1. Mu Mbimbiliya liji mbolo yika linalumbunuka?

 KU MASHIMBU akunyima, mbolo yapwile kulia chize atu eswe te akulia. (Uputu. 14:18; Luka 4:4) Kwamba umwenemwene, “mbolo” japwile ni ulemu unji, kashika ha mashimbu amwe muze Mbimbiliya yakutongola mbolo, yakuhanjika ha kulia cheswacho. (Mateu 6:11; Yili. 20:7 nota ya estudo) Yikomokeso yaali ya Yesu yize twanyingika chinji kayilingile ni mbolo. (Mateu 16:9, 10) Chimwe cha ku chikomokeso chacho chili mu Yoano kapitulu 6. Mutulilongesa lusango wacho ni kumona malongeso waze mutuhasa kwandaho musono.

2. Ha shimbu lika tununu twa atu afupiwile kulia?

² Muze apostolo ja Yesu te hafuna mu wenyi uze ayile ni kwambujola, Yesu yaya no mu wato ku sali likwo lia kalunga-lwiji wa Ngalileya hanga ahwime. (Marku 6:7, 30-32; Luka 9:10) Ayo kayile mu yimwe mbonge yize te avuluka ngwo Mbeteseta, ku chimwe chihela kwaukawo kuze kwakapwile zungo. Alioze, tununu twa atu yevwa ngwo, Yesu ku Mbeteseta ali, chocho yaya hanga amumone. Muze Yesu aamwene, iye kakaalengulwile. Shimbu aalengulule, yaasolwela keke, chocho yasa mashimbu hanga aalongese hakutwala ku Wanangana wa Zambi ni kuwuka waze apwile ni misongo yeka ni yeka. Muze te kunayi ni kutoka, tumbaji yaputuka kulihulumba chinji hakutwala ku chize te atu jacho mawana yuma ya kulia. Atu amwe hakachi ko kota kapwile ni chimwe kulia, alioze anji a kuli ayo te mafupa kuya mu chihunda hanga alande kulia. (Mateu 14:15; Yoa. 6:4, 5) Mba kuchi Yesu te mahwisa kapinda wacho?

CHIKOMOKESO CHA KWOKESA MBOLO

3. Yika Yesu alwezele apostolo jenyi hanga alingile mbunga? (Tala nawa chizulie ha chifukilo.)

³ Yesu yalweza apostolo ngwenyi: “Ayo katambile kuya kwo, ehenu yimwe hanga alie.” (Mateu 14:16) Chino te chinasoloka  ngwe kuchichi kuhasa kulingiwa, mumu ha chihela chacho hapwile malunga 5,000. Mba nyi mutwalula mapwo ni twanuke, muchihasa kupwa ngwe hapwile unji wa atu 15,000 waze te anafupiwa kulia. (Mateu 14:21) Kashika Andeleu ambile ngwenyi: “Tuli hano ni umwe kanuke wa lunga yoze uli ni mbolo jitano ja tiliku ni tuyishi twaali. Alioze, chipwe chocho kuyichi kukumbana kuli atu apwahaha.” (Yoa. 6:9) Mbolo ja tiliku je te atu akulia chinji, chikwo nawa, tuyishi twacho kota twapwile twomu nawa twamungwa. Chipwe chocho, unji wa mbolo ni yishi waze kanuke wacho apwile no te kuyichi kukumbana atu jacho.

4. Malongeso aka twawana ha Yoano 6:11-13? (Tala nawa yizulie.)

⁴ Yesu yazanga kuhana kulia kuli mbunga yacho, chocho yeta kuli eswe hanga atwame ha yambu. (Marku 6:39, 40; tanga Yoano 6:11-13.) Hanyima lia yino, Mbimbiliya yakwamba ngwo, iye yalemba kuli Tato hanga awahise mbolo ni yishi jacho. Te chinalite lume kusakwilila Zambi mumu iye mwe wapwile chishina cha kulia chacho. Yize Yesu alingile yili chilweza chipema kuli yetu, hita shimbu tunambe kulia muchilita kulemba kuli Yehova. Chino mutuhasa kuchilinga chipwe ngwe tuli ukawetu hanji tuli mukachi ka atu. Hanyima lia kulemba, Yesu yahana kulia chacho, chocho atu eswe yalia yakuta. Hanyima lia chino, yikusala kulia chikwo nawa. Alioze Yesu kakazangile hanga apihise kulia chize chasalileho. Chocho yeta kuli tumbaji twenyi akunge kulia cheswe hanga akachilie ha mashimbu akwo. Chino nawa chili chilweza chipema kuli yetu. Kutwatambile kupihisa chuma nichimwe. Twatamba kusolola mana ha yuma yize tuli nayo. Nyi uli chisemi, longesa ana je lusango yono hanga anyingike ulemu wa kulemba  shimbu kanda achilia, ni kupwa yihanyi ngwe Yesu.

5. Yika atu ambile kulinga kuli Yesu, mba yika iye alingile?

⁵ Ha chisuho chacho, atu kanakakomoka ha malongeso a Yesu ni ha yikomokeso yize alingile. Ha kupalika cha miaka yinji kunyima, Mose kambile ngwenyi, Zambi te matuhwisa mukachi ko profeta munene, atu jacho te kanachinyingika. Kashika ayo kota kalihulile ngwo, ‘Shina Yesu mwe profeta wacho?’ (Shimbi 18:15-18) Kota kanyongene ngwo, Yesu mapwa nguvulu mupema chinji, mumu te mapwa ni uhashi wa kuhana kulia ku vungu lieswe. Hachino, atu jacho yaputuka kufupa Yesu hanga “amupwise mwanangana.” (Yoa. 6:14, 15) Nyi Yesu katayijile chikuma chacho, kachi iye kalinjishile mu yuma ya mafwefwe ya A-Yunda waze te akuyula kuli A-Roma. Alioze kakazangile kulinjisa mu yuma yacho. Mbimbiliya yakwamba ngwo, iye ‘kakatukile ni kuya ku mulundu.’ Hachino, chipwe ngwe Yesu kapwile ni kumushinjila hanga alinjise mu yuma ya mafwefwe, nihindu yalituna. Hano hali longeso linene kuli yetu.

6. Kuchi mutuhasa kwimbulula chilweza cha Yesu? (Tala nawa chizulie.)

⁶ Musono, kukushi mutu niumwe yoze matwita hanga tulinge chikomokeso cha kwokesa mbolo hanji kuuka mieji. Chikwo nawa, kukushi niumwe yoze matushinjila hanga tupwe mianangana. Alioze, amwe hanji mahasa kutushinjila hanga tusakule nguvulu wa chifuchi hanji tukwase umwe yoze kulita ni kunyonga cho, mahasa kupwa nguvulu mupema. Alioze chilweza cha Yesu chili zwalala. Iye kalitunyine  kulinjisa mu yuma ya mafwefwe ni kwamba ngwenyi: “Wanangana wami hi wa hano hashi ko.” (Yoa. 17:14; 18:36) Yetu Akwa-Kristu tunafupiwa kunyonga ni kulinga yuma ngwe Yesu. Kashika twakukwasa wika Wanangana wa Zambi. Unguvulu wacho we twakuya ni kwambujola kuli atu nawa we twakwita mu yilemba yetu. (Mateu 6:10) Alioze, mutumona nawa yize mutuhasa kulilongesa ha lusango wa Yesu wa kwokesa mbolo.

‘ULUMBUNWISO WA MBOLO’

7. Yika Yesu alingile, mba yika apostolo alingile? (Yoano 6:16-20)

⁷ Hanyima lia Yesu kulisa mbunga yinene ya atu, iye yalweza apostolo jenyi hanga ahiluke ku Kafwanaume mu wato. Alioze, iye yaya ukawenyi ku mulundu. Hachino, yahasa kulihandununa ni atu waze afupile kumupwisa mwanangana. (Tanga Yoano 6:16-20.) Muze apostolo te anazauka kalunga-lwiji, yikuputuka umwe kangonga yoze wapwile ni tachi jinji ni kuneha mikanya yinene-yinene. Hachino, Yesu yenda helu lia meya ni kuya ndo kuze apwile apostolo. Iye yasanyika postolo Petulu hanga neye ende helu lia meya. (Mateu 14:22-31) Muze Yesu anjilile mu wato, kangonga wacho yahwa. Tumbaji yakomoka chinji ha kuchimona, yamba ngwo: “Pundu lume yena uli Mwana wa Zambi.” a (Mateu 14:33) Chili kukomoka ha kunyingika ngwo, tumbaji kambile chocho hanyima lia kumona ngwo Yesu kenda helu lia meya ni muze alingile chikomokeso cha kwokesa mbolo. Talenu chimwe chikuma chilemu chize Marku asonekene mu mukanda wenyi. Yamba ngwenyi: ‘[Apostolo] alishimwokene chinji, mumu chikomokeso cha mbolo te kanda chichaalumbunuka. Chikwo nawa, mbunge jo te jinachikale.’ (Marku 6:50-52) Tumbaji te kanda achinyingika ndundo jinji jize Yehova ahanyine kuli Yesu hanga alinge yikomokeso. Alioze ha kupalika cha amwe mashimbu, Yesu yahanjika nawa ha chikomokeso cha mbolo; yize iye ambile yinatwehe limwe longeso lilemu.

8-9. Mumu liaka mbunga ya atu yayile ndo ku Kafwanaume ni kufupa Yesu? (Yoano 6:16-20)

⁸ Mbunga ya atu yize Yesu alishile, kalihulikilile wika ha kulia cha ku musunya ni ha yize te anazange. Mumu liaka tunambe chocho? Tunambe chocho, mumu ha tangwa lize liahachileho, Yesu ni apostolo jenyi yaya ko. Hachino, mbunga yakwata mato waze te anakatuka ku Tiperia ni kuya ku Kafwanaume hanga awane Yesu. (Yoa. 6:22-24) Shina ayo kayileko hanga evwe sango hakutwala ku Wanangana? Ka. Ayo kayileko hanga Yesu aehe mbolo alie ni kukuta. Kuchi tunachinyingika?

⁹ Talenu yize yalingiwileko muze Yesu aliwanyine ni mbunga hakamwihi ni Kafwanaume. Yesu yamba pundu ngwenyi, atu jacho kazangile kuya kuli iye mumu lia kwaha mbolo. Yesu yalumbununa pundu ngwenyi, ‘ayo kalile mbolo ni kukuta.’ Hanyima yamba ngwenyi ‘mbolo jacho japwile kulia chize chakupola.’ Mba yaakolweza hanga akalakalile “kulia chize kuchishi kupola cha mwono wa mutolo.” (Tanga Yoano 6:26, 27.) Yesu yamba ngwenyi, kulia chacho te muchikatuka kuli Tato. Achinyongenu chize tumbaji alivwile ha kunyingika ngwo te malia kulia chize muchaaha mwono wa mutolo! Kulia chika chenacho, mba kuchi o te mahasa kuchiwana?

10. Yika atu atambile kulinga hanga azuke “mwono wa mutolo”?

¹⁰ Chinasoloka ngwe A-Yunda jacho kanyingikine ngwo, mba azuke kulia chacho, ayo te kanafupiwa kulinga chimwe. Ayo kota kapwile ni kunyonga ha milimo yize te shimbi ya Mose yakwita. Alioze Yesu yaalweza ngwenyi: “Mulimo wa Zambi uli uno, fulielenu hali yoze iye atumine.” (Yoa. 6:28, 29) Chino hi chisuho chitangu  ko chize Yesu ambile ngwenyi, mba ayo apwe ni “mwono wa mutolo” te katamba kufuliela muli yoze Zambi atumine. Kwamba umwenemwene, Yesu te hanahanjika kulu ha chikuma chacho. (Yoa. 3:16-18, 36) Ha chisuho chikwo, Yesu yahanjika nawa ha yize o te atamba kulinga mba azuke mwono wa mutolo. —Yoa. 17:3.

11. Yika yinasolola pundu ngwo A-Yunda kapwile ni kulihulumba wika ha kulia cha ku musunya? (Samu 78:24, 25)

¹¹ Yika atu jacho atambile kulinga mba azuke mwono wa mutolo? A-Yunda jacho te keshi kutayiza ngwo, muchilita kufuliela muli Yesu. Kashika ahulile Yesu ngwo: “Chilayi chika mulinga hanga tumone, mba tufuliele muli yena?” (Yoa. 6:30) Hanyima ayo yamba ngwo, ha matangwa ja Mose kupalikila mu chikomokeso, tulamba two katambwile manaa yize yapwile ngwe mbolo hanji ngwetu kulia cho cha tangwa ha tangwa. (Nehe. 9:15; tanga Samu 78:24, 25.) Chino chinasolola pundu ngwo, ayo kapwile ni kufupa wika kulia cha ku musunya. Kashika muze Yesu ahanjikile no hakutwala ku “mbolo yamwenemwene ya mwilu,” yinalise ni manaa yize te muyaaha mwono wa mutulo, ayo kakamuhulile nawa ulumbunwiso wayo. (Yoa. 6:32) Ayo kapwile ni kulihulumba chinji ha yize te anafupiwa ku musunya, kashika kakahashile kunyingika umwenemwene ulemu uze te Yesu anaalongesa. Longeso lika mutuhasa kuwana ha lusango yono?

YIKA YATAMBA KUPWA NI ULEMU UNJI KULI YETU?

12. Kulita ni yize Yesu alongesele, yika yatamba kupwa ni ulemu unji ku mwono wetu?

¹² Longeso twawana ha Yoano kapitulu 6 lili ngwo, yuma yize tunafupu ku spiritu yatamba kupwa yilemu chinji ku mwono wetu. Yino ye Yesu alongesele nawa muze amwesekele kuli Satana. Ha mashimbu jacho, iye yasolola ngwenyi, kwononokena Yehova chili chilemu chinji kuhiana kukuchisa usolo wenyi wa ku musunya. (Mateu 4:3, 4) Chikwo nawa, ha Longeso lienyi lia ha Mulundu, iye yalongesa ulemu wa kufunga kanawa kulia chetu cha ku spiritu. (Mateu 5:3) Kashika muchilita kulihula ngwo, ‘Shina mwono wami wakusolola ngwo usepa wami ni Yehova uli ulemu chinji kuhiana yuma yize nakuzanga?’

13. (a) Mumu liaka hi chipi ko kulia? (b) Utowezo uka Paulu atuhele? (1 A-Korindu 10:6, 7, 11)

¹³ Hi chipi ko kwita mu yilemba yuma yize tunafupu ku musunya ni kuwahilila ni yuma yacho. (Luka 11:3) Mbimbiliya yakwamba ngwo, chili chipema “kulia ni kunwa” ni kulivwisa kuwaha ha mulimo uze twakulinga, mumu ‘yinakatuka ku kwoko lia Zambi wamwenemwene.’ (Chilu. 2:24; 8:15; Tia. 1:17) Alioze, twatamba kukeya hanga yuma yize tunafupu ku musunya yihone kupwa ha chihela chitangu ku mwono wetu. Mutuhasa kulilongesa ha yize Paulu asonekenene Akwa-Kristu mu Korindu. Iye kasolwele yuma yimwe yize yalingiwile ku vungu lia Izalele, kuchingako ni yize ayo alingile muze apwile hakamwihi ni Mulundu wa Sinai. Hanyima, iye yahana umwe utowezo ngwenyi: Kutwatambile “kuzanga yuma yipi ngwe chize ayo ayizangile.” (Tanga 1 A-Korindu 10:6, 7, 11.) Yehova kalingile chikomokeso hanga ahane kulia kuli A-Izalele. Alioze, zango lio hakutwala ku kulia liokele chinji, chocho chino yichaapinjisa. (Kwa. 11:4-6, 31-34) Chikwo nawa, muze o apwile ni kuwayila mwana ngombe wa oru, kasolwele pundu ngwo, te kakulihulumba wika hakutwala ku kulia, kunwa ni kuheha kuhiana kwononokena Yehova. (Kutuhu. 32:4-6) Kupalikila mu chilweza chino, Paulu yatoweza Akwa-Kristu waze apwile ha mashimbu jacho ngwo, te kwasala hakehe Yerusaleme ni tembele ayinongese. Ni yetu nawa tuli kusongo lia yuma ya mwakono. Kashika twatamba kusa shindakenyo ha yiyulo ya Paulu ni kusa tachi hanga tuhone kuholokela mu muheto uze A-Izalele aholokelele.

14. Yika Mbimbiliya yakwamba hakutwala ku kulia chize mutukapwa nacho mu chifuchi chaha?

 ¹⁴ Muze Yesu ahanjikile ha ‘kulia chetu cha ha tangwa,’ iye kambile nawa ngwo, muchilita kulemba hanga upale wa Zambi “ulingiwe hano hashi, ngwe chizechene unalingiwa mu malilu.” (Mateu 6:9-11) Shina unahase kunyonga chize hano hashi muhakapwa muze Zambi makakumbulula kulemba chino? Mbimbiliya yakwamba ngwo, upale wa Zambi hano hashi unatale nawa ha kwokesa kulia. Mukanda wa Izaia 25:6-8 wakusolola ngwo, mu Wanangana wa Zambi atu makapwa ni kulia chinji chiyema. Mukanda wa Samu 72:16 unalakenya ngwo: ‘Hashi heswe muhakapwa kulia chakulumbama ndo ni helu lia milundu.’ Shina kuwevwile kuwaha ha kunyingika ngwo, mukateleka kulia chize wakuzanga hanji kulia chize kanda uchilia kama? Chikwo nawa, kanda uvulama ngwe mukalima minda ya uva ni kulia mihuko yamo. (Iza. 65:21, 22) Atu eswe waze makapwa hano hashi makayuka ni yuma yino yipema.

15. Yika makalilongesa atu waze makahindwisa? (Yoano 6:35)

¹⁵ Tanga Yoano 6:35. Tunyongenu nawa hali atu waze alile mbolo ni yishi waze Yesu okosele mu chikomokeso. Ha mashimbu jacho, ayo kakafulielele muli Yesu. Chipwe chocho, ha uhindukilo uze muukalingiwa kulutwe hanji yena mukanyingika amwe a kuli ayo. Ayo hanji makaahindwisa chipwe ngwe kakafulielele muli Yesu. (Yoa. 5:28, 29) Atu jacho makanyingika ulumbunwiso uze Yesu aalwezele muze ambile ngwenyi: “Yami nguli mbolo ya mwono. Yoze meza kuli yami, kechi keza kevwa nawa zala nilimwe tangwa.” Ayo makafupiwa kufuliela mu chitapo cha Yesu. Makafupiwa nawa kufuliela ngwo, Yesu kahanyine mwono wenyi hanga alamwine atu eswe. Ha mashimbu jacho, atu eswe waze makahindwisa ni waze makasemukina mu chifuchi chaha, makaalongesa yuma ya ku ufulielo. Mutukawahilila chinji ha kukwasa atu kulilongesa yuma yino yipema hakutwala ku upale wa Yehova. Kulinga chino muchikayema chinji kuhiana kulia cha ku musunya. Chochene yuma ya ku ufulielo, muyikapwa ni ulemu unji ku mwono wetu.

16. Yika mutulilongesa ha mutwe uze muuhataho?

¹⁶ Ha mutwe uno, twalilongesaho yikuma yimwe ya lusango wa Yoano kapitulu 6, alioze Yesu kapwile ni yuma yinji yakutulongesa hakutwala ku “mwono wa mutolo.” A-Yunda waze Yesu ahanjikile no katambile kulihulikila chinji ha yize te analweze, ni yetu che twatamba kulinga. Kashika, ha mutwe uze muuhataho, mutununga ni kuhengwola mu yimako-yimako kapitulu 6 wa mukanda wa Yoano.