DIANA kali ni miaka kuhiana 80 nawa kamona lamba linji hakupalika cha yimwe miaka. Mukwo-lunga, yoze te ukwete musongo wa wongo uze avuluka ngwo, Alzheimer te katwama mu zuwo lia tushinakaji chocho yafwa. Ana jenyi aali a malunga no yafwa, nawa iye te kakupinda ni cancer wa liele. Alioze mandumbu kakumona uwahililo wa pangi Diana muze ali kukunguluka ni mu munda.

John kapwile kalayi wa mbonge ha miaka kuhiana 43. Te kakuzanga chinji mulimo wenyi nawa te keshi kunyonga kulinga mulimo ukwo. Alioze, iye yecha mulimo wa kalayi wa mbonge hanga afunge usoko wenyi yoze te wayiza. Muze mandumbu ni mapangi waze te anyingika ndumbu John mamuwana ha kukunguluka cha mbonge hanji cha mambonge, ayo kakumumona ngwo aye kalumukine. Nihindu kakuwahilila chinji.

Kuchi Diana ni John akuhasa kupwa ni uwahililo wacho? Kuchi mutu yoze unamono lamba mahasa kuwahilila? Kuchi mutu mahasa kuwahilila nyi mecha mulimo uze te akuzanga chinji? Mbimbiliya muyihasa kutwaha kumbululo. Mumu yinambe ngwo: “Akwa ululi makawahilila muli Yehova.” (Samu 64:10) Mutuhasa kunyingika kanawa umwenemwene uno nyi twanyingika yize ya kuneha uwahililo wa mutolo ni yize kuyishi kuuneha.

Yuma yimwe nihindu yakuneha uwahililo ku mwono. Chakutalilaho, achinyonga alunga ni pwo alizanga chinji waze achilimbata. Hanji mutu yoze mapwa chisemi chipwe ngwetu matambula chiteli chaha mu mulimo wa Yehova. Yuma yino yakuneha uwahililo mumu yili yawana yize yakukatuka kuli Yehova. Iye hanatwehe ulo, hanatukwase kupwa ni ana nawa hanatwehe mulimo mu ululikiso wenyi.—Uputukilo 2:18, 22; Samu 127:3; 1 Timoteu 3:1.

Chipwe chocho, yuma yimwe yize yakuneha uwahililo muyihasa kupwa ya mashimbu akahe. Chakutalilaho, yoze walimbata nenyi mahasa kulinga utanji hanji kufwa. (Ezekiele 24:18; Hozeia 3:1) Ana mahasa kuhona kwononokena yisemi jo ni Zambi, chipwe hanji kwaasosolola mu chikungulwila. Chakutalilaho, ana ja Samuele te keshi kuwayila Yehova ni mbunge yeswe, Ndawichi nawa kapwile ni yipikalo yinji mu usoko, mumu kalingile  utanji ni Bate-Shipa. (1 Samuele 8:1-3; 2 Samuele 12:11) Muze yuma yamutapu au muyilingiwa, kuyishi kuneha uwahililo alioze yinyengo ni yikola.

Chizechene nawa, ha mashimbu amwe kutuchi kuhasa kununga ha chiteli chetu mu mulimo wa Yehova, mumu lia misongo hanji kuya ni kufunga asoko, chipwe kwalumuka cha yimwe mu ululikiso wa Yehova. Mandumbu anji waze ahichikile yiteli yo kakwamba ngwo hanatokesa uwahililo uze te akwivwa.

Mutuhasa kumona ngwetu uwahililo uno uli wa mashimbu akehe. Alioze, shina kuli umwe uwahililo uze wakununga chipwe ngwe mutupwa mu yipikalo? Kuuli, mumu Samuele, Ndawichi ni atu akwo nawa kakatokesele uwahililo wo muze apwile mu yipikalo.

Yesu kanyingikine yize uwahililo unalumbunuka. Shimbu te kanda achiza hashi, Mbimbiliya yinatulweze ngwo te ‘kakuwahilila kumeso [Yehova] matangwa eswe.’ (Yishima 8:30) Alioze, muze ejile hano hashi, ha mashimbu amwe te kakupalika mu yipikalo. Chipwe chocho, Yesu kanakawana uwahililo ha kulinga upale wa Tato. (Yoano 4:34) Mba yika mutwamba ha lamba lize Yesu amwene ha maola akasula ku mwono wenyi? Twakutanga ngwo: ‘Ha uwahililo uze asele kumeso jenyi, wanyongonwene ha mutondo wa lamba.’ (Hepreu 12:2) Kashika mutuhasa kulilongesa yuma yinji ha yuma yaali yize Yesu ambile hakutwala ku uwahililo wamwenemwene.

Ha shimbu limwe, tumbaji 70 kafunyine kuli Yesu kukatuka mu mulimo wa kwambujola. Ayo kapwile ni uwahililo unji mumu lia yuma yeswe yize alingile, chipwe kuhuma andemoniu. Alioze Yesu yaalweza ngwenyi: “Kanda nukawahilila ha chino ngwe maspiritu kananuzeyela; alioze shinaho wahililenu mumu majina jenu hanasoneka mwilu.” (Luka 10:1-9, 17, 20) Chochene, kupwa ni utayizo wa Yehova chili ni ulemu nawa chakuneha uwahililo unji kuhiana chiteli cheswacho mutupwa nacho.

Ha chisuho chikwo, muze Yesu te analongesa mbunga, umwe pwo Ka-Yunda yakomoka chinji ni malongeso jenyi, chocho yamba ngwenyi kota naye kakuwahilila chinji ha kupwa ni mwana ngwe iye. Alioze Yesu yakumbulula ngwenyi: “Ewa alioze shinaho, kawaha waze akwivwa liji lia Zambi  nikulifunga.” (Luka 11:27, 28) Kuzanga ana jetu muchihasa kutwaha uwahililo. Alioze chuma chize chakutwaha uwahililo wa mashimbu anji chili kwononokena Yehova ni kupwa ni usepa upema ni iye.

Nyi twanyingika ngwetu Yehova kakuwahilila ni yetu, chakutwaha uwahililo unji. Nawa chipwe mutupalika mu yipikalo, nihindu kuyichi kuchiza uwahililo uze tukwete. Alioze muze mutununga ni kushishika ha mashimbu a yipikalo, uwahililo wetu muwoka chinji kuhiana. (A-Roma 5:3-5) Chikwo nawa, Yehova kakuhana spiritu yenyi kuli waze akufuliela muli iye, nawa uwahililo uli chihanda cha muhuko wa spiritu. (A-Ngalashia 5:22) Chino chinatukwase tunyingike ulemu wa maliji a Samu 64:10 ngwo: “Akwa ululi makawahilila muli Yehova.”

Maliji wano kanalumbununa nawa mumu liaka Diana ni John ahashile kununga ni uwahililo chipwe ngwe kapwile mu yipikalo. Diana yamba ngwenyi: “Ami nakuchinyina kuli Yehova, ngwe chize mwana akulinga kuli yisemi jenyi.” Yawezela nawa ngwenyi: “Nakulivwa ngwami kakunguwahisa hanga ngununge ni kwambujola chinji hamwe ni uwahililo.” Yika yakwashile John mba afunge uwahililo ni kwambujola chinji muze echele chiteli chenyi? Mwene yamba ngwenyi: “Chize ha mwaka 1998 uze angwehele chiteli cha kulongesa ku Shikola ya Kulilongesa Milimo ya mu Ululikiso nalingile chinji longeso lia wika kuhiana kunyima.” Aye yalumbununa ngwenyi, chapwile chashi iye ni mukwo-pwo kwashiwisa mwono wo, mumu kapwile ni kuzanga kulinga yeswayo Yehova maatuma kulinga. Yawezela ngwenyi: “Twachilingile chakuhona kuliseha.”

Mandumbu akwo hanatayiza ngwo maliji waze ali ha Samu 64:10, kali amwenemwene. Tutalenu chilweza cha alunga ni pwo waze akalakalile ku Mbetele ya mu Estados Unidos ha miaka kuhiana 30. Ayo kaatumine ngwe pionelu alipwila. O yamba ngwo: “Yinyengo yakupwa kuli mutu mweswe nyi matokesa chuma chize akuzanga chinji,” alioze yawezela nawa ngwo: “Chipwe chocho, kuuchi kuhasa kunenganyana ku miaka yeswe.” Muze ayile ku mulimo wo waha, ayo yaputuka kwambujola hamwe ni chikungulwila. Yamba nawa ngwo: “Te twakulemba wika ha yuma yize tunafupiwa. Hachino muze te twakumona makumbululo a yilemba yetu te chakututakamisa ni kutwaha uwahililo. Ha limwe shimbu muze twaheteleko, mandumbu amwe mu chikungulwila yaputuka kulinga upionelu, nawa yitupwa ni alongi aali a Mbimbiliya.”

Hi chashi ko kupwa ni uwahililo mashimbu eswe. Kwakupwa mashimbu waze mutunenganyana. Alioze Yehova kakututakamisa ni maliji waze ali ha Samu 64:10. Chipwe muze mutuhona utakamiso, mutuhasa kupwa ni shindakenyo ngwetu nyi mutununga ni kushishika chipwe ngwe mutupalika mu yuma yeswayo, nihindu ‘mutuwahilila muli Yehova.’ Nawa mutuhasa kushimbwila mashimbu waze chilakenyo cha Yehova cha “lilu liaha ni hashi haha” muchikamanunuka. Hashi haha, atu eswe makapwa angunu nawa ‘makalikwiza ni kuwahilila ndo ku miaka” yeswe mumu lia yuma yeswe yize Yehova makaalingila.—Izaia 65:17, 18.

Tutalenu chize yino muyikapwa. Mutukapwa ni mijimba yingunu nawa mutukapwa ni kuhinduka ni ngolo matangwa eswe. Chipwe ngwe yize yalingiwile kunyima yatuhele yinyengo, nihindu kuyichi katwaha nawa yikola ku mbunge. Yehova kakutulweza ngwenyi, “yuma yakushi kechi kayiwuluka nawa, chipwe kuyinyonga.” Mutukatambwisa asoko jetu waze hanafu nawa mutukevwa ngwe chize evwile yisemi ja mwana-pwo yoze wapwile ni miaka 12 muze amuhindwishile kuli Yesu: “O alishikishilile chikolo hazehene.” (Marku 5:42) Hita mutu hano hashi makapwa mukwa-ululi nawa “makawahilila muli Yehova” ku miaka yeswe.