1, 2. Manyonga aka alisa waze atu akwete hakutwala ku paraisu?

MANDUMBU ni mapangi anji aku yifuchi yeka ni yeka kayile ku kukunguluka cha mambonge chize chalingiwile mu Seul, Coreia. Muze mandumbu jacho te anatuhuka mu chihela muze alikungulwile, mandumbu amu Coreia yaajingilika. Chino chapwile chipema chinji, chocho anji a kuli ayo yaputuka kulishika ni maliji wano: “Mutukaliwana mu Paraisu!” Kuli yena, paraisu yika yenayo ayo te anahanjikila?

² Musono atu kakwete manyonga alisa hakutwala ku paraisu. Amwe kakwamba ngwo paraisu yili wika chilota. Akwo ngwo paraisu yinalumbunuka kweswako ayo ali ni kuwahilila. Mutu yoze unevu zala nyi matwama ku mesa yize yinazale too ni kulia mahasa kulivwa ngwe kali mu paraisu. Ha miaka yinji kunyima, umwe pwo kamwene mungulunga wa too ni yitemo yipema yevwa kuwaha nikwamba ngwenyi, “Yino ye paraisu!” Chihela chacho ni musono kakuchivuluka ngwo Paraisu, chipwe ngwe mwakuholoka neve yinji hita mwaka. Mba kuchi yena wakunyonga Paraisu? Shina unashimbwila ngwo muyikeza?

3. Mukanda uka wa Mbimbiliya muze anatongola chitangu Paraisu?

³ Mbimbiliya ya kuhanjika ha yimwe paraisu yize yapwile  ku mashimbu akunyima ni yimwe yize muyikapwa kulutwe lia matangwa. Twakutanga liji Paraisu ha chisuho chitangu mu mukanda utangu wa Mbimbiliya. Mu Mbimbiliya ya Katolika Douay, yize achijile mu limi lia Latin, yinalumbununa Uputukilo 2:8 ngwo: “Ku uputukilo, Mwene Zambi, yatumba yimwe paraisu ya uwahililo, yasamo lunga yoze awumbile.” (Sona jilaa ni jetu.) Sona ja Hepreu jinambe ngwo, munda wa Endene. Liji “Endene” linalumbunuka “Uwahililo,” nawa munda wacho wapwile chihela chipema. Wapwile chihela chipema chinji, mumu mwapwile kulia chinji ni sambukila mukachi ka atu ni tushitu.—Uputukilo 1:29-31.

4. Mumu liaka mutuhasa kwamba ngwetu munda wa Endene ye te paraisu?

⁴ Liji lia Hepreu “munda” kakulilumbununa mu Ngregu ngwo pa·raʹdei·sos. Umwe mukanda unambe ngwo, Ka-Ngregu nyi mevwa liji pa·raʹdei·sos, iye manyonga chimwe chihela chinene chipema, muze kumushi ponde, muli mitondo yipema yize yakwima mihuko yeka ni yeka, nawa muli ngiji jipema ni yambu yize mapanga ni tushitu akwo mahasa kulia. (Cyclopaedia M’Clintock and Strong.)—Tesa nawa ni Uputukilo 2:15, 16.

5, 6. Mumu liaka Alama ni Eva atokesele uhashi wo wa kutwama mu Paraisu, nawa yika amwe mahasa kulihula?

⁵ Yehova kasele Alama ni Eva mu munda wa mutapu wacho, yimwe paraisu. Alioze, amu kakononokene kuli Yehova, chocho yatokesa chiwape cha kutwama mu Paraisu hamwe ni ana jo. (Uputukilo 3:23, 24) Chipwe ngwe mu Paraisu yacho kumwakapwile nawa mutu niumwe, chinasoloka ngwe yanungine ndo ha Sanga lia Meya ha matangwa ja Noa.

⁶ Amwe mahasa kulihula ngwo, ‘Shina hano hashi muheza kapwa nawa Paraisu?’ Yuma yize yalingiwileko yika yinasolola? Nyi unashimbwila kutwama mu Paraisu hamwe ni atu waze wazanga, shina uli ni shindakenyo ha kutalatala che? Shina muhasa kulumbununa, mumu liaka twakufuliela ngwetu mukukapwa paraisu kulutwe lia matangwa?

7, 8. (a) Chilakenyo chika Zambi alingile kuli Apalahama? (b) Yika Apalahama anyongene ha chilakenyo cha Zambi?

⁷ Makumbululo a yihula hakutwala ku Paraisu kali mu Mbimbiliya, mumu Mbimbiliya yili mukanda wa Yehova yoze watangile Paraisu yitangu. Tutalenu yize Zambi alwezele kuli sepa lienyi Apalahama. Iye yamba ngwenyi te mokesa munyachi wa Apalahama “ngwe masekeseke a ku sesa lia kalunga-lwiji.” Chocho, Yehova yalinga chilakenyo chino chilemu kuli Apalahama ngwenyi: “Munyachi we makawahisa mavungu eswe a hashi, mumu hiunononoka ku liji liami.” (Uputukilo 22:17, 18) Kulutwe, Zambi yafunyina nawa chilakenyo chacho kuli mwana ni mujikulu wa Apalahama.—Tanga Uputukilo 26:4; 28:14.

⁸ Kukushi nichimwe mu Mbimbiliya chize chinasolola ngwo Apalahama kanyongene ngwenyi atu makatambula yiwapwe mu yimwe paraisu mu malilu. Kashika, muze Zambi alakenyene ngwo, “mavungu eswe a hashi” te mapwa akuwahisa, Apalahama kanyingikine ngwenyi yiwape yacho te muyipwa hano hashi. Alioze, shina uno uli wika uchela wa Mbimbiliya uze unasolola ngwo te mukupwa paraisu hano hashi?

9, 10. Yilakenyo yika yinatukwase kushimbwila paraisu kulutwe lia matangwa?

⁹ Zambi katumine umwe wa ku munyachi wa Apalahama, Ndawichi hanga ahanjike hakutwala ku mashimbu a kulutwe muze “yingulungulu”  kechi kapwako nawa. (Samu 37:1, 2, 10) Alioze, “yimbovu kumakahinga chifuchi. Kumakawahilila mu kulumbama cha sambukila.” Ndawichi yamba nawa ngwenyi: “Akwa ululi kumakazuka chifuchi; kumakatwamamo ku miaka ya mutolo.” (Samu 37:11, 29; 2 Samuele 23:2) Mba kuchi yilakenyo yino yakwachile hali atu waze te akuzanga kulinga upale wa Zambi? Ayo kapwile ni shindakenyo ngwo tangwa limwe akwa-ululi e wika te mahinga hashi ni kupwisaho nawa paraisu ngwe munda wa Endene.

¹⁰ Hakupalika cha mashimbu, A-Izalele anji waze te akuliamba ngwo kakuwayila Yehova yamwehuka hamwe ni uwayilo wamwenemwene. Chocho Zambi yecha A-Babilonia hanga akumbe atu jenyi, kunongesa chifuchi cho, ni kutwala anji a kuli ayo mu undungo. (2 Sango ja Mianangana 36:15-21; Jeremia 4:22-27) Alioze aprofeta a Zambi kambile ngwo, atu jenyi te mafuna mu chifuchi cho hakupalika cha miaka 70. Uprofeto wacho wamanunukine. Alioze unatale nawa ha matangwa jetu. Muze mutushimutwinaho umwe, utala chize unatwehe shindakenyo ya kushimbwila paraisu hano hashi kulutwe lia matangwa.

11. Kuchi uprofeto uli ha Izaia 11:6-9 wamanunukine, alioze chihula chika mutuhasa kulihula?

¹¹ Tanga Izaia 11:6-9. Zambi kahanjikile kupalikila kuli profeta Izaia ngwenyi, muze A-Izalele mahiluka ku chifuchi cho, ayo te mapwa ni sambukila. Niumwe te kechi kwivwa woma wa kumulukulila kuli tushitu hanji atu. Twanuke ni makulwana te matwama kawape. Shina chino chinakwiwulula sambukila yize yapwile mu munda wa Endene? (Izaia 51:3) Izaia kambile nawa ngwenyi hashi heswe, hi wika ko vungu lia Izalele, te ‘muhazala ni chinyingi cha Yehova ngwe meya akufuka kalunga-lwiji.’ Mba shimbu lika uprofeto wacho te mumanunuka? Kwamba pundu, unatale kulutwe lia matangwa.

12. (a) Yiwape yika apwile nayo A-Izalele waze akatulike ku undungo mu Babilonia? (b) Yuma yika muyikamanununa kulutwe lia matangwa yize anatongola ha Izaia 35:5-10?

¹² Tanga Izaia 35:5-10. Hano, Izaia kambile nawa ngwenyi, A-Izalele waze makatuka ku Babilonia te kechi kwivwa nawa woma wa kwaalukukila kuli tushitu hanji atu. Iye yamba ngwenyi mu chifuchi te mumupwa kulia chinji chipema mumu te mumupwa meya anji ngwe chize apwile mu munda wa Endene. (Uputukilo 2:10-14; Jeremia 31:12) Shina uprofeto wacho te mumanunuka wika ha mashimbu ja A-Izalele jacho nyi? Nyingika ngwe, uprofeto wambile nawa ngwo tupuputa, yilema, ni tunaye te maawuka. Alioze yino kuyakalingiwile kuli A-Izalele waze akatukile ku Babilonia. Chino te chinasolola ngwo, kulutwe lia matangwa Zambi te mawuka misongo yeswe.

13, 14. Kuchi Izaia 65:21-23 wamanunukine muze A-Izalele akatukile ku Babilonia, alioze chihanda chika cha uprofeto uno chinafupiwa kumanunuka? (Tala chizulie ha uputukilo.)

¹³ Tanga Izaia 65:21-23. Muze A-Yunda afunyine mu chifuchi cho, ayo kakawanyine mazuwo apema hanji yilenga ni minda ya uva. Chipwe chocho, Yehova yaawahisa hakehe-hakehe  yuma yiyalumuka. Atu kevwile chiseke chinji ha kutunga mazuwo ni kutwamamo ni kuwahilila ni kulia chipema chize ene te akulima.

¹⁴ Twamona ngwetu, kulita ni uprofeto uno matangwa jetu “makapwa ngwe matangwa ja mitondo.” Mitondo yimwe yakutwama tununu twa miaka. Atu mba atwame miaka yeswayi, ayo kanafupiwa kupwa ni mijimba yingunu. Nawa nyi ayo katwamine ni sambukila mu chihela chipema ngwe chize Izaia ambile, chamwenemwene kachi yapwile lume paraisu! Kashika uprofeto uno mukamanunuka kulutwe!

15. Yiwape yika yize anatongola mu mukanda wa Izaia?

¹⁵ Yilakenyo yino twashimutwina yasolola pundu ngwo kumukukapwa paraisu kulutwe lia matangwa. Hashi heswe muhakazala ni atu akuwahisa kuli Zambi. Niumwe kechi kalipikala ngwo mamulinga upi kuli tushitu hanji kuli atu api. Tupuputa, tunaye ni yilema makaawuka. Atu makatunga mazuwo ni kuwahilila ni kulia chize makalima ene. Ayo makatwama miaka yinji kuhiana ya mitondo. Ewa, Mbimbiliya yakusolola ngwo paraisu yacho muyikeza. Alioze atu amwe waze twakuhanjika no mahasa kwamba ngwo, uprofeto uno kuwalumbunukine ngwo mukukapwa paraisu hano hashi. Mba kuchi mwaalweza? Shina uli ni shindakenyo yingunu yize yinasolola pundu ngwo mukukapwa paraisu hano hashi? Yesu, mutu yoze te wahiana atu eswe hanatwehe shindakenyo yingunu hakutwala ku paraisu.

16, 17. Shimbu lika Yesu ahanjikile hakutwala ku Paraisu?

¹⁶ Chipwe ngwe Yesu kakapwile ni mulonga niumwe, nihindu yamuhisa chocho yamuhata ha mutondo hanga afwileho hamwe ni A-Yunda yingulungulu waze apwile hita sali lienyi. Umwe yanyingika ngwenyi, Yesu te mutu mupema chocho yamba ngwenyi: “Mwene, ngwiwuluke kama muze muwiza mu Wanangana we.” (Luka 23:39-42) Chilakenyo chize Yesu alingile kuli chingulungulu wacho chinakwate ha mwono we wa kulutwe lia matangwa. Maliji jacho a Yesu kali ha Luka 23:43. Amwe akwa-mana hakutwala ku Mbimbiliya kakusa lutope * kunyima lia liji “musono” ni kulumbununa maliji jacho ngwo: “Ngunakulweze pundu ngwami, musono yena kumukapwa hamwe ni yami mu Paraisu.” Ayo kakwete manyonga alisa hakutwala ha chihela haze te hatamba kupwa lutope ha maliji jacho. Mba yika Yesu te anambe kwamba, muze ambile ngwenyi “musono”?

¹⁷ Malimi anji waze akuhanjika musono, kakuzachisa lutope hanga alulieke ulumbunwiso wa amwe maliji ni kwaasolola zwalala. Alioze mu yisoneko yitangu ya Ngregu, yilayi ya uhwimino te keshi kuyizachisa chinji. Hachino, mutuhasa kulihula ngwetu: Shina Yesu kambile ngwenyi, “Ngunakulweze ngwami, musono yena kumukapwa hamwe ni yami mu Paraisu”? Nyi kambile ngwenyi, “Ngunakulweze musono, ngwami yena kumukapwa hamwe ni yami mu Paraisu”? Akwa-kulumbununa Mbimbiliya kakusa lutope kunyima hanji kulutwe lia liji “musono” kulita ni ulumbunwiso uze ayo anevu ha maliji a Yesu, kashika muhasa kuwana manyonga jo mu Mbimbiliya jinji musono.

18, 19. Yika yatukwasa kunyingika ulumbunwiso wa maliji a Yesu?

¹⁸ Chipwe chocho, iwuluka ngwe Yesu kalwezele tumbaji twenyi hakutwala ku kufwa chenyi. Yamba ngwenyi: “Mwana mutu kumakapwa mu fuka matangwa atatu ni ufuku  utatu.” Yawezela nawa ngwenyi: “Kumakakunjika mwe Mwana mutu ku moko ja atu; kumakamushiha, mba ha tangwa liamuchitatu kumakahinduka.” (Mateu 12:40; 16:21; 17:22, 23; Marku 10:34) Postolo Petulu kasolwele ngwenyi yino yalingiwile. (Yilinga 10:39, 40) Kashika, Yesu ni chingulungulu yoze afwile nenyi kakayile mu Paraisu ha tangwa lizeliene. Mbimbiliya yinambe ngwo, Yesu kapwile “kuma kwa afu” ha matangwa atatu ndo haze Zambi amuhindwishile.— Yilinga 2:31, 32. * (Tala maliji mushi lia lifwo.)

¹⁹ Muze Yesu ambile ngwenyi, “Pundu ngunakulweze musono” te kanatongola chilakenyo chenyi kuli chingulungulu. Atu anji che te akuhanjika chipwe ha matangwa ja Mose. Ha shimbu limwe Mose yamba ngwenyi: “Maliji ano, ngunanwambe musono, akapwe mu mbunge jenu.”—Shimbi Yamuchiali 6:6; 7:11; 8:1, 19; 30:15.

20. Yika yinakwase ulumbunwiso wetu ha maliji waze Yesu ambile?

²⁰ Umwe mukwa-kulumbununa Mbimbiliya wa ku Chivumbuko * yamba ngwenyi: “Ushindakenyo ha chisoneko chino uli ha liji ‘musono’ nawa katamba kuchitanga ngwo, ‘Pundu ngunakulweze musono, kumukapwa hamwe ni yami mu Paraisu.’ Chilakenyo  chino kachilingile ha tangwa liacho alioze te muchimanunuka kulutwe.” Iye yamba nawa ngwenyi, chino che te akuhanjika atu ku yihela yacho nawa chinasolola ngwo, “chilakenyo kachilinga ha tangwa limwe nawa te manunga ni kuchifunga.” Kashika Mbimbiliya ya siríaco yize alingile ha sekulu yamuchitano, yinalumbununa versu yino ngwo: “Amene, ngunakulweze musono ngwami kumukapwa hamwe ni yami mu Munda wa Endene.” Tulieswe mutuhasa kuwana utakamiso ha chilakenyo chino.

21. Yika yize kuyakalingiwile kuli chingulungulu, nawa mumu liaka?

²¹ Muze Yesu ahanjikile ni chingulungulu hakutwala ku Paraisu, iye te kasolo kuhanjika hakutwala ku paraisu ya mu malilu. Kuchi tunachinyingika? Shindakenyo yimwe yili ngwo, chingulungulu wacho kakanyingikine ngwo Yesu kalinga usendo ni apostolo jenyi ashishika hanga aye ni kuyula hamwe nenyi mu malilu. (Luka 22:29) Chikwo nawa, chingulungulu wacho te hi wakupapachisa ko. (Yoano 3:3-6, 12) Kashika muze Yesu alingile chilakenyo chino kuli chingulungulu, kota te kanahanjikila paraisu hano hashi. Hakupalika cha miaka, postolo Paulu yahanjika hakutwala ku usolwelo wa umwe lunga yoze ‘apindumwine mwilu mu paraisu.’ (2 A-Korindu 12:1-4) Chipwe ngwe Paulu ni apostolo akwo kaasakwile hanga aye mu malilu ni kuyula hamwe ni Yesu, nihindu Paulu te kanahanjika hakutwala ku paraisu ya kulutwe lia matangwa. * (Tala maliji mushi lia lifwo.) Shina paraisu muyikapwa hano hashi? Shina mukapwamo?

22, 23. Yika muhasa kushimbwila kulutwe lia matangwa?

²² Iwuluka ngwe Ndawichi kahanjikile hakutwala ku limwe shimbu muze ambile ngwenyi, “akwa ululi kumazuka chifuchi.” (Samu 37:29; 2 Petulu 3:13) Ndawichi katongwele shimbu lize atu eswe hano hashi te makaula shimbi jingunu ja Zambi. Uprofeto wa Izaia 65:22 unambe ngwo: “Matangwa ja atu jami makapwa ngwe matangwa ja mitondo.” Chino chinalumbunuka ngwo atu waze makawayila Yehova mu chifuchi chaha makatwama tununu a tununu twa miaka. Shina unashimbwila chifuchi chacho? Ewa, mumu kulita ni mukanda wa Usolwelo 21:1-4, Zambi makawahisa atu, ha yiwape yacho ‘kufwa kuchichi kapwako nawa.’

²³ Yize Mbimbiliya yakulongesa hakutwala ku Paraisu yili zwalala. Alama ni Eva katokesele uhashi wo wa kutwama mu Paraisu ku miaka ya mutolo, chipwe chocho hashi muhakapwa nawa paraisu. Ngwe chize Zambi hanalakenya, iye makawahisa atu hano hashi. Ndawichi kambile ngwenyi, yimbovu ni akwa-ululi makahinga hashi nawa makatwamaho ku miaka ya mutolo. Nawa uprofeto uli mu mukanda wa Izaia unatukwase hanga tushimbwile tangwa lize mutukawahilila ni mwono mu paraisu yipema hano hashi. Mba tangwa lika muyikeza? Muze muyikeza chilakenyo cha Yesu kuli chingulungulu muchikamanunuka. Nyi wasa tachi ni yena muhasa kupwa mu Paraisu yacho. Ha shimbu liacho, maliji ambile mandumbu ni mapangi ha kukunguluka cha mambonge mu Corea ngwo, “Mutukaliwana mu Paraisu!” makamanunuka pundu.