1, 2. Mumu liaka yisemi amwe akuzakalala muze ana jo mazanga kulihana kuli Yehova ni kwaapapachisa?

TUNUNU twa alongi a Mbimbiliya kakulihana kuli Yehova ni kwaapapachisa. Anji akuli ayo kali akweze waze akukolela mu umwenemwene ni kusakula jila yipema ku mwono wo. (Samu 1:1-3) Nyi uli chisemi Chela cha Yehova, kota unashimbwila ni uwahililo weswe tangwa lize mwane mamupapachisa.—Tesa ni 3 Yoano 4.

² Chipwe chocho, muhasa kuzakalala. Hanji wakumona akweze amwe maapapachisa alioze ha mashimbu amwe maputuka kuyambashana nyi kutwama kulita ni shimbi ja Zambi chili lume chipema kuli ayo. Amwe kakuhichika umwenemwene. Kashika muhasa kunyonga ngwe mwane neye maputuka kuwayila Yehova, alioze kulutwe matokesa zango lize te akwete ku umwenemwene. Mwane mahasa kupwa ngwe amwe akwa-Kristu mu Efwesu ku sekulu yitangu. Yesu yaamba ngwenyi:  ‘Hinunehuka zango lienu litangu.’ (Usolwelo 2:4) Kuchi muhasa kukwasa mwane hanga anunge ni kukolesa zango lienyi ni ‘kutatuka mu kuzuka ulamwino? (1 Petulu 2:2) Mutuwana kumbululo ha chilweza cha Timoteu.

3. (a) Kuchi Timoteu apwile mukwa-Kristu, nawa kuchi akawile yize alilongesele? (b) Yikuma yika yitatu yize Paulu asolwele hakutwala kuli Timoteu?

³ Postolo Paulu kamenekene Lisetra a chisuhu chitangu ha mwaka 47. Iye kota kayileko muze Timoteu te uchili mukweze nawa te halilongesa kulu hakutwala kuli Yesu. Iye te kakukaula yize akulilongesa, kashika hakupalika cha miaka yaali iye yaputuka wenyi ni Paulu. Hakupalika cha miaka 16, Paulu yasonekena Timoteu ngwenyi: “Nyongonona mu yuma yize hiunalilongesa, ni yize hiunayisela chinyingi, se unanyingika yoze wakulongeseleyo; chize ku ukemba we hiunanyingika je sona jisandu [Yisoneko ya Hepreu], jize jinahase kukufumba mana mukuzuka ulamwino ku ufulielo uze uli muli Kristu Yesu.” (2 Timoteu 3:14, 15) Tala ngwe, hano Paulu kambile kuli Timoteu (1) te kanyingikine sona jisandu, (2) kasele chinyingi ha kufuliela yuma yize alilongesele, nawa (3) yapwa ni mana mukuzuka ulamwino ku ufulielo uze uli muli Kristu Yesu.

4. Yika muuzachisa hanga ulongese ana je? (Tala chizulie ha uputukilo.)

⁴ Amu nuli yisemi Yela ja Yehova, nunazange hanga ana jenu anyingike sona jisandu, jize musono jinachingi, Yisoneko ya Hepreu ni Yisoneko ya Ngregu ya akwa-Kristu. Chipwe ana kemba no mahasa kulilongesa hakutwala kuli atu ni yuma yize yili mu Mbimbiliya. Ululikiso wa Yehova wakutuhwisa mikanda ni yinema yeka ni yeka yize yisemi mahasa kuzachisa hanga akwase ana jo. Mikanda ni yinema yacho shina yili mu limi lienu? Ana jenu kanafupiwa kunyingika yize yili mu Mbimbiliya hanga akolesa usepa wo ni Yehova.

5. (a) ‘Kuyisela chinyingi’ yika chinalumbunuka? (b) Kuchi tunanyingika ngwetu Timoteu kasele chinyingi ha sango jipema hakutwala kuli Yesu?

⁵ Kunwatambile wika kulongesa ana jenu hakutwala kuli atu ni yuma yize yili mu Mbimbiliya. Iwulukenu ngwenu, Timoteu nawa ‘kasele chinyingi mu yuma yize amulongesele.’ Hano, liji lia Ngregu lize Paulu azachishile linalumbunuka ‘kuyisela chinyingi’ hanji ‘kupwa ni shindakenyo hakutwala ku umwenemwene wa chimwe chuma.’ Timoteu te kanyingika Yisoneko ya Hepreu “chize ku ukemba,” chekwamba, chize muwanuke wenyi. Kulutwe, yapwa ni shindakenyo ngwenyi Yesu mwe te Mesaya. Ufulielo wa Timoteu te ukolo, kashika amupapachishile ni kukalakala mulimo wa mishionaliu hamwe ni Paulu.

6. Kuchi muhasa kukwasa ana je hanga akolese ufulielo wo ha Liji lia Zambi?

⁶ Kuchi munuhasa kukwasa ana jenu hanga  akolese ufulielo wo ni ‘kulisele chinyingi’ ngwe Timoteu? Chitangu, pwenu yihumikiji. Mumu mutu mba apwe ni ufulielo ukolo chakumbata mashimbu anji. Chikwo nawa nyi nwakufuliela yimwe, kuchalumbunukine ngwo ana jenu no mayifuliela. Hita mwana katela kuzachisa “kunyonga cha mana” jenyi hanga afuliele yize Mbimbiliya yakwamba. (Tanga A-Roma 12:1.) Yisemi, senu tachi hanga nukwase ana jenu akolese ufulielo wo, chipi-chipi muze manuhula yimwe. Tutalenu yize mutuhasa kulilongesa ha chilweza cha umwe tata.

7, 8. (a) Kuchi chisemi Chela cha Yehova masolola uhumikizo muze malongesa mwanenyi? (b) Shimbu lika watamba kupwa chihumikiji ni mwane?

⁷ Tomas, yoze uli ni mwana wa pwo wa miaka 11, yamba ngwenyi mwanenyi ha mashimbu amwe kakumuhula ngwenyi: “Shina Yehova kazachishile evolusau mba ase mwono hano hashi?” hanji “Mumu liaka kutushi kulinga yuma ya mafwefwe hanga tweseke kululieka yuma mu chifuchi chetu?” Ha mashimbu amwe, kakusa tachi hanga ahone kulweza mwanenyi yize atamba kufuliela. Tomas kananyingika ngwenyi, yize yakulingisa mutu mba atayize umwenemwene hi chuma chinene ko, alioze yilweza yinji yikehe-yikehe.

⁸ Tomas kananyingika nawa ngwenyi katamba kupwa chihumikiji mba alongese kanawa mwanenyi. Kwamba pundu, akwa-Kristu eswe katamba kupwa yihumikiji. (A-Kolosu 3:12) Tomas nawa kananyingika ngwenyi mukufupiwa shimbu ni kuhanjeka chinji hanga akwase mwanenyi kukolesa ufulielo wenyi. Iye katamba kunyonga nenyi ha yize akulilongesa mu Mbimbiliya. Tomas yamba ngwenyi: “Kanji-kanji ha yikuma yilemu, ami ni mukwetu-pwo twakuzanga kunyingika nyi mwanetu kakufuliela lume ngwo yize analilongesa mu Mbimbiliya yinalite. Nyi kali ni yihula, chino cha kupema chinji. Kwamba pundu, nakuzakalala chinji nyi iye matayiza chuma chakuhona kunguhula.”

9. Kuchi muhasa kukwasa ana je kufuliela mu Liji lia Zambi?

⁹ Nyi yisemi malongesa ana jo ni uhumikizo, hakupalika cha mashimbu, ana maputuka kunyingika “utohe ni usuhe, ni usuku kwilu, ni usuku kwishi” wa ufulielo. (A-Efwesu 3:18) Mutuhasa kwaalongesa mu jila yize mahasa kwivwa kanawa umwenemwene kulita ni miaka yo. Muze ufulielo wo ha yize analilongesa muukola, muchipwa chashi kuli ayo kukalila ufulielo wo kuli akwo ni kuli waze alilongesa no ku shikola. (1 Petulu 3:15) Chakutalilaho, shina ana jenu mahasa kuzachisa Mbimbiliya hanga alumbunune yize yakulingiwa kuli mutu muze mafwa? Kutala yize Mbimbiliya yakwamba, shina yakwaalumbunukina? * (Tala maliji mushi lia lifwo.) Iwulukenu ngwenu nwatamba kupwa  yihumikiji mba nukwase ana jenu afuliele mu Liji lia Zambi, nyi nwalinga chocho shinoho.—Shimbi Yamuchiali 6:6, 7.

10. Yika yatamba kupwa ni ulemu ku malongeso je?

¹⁰ Chochene, chilweza che necho chikwete ulemu unji nyi muzanga hanga ukwase ana je apwe ni ufulielo. Stefanie, mama yoze ukwete ana atatu, yamba ngwenyi: “Chize haze ana jami te achili twanuke, te nakulihula ngwami, ‘Shina nakulweza ana jami, mumu liaka nakufuliela ngwami Yehova kwali, ni zango lize akwete hamwe ni majila jenyi angunu?” Shina ana jami kakumona pundu ngwo, nakuzanga Yehova ni mbunge yeswe? Kuchishi kuhasa kushinjila ana jami hanga alinge yuma yize ami kuchishi kulinga.”

11, 12. Mana yika analumbunuka, nawa kuchi tunanyingika ngwetu kupwa ni mana kuchalumbunukine kutatuka ku mujimba?

¹¹ Twalilongesa ngwetu Timoteu (1) te kanyingika Yisoneko yisandu nawa (2) te kakwete shindakenyo ha yize te afuliela. Mba, yika Paulu te anambe kwamba, muze ambile ngwenyi sona jisandu te mujihana Timoteu “mana mukuzuka ulamwino”?

¹² Mukanda wetu umwe (Estudo Perspicaz das Escrituras, Volume 2) unalumbununa ngwo, mu Mbimbiliya liji mana mulihasa kulumbunuka “uhashi wa kuzachisa chinyingi ni kunyingika chize mutuhasa kukumba kanawa yipikalo yetu, kwehuka ponde, kukwata yiyulo yipema ni kukolweza akwetu no achilinge chochene. Yino yalisa ni uhepuke.” Mbimbiliya yinambe ngwo, “Uhepuke unakashiwila mu mbunge ya mwana.” (Yishima 22:15) Amu mana kalisa chinji ni uhepuke, kashika kupwa ni mana chinalumbunuka kukola ku ufulielo. Mutu kakukola ku ufulielo hakuvwila Yehova woma ni kuzanga kumwononokena, hi wika ko kutatuka ku mujimba.—Tanga Samu 111:10.

13. Kuchi akweze mahasa kusolola ngwo kali ni mana mukuzuka ulamwino?

¹³ Akweze waze akola ku ufulielo keshi ‘kuhungumuka ni mikanya ni kuhungumioka kweka ni kweka’ ha kwaapiangula kuli akwo. (A-Efwesu 4:14) Shimbu alinge chocho, ‘mana ali no a kulifumba, kakusa chinyingi hakachi ka chipema ni chipi.’ (A-Hepreu 5:14) Hachino, ayo kakukwata yiyulo ya mana, chipwe ngwe yisemi jo hanji atu akwo keshi ni kwaamona. (A-Fwilipu 2:12) Mana jacho e akukwasa mukuzuka ulamwino. (Tanga Yishima 24:14.) Mba kuchi munuhasa kukwasa ana jenu hanga apwe ni mana jacho? Nwatamba kupwa ni shindakenyo ngwenu ana jenu kananyingika kanawa yize nwafuliela. Ha yize wakwamba ni kulinga, ayo katamba kumona ngwo nwakusa tachi hanga nukaula shimbi ja Mbimbiliya.—A-Roma 2:21-23.

14, 15. (a) Yika mukweze yoze unazange amupapachise atamba kunyonga? (b) Kuchi muhasa kukwasa ana je apukune ha yiwape yakwiza ha kukaula shimbi ja Zambi?

¹⁴ Mba nukwase ana jenu akole ku ufulielo,  kunwatambile wika kwaalweza upi ni upeme. Nwatamba nawa kwaakwasa hanga anyonge ha yihula ngwe yino: ‘Mumu liaka Mbimbiliya yakukanjisa yuma yize yakusoloka ngwe yipema? Kuchi munguhasa kupwa ni shindakenyo ngwami kukaula shimbi ja Mbimbiliya chili chipema ku mwono wami?’—Izaia 48:17, 18.

¹⁵ Nyi mwanenu mazanga hanga amupapachise, mukwasenu nawa hanga anyonge ha yiteli yize mutu akupwa nayo nyi mamupapachisa. Kuchi iye akwivwa ha yiteli yacho? Yiwape yika mahasa kuzukako? Yipikalo yika mahasa kupwa nayo? Mumu liaka yiwape yacho yinahiane yipikalo yize mamona? (Marku 10:29, 30) Chili chilemu kunyonga kanawa ha yuma yino shimbu mwanenu kanda achimupapachisa. Kwasenu mwanenu hanga apukune ha yiwape yize yakwiza ha kwononoka ni ha yipikalo yize yakwiza ha kwehuka shimbi ja Zambi. Chino muchimukwasa kunyingika ngwenyi kukaula shimbi ja Mbimbiliya nihindu muchimukwasa ku mwono wenyi.—Shimbi Yamuchiali 30:19, 20.

16. Yika yisemi atamba kulinga nyi mwano yoze hanamupapachisa maputuka kuzeya ku ufulielo?

¹⁶ Yika munuhasa kulinga nyi mwanenu yoze hanamupapachisa maputuka kuyambashana  hakutwala ku umwenemwene? Chakutalilaho, mwanenu mahasa kuzanga kulinga yuma ya hano hashi. Hanji mwanenu maputuka kuyambashana nyi kukaula shimbi ja Mbimbiliya yili jila yipema ku mwono wo. (Samu 73:1-3, 12, 13) Yize muhanjika hanji mulinga, muyihasa kumulingisa anunge ni kuwayila Yehova hanji ka. Kanda nulitacheka ni mwanenu ha chikuma chacho, chipwe ngwe kali kanuke hanji mukweze. Alioze, sololenu ngwenu nwakumuzanga nawa nunazange kumukwasa.

17, 18. Nyi mukweze yoze unayambashana, kuchi yisemi jenyi mahasa kumukwasa?

¹⁷ Mukweze yoze hanamupapachisa hanalihane kuli Yehova. Chino, chili chilakenyo cha kumuzanga ni kumuwayila kuhiana chuma cheswacho. (Tanga Marku 12:30.) Yehova kakulemesa chinji chilakenyo chakulihana, ni yetu nawa che twatamba kulinga. (Chilumbununyi 5:4, 5) Iwululenu chikuma chacho kuli mwanenu. Alioze chitangu, tangenu ni kulilongesa mikanda yamu ululikiso wetu yize akutuhwishila yisemi. Hachino, ni zango lieswe nawa ha shimbu lialita, lumbunwinenu mwanenu ngwenu chiyulo cha kulihana kuli Yehova ni kumupapachisa hi chamiselo ko, chipwe chocho, muchimunehena yiwape yinji.

¹⁸ Chakutalilaho, muhasa kuwana utowezo upema mu apendice “Yihula Akuhula Yisemi,” kusongo lia mukanda Yihula Akuhula Akweze, Volume 1. Yikuma yacho yakutoweza yisemi achine kulipupwisa ha kunyonga ngwo, mwano kanahichika umwenemwene, alioze anyingike mumu liaka iye analingi chocho. Kota kakuhonga chinji ni kulivwa ukawenyi. Hanji kakwivwa ngwe akweze akwo kakulingila Yehova kanawa kuhiana iye. Apendice yacho yinalumbununa ngwo yuma yacho kuyalumbunukine ngwo mwanenu keshi kutayiza yize nwakufuliela. Yino yili yimwe yaku yipikalo yize te mapalika ku mwono wenyi. Apendice yinahane nawa umwe usongwelo hakutwala ku chize yisemi mahasa kukwasa mwano yoze unayambashana hakutwala ku umwenemwene.

19. Kuchi yisemi mahasa kukwasa ana jo apwe ni “mana mukuzuka ulamwino”?

¹⁹ Amu nuli yisemi, nuli ni mulimo ulemu hamwe ni chiteli cha kukwasa ana jenu ha ‘kwaafumba ni kukanyamisa cha Yehova.’ (A-Efwesu 6:4) Ngwe chize twalilongesa, chino chinalumbunuka ngwo, nwatamba kulongesa ana jenu yize Mbimbiliya yakwamba ni kwaakwasa hanga apwe ni shindakenyo ya yize akulilongesa. Nyi ufulielo wo muukola, ayo malihana-ene kuli Yehova ni kumuwayila ni mbunge yeswe. Nyi nwachilinga, Liji lia Yehova, spiritu yenyi ni tachi jenu, muyikwasa ana jenu hanga apwe ni “mana mukuzuka ulamwino.”