MUTWE WA KULILONGESA 50
MWASO 135 Kuliumba cha Zambi: “Mwanami, Pwako ni Mana”
Yisemi—Kwasenu Ana Jenu Hanga Ajame ku Ufulielo
“Nukahase kusa chinyingi yenwene ha upale ungunu wa Zambi.”—ROMA 12:2.
YIZE MUTULILONGESA
Mutumona yiyulo yimwe yize muyihasa kukwasa yisemi muze mahanjika ni ana jo hakutwala kuli Yehova ni Mbimbiliya ni kwakwasa hanga akolese ufulielo wo.
1-2. Yika yisemi atamba kulinga muze ana jo maahula hakutwala ku yize twafuliela?
ATU anji kananyingika ngwo kulela ana hi chashi ko. Kashika nyi uli chisemi, tunakuchichimieka ha tachi jize wakusa hanga ukwase ana je apwe ni ufulielo ukolo. (Shimbi 6:6, 7) Ha kupalika cha mashimbu, ana je mahasa kuputuka kukakajana hakutwala ku yize twafuliela ni ha yize Mbimbiliya yakwamba hakutwala ku chipi ni chipema.
2 Ku uputukilo, yena muhasa kunyonga ngwe ana je keshi ni ufulielo ukolo muli Zambi ni ha yize Mbimbiliya yakwamba. Muchihasa kusoloka ngwe, shimbu mwane asenye kulutwe ku ufulielo iye kanafuna kunyima. Alioze kwamba pundu, mba mwane apwe ni shindakenyo ha yize afuliela, iye katamba kuhula. (1 Kori. 13:11) Kashika kanda ulipikala. Ha chikuma ngwe chino, yena muhasa kukwasa mwane hanga alulieke uhashi wenyi wa kunyonga kanawa.
3. Yika mutumona ha mutwe uno?
3 Ha mutwe uno, mutumonaho chize yisemi mahasa kukwasa ana jo (1) apwe ni ufulielo ukolo muli Zambi ni ha Mbimbiliya, (2) alemese yize Mbimbiliya yakwamba hakutwala ku chipi ni chipema, ni (3) akalile yize afuliela. Mutumona nawa mumu liaka chili chilemu ana kuhula yisemi jo ni yize yisemi mahasa kulinga hanga apwe ni uhashi wa kuhanjika ni ana jo hakutwala ku yize twafuliela.
KWASA ANA JE APWE NI UFULIELO UKOLO MULI ZAMBI NI HA MBIMBILIYA
4. Yihula yika ana je mahasa kulihula, mumu liaka?
4 Kwasa ana je apwe ni ufulielo ukolo muli Zambi ni ha Mbimbiliya. Ngwe chizechene yena kuwakasemukine ni ufulielo muli Zambi, ni ana je kakasemukine ni ufulielo muli Zambi. Kashika chili chilemu kwiuluka ngwe, ufulielo hi chuma ko chize tata akupalikisa kuli ana jenyi. Hachino, mwane hanji malihula ngwenyi: ‘Kuchi munguhasa kupwa ni shindakenyo ngwami, Zambi kwatwama? Shina munguhasa kutayiza lume yize Mbimbiliya yakwamba?’ Hi chipi ko kulihula chocho. Kwamba pundu, Mbimbiliya yakutukolweza hanga tukalakalise uhashi wetu wa kunyonga ni ‘kusa shindakenyo ha yuma yeswe.’ (Roma 12:1; 1 Tesa. 5:21) Mba kuchi muhasa kukwasa ana je akolese ufulielo wo?
5. Yika yisemi mahasa kulinga hanga akwase ana jo akolese ufulielo wo ha yize Mbimbiliya yakwamba? (A-Roma 12:2)
5 Kolweza ana je hanga awane yuma yize yakusolola ngwo Mbimbiliya yili yamwenemwene. (Tanga A-Roma 12:2.) Muze ana je makuhula yimwe, fupa uhashi wa kwalongesa chize mahasa kuwana kumbululo kupalikila mu mikanda yetu. Ngwe chilweza, muhasa kwakwasa ahengwole mu mikanda ni mu yinema yetu hanga apwe ni shindakenyo ngwo, Mbimbiliya hi wika ko mukanda uze asonekene kuli atu. Alioze uli “liji lia Zambi.” (1 Tesa. 2:13) Ayo mahasa kuhengwola hakutwala ku mbonge ya Ninive. Kunyima, atu amwe waze te keshi kufuliela mu Mbimbiliya kapwile ni kwamba ngwo, Ninive kuyakapwileko. Alioze ha miaka 1850, akwa-kuhengwola yawana yikulu ya mbonge yino ni kusolola ngwo, yize Mbimbiliya yakwamba yalita. (Zefa. 2:13-15) Nyi ana je mahengwola chikuma, “Unachinyingika Nyi?” mu Kaposhi wa Kutalila wa Novembro 2021, ayo mamona chize unongeso wa mbonge ya Ninive wamanunwine uprofeto wa mu Mbimbiliya. Kolweza ana je atese yize akulilongesa mu mikanda yetu ni yize akulilongesa mu mikanda yikwo ya shindakenyo. Kulinga chino, muchaakwasa apwe ni shindakenyo ngwo, yize Mbimbiliya yakwamba yili yamwenemwene.
6. Kuchi yisemi mahasa kukwasa ana jo hanga akalakalise uhashi wo wa kunyonga? Hana chilweza. (Tala nawa chizulie.)
6 Kolweza ana je hanga akalakalise uhashi wo wa kunyonga. Fupa uhashi wa kuhanjika ni ana je hakutwala ku chikuma cha kufuliela muli Zambi ni mu Mbimbiliya. Muhasa kuchilinga ha kwatwala hanga ameneke muzeu hanji Mbetele. Muze munuya ni kumeneka muzeu hanji kuutala ha TV, munuhasa kukwasa ana jenu amone chize chuma chimwe hanji lusango wa yize yalingiwile kunyima, yinasolola ngwo Mbimbiliya yili yamwenemwene. Ngwe chilweza, shina ana je kananyingika ngwo, jina lia Zambi liakusoloka ha limwe liwe awanyine hikwapalika miaka 3,000 lize avuluka ngwo liwe lia Moape? Liwe lino lili mu Museu wa Louvre mu Paris, França. Kuchizako yino, ha chihanda cha muzeu chize chakusolola “Mbimbiliya ni Jina lia Zambi” ku chishina chinene cha Yela ja Yehova ku Warwick, Nova York, muli chizulie cha liwe lia Moape. Sango jikwo jize jakusoloka ha liwe liacho, jili ja Mesha Mwanangana wa Moape yoze walimikine ni Izalele. Sango jacho jili mu Mbimbiliya. (2 Mia. 3:4, 5) Nyi ana je malimwena ni meso jo chize sango ja mu Mbimbiliya jili jamwenemwene nawa jalita, muchaakwasa akolese ufulielo wo.—Tala nawa 2 Sango ja Mianangana 9:6.
Kwasa ana je akalakalise uhashi wo wa kunyonga ha kwasolwela yuma yize yili mu mizeu (Tala paragrafu 6)
7-8. (a) Yika mutuhasa kulilongesa ha upeme ni ha chize yitangiwa yili yakululieka? Hana chilweza. (Tala nawa yizulie.) (b) Yihula yika muyihasa kukwasa ana jenu akolese ufulielo wo muli Sakatanga?
7 Kolweza ana je apukune ha yitangiwa. Muze nunayi ni kwendangana mu chimwe chihela hanji mu umwe munda upema, kwasa ana je hanga amone yuma yakukomwesa yize yakusoloka ku yitangiwa. Mumu liaka? Mumu chino muchaakwasa kumona ngwo kuli umwe mukwa-mana yoze wayitangile. Ngwe chilweza, yitangiwa yinji yize yalivunga, akwa-mana kakuyihengwola ha miaka yinji. Nicola Fameli, umwe mukwa-kuhengwola yitangiwa, kanalumbununa ngwenyi, nyi muhengwola kwalula chize chili ku chimwe chitangiwa chalivunga, mumona ngwe kwalula chacho cheswe chinakaula shimbi yimuwika. Kwalula chacho kakuchivuluka ngwo, fibonachi. Shimbi ya kulivunga chacho mutuhasa kuyimona ku yuma yinji, ngwe kukujinguluka cha chizavu cha tutongonoshi, kole a mu kalunga-lwiji, ku mafwo ni ku utolo. a
8 Ku shikola, ana jenu hanji malilongesa nawa hakutwala ku shimbi jikwo, jize jakusoloka chinji ku yitangiwa. Ngwe chilweza, mitondo yinji yakukaula shimbi yimuwika. Chishina chakusa mitango, mba mitango muyisa mitango-ni-yikwo ni mafwo. Shimbi yino kakuyivuluka ngwo fractal. Shimbi yino mutuhasa kuyiwana nawa ku yitangiwa yikwo. Mba iya watangile shimbi jino jakusongwela yuma mu jila yipema? Iya waluliekele yuma yino twakumona ku yitangiwa? Nyi ana jenu manyonga ha yihula ngwe yino, chino muchaakwasa kupwa ni shindakenyo ni kufuliela ngwo, Yehova mwe watangile yuma yeswe. (Hepre. 3:4) Muze ana jenu anayi ni kukola, munuhasa kwakwasa hanga amone ulemu wa kwononokena shimbi ja Yehova. Mba nuchilinge, munuhasa kwahula ngwo: “Nyi Zambi mwe watutangile, shina iye keshi ni ulite wa kutulweza yize twatamba kulinga mba tuwahilile?” Munuhasa nawa kwalumbunwina ngwo, Zambi katuhele Mbimbiliya hanga yitukwase kupwa ni uwahililo.
NASA, ESA, and the Hubble Heritage (STScl/AURA)-ESA/Hubble Collaboration
Iya wasele shimbi mu yuma yipema yize twakumona ha yitangiwa? (Tala maparagrafu 7-8)
KWASA ANA JE HANGA ALEMESE SHIMBI JA MU MBIMBILIYA
9. Mumu liaka ana je mahasa kuyambashana hakutwala ku ulemu wa kukaula shimbi ja mu Mbimbiliya?
9 Nyi ana je maputuka kuyambashana hakutwala ku ulemu wa kukaula shimbi ja mu Mbimbiliya, fupa kunyingika mumu liaka anayambashana ha chikuma chacho. Shina chamwenemwene ayo keshi kutayiza yize Mbimbiliya yakwamba nyi kanyingikine wika kulumbununa yize afuliela? Kwasa ana je anyingike mumu liaka chili chilemu kukaula shimbi ja Yehova. Muhasa kuchilinga ha kulilongesa no mukanda, Wahilila ku Mwono ku Miaka Yeswe! b
10. Yika muyihasa kukwasa ana je amone Yehova ngwe sepa lio?
10 Kwasa ana je alemese usepa wo ni Yehova. Muze mwalongesa Mbimbiliya, kaula yihula ni yilweza yize yili mu mukanda, Wahilila ku Mwono ku Miaka Yeswe! hanga unyingike yize ana je akunyonga hakutwala ku yikuma yimwe. (Yishi. 20:5) Ngwe chilweza, ha longeso 8 lia mukanda uno, Yehova kakumutesa ni sepa wamwenemwene yoze wakutwiulula yuma hanga atukwase ni kutufunga. Hanyima lia kutanga 1 Yoano 5:3, muhasa kwahula ngwe: “Nyi Yehova kali Sepa mupema, yika twatamba kulinga muze matwita hanga tulinge chimwe chuma?” Chihula chino muchihasa kusoloka ngwe kuchishi ni ulemu, alioze muchikwasa ana je kunyingika ngwo, Yehova katuhele shimbi mumu kakutuzanga.—Iza. 48:17, 18.
11. Kuchi muhasa kukwasa ana je alemese shimbi ja mu Mbimbiliya? (Yishima 2:10, 11)
11 Hanjikenu ha yiwape yize yakwiza ha kukaula shimbi ja mu Mbimbiliya. Muze nunatange Mbimbiliya hanji chisoneko cha ha tangwa, shimutwinenu ha chize shimbi ja mu Mbimbiliya jinakwase usoko wenu. Ngwe chilweza, shina ana jenu kananyingika ulemu wa kupwa yikilikita ni kuhanjika umwenemwene? (Hepre. 13:18) Shina ana jenu kananyingika ngwo, shimbi ja mu Mbimbiliya jakutukwasa kuwahilila ni kupwa ni mwono upema? (Yishi. 14:29, 30) Kuhanjika ni ana jenu ha yikuma ngwe yino, muchaakwasa kulemesa shimbi ja mu Mbimbiliya.—Tanga Yishima 2:10, 11.
12. Kuchi chisemi umwe akukwasa mwanenyi kukaula shimbi ja mu Mbimbiliya?
12 Steve, umwe ndumbu mu França, kanalumbununa chize iye ni mukwo-pwo akukwasa mwano Ethan kunyingika ngwo, Yehova kakutwaha shimbi mumu kakutuzanga. Yamba ngwenyi: “Twakumuhula ngwetu, ‘Mumu liaka Yehova anazange hanga tukaule shimbi yino? Kuchi shimbi yino yinasolola ngwo iye kakutuzanga? Yika te muyilingiwa kuli yena nyi wecha kukaula shimbi yino?’” Kuhanjika yikuma yino ni Ethan, chamukwashile kunyingika ngwenyi Yehova kakutwaha shimbi jenyi hanga jitukwase. Steve yamba nawa ngwenyi: “Nyonga lietu lili kukwasa Ethan hanga amone ngwo, mana a mu Mbimbiliya kahiana mana ja atu.”
13. Kuchi yisemi mahasa kufumba ana jo hanga akaule shimbi ja mu Mbimbiliya? Hana chilweza.
13 Fumbenu ana jenu apwe ni kukaula shimbi ja mu Mbimbiliya. Jila yimwe ya kuchilingila yili muze shikola yakwita kuli alongi hanga atange umwe mukanda ngwe chihanda cha mulimo wa ku shikola. Mikanda yacho muyihasa kusolola ngwo, muchilita kwimbulula atu a yitanga yipi waze anatongolamo. Yenu munuhasa kukolweza ana jenu anyonge ha yize Yehova akwamba hali atu waze akulinga yuma ya mutapu au. (Yishi. 22:24, 25; 1 Kori. 15:33; Fwili. 4:8) Hachino, ana jenu mamona ngwo kwononokena Yehova chili kusolola mana. Chikwo nawa, nyi longeshi hanji alongi-ni-akwo maeta hanga asolole nyonga lio hakutwala ku mukanda wacho, ayo mahasa kuhanjika ha yize afuliela.
LONGESA ANA JE APWE NI KUKALILA YIZE AFULIELA
14. Chikuma chika muchihasa kupwa chikalu kuli akweze, nawa mumu liaka?
14 Ha mashimbu amwe, akweze kakwivwa woma wa kukalila yize afuliela. Ngwe chilweza, ayo hanji kakwivwa woma wakulumbununa mumu liaka keshi kutayiza longeso liakwamba ngwo, yuma yalitangile yene. Mumu liaka? Muchihasa kupwa ngwe alongeshi kakwamba ngwo, longeso liacho lili liamwenemwene. Nyi uli chisemi, kuchi muhasa kukwasa ana je apwe ni shindakenyo ngwo, yuma yize afuliela yili yamwenemwene?
15. Yika muyihasa kukwasa mukweze Mukwa-Kristu kujikijila chinji ha yize afuliela?
15 Kwasenu ana jenu ajikijile chinji ha yize afuliela. Ana jenu katambile kwivwa sonyi mumu lia kufuliela muli Sakatanga. (2 Timo. 1:8) Mumu liaka tunambe chocho? Mumu kuli akwa-mana anji waze akutayiza ngwo mwono kautangile. Muze o akuhengwola ha chize mwono wapwa kakumona ngwo kuli umwe mukwa-mana yoze wautangile. Hachino, ayo keshi kutayiza longeso liakwamba ngwo, yuma yalitangile yene lize akulongesa ku mashikola anji. Chuma chikwo chize muchikwasa ana jenu kukolesa ufulielo wo, chili kunyingika yize yakwashile mandumbu akwo kupwa ni shindakenyo ngwo, mwono kautangile. c
16. Kuchi yisemi mahasa kukwasa ana jo apwe ni uhashi wakulumbununa mumu liaka akufuliela muli Sakatanga? (1 Petulu 3:15) (Tala nawa chizulie.)
16 Kwasenu ana jenu hanga apwe ni uhashi wakulumbununa mumu liaka akufuliela muli Sakatanga. (Tanga 1 Petulu 3:15.) Hanji muchipema kulilongesa yikuma yili mu site yetu jw.org yinambe ngwo, yuma kayitangile nyi yalitangile yene? Kulinga chino, muchikwasa mwane kusakula yikuma yize mamona ngwe muyikwasa akwo kunyingika ngwo, kuli umwe Sakatanga. Mukwase hanga anyingike chize malumbununa yikuma yacho kuli akwo ku shikola. Mukolweze hanga alumbunune yikuma yacho mu jila yalita nawa yashi muze umwe mazanga kuhanjika nenyi. Ngwe chilweza, umwe wa kuli alongi-ni-akwo mahasa kwamba ngwenyi: “Yami nakutayiza wika yuma yize nakumona, Zambi kanda nguchimumona kama.” Mwanenu mahasa kumukumbulula ngwenyi: “Uchinyonga ngwe unende mu umwe mushitu, mba mumona limwe shima lia meya liakutunga kanawa ni mawe. Kuchi munyonga? Kwamba pundu, munyonga ngwe umwe walitungile. Mba nyi chuma chamutapu au chili ni yoze wachilingile, kuchi mutwamba ha malilu ni hashi?”
Lumbununa yuma mu jila yashi muze muhanjika ni alongi-ni-akwenu (Tala maparagrafu 16-17) d
17. Kuchi yisemi mahasa kukolweza ana jo hanga afupe uhashi wa kuhanjika ni akwo hakutwala ku Mbimbiliya?
17 Kolwezenu ana jenu afupe uhashi wa kuhanjika ni akwo hakutwala ku Mbimbiliya. (Roma 10:10) Mutuhasa kwamba ngwetu, kuhanjika ni akwetu hakutwala ku Mbimbiliya chili ngwe tachi jize kanuke akusa hanga aputuke kwenda. Ku uputukilo, iye kakutatangiya, mba ha kupalika cha mashimbu maputuka kwenda kanawa. Chizechene nawa, mukweze Mukwa-Kristu mahasa kuputuka kulweza akwo yize afuliela ha kuhanjika ha yikuma yikehe-yikehe. Ngwe chilweza, iye mahasa kuhula longi-ni-mukwo ngwenyi: “Shina unanyingika ngwe akwa-mana anji kakwimbulula yitangiwa ha yize akulinga? Mana ngukusolwele chimwe chinema chipema chinji.” Hanyima lia kumusolwela chinema chinambe ngwo, Shina Umwe Wayitangile?, iye mahasa kwamba ngwenyi: “Nyi akwa-mana kakwachichimieka mumu lia yize akulinga, iya unatela uchichimieko ha yitangiwa?” Chino muchihasa kukwasa longi-ni-mukwo azange kulilongesa yuma yinji.
NUNGA NI KUKWASA ANA JE AKOLESE UFULIELO WO
18. Kuchi yisemi mahasa kununga ni kukwasa ana jo hanga akolese ufulielo wo muli Zambi?
18 Twatwama mu chifuchi muze munazale too ni atu waze keshi kufuliela muli Yehova. (2 Petu. 3:3) Kashika yisemi, muze munulilongesa ni ana jenu, shindakenyenu ha yikuma yize muyokesa zango lio ha Mbimbiliya ni ha shimbi ja Yehova. Hanjikenu hakutwala ku yuma yipema yize twakumona ku yitangiwa ni kwakwasa akalakalise kanawa uhashi wo wakunyonga. Akwasenu anyingike uprofeto wa mu Mbimbiliya uze hiunamanunuka. Chahiana ulemu, lembenu hamuwika ni ana jenu ni kwalembela nawa. Nyi nwachilinga, munuhasa kupwa ni shindakenyo ngwenu, Yehova mawahisa tachi jize nunase hanga nukwase ana jenu akole ku ufulielo.—2 Sango 15:7.
MWASO 133 Wayilenu Yehova ha Matangwa a Ukweze
a Nyi muzanga kunyingika sango jikwo tala chinema, As maravilhas da criação revelam a glória de Deus—Padrões ha site jw.org.
b Nyi ana je hahwisa kulilongesa mukanda, Wahilila ku Mwono ku Miaka Yeswe!, muhasa ku kukulula yikuma yimwe mu longeso 3 ni 4, waze akuhanjika ha shimbi ja mu Mbimbiliya.
c Tala chikuma, “Por que acreditamos num Criador” Laulenu!, wa Setembro, 2006 ni A origem da vida—Cinco perguntas que merecem resposta. Mba uwane sango jikwo, tala yinema A Origem da Vida: Teorias e Fatos.
d ULUMBUNWISO WA CHIZULIE: Mukweze Chela cha Yehova kanasolola chinema kuli longi-ni-mukwo chinambe ngwo, “Shina Kuli Umwe Wayitangile?”
