Akweze ‘Senu Tachi Hanga Nukalilamwine’
“Chizechene ngwe nwakwononoka, . . . manununenu ulamwino wa yenwene ni woma ni kuchikima.”—A-FWILIPU 2:12.
1. Mumu liaka upapachiso uli ulemu? (Tala chizulie ha uputukilo.)
HITA mwaka tununu twa alongi a Mbimbiliya kakwaapapachisa. Anji akuli ayo kali twanuke ni akweze, waze akukolela mu umwenemwene. Shina ena uli umwe wa kuli ayo? Nyi chenacho, hiunalingi chuma chipema ku mwono we. Mumu hita mukwa-Kristu katamba kumupapachisa. Upapachiso we mukwasa mutu kulilamwina ni kutwama ku miaka yeswe.—Mateu 28:19, 20; 1 Petulu 3:21.
2. Mumu liaka kuwatambile kwivwa woma ha kulihana kuli Yehova?
2 Muze makupapachisa, Yehova maputuka kukuwahisa mu majila alisa. Alioze mupwa nawa ni yiteli yaha. Kuchi acho? Ha tangwa lize akupapachishile, ndumbu yoze wahanjikile pande kahulile ngwenyi: “Ni uhashi wa ukuule wa chitapo cha Yesu Kristu, shina walikonyeka ku shili ye ni kulihana kuli Yehova hanga ulinge upale wenyi?” Wakumbulwile ngwenyi, ewa.
Hachino, walakenyene ngwenyi kuzanga Yehova ni kumuwayila chili chuma chilemu ku mwono we weswe. Shina watamba kwivwa woma wakumanununa chilakenyo chacho chilemu? Ka! Nyi wecha Yehova hanga asongwele mwono we kuuchi kaliseha ni limwe tangwa. Atu waze kanyingikine Yehova, kanalingi chihanda cha hano hashi ha Satana. Ndiapu keshi kwaafunga chipwe yena kechi kukufunga. Kashika, nyi mwehuka Yehova, Satana mawahilila mumu mutokesa kutalatala che cha mwono wa mutolo.3. Kuchi Yehova akukuwahisa hamukunda wa kulihana kuli iye?
3 Achinyonga ha chize Yehova anakuwahisa hamukunda wakulihana kuli iye ni kukupapachisa. Hiunahane mwono we kuli Yehova, kashika muhasa kwamba ni ushindakenyo weswe ngwenyi: “Yehova kwali ku sali lia yami, chichi kwivwa woma. Atu yika mangulinga?” (Samu 118:6) Kukushi nichimwe chinahiane kupwa sali lia Zambi ni kunyingika ngwe iye kakukuvwila kuwaha.
KUCHILI CHITELI CHE
4, 5. (a) Mumu liaka mutuhasa kwamba ngwetu kulihana kuli Yehova chili chiteli cha mutu mwene? (b) Yipikalo yika akwa-Kristu a miaka yalisa akupwa nayo?
4 Kuwatambile kumona usepa we ni Yehova ngwe unakatuka hali yisemi. Chipwe ngwe uli hamwe ni yisemi je, usepa we ni Yehova uli chiteli cha yena mwene. Mumu liaka chili chilemu kunyingika chino? Mumu niumwe wakuli yetu mahasa kunyingika kanawa chize ufulielo wetu makaweseka kulutwe, wakuhi. Chakutalilaho, hanji kakupapachishile muze te uchili kanuke. Haliapwila hi wapwa mukweze, hi waputuka kunyonga cheka ni kupalika mu yipikalo yeka. Umwe mukweze wa pwo yamba ngwenyi: “Kanuke kanji-kanji keshi kupihilila ha kupwa Chela cha Yehova mumu chakuhona kulia bolu ku chiwanyino cha shikola. Alioze muze makola nawa usolo wakulisumbakenya muuwoka, iye katamba kupwa ni shindakenyo ngwenyi kukaula shimbi ja Yehova chili chipema ku mwono wami.”
5 Hi akweze wika ko akupalika mu yipikalo yaha. Chipwe waze akupapachisa kuukulwana, no ufulielo wo kakuweseka mu mutapu uze ayo keshi kushimbwila. Yeseko yo muyihasa kwiza ku ulo, misongo hanji ku mulimo wo waku musunya. Chipwe ngwe tuli ni miaka yeswayo, nihindu hita umwe wakuli yetu katamba kushishika kuli Yehova ha yeseko yeswayo mamona ku mwono wenyi.—Tiangu 1:12-14.
6. (a) Yika chinalumbunuka ngwo kulihana che kuli Yehova keshi kuchalumuna? (b) Yika muhasa kulilongesa ha A-Fwilipu 4:11-13?
6 Mba uhase kununga ni kushishika, watamba kwiwuluka mashimbu eswe ngwenyi chilakenyo chize walingile kuli Yehova keshi kuchalumuna. Chino chinalumbunuka ngwo, unakalakenya kuwayila Mukwa-Ndundo-Jeswe, chipwe ngwe mukulingiwa yeswayo ku mwono we. Nawa chipwe ngwe masepa ni asoko je mecha kumuwayila alioze yena ka. (Samu 27:10) Yeswayo muyilingiwako, lemba kuli Yehova akukwase kufunga chilakenyo chize walingile kuli iye.—Tanga A-Fwilipu 4:11-13.
7. Yika chinalumbunuka kusa tachi mukuzuka ulamwino ni “woma ni kuchikima”?
7 Yehova kanazange hanga upwe sepa lienyi. Alioze watamba kulikolweza mba ufunge usepa wacho ukole ni kusa tachi mukuzuka ulamwino. A-Fwilipu 2:12 unambe ngwo: “Manununenu ulamwino wa yenwene ni woma ni kuchikima.” Chino chinalumbunuka ngwo twatamba kunyonga kanawa ha chize mutukolesa usepa wetu ni Yehova ni kununga ni kushishika kuli iye. Kutwatambile wika kwamba ngwetu mutuchilinga. Iwuluka ngwenyi chipwe waze te akuwayila Yehova ha miaka yinji kakanungine ni kushishika kuli iye. Mba yuma yika muyihasa kukukwasa hanga use tachi mukuzuka ulamwino?
LONGESO LIA MBIMBILIYA LIKWETE ULEMU
8. Longeso lia wika lia Mbimbilya yika linachingi? Mumu liaka likwete ulemu?
8 Mba tupwe masepa ja Yehova, twatamba kumupanjika ni kuhanjika nenyi. Jila yilemu yize twakupanjikilamo Yehova yili kulilongesa Mbimbiliya. Yino yinachingi kutanga ni kupukuna ha Liji lia Zambi ni ha mikanda yize yakulumbununa Mbimbiliya. Alioze kulilongesa Mbimbiliya kuchalumbunukine wika kupacheka yuma mu mutwe ngwe chize akulinga ku yeseko yaku shikola. Alioze, chili ngwe unayi mu wenyi upema muze muhengwola ni kuwana yuma yaha hakutwala kuli Yehova. Chino muchikukwasa kukundama kuli Zambi, nawa iye makundama kuli yena.—Tiangu 4:8.
Kuchi wa kuhanjika ni Yehova? (Tala paragrafu 8-11)
9. Yikuma yika yakukukwasa ha longeso lie lia wika?
9 Ululikiso wa Yehova wakutuhwisa yikuma yinji yize muyihasa kukukwasa kulinga longeso lia wika. Chakutalilaho, ha site jw.org hali mutwe ngwo, “Yikuma ya Longeso lia Mbimbiliya” ha chihanda “Akweze” muyikukwasa kukaula yize wakulilongesa mu Mbimbiliya. Nawa ha site jw.org, muhasa kuwanaho usongwelo wa chize mulilongesa mukanda “Yika Mbimbiliya Muyihasa Kutulongesa?” Yino muyihasa kukukwasa kukolesa ufulielo we ni kulumbununa kuli akwenu yize wafuliela. Muhasa kuwana ukwaso ukwo wa longeso lie lia wika ha chikuma ngwo, “Yize Akweze Akuhula . . . Kuchi Munguhasa Kwivwa Chiseke ha Kutanga Mbimbiliya?” mu Lawola! (Despertai!) wa Abril 2009. Kulilongesa ni kupukuna chikwete ulemu mukuzuka ulamwino.—Tanga Samu 119:105.
KULEMBA CHIKWETE ULEMU
10. Mumu liaka mukwa-Kristu yoze hanamupapachisa atamba kulemba?
Nyi mulipikala ha chuma cheswacho, “mbila chiteli che hali Yehova”
10 Twakupanjika Yehova muze twakulilongesa Mbimbiliya, nawa twakuhanjika nenyi muze twakulemba kuli iye. Kutwatambile kumona ngwetu kulemba chapwa ndako wika hanji chuma chize twakuyukila ku mwono wetu. Kulemba chapwa kuhanjika ni Tangi yetu. Nyingika ngwe, Yehova kanazange kwivwa yize unambe kumulweza! (Tanga A-Fwilipu 4:6.) Kashika, nyi mulipikala ha chuma cheswacho, Mbimbiliya yinambe ngwo, “mbila chiteli che hali Yehova.” (Samu 55:22) Nyi muhula mandumbu anji makulweza ngwo chiyulo chino chakwaakwasa chinji. Kashika ni yena muchihasa kukukwasa!
11. Mumu liaka twatamba kusakwilila Yehova mashimbu eswe?
11 Chipwe chocho, kutwatambile kulemba wika muze mutufupa hanga Yehova atukwase. Mbimbiliya yinatulweze ngwo: “Pwenu nikusakwilila.” (A-Kolosu 3:15) Ha mashimbu amwe twakuzakalakala chinji hakutwala ku yipikalo yetu nikuhona kumona yuma yipema yize tuli nayo. Kashika, eseka kulinga chino: Hita tangwa, nyonga hapwakama yuma yitatu yize musakwila, nawa sakwilila Yehova ha yuma yacho. Umwe mukweze avuluka ngwo Abigail, yoze apapachishile ni miaka 12, yamba ngwenyi: “Nakunyonga ngwami, Yehova kakulemesa usakwililo wetu kuhiana mutu mweswawo hano hashi. Twatamba kumusakwilila ha yiwape yeswe yize akutwaha.” Ha mashimbu amwe Abigail kakulihula ngwenyi: ‘Nyi nasakwilila Yehova musono ha yuma yize angwaha yika mungulinga nyi nahinduka nayo hamene?’ * (Tala maliji mushi lia lifwo.)
ULEMU WA YIZE WAKULITANAKA NAYO KU MWONO
12, 13. Kuchi wesekele Yehova ku mwono we ni kumona ngwe kali mupema? Nawa mumu liaka chili chilemu kunyingika chize Yehova akukukwasa?
12 Yehova kakwashile Mwanangana Ndawichi hanga anyongonone ha yipikalo yinji. Kashika, Ndawichi ahanjikile ha yize alitakanyine nayo ku mwono wenyi ngwenyi: ‘Pakenu nutale yenwene, numone upeme wa Yehova. Kawaha yoze wakuchinyina kuli iye.’ (Samu 34:8) Versu yino yinasolola ngwo twatamba kupaka hanji kweseka upeme wa Yehova. Nyi mutanga Mbimbiliya ni mikanda yetu ni kuya ku kukunguluka, munyingika chize Zambi akwashile mandumbu akwo hanga anunge ni kushishika. Alioze muze ufulielo we kuli Yehova muukola, mba mumona chize Yehova akukukwasa. Kuchi wesekele Yehova ku mwono we ni kumona ngwe kali mupema?
Lemesa chihela che chize Yehova hanakwehe mu ululikiso wenyi
13 Mukwa-Kristu mweswe haneseka upeme wa Yehova mu mutapu walipwila. Iye kakutusanyika tulieswe hanga tukundame kuli iye ni kuli Mwanenyi. Yesu yamba ngwenyi: “Niumwe mahasa kwiza kuli yami shina mwe Tata wangutumine mamukoka.” (Yoano 6:44) Shina wakwivwa ngwe Yehova kakukukoka kuli iye? Nyi wakunyonga ngwe ‘Yehova kakukoka yisemi jami kuli mwene nawa ami nakwaakaula wika’? Iwuluka ngwe muze walihanyine kuli Yehova ni kukupapachisa, chocho yiupwa ni usepa walipwila ni iye. Mbimbiliya yakutulweza ngwo: “Nyi kachi umwe mazanga Zambi, iye kanamunyingika kuli Zambi.” (1 A-Korindu 8:3) Kashika lemesa chihela che chize Yehova hanakwehe mu ululikiso wenyi.
14, 15. Kuchi kwambujola muchikukwasa kupwa ni ufulielo ukolo?
14 Nawa wakweseka upeme wa Yehova muze akukwaha hamu lia kuhanjika ya ufulielo we kuli akwenu mu munda ni ku shikola. Muchihasa kupwa chikalu kwambujola kuli waze walilongesa no ku shikola. Muhasa kuzakalala ha yize ayo mamba hanji malinga. Muhasa kwivwa woma hakulumbununa yize wafuliela ha mbunga yinene. Mba yika muyihasa kukuwasa?
15 Achinyonga mumu liaka wafuliela yize wakufuliela. Nyi usongwelo wa kulilongesa ha site jw.org, uli mu limi lienu, uzachise. Uno muuhasa kukukwasa kunyonga ha yize wafuliela, mumu liaka wayifuliela, nawa kuchi muhasa kulumbununa ufulielo we kuli akwenu. Nyi uli ni shindakenyo nawa walilulieka kanawa, muzanga kwambujola hakutwala kuli Yehova.—Jeremia 20:8, 9.
16. Yika muyihasa kukwaha hamu lia kuhanjika ya ufulielo we kuli akwenu?
16 Chipwe ngwe hi walilulieka kanawa, nihindu muhasa kwivwa woma wa kulumbununa yize wafuliela. Umwe ndumbu wa pwo wa miaka 18, yoze apapachishile ni miaka 13, yamba ngwenyi: “Ngunanyingika ngwami nakufuliela, alioze ha mashimbu amwe chakupwa chikalu kuhanjika yize nafuliela kuli akwetu.” Hachino iye kakusa tachi hanga ahanjike umwenemwene ni uhumikizo weswe. Yamba ngwenyi: “Atu waze nalilongesa no ku shikola kakuhanjika ha yuma yize akulinga. Ni yami natamba kuhanjika chochene. Kashika nakuputuka kuhanjika ni maliji ngwe wano, ‘tangwa limwe te ngunalongesa Mbimbiliya, chocho. . . ’ Mba hingununga ni kuhanjika sango jacho. Chipwe ngwe chikuma chacho kuchatalile pundu ha Mbimbiliya, nihindu akwetu kakuzanga kunyingika yize nakulinga muze nakulongesa atu Mbimbiliya. Ha mashimbu amwe ayo kakunguhula hakutwala ku chikuma chacho. Chino chakungukwasa
kwambujola umwenemwene kuli akwetu. Nyi nalinga chocho nakwivwa kuwaha!”17. Yika nawa muyihasa kukukwasa kuhanjika ni akwenu?
17 Nyi akwenu mamona ngwo wakwaazanga ni kwaavumbika, muchipwa chashi ayo kukuvumbika hamwe ni yize wafuliela. Olivia, yoze uli ni miaka 17 nawa apapachishile kuwanuke, yamba ngwenyi: “Te nakwivwa woma ngwami nyi munguputuka kuhanjika ya Mbimbiliya, akwetu mangumona ngwe nakulikwachilila wika ha Mbimbiliya.” Chocho yaputuka kunyonga yuma mu mutapu weka. Shimbu alihulikile chinji ha woma akwivwa, yanyonga ngwenyi: “Akweze anji kanyingikine kanawa Yela ja Yehova. Kashika yetu wika e Yela waze twatamba kwaalweza yo. Hachino, yuma yize mutulinga hanji mutuhanjika muyisolola nyi ayo matayiza sango jetu nyi ka. Mba yika muyilingiwako, nyi twakwivwa sonyi hanji woma, twakupinda ha kuhanjika ya ufulielo wetu, hanji twakukukuma ha kuyihanjika? Acho akwetu matumona ngwe kutushi ni shindakenyo ha yize tunahanjika. Ayo mahasa kuhona kuyitayiza mumu lia yetu kuhona ushindakenyo. Alioze, nyi mutuhanjika kanawa ni ushindakenyo weswe ha yize twafuliela, kuyinjisa mu lusango yoze tunahanjika, ayo matuvumbika chinji.”
SENU TACHI HANGA NUKALILAMWINE
18. Yika watamba kulinga mba use tachi mukuzuka ulamwino?
18 Twalilongesa ngwetu chili chilemu kusa tachi mukuzuka ulamwino. Mba uchilinge, watamba kutanga Mbimbiliya ni kuyipukuna, kulemba kuli Yehova, ni kunyonga chinji mutapu uze iye akukukwashilamo. Nyi mulinga yuma yino, muupwa ni shindakenyo ngwe Yehova kali Sepa lie mupema. Usepa wacho muukukwasa kuzanga kuhanjika ni akwenu ha yize wafuliela.—Tanga Samu 73:28.
19. Mumu liaka chili chilemu kusa tachi mukuzuka ulamwino?
19 Yesu ngwenyi: ‘Nyi kachi umwe mazanga kwiza kuli yami, akalitune-mwene, akazundule mutondo wenyi wa lamba, angukaule.’ (Mateu 16:24) Ewa, hita mukwa-Kristu mba akaule Yesu katamba kulihana kuli Yehova ni kumupapachisa. Alioze chino chili wika uputukilo wa mwono upema haliapwila, nawa muchikatwaha mwono wa mutolo mu paraisu. Kashika, sako tachi ukazuke ulamwino!
^ kax. 11 Mba uwane ukwaso tala mukanda, “Yihula Yize Akweze Akuhula—Mumu Liaka Natamba Kulemba?” nawa ha site jw.org, hali hamwe ha kusonejeka.