MUTWE WA KULILONGESA 51
MWASO 3 Tachi Jetu, Ufulielo Wetu, Ujikijilo Wetu
Yehova Kakumona Masoji Je
“Sako kama masoji jami mu mulangi we. Te mu mukanda we keshimo, nyi?”—SAMU 56:8.
YIZE MUTULILONGESA
Mutumona ngwetu, Yehova kakunyingika chize twakulivwa muze tunapalika mu kapinda nawa kakututakamisa.
1-2. Yuma yika muyihasa kutulilisa?
HA MASHIMBU amwe, yetu eswe twakulila. Twakulila muze kwakulingiwa yuma yimwe yize yakutuvwisa chiseke. Yena hanji walilile muze kwalingiwile chimwe chuma chilemu ku mwono we. Ngwe chilweza, muze mwane asemukine, muze weulukile chimwe chuma chipema hanji muze watambwishile sepa lie yoze te kunushi kulimona ha miaka yinji.
2 Alioze kanji-kanji, twakulila mumu lia lamba lize twakumona. Ngwe chilweza, mutuhasa kulila muze umwe yoze twajikijila matulinga yuma yipi. Mutuhasa kulila mumu lia kupwa ni umwe musongo, hanji muze mutufwisa mutu yoze twazanga. Ha yikuma ngwe yino, mutuhasa kulivwa ngwe chize alivwile profeta Jeremia muze Yerusaleme ayikumbile kuli A-Babilonia. Iye yamba ngwenyi: ‘Meso jami kanalili mihwiji ya masoji . . . Meso jami kanalila chakuhona kulitwamina, chakuhona kuhwima.’—Lungu. 3:48, 49.
3. Kuchi Yehova akulivwa muze tuvumbi twenyi akumona lamba? (Izaia 63:9)
3 Yehova kananyingika yisuho yize twakulila mumu lia lamba lize twakumona. Mbimbiliya yakutwaha shindakenyo ngwo, Yehova kananyingika yuma yeswe yize tuvumbi twenyi akupalika; nawa kakutwivwa muze tunalila hanga tumwite ukwaso. (Samu 34:15) Alioze Yehova kakulinga yuma yinji hi wika ko kutupanjika. Ngwe chizechene apwa umwe tata wa zango, Yehova kakwivwa chinyengo muze akutumona mutulila, nawa kakuzanga chinji kutukwasa.—Tanga Izaia 63:9.
4. Yilweza yika ya mu Mbimbiliya mutulilongesa, nawa yika mutulilongesa hali Yehova?
4 Kupalikila mu Liji lienyi, Yehova kanatulweza chize iye alivwile muze tuvumbi twenyi alilile ni chize aakwashile. Ngwe chilweza, mutuhasa kulilongesa ha yize yalingiwile kuli Hana, Ndawichi ni Mwanangana Hezekia. Mumu liaka o alilile? Kuchi Yehova akumbulwile muteto wa kwita cho? Kuchi chilweza cho muchihasa kututakamisa muze mutunenganyana, muze matulinga yuma yipi hanji muze mutuhona kutalatala?
YEHOVA KAKUMONA MUZE WAKULILA MUMU LIA KUFWISA MUTU YOZE WAZANGA
5. Kuchi Hana alivwile ha yize te anapalika?
5 Hana kapalikile mu yipikalo yinji yize yamulilishile. Lunga lienyi kapwile ni pwo mukwo yoze te avuluka ngwo Penina. Penina te keshi kuzanga Hana. Kuchizako yino, Hana kapwile mumba, alioze Penina kapwile ni ana anji. (1 Samue. 1:1, 2) Mashimbu eswe, Penina te kakukekuna Hana mumu lia kupwa mumba. Nyi yena, kachi kuchi walivwile? Hana kanenganyanyine chinji, chocho ‘walilile chakuhona kulia’ ni ‘kulifwita chikolo’ mu mbunge.—1 Samue. 1:6, 7, 10.
6. Yika Hana alingile mba awane utakamiso?
6 Kuchi Hana awanyine utakamiso? Chuma chamukwashile chapwile kuya ni kuwayila Yehova ku tabernakulu. Koko, kota ku chimwe chihela hakamwihi ni unjililo wa yiize ya tabernakulu, ‘iye yaputuka kulemba kuli Yehova ni kulila chikolo.’ Yaliumba kuli Yehova ngwenyi: ‘Talenu kama ku luyinda wa yami kavumbi kenu, nukangwiuluke.’ (1 Samue. 1:10b, 11) Hana kalwezele Yehova chize te analivu kupalikila mu yilemba. Muze Yehova amwene Hana kanalili, neye yanenganyana chinji mumu te kakumuzanga.
7. Kuchi Hana alivwile hanyima lia kulweza Yehova kapinda wenyi?
7 Hanyima lia Hana kulweza Yehova chize apwile ni kulivwa, Mwata wa asasendote Eli, yamulweza ngwenyi, Yehova kumakumbulula yilemba yenyi. Kuchi Hana alivwile? Mbimbiliya yinambe ngwo: “Chocho pwo yaya kwenyi, yalia, mba kapwile nawa ni chinyengo ku meso.” (1 Samue. 1:17, 18) Chipwe ngwe kapinda wa Hana kakahwile ha shimbu lizeliene, nihindu kalivwile kanawa. Iye kakunjikile yipikalo yenyi yeswe kuli Yehova. Chocho Yehova yamona kulifwita chenyi, yevwa kulila chenyi, mba yamukwasa kupwa ni ana.—1 Samue. 1:19, 20; 2:21.
8-9. Kulita ni A-Hepreu 10:24, 25, mumu liaka twatamba kulinga yeswayo mutuhasa hanga tupwe ha kukunguluka? (Tala nawa chizulie.)
8 Yika twalilongesa? Yena hanji unapalika mu yipikalo yize yinakuvwisa chinyengo chinji. Hanji unanenganyana ha kufwa cha umwe usoko hanji sepa. Ha mashimbu ngwe wano, hi chipi ko kuzanga kutwama ukawe. Alioze ngwe chizechene Hana awanyine utakamiso ha kuya ku tabernakulu, ni yena muhasa kuwana utakamiso ha kuya ni kukunguluka chipwe ngwe kuushi kulivwa kanawa. (Tanga A-Hepreu 10:24, 25.) Ha kukunguluka twakwivwaho versu ja mu Mbimbiliya jize jakututakamisa. Yino yili jila yipema yize Yehova akutukwashilamo hanga tweche kunyonga ha yuma yize yakutuvwisa chinyengo. Chino chakutukwasa kulivwa kanawa ku manyonga chipwe ngwe kapinda wetu kechi kuhwa ha shimbu lizeliene.
9 Ha kukunguluka, mandumbu jetu kakututakamisa ni kusolola ngwo kakutuzanga, nawa twakulivwa kanawa kupwa hamwe no. (1 Tesa. 5:11, 14) Tutalenu yize yalingiwile kuli umwe pionelu walipwila muze mukwo-pwo afwile. Iye yamba ngwenyi: “Ha mashimbu amwe, nakuzanga kutwama ukawami, mumu chishi kuhasa kulitwamina kulila. Alioze muze nakuya ku kukunguluka, nakutambula utakamiso uze ngunafupu. Maliji a zango waze mandumbu akungulweza ni makumbululo waze akuhana ha kukunguluka kakungutakamisa. Chipwe ngwe nakusakalala ni kulipikala shimbu kanda nguchiya ku kukunguluka, nihindu nakulivwa kanawa muze nakupwaho.” Muze twakupwa ha kukunguluka, Yehova kakututakamisa kupalikila muli mandumbu jetu.
Mutuhasa kutambula utakamiso kuli mandumbu jetu a ku ufulielo (Tala maparagrafu 8-9)
10. Kuchi mutuhasa kwimbulula Hana muze tunanenganyana?
10 Hana kawanyine nawa utakamiso ha kulemba kuli Yehova ni kumulweza chize apwile ni kulivwa. Ni yena muhasa ‘kumbila yipikalo ye kuli Yehova’ ni kupwa ni shindakenyo ngwe iye mapanjika kulemba che ni kukukwasa. (1 Petu. 5:7) Umwe ndumbu yoze lunga lienyi amushihile kuli eji, yamba ngwenyi: “Nevwile yikola yinji ku mbunge ni kunyonga ngwami, chichi keza kawahilila nawa. Alioze muze napwile ni kulemba kuli Yehova, te nakuwana utakamiso. Ha mashimbu amwe, chakapwile ni kuhasa kulweza Yehova chize ngunalivu, chipwe chocho iye te kakungupanjika. Muze napwile ni kulipikala chinji, te nakulemba kuli Yehova, chino te chakungukwasa kupwa ni sambukila ya ku mbunge.” Muze twakulweza Yehova yize yinatupikala, neye kakunenganyana ni kunyingika yikola yize tunevu. Chipwe ngwe kapinda we manunga, nihindu Yehova mahasa kukuhwimisa mbunge ni kukukwasa upwe ni sambukila. (Samu 94:19; Fwili. 4:6, 7) Iye makakuwahisa mumu lia kunyongonona ni ushishiko we.—Hepre. 11:6.
YEHOVA KAKUMONA MASOJI JE MUZE AKUKULINGA YUMA YIPI
11. Kuchi Ndawichi te akulivwa muze akwo apwile ni kumulinga yuma yipi?
11 Ku mwono wenyi, Ndawichi kapalikile mu kapinda munji yoze wamulilishile. Iye kapwile ni akwa-kole anji. Chipwe lume amwe a kuli masepa ni asoko jenyi, kakashishikile kuli iye, nawa kamulingile yuma yipi. (1 Samue. 19:10, 11; 2 Samue. 15:10-14, 30) Ha amwe mashimbu akalu chinji ku mwono wenyi, Ndawichi yasoneka ngwenyi: “Yikatalo ngunevu ya mikuma yami. Ufuku weswe nakuulisa muhela wami ni masoji. Nakuhinjila muu wami ni masoji jami.” Mumu liaka Ndawichi alivwile chocho? Mwene yalumbununa ngwenyi: “Ha mukunda wa akwa kole jami.” (Samu 6:6, 7) Muze akwo apwile ni kumulinga yuma yipi, Ndawichi te kakunenganyana ni kulila chinji.
12. Kulita ni Samu 56:8, shindakenyo yika Ndawichi apwile nayo?
12 Chipwe ngwe Ndawichi kapalikile mu yipikalo yinji, nihindu kapwile ni shindakenyo ngwenyi, Yehova kakumuzanga. Iye yasoneka ngwenyi: “Yehova hanevu liji lia kulila chami.” (Samu 6:8) Ha chisuho chikwo, iye yasoneka maliji apema waze tunawane ha Samu 56:8. (Tanga.) Maliji jacho kanasolola ngwo, Yehova kakutuzanga chinji nawa kakulihulumba ha chize twakulivwa. Ndawichi kambile ngwenyi, chapwile ngwe Yehova kanakungu masoji jenyi mu umwe mulangi, hanji kwasoneka mu umwe mukanda. Ndawichi kapwile ni shindakenyo ngwenyi, Yehova kamwene lamba lienyi ni kuliewuluka. Iye kapwile nawa ni shindakenyo ngwenyi, Yehova kakanyingikine wika yize apwile ni kupalika, alioze ni chize yuma yacho yakwachile ku mwono wenyi.
13. Yika twatamba kwiuluka nyi amwe matulinga yuma yipi? (Tala nawa chizulie.)
13 Yika twalilongesa? Shina unevu yikola ku mbunge mumu lia yuma yipi yize akulingile kuli mutu yoze te wakujikijila? Kota unanenganyana mumu usendo hanji ulo we wafwa, hanji mutu yoze wazanga kecha kuwayila Yehova. Umwe ndumbu yoze mukwo-pwo walingile utanji ni kumuhichika, yamba ngwenyi: “Chakahashile kutayiza ngwami, yuma yacho yinalingiwa kuli yami. Nanenganyanyine ni kwivwa uli, ni kulimona ngwe chishi ni ulemu.” Nyi unapalika mu yuma ngwe yino, muhasa kutakama ha kunyingika ngwe, Yehova kechi keza kakwehuka. Ndumbu yamba nawa ngwenyi: “Usendo wa ana ja atu muuhasa kuhwa, alioze ni Yehova kuushi kuhwa. Chipwe ngwe mukulingiwa chuma cheswacho, Yehova kwali hamwe ni yetu. Kechi keza kahichika atu waze akushishika kuli iye.” (Samu 37:28) Iwuluka nawa ngwe, zango lia Yehova linahiane lia mutu mweswawo. Nyi matulinga yuma yipi kuli mutu yoze twakuzanga hanji yoze twakujikijila, chino chakutuvwisa yikola yinji. Alioze Yehova kalumwine chize akwivwa hali yena. Kuli iye, yena uli mulemu chinji. (Roma 8:38, 39) Chuma twatamba kwiuluka chili chino: Chipwe ngwe matulinga yuma yipi kuli mutu mweswawo, nihindu Tata yetu wa mu malilu kakutuzanga.
Mukanda wa Masamu unatwehe shindakenyo ngwetu, Yehova kali hehi ni waze amakuka mbunge (Tala paragrafu 13)
14. Shindakenyo yika twakuwana ha Samu 34:18?
14 Nyi umwe kakashishikile kuli yena, maliji a Ndawichi ali ha Samu 34:18, mahasa kukutakamisa. (Tanga.) Umwe mukanda unambe ngwo, maliji “spiritu ya kupihilila” mahasa kutala hali “atu waze keshi ni kutalatala nichimwe cha chuma chipema.” Kuchi Yehova akukwasa atu waze akulivwa chocho? Ngwe chizechene umwe tata wa zango akukangayika mwanenyi yoze unalila ni kumutakamisa, “Yehova katwama hehi” ni yetu. Muze twakwivwa yikola mumu lia yize umwe atulinga, Yehova neye kakwivwa yikola yacho ni kutukwasa. Iye kanazange chinji kututakamisa muze tuli ni spiritu yakupihilila ni kulivwa ngwe kutushi ulemu. Chikwo nawa, Yehova kakutwaha yuma yinji yipema yize yakutukwasa kukumba yeseko yize tunapalika.—Iza. 65:17.
YEHOVA KAKUMONA MASOJI JE MUZE WAKULILA MUMU LIA UMWE MUSONGO
15. Yika yatwalile Hezekia kunenganyana chinji ni kulila?
15 Muze apwile ni miaka 39, Mwanangana Hezekia yayiza chinji. Profeta Izaia, yalumbununa sango jize atambwile kuli Yehova ngwenyi, Hezekia te mafwa mumu lia musongo wenyi. (2 Mia. 20:1) Chasolokele ngwe Hezekia kakapwile ni kutalatala nichimwe. Muze Hezekia evwile sango jacho, iye yanenganyana chinji ni kulila. Chocho yalemba kuli Yehova ni kumwita ukwaso.—2 Mia. 20:2, 3.
16. Yika Yehova alingilile Hezekia?
16 Muze Yehova avwile kulemba cha Hezekia ni kumona masoji jenyi, yamuvwila keke ni kumulweza ngwenyi: “Hinevwa kulemba che, hinamona masoji je, mungukuwuka.” Kupalikila muli Izaia, ni keke yeswe, Yehova yalakenya kwokesa matangwa a mwono wa Hezekia ni kupulwila A-Izalele ku moko ja Asuria.—2 Mia. 20:4-6.
17. Kuchi Yehova akutukwasa muze tunapinji ni umwe musongo? (Samu 41:3) (Tala nawa chizulie.)
17 Yika twalilongesa? Shina unapinji ni umwe musongo uze unasoloka ngwe kuushi kuya? Nyi chenacho, lweza Yehova chize unalivu. Iye makupanjika chipwe ngwe mulila muze unalembe kuli iye. Mbimbiliya yinatulakenya ngwo, “Tata ya keke, kanda Zambi ya utakamiso,” matutakamisa mu lamba lietu lieswe. (2 Kori. 1:3, 4) Musono kutushi kushimbwila ngwetu, Yehova mahwisa yipikalo yetu yeswe, alioze mutuhasa kumujikijila ngwetu matukwasa. (Tanga Samu 41:3.) Kupalikila mu spiritu yisandu, Yehova kakutwaha tachi, mana ni sambukila ya ku mbunge, yize yakutukwasa kunyongonona. (Yishi. 18:14; Fwili. 4:13) Iye nawa kakututakamisa ha kutwaha kutalatala chakuhwisa misongo yeswe kulutwe lia matangwa.—Iza. 33:24.
Yehova makumbulula yilemba yetu ni kutwaha tachi, mana ni sambukila ya ku mbunge (Tala paragrafu 17)
18. Chisoneko chika chakukutakamisa muze unapalika mu yipikalo? (Tala mushete, “ Maliji a Utakamiso Waze Matukwasa Kukusumuna Masoji.”)
18 Hezekia kawanyine utakamiso ha maliji ja Yehova. Ni yetu nawa mutuhasa kuwana utakamiso mu Liji lia Zambi. Yehova kasele maliji apema mu Mbimbiliya waze mahasa kutusangulwisa muze tunapalika mu yipikalo. (Roma 15:4) Umwe ndumbu wa pwo mu África Ocidental, yoze awanyine ni musongo wa cancer te kakulila mashimbu eswe. Mwene yamba ngwenyi: “Chisoneko chize chakungutakamisa chili Izaia 26:3. Chipwe ngwe kutuchi kuhasa kuhwisa kapinda wetu, nihindu chisoneko chino chakungwaha shindakenyo ngwo, Yehova mahasa kutwaha sambukila ya ku mbunge yize muyitukwasa kukumba kapinda yoze tuli nenyi.” Shina ukwete chimwe chisoneko chize chakukutakamisa muze unapalika mu yipikalo hanji muze unahono kutalatala ha yize unapalika?
19. Yika tunashimbwila kulutwe lia matangwa?
19 Amu songo lia chifuchi chino linakundama, mutushimbwila kupalika mu yuma yinji yikalu yize muyitutwala hanga tulile. Alioze ngwe chize twamona ha chilweza cha Hana, Ndawichi ni Mwanangana Hezekia, Yehova kakumona masoji jetu, nawa kakunenganyana chinji. Yehova kakutuzanga mumu lia kununga ni kushishika kuli iye chipwe ngwe twakumona lamba, nawa kakwiuluka masoji jetu. Kashika muze mutupalika mu yuma yize muyituvwisa chinyengo, tulembenu kuli Yehova ni mbunge yetu yeswe. Kanda tulihandununa ni mandumbu jetu mu chikungulwila mumu o kakutuzanga. Chikwo nawa, nyi twanunga ni kutanga Mbimbiliya mututambula utakamiso wa Yehova. Nyi twanunga ni kunyongonona ni ushishiko weswe, mutuhasa kupwa ni shindakenyo ngwetu Yehova makatuwahisa. Chino chinachingi kutukusumuna masoji waze twakutuhwisa mumu lia yuma yipi yize yakulingiwa ku mwono wetu. (Uso. 21:4) Hanyima lia yino, mutukalila wika mumu lia chiseke.
MWASO 4 “Yehova Iye Kafunga Kami”
