liaka twakulemesa chinji jina lia Yehova ni kulipwisa lisandu? Tutalenu yikuma yino yitatu.

Chitangu, mu munda wa Endene Satana kahanjikile yuma yipi ha jina lia Yehova ni kupihisa lufuma wenyi. Chihula chize Satana ahulile kuli Eva chasolwele ngwe Yehova hi chihanyi ko, nawa kakusa shimbi jize hi jashi ko kukaula. Satana kambile yuma yalisa ni yize Yehova ambile. Chapwile ngwe kanambe ngwenyi, Yehova mukwa-mahuza. Iye kapihishile lufuma wa jina lia Yehova. Chocho yalipwisa “Ndiapu,” linalumbunuka ngwo chilamikiji. (Yoa. 8:44) Amu Eva afuliele ha mahuza a Satana, acho yalituna Yehova ni chiyulo chenyi. (Uputu. 3:1-6) Ndo haliapwila, Satana machinunga ni kuhanjika mahuza hali Yehova. Tuli ni shindakenyo ngwetu, waze akutayiza mahuza jacho keshi kwononokena Yehova. Hachino, kuli atu ja Zambi, mahuza hakutwala ku jina lisandu lia Yehova kali uhenge unene. Chikuma chino chili chishina cha yipikalo ni lamba lieswe lize atu akumona hano hashi.

Chamuchiali, mumu lia upeme wa yitangiwa yeswe, Yehova hanatese kululieka lufuma wa jina lienyi ni kulinangamisa. Chino chili chuma chilemu chinji kuli Yehova. Kashika, anambe ngwenyi: “Mungukasolola usandu wa jina liami linene.” (Eze. 36:23) Yesu kasolwele pundu ngwenyi, chuma chilemu mu yilemba ya tuvumbi eswe Yehova waze ashishika chili kupwisa jina lienyi lisandu. Kashika ambile ngwenyi: “Tata nuli mu malilu, jina lienu lipwe lisandu.” (Mateu 6:9) Mbimbiliya yakushindakenya yisuho yinji ulemu wa kuhalisa jina lia Yehova. Tutalenu yimwe yisoneko: “Hanenu kuli Yehova ulemu wa jina lienyi.” (1 Sango 16:29; Samu 96:8) “Imbilenu ulemu wa jina lienyi.” (Samu 66:2) “Munguchichimieka jina lie ku miaka ya mutolo.” (Samu 86:12) Tangwa limwe Yehova mwene yahanjika kukatuka mu malilu muze akumbulule Yesu mu tembele mu Yerusaleme, ngwenyi: “Tata, chichimieka jina lie.” Chocho Yehova yamukumbulula ngwenyi: “Hingunalichichimieka, kumungukalichichimieka cheka nawa.”—Yoa. 12:28. a

Chamuchitatu, upale wa Yehova mashimbu eswe muukwata ha jina lienyi, hanji ngwetu lufuma wenyi. Nyonga ha chino: Yika muyikalingiwa hanyima lia cheseko cha kasula, ha kanunu ka miaka ya kuyula cha Yesu? Kuchi angelo ni atu eswe makevwa hakutwala ku jina lia Yehova ha mashimbu jacho? Mba tukumbulule yihula yino, twiwulukenu yikuma yaali yinatale ha ushishiko  wa atu ni ha wata wa Yehova. Hanyima lia kanunu ka miaka, shina atu makafupiwa kusolola ushishiko? Ka. Mumu ha shimbu liacho, ayo makapwa akweseka kulu; makapwa angunu, nawa makatambula mwono wa mutolo. Muze mashimbu jacho makaheta, shina chikuma cha wata wa Yehova muchikapwa mu lusango ni kulihandununa? Ka. Eswe mu malilu ni hashi makalinunga ni kupwa ni shindakenyo ngwo, mutapu wa kuyula cha Yehova wahiana weswe, nawa wapwa upema. Mba shina jina lia Yehova mulikanunga ni kupwa chuma chilemu kuli tuvumbi twenyi?

Hanyima lia kanunu ka miaka, atu eswe makanyingika umwenemwene hakutwala kuli Yehova ni jina lienyi mulikapwa lisandu. Alioze, jina lia Yehova mulikanunga ni kupwa chuma chilemu kuli tuvumbi twenyi eswe mu malilu ni hashi. Mumu liaka? Mumu ayo makamona ngwo, Yehova makanunga ni kulinga yuma yakukomwesa. Tunyongenu ha chino: Muze Yesu makafunyisa wata kuli Yehova, Zambi makapwa “yuma yeswe muli eswe.” (1 Kori. 15:28) Mba hi atu hano hashi makayuka “ku kutusuka cha uhenya wa ana a Zambi.” (Roma 8:21) Hanyima lia yino yeswe, Yehova makamanununa upale wenyi unene, wa kuchinga yitangiwa yenyi mu malilu ni hashi hanga apwe usoko unene nawa walinunga.—Efwe. 1:10.

Muze yino yeswe muyikalingiwa, kuchi asoko ja Yehova mu malilu ni hashi makevwa? Kwamba pundu, eswe makapwa ni chiseke cha kununga ni kuwayila Yehova. Ndawichi kasonekene ngwenyi: “Yehova Zambi akawahe . . . Jina lienyi lilemu likafumane ku miaka ya mutolo.” (Samu 72:18, 19) Muze mututwama ku miaka yeswe, nihindu mutukapwa ni yuma yipema yize muyikatutwala tununge ni kuwayila Yehova.

Jina lia Yehova liakusolola pundu chize iye apwa. Muze twakunyonga ha jina lienyi, twakwiwuluka nawa zango lienyi. (1 Yoa. 4:8) Mashimbu eswe twakwiwuluka ngwetu, Yehova katutangile mumu lia zango, katuhele ukuule mumu lia zango, nawa kakuyula mu jila yalita mumu lia zango. Chikwo nawa, mutununga ni kwivwa zango lize Yehova akwete hali yitangiwa yenyi. Ku miaka yeswe, mutupwa ni yuma yize muyitutwala hanga tununge ni kukundama kuli Yehova ni kuhalisa jina lienyi.—Samu 73:28.